"أثر الهناء حلم يا حمد"

البارت العاشر

قامت حصه ترقص وزينه ودلال حوالينها يرقصون وهيا قامت ترقص مع امها وشوي قامت عذبه وساره يرقصون حوالينهم بعد والكل منهار على جمال بنات الطايل-
هيا:يابعد راسي يا ام العريس عاااششت امي عاشتت
عذبه وهي ترقص بنعومه وتضحك:اي والله عشتي يمه
الطقاقة:عشتتتو عشتو...-طاحت عينها على ساره وغنت فيها وقالت-
لما بدت ساره كأنه هل البدر في نصف الشهر
من قدها وجه الضيا من قدها غصن الزهر
في ليلة أفراح الطايل به الفرح طاب السهر
عاشو...  في حسنها والحسن قطرة من بحر
عاشششو بنات الطايلل على قلبي يا البيج
ساره قامت ترقص بشعرها: يابععد قلوب بنات الطايل
هيا: مافيه شوط للعريس ولا لاخوات العريس؟؟ لالالا مستحيل
الطقاقه:ابششششري بسعدتس يلا يا بناتتت يلااا
عرس فلاح يطرب البالي
وعرس فلاح يطرب الباااااااالي
والجمعه فيه فزوله
مرحبا ياللي لنا عاني
ومرحبا ياللي لنا عانننني
الجده منيره قامت ترقص بيدها وترحب بالناس وهي تشل الصوت:اي والله يا مرحبا باللي لنا عاننني يا مرحبا
كملت الطقاقه:
حط فوق الراس ماجوبه
لابني عمي وشجاعني
عاشششششت ام سيف عاشتتتت
وبيوتهم للعز منصوبه
وبيوتهم للعز منصوووووووبه
-تحمسو البنات وقامو يرقصون مع امهاتهم والجده منيره والعقد فوقهم والغيوم فوق الكل وريحة العوده بكل الديرة والضحكات ترتفع وتنتشر والتصفيق واصوات التعزيز والفرحه منتشر بالمكان مع انتشار ريحة العوده وساره تشيك على العشاء شوي اللي قد اعتزى فيها ابوها واتكل عليها تسوي عشاء عرس ولد عمها وتممت له بكل حب وشوي ترجع ترقص والكل منبهر بها وبما إن تركي رجال وقد كلمته علم أخته بالموضوع اللي ما كان له بهالدنيا غير أخته وأبوه وعمه عمومًا علم أخته وكانت أنظار فوز على ساره طول الوقت وتحاول تتفحصها زين وهل تناسب تركي أو لا وتأكدت من بعد الزواج أن ساره أنسب بنت بالعالم لتركي مابتحصل اطيب وازين منها وقررت تكلم زينه اثناء العرس-
زينة:والله يافوز مثلتس عارف الكلمة عند الرجال حنا مالنا شيء بكلم ابوها واعلمه والله يكتب اللي فيه الخير
فوز: ما بنلقى ازين من ساره لتركي ياخالتي ولو الوالدة حيه والله ان تشهد لكم بعد مير شوفي وردي لنا زين؟
زينه: زين زين الله يقربنا كلنا من عيال الحلال -جلست تتأمل بنتها ساره شلون كبرت وصارو الخطابة فيها وهي للحين تشوفها صغيره-
-عند العيال كانت اصوات العرضه ترتفع مع احياء ذكرى ال سعود ومجد السعودية ونجد العذيه والسيوف ترقى للسماء وتنزل الارض بحدة وقوة وعيال أبو متعب محيين الليل بالكرم والطرب والتراحيب وعيال عبدالرحمن وابو فلاح بعد ولكن بصمة عيال سيف كانت بارزة وبيّنه لأنهم عيال الديرة والتربية ثمرت فيهم فعلاً..بدأ الليل يزين وبدأت فقرة الطرب الحقيقية وهي السامري اللي كانو يتقنونها سعود وحمد بشكل عجيب ويطلعون ثنائي مميز في الحفل وما ودك الا انك تطالعهم وتنبسط من الطرب وبدو يجلسون في صفين ويشلون الاصوات وتعتلي بالاغاني والتعزيز وسعود وحمد بالنص يلعبون بالاكتاف ويتمايلون مع دقة السامري المميزة في الديرة-
ابو فلاح بهمس:وين القهوة يا ولد؟
رايد التفت واخذها فرصة:سم ياعم
ابو فلاح:سم الله عدوك لاهنت
رايد:مبروك ما سويتو لفلاح الله يوفقه ويبني بيته
ابو فلاح:الله يبارك فيك والعقبى لك ... -ناظره فايز شوي ثم قال- جعل ابوك بالجنه
رايد وهو كاتم غضبه وحقده على فايز:امين .. امين جزاك الله خير و الله يقربنا من النسب الطيب شرواك
-ابو فلاح ابتسم وسكت لأن في عينه بناته صغار ولاهم حول زواج وما كان يؤمن بفكرة إن البنت تخلص الثانوية وتتزوج على طول لذلك قصر الموضوع رغم انه فهم نية رايد-
رايد في نفسه: (والله ان تطيع وتوافق وتطمع فيني بعد بس هيييين منيب ولد ضاري ان ماخليتك توافق و الايام بيننا)
عذاري وقفت على سور الاستراحة وشافت رقص سعود وحمد وقالت بصوت مسموع للي حولها:يازيننننن اللي يرقصص
عذبه التفتت وقالت للهنوف:من تناظر ذي؟تكفين شوفي لاتقصد حمد ابقوم اذبحها
الهنوف قامت وقالت لعذاري:تقصدين حمد؟
عذاري وهي طايحه بالغرام:ايييه
الهنوف:عاد تدرين قبل نطلع الاستراحة قال ان لعبت علمو عذبه تشوفني تراني اتعنى لها ليته يدري انتس انتي اللي شفتيه
عذاري بقهر وغبنه:شمعنى عذبه؟
الهنوف:مادريتتتتي؟ نبي نزوج عذبه لحمد
-عذاري جلست مكانها ولا عاد انسمع لها حس وكانت الغيرة تاكل قلبها أكل وتخز عذبه بحقد ولا عرفت وش تسوي غير انها تناظر عذبه وتحاول تشوف وش شاف فيها حمد عشان يحبها ويتركها !-
الهنوف همست في اذن عذبه:خذيت حقتس وافي
عذبه ناظرت الهنوف و تحاول تفهم
الهنوف:علمتها انتس حبيبة حمد وتبون تعرسون بعد وهذا هي هجدت مكانها
عذبه بثقة:كان قلتي وزوجته مستقبلاً بعد عشان تفقد الأمل مره وحده
الهنوف:اي وانا وش قايله يا الفاهيه؟؟ لعنبو هالحب صرتو بقر ماتفهمون بسبته الله يعافينا ويكفينا بس
بدور:عزتي لسعود يرقص ومحد يحبه
الجازي:هذي شغلتك انتي هههههههههههههههههه
الهنوف:هههههههههههههههههههه اي والله اللي يسمعها يقول مب هي الي فضحتنا بالصياح في الظهر
مزون:قومو حضرو العشاء قضت ساره منه
هيا اللي كانت يدها على يد ساره ويتعاونون بالعشاء قالت:ساره
ساره وهي تشيل المفطح:سمي
هيا:عادي تعرسين بالعمر ذا؟
ساره ناظرتها:هو؟ شالطاري؟
هيا:ابد بس انشدتس
ساره:هيا خلي عنتس الهذره وتعالي شليه معي بيجي متعب الحين يشيل عشاء الرجال واحنا باقي ماجهزناه
هيا:ساره بصارحتس احس ودي اعرس بمتعب هالحين بس ابوي ما يوافق يقول حنا صغار وانا من بعد العرس وعقب ماشفت هالبنات الحلوات بالديرة اخاف خالتي تخطب له منهم
ساره ناظرت ورا هيا وضحكت: مصارحتس ماكانت لي لحالي للأسف
متعب تنحنح :العشاء يا ساره
هيا شهقت ورجعت داخل الاستراحة..
متعب:هههههههههههههههههههههههههههههههههههه البنت ذي بتطير عقلي مهب صاحيه
ساره:متعب حرام علييييك بيزر عقلها منك دوم تطلع لها وتروعها
متعب:شسويت انا يا عيون اخوتس؟ جاي اخذ العشاء هي اللي تهذر بس علميها مابخلي امي تخطب لي ولو كثر زينهم
طارق جاء:متعب عمي يقول وين العشاء؟؟-دخلت ساره تجهز الصحن الثاني وعطته مزون تطلعه-
متعب شال صحن وراح: الحقني بالثاني وتعال
-مزون جت وطلعت الصحن وهي مدنقه واول ما رفعت راسها طاحت عينها بعين طارق وعاشو لحظات تأمل بين بعض هي كانت تتأمل رزته في عرس اخوه وريحة عطره اللي انتشرت بينهم وثقله ونظراته وثوبه الأبيض وغترته البيضاء وهو عيونه على جمال مزون ويتأمل بياضها اللي برزه فستانها الأحمر وشاف مزون بمنظر غير اللي شافه في العزبه وماقدر يتخطى شعرها وانوثتها وبالقوة قدر يصد وما نطق بكلمة وحده ولاحتى ابتسم بس شال الصحن ولحق متعب وهي كان قلبها بيطلع من مكانه واختبصت وانحاست ورجعت تسوي انها طبيعيه وتكمل شغل مع بنات خوالها-
حصه دخلت عليهم المطبخ:تجهزو يا بنات بعد العشاء بتجي رغد
ساره:ما بغتتتتتتت مره متحممممسه ابي اشوفها
عذبه:تهبل تهبللل بس حتى انا متحمسه لطلتها كعروس
هيا:شدعوه مزون مب متحمسه؟
مزون:هاه؟ لوش؟
ساره:رغد بتجي بعد العشاء يلا يلا امشو
هيا كلمت مزون بعد ماطلعو البنات:علامتس؟
مزون:مافيني شيء انتي اللي شفيك؟
هيا:يووووههه يوووهه جاني اللي ما يسر عدوي تكفين
مزون:هوو!!شصاير؟
هيا:متعب درا بي يوووه شلون انام هالحين
مزون:دا بويش؟؟
هيا:اختس المخديه فلتت لسانها قدام متعب وسمعني اني احبه وابي اعرس به تخيلي!!
مزون ضحكت: هههههههههههههههههههه خوفتيني احسب صار شيء هالديرة كلها والرياض والشرقية بعد تدري بكم من يومنا هالطول ومتعب لهيا وهيا لمتعب وش الجديد
هيا:ياويلي عن روحي اقولتس سمعني سمعني لو نمزح كان عادي بس هالمره سمعني صدق وعاد مستحيه منه مره اخاف ينقدني ويكنسل يقول وش هالخفيفه مدري مدري
مزون: شدعوووه شدعوه هيونننن! مب عادتك واذا درا متعب؟اصلاً هو يموت بطوايف اهلك بعد البلاء باخوك انتي
هيا:طارق؟شمسوي التيس الاربد؟لاتقولين زعلتس؟ قسم بالله لا احوسه حوسسسس قولي بس
مزون:ههههههههههههههههههههههههههههههههههه لا بس بنشدتس
هيا:سمي
مزون:هو علامه كذا؟يعني كل عيال خوالي يهبلون الا هو حتى ابتسامه مايبتسم ماندري وش اللي يعجبه
هيا:تراه حليّل بس جاف شوي لكن قلبه ابيييييييض لايغرتس بس مثل ماتقولين له عالمه ماهو يمنا ولا يداني الديرة ابد وتقلب شخصيته هنا ولا بالشرقيه!! حليّل
مزون:والله ما هقيته حليل على قولك بس امشي نرقص ونتعشى ونشوف هالرغد معكم
-فعلاً تعشو ورقصو وانبسطو والجده منيره وخويتها أم جابر ماقعدو والليل والعرس كان برعايتهم هم ورقصهم وقصايدهم والناس كانت منبهره بتعاون بنات الطايل اللي كأنهم كلهم من بطن واحد قومتهم وحده وقعدتهم وحده والبشاشه في وجيههم ونعومتهم وسنعهم ما كان فيهم الا الهنوف اللي ترادد وطويلة لسان شوي عمومًا جاء وقت زفة رغد اللي وصلها فلاح وهو يسمي عليها ويحصنها قبل تدخل-
فلاح:خليتس يم امي وسمي على روحتس
رغد:فلاح تراك مسمي علي اكثر من مره خلاص يبه
فلاح:احبتس رغد
رغد:وانا اموت فيك يا احلى زوج بالحياة
-حصه وهي واقفة عند باب الاستراحة وتأشر لفلاح ينزّل رغد-
فلاح:امي عصبت تبيتس ههههههههههههه يلا يلا وودعتس الرحمن ولاتاكلين الجو هاه! تراها دقايق واخذتس للفندق لاتنبسطين معهم اعرف بنات عمي بيطيرون بتس هالحين وتحبينهم
رغد:من يوم جينا الديرة وانا اناظرهم من الشباك وميته عليهم صج يهبلون كلهم خصوصًا ساره ومزون ابي اعيش وياهم من قريب والود ودي مانروح الفندق ابي اعرفهم وافطر معهم واقرب منهم تكفى فلوحي
فلاح:ويشششششش؟؟؟
رغد ببراءة:فلوحي
فلاح:اببوووو اللي ما يكتب البيت باسمتس بعد مير انزلي الحين لاتخليني اتهور
-طبعًا رغد وفلاح كانو ثنائي غريب صح فلاح من سكّان الشرقية ولكن اصله وبداوته تغلب عليه ورغد بنت مدينه وراقيه وحياتها من مطاعم لكفيهات لتماشي وسفريات بس صار بينها وبين فلاح حب وميانه وترابط عجيبببببب...رغد نزلت والتوتر ماكلها اكل خصوصًا ان العرس كان عند اهل زوجها وبدون اهلها وخطواتها ثقيلة بس البنات ما حسسوها بغياب اهلها هذي ساره تشيل طرحتها وهذي مزون تعدل فستانها وهيا تمشي قدامها وتصفق لها وعذبه ماسكه يدها وحصه وزينه والجده منيره وزينه ينتظرونها قدام وكانت رغد أجمل عروس دخلت عائلة الطايل لا من جمال ولا من ذرابه ولا من أدب ورقي حتى الطقاقات وقفو الدق ثواني منبهرين من جمال رغد اللي كان جمالها يفرق عن جمال بنات الديرة وملامحهم كاملة بس دام مزون موجوده وتعشق الرقص استلمت الطقاقات ونبهتهم يدقون من جديد-
الطقاقه:الف الصلااااة والسلام عليككك يا حبيب الله ممممحمممد
عذبه وساره وهيا: لللوووولوووولووووييييييي
الطقاقة:وومباركين عرس هالاثنين
ليلة ربيععع عين قمره
واللي جمع بين قلبين
الله يطول بعممره
-قامو البنات يرقصون قدام رغد ويعيدون ورا الطقاقة-
استرسلت الطقاقة بالاغنية:ابو العريس قرة العين
وفيّ ماقصر بنذره
صيروا يا بنيات صفين
كل وحده تلفح له مره
عاششششووو بنات الطايل يا لبييييه
ضحكت رغد بخجل وحب لبنات عم فلاح وشافت فيهم اللي ما شافته في اخواتها حتى وحبتهم مره ولكن ليلة العمر ماتتعوض وسرعان ماجاء فلاح وأخذ عروسته وراحو للفندق وكلٍ سرى لبيته وانتهى الزواج اللي كانو كلهم متحمسين له وصار مثل مايحبون وأكثر لولا غيرة عذبه من عذاري وأول ما رجعو ...هذا اللي صار-
سعود دخل البيت وشماغه على كتفه:باقي فيني طرب ودي ارقصصصص
عمر:انا سيقاني تعورني ليش زواجات الديره كذا؟؟
ركان:قاييييل لك مير ماتطعم العلم
فارس قعد بالجلسة ومدد رجلينه:هنا ماعندهم مثل زواجاتنا بالرياض المقهوجيين يشيلون العرس شيل
هزّاع:حبيبي انت القهوجي هنا اههخخخخ
حمد وهو يطق رقبه لسعود وعلى راسه طاقيته وفوقها العقال وشماغه على كتفه مثل:عاش بو سيف عاش
سعود يبادله طق الرقبه ويهز له:عشت عشت ياحميد
ركان دخل بينهم وهز كتوفه:طيب طيب طيب
متعب دخل وسكر باب البيت وراه:علامهم ذولا يرقصون سكّاتي؟زين اطربونا
-طلعو البنات من داخل البيت للحوش يوم سمعو حس العيال وهم قد بدلو ولبسو قمصان وهذي كانت من قوانين بيت سيف إن البجايم ممنوعه والبناطيل عامة-
هيا:سمعت طاري طرب
الهنوف:متعب تكفى ياخوي
متعب:جلى همتس ياعين اخوتس شبغيتي؟؟
الهنوف:خلنا نسمر بالسطح سوا وانتم اطربونا
عذبه:اي تككفففوووووونننن باقي عندنا طاقه ماشبعنا من العرس
طارق:بكفيكم انا بنام
مزون:قلعتك احنا بنستانس
فارس:حتى انا والله برقد مافيني شدة تكسرت بالعرس تكسر
الجازي:وانا بعد
عمر:رغم اني مكسر بس ماقدرر افوت الجلسة يلا يلا
متعب:دقيقة انا ماقررت؟
هيا:ماترد لنا طلب نعرفك نعرفك
حمد:جلستي زاهبه امشووو السطح بس بشويش ترا اهالينا نايمين
هزاع:انا طالع بس احس بشوية جوع
ساره:هو هزاع ماتعشيت من عشاي؟؟
بدور:اسبقونا السطح واحنا بنرقى بعدكم ونجيب معنا شاهي ونقنقه يلا
سعود بكبرياء:ماودتس ترقدين انتي بعد؟
بدور:انقلع انت يا راعي العلوم
حمد:بسسسسس بس! امشو لاتبطوووون
عذبه:هَذه والله راعي العلوم صدق-راحت-
متعب ضرب جنب حمد وانتظرهم يتوزوعون وقال:حميد لاتدور الردى في بنت عمك تراها شعرة من شنبك وشرفك وعرضك لاتغازلها قدامنا وبالطريقة ذي! تفهم الكلام ولا ماتفهمه!!!! مب عشاننا ربينا سوا تاخذ راحتك قلنا نمزح معهم ونسولف لكن بحدود لاتتمادى البنت ماتحل لك للحين
حمد: بل بل بل متعب يا ابوي شقايل انا؟اقصدهم كلهم لايبطون امش امش بس
متعب:هذا العلم وصلك واللي عندي قلته
حمد: يا رجال امش بس عذبه بين الهدب والعين ما اضرها ولا ارضى عليها الضر علامك انت!!! مثلها مثل ساره والهنوف كلهم خواتي وبعيني سوا ولاني متمادي تراني رباة سيف الطايل اعرف اللي لي والللي علي-يحاول يكتم حبه ومواقفه مع عذبه تقتصر بينهم الاثنين من دون محد يلاحظ-
متعب:هذا العشم فيك
-طلعو العيال وكان على درج السطح لمبه إضاءتها خفيفة فكانو العيال جالسين على الدرج وتحت هاللمبة وينتظرون البنات عشان يدخلون السطح سوا ومايطلع باب السطح صوت مرتين وجو البنات بطوفرية فيها شاهي مخلوط حبق ونعناع في ثلاجة لها خرطوم كبيره وفناجيل وصامولي وجبن وفصفص نوعين ومكسرات-
عمر:هلا هلا
حمد:اشششش رحب بالسطح يلا امشو
-دخلو السطح وجلسو بشكل دائرة البنات بصف والعيال بصف وبينهم شوية مساحه وبدو يحشون ويطقطقون ويغنون بشويش وكان سعود صاحب الحنجره الذهبيه وهذا اللي اخفيناه عنكم ومتعب وعمر ماكانو بعيد عنه-
هزاع:عاشششششش عاششششش-صفق صفقات سريعه ورا بعض وطربيه-
هيا:ودي يوقف العمر على هاللحظه ما ابي نكبرررر تكفون
ساره: اي والله نهبل سامرين ومروقين وتحت القمرى بعد!!
حمد:بهالمناسبة بغني لكم
بدور:وععع الا وعع لا تكفى مانبي صوتك
الهنوف:اهخخخ عسى اللي قوم حظ سعود يقوم حظي
متعب ضربها بشويش في ساقها:عادتس بزر لعد اسمعتس تقولينه
الهنوف: بلل! لايكون سعود كبر جدي؟
ركان:اي صدز تراتس من عيالي
الهنوف:انت كل تبن تراك اصغر العنقود وانا اكبر منك
حمد:اص انتم تعالي انتي-يقصد بدور-شقصدتس بصوتي؟؟؟تبين ارنتس هالحين بهالمركى؟
عذبه:ياحليله شوفو من يناقر
حمد:افااا هذا وانا اسوي اني قوي قدامتس عشان تعجبين بي
عذبه:غيري ميتٍ عليك مير خلنا ساكتين
ساره بتغير الموضوع: اقول هزاع احشي لك صاموليه ثانيه؟
هزاع:انا جايب ساره ولاحصه؟علامتس يا بنت الحلال كل ما سديت ثمي غزيتيه اكل!
هيا:هههههههههههههههههههههههههههههههههههههه هزاع ووجع البنت متجملة فيك!
هزاع:اي وانا صادق عند ربي وتقول لي صاموليه ثانيه وهي العاشره ليتني ماقلت جوعان
الهنوف:وسلال يهر بطنك قول امين هذا جازتها ماكلتك؟عطيني سوير يا روحي عليتس
متعب:ياطيب قلبتس يا ساره يارب تاخذين واحد يخليتس يا دهينه لاتنكتين
هيا:امييييين
متعب:يادبل تسبدي مانيب داعي لتس لاتتعنين اسكتي بس
هيا تذكرت موقفها وسكتت
عمر: غررررررريييبببه سكتت هيا!!
مشعل: هيا ساكته!!! خذيت لي غفوه وقمت من صدمتي!
هيا:هههههيييييييي!!!! والله ان قمت عليكم مب ازين لكم ماتبوني استحي؟
متعب: يا تسبدي يا ناااه اي وحنا وش قايلين عشان تستحين؟قاعد اسبتس
حمد:اقول هيووون يقولتس من سبك مات عليك مو بس حبك
مزون: من قدتتتتسسسسس يا هههياااااا
بدور: اففف اففففف وش هالتصريححححح
الهنوف: متعب!!!!! لاياخوي ويا قدوتي اجل توني بزر وانت طايح على وجهك!!!!
متعب انحرج:وجع وجع وجع قصرو اصواتكم لحد يسمع ويصدق اقول سعود غن
سعود: ايييي من عيوني اغني ليش لا-غمز عشان يحرجه وبدا سعود يغني وقال-
احبك حب يا مجنون ولكن مقدر احكي لك!
احبك يا بعد هالكون وروحي ماتبي غيرك
انا ياخلي اتعذب ،في بعدك عذابي شوق
ولو اني عليك اككككككذذذذبببب اسمعو اسمعو هنا
ولو اني عليك اكذب يا هيا اصير انسان فاقد ذوق
هيا:ههههههههههههههههههههههههههههههه ياويلي تراني بقوم
عمر كمل الاغنية وكانه جاز له الوضع:
احبك حب يا مجنون ولكن مقدر احكي لك!
احبك يا بعد هالكون وروحي ماتبي غيرك
ذايب بين يدينك القلب من غيرك عليه يمون!!
من يا هههييا من
"انتهى💕🫶🏻"