"أثر الهناء حلم يا حمد"

البارت التاسع والعشرين

-في الديرة وتحديداً بيت ابو متعب-
عجز سعود ينام وهو خايف من هالموضوع خايف من روحة طارق بهالهدوء ماعرف شلون يتصرف ولا وش يسوي مسك التليفون بيتصل على متعب بس ماله الا يومين متزوج تردد كثييييير وطلع الحوش يدور ويدوّر لحل ... في بيت رايد وصقر المهجور كان هناك رايد يناظر الأحداث كلها من بدايتها لحوسة سعود تأكد مثل اسمه أن فيه شيء حاصل بين عيال العم تحديدًا طارق وسعود لأنهم محتاسين وهذي فرصة لازم يستغلها ويبدأ بخطته الآن ! دام صقر بدأ بالجزء الأول منها ، طلع من البيت بخفة وراح لبيتهم
صقر وهو يناظر غرفته اللي بدت تفضى عشان الاثاث الجديد والتفت على صوت خطوات رايد وهو جاي:بدري! تو الناس
رايد بعجله وابتسامه: انا ماشي الشرقية انتبه لأمي منيب مطول
صقر قطب حواجبه وقال باستغراب: وعرسي؟
رايد:عرسك باقي له خمس ايام وازهله انا بزينه كله حتى لاتشيل هم شيء بروح الشرقيه يومين حولها وارجع
صقر تقدم لرايد ومسك ذراعه:ولد! وش ناوي عليه؟على وش هالعجله؟
رايد بضحكة: على يوم السعد .. لاتقول لامي صرف باي شيء زين؟ يلا سلاااام
-دخل غرفته ياخذ اغراضه الاساسيه وطلع مستعجل وصقر وراه يناظره وبينه وبين نفسه ما وده شيء ينكد عليه عرسه من ساره اللي مايدري ليه قلبه يحن لا صار الطاري عندها -
طلع رايد ومسك خط الشرقيه وهو ساند راسه على يده ومتكي على دريشه السياره ومبتسم لملامح خطته اللي بدأت توضح قدامه

وعند سعود بعد ما صدع من التفكير قرر انه يطلع بموتر حمد للدمام وهناك بيكلم طارق بنفسه ويحلها بنفسه مابيدخل لا متعب ولا حمد ، رفع عيونه للسماء وهو يطلب الله يطلق لسانه ويعاونه ويكون معه وده يخسر الدنيا بس مايخسر جمعة بيتهم وعيال عمه وحب حمد وعذبه ما وده اخوه يرجع ويتنكد من الاخبار الحاصله في غيابه ، طلع سعود يريح شوي قبل الصبح

- في بيت فايز-
حصه كانت جالسه على السرير وفايز مستعد للنوم:ابو فلاح
ابو فلاح ناظرها:ان كانتس بتشكين من الحال فهذاني اقولتس اقصري الشر وجهزي شناطتس نحضر عرس ساره عشان خاطر اخوي ونذلف -صد عشان ينام بس تكلمت حصه وخلته يفز لها من جديد-
حصه:ازين ما تسوي مير بغيت اقولك ان عذبه وطارق سبقونا هناك
ابو فلاح فز لحصه بتعجب:وشهههو؟؟؟؟عذبه وش تسوي بروحها في الشرقيه؟؟؟؟ وانا هنا ويش؟؟؟ورا محد شاورني قبل يطلعون؟؟؟ وهو لايكون اخذها بموتري!!!شلون نرجع حنا؟؟؟ ما تتكلمين !
حصه وبحلقها غصه من عذبه:طارق يقول يبي يسجلها بمدرسة اكاديمية عشان تدخل الجامعه وانا سمحت لهم واذا على الروحه نكلمه يرجع ياخذنا وراك!
ابو فلاح بغضب:وانتي تربطين وتفكين من راستس؟؟؟ ماقلتي وراي رجل انشده؟؟ وش هالمدرسة هالحين والدنيا اجازه!!!! ووشلون يرجع لنا وعذبه لحالها بالشرقيه؟؟ وش هالمخ اللي براستس!
حصه :تعرف طارق محدٍ حريص على الدراسة وخواته مثله اكيد يعرف مدرسة مفتوحة وسجلها بعدين هذاك دريت وش صار بالدنيا؟ ارقد وعين من الله خير ولا تكبر المواضيع يا بو فلاح عذبه طارق معها وفلاح ورغد جايين وبيصيرون هناك بعد
ابو فلاح ناظر حصه بغضب وانسدح على الجهة الثانيه معد وده يناقش اكثر كفايه شايع قالب اخلاقه ومخه فوق تحت كان همه الأكبر هالفتره هو زواج ساره وانها ماتنضر من ولد ضاري وان شايع يفكه شره ويس ، انقلب ونام وحصه طلعت من الغرفة ودخلت للصاله وبدأت تصيح من عظمة المصيبة اللي طاحت على راسها بأعتقادها ! فرشت سجادتها بالصاله وقامت تدعي ان الله يستر عذبه ويسوق لها شخص يسترها ويفكها من ألسنة الناس ويفكها شر حمد
ومن اذان الفجر وصوت المطر فز سعود من محله وطلع المسجد يصلي وانطلق للبيت قبل ابوه وعمه
سعود:يا ولدد
ساره طلعت له وشرشف الصلاه للحين عليها: سعود؟
سعود:سوير ياخوتس عطيني فطور سريعععع بطلع الشرقيه
ساره باستغراب:عسى ماشر؟
سعود: بلحق السوق وابيع موتر حمد موصيني يلا يلا استعجلي
ساره :ابششر ابشر ، بعطيك قهوه بعد انتظر الحين تخلص
سعود ابتسم:ياحلوها ياناس ياحلووووها اللي تعرف لي
ساره ضحكت وراحت المطبخ جهزت لسعود سلة فيها قهوه وتمر وفطور وشاهي وعطته : قلت لابوي؟
سعود:الحين اقول له.. امي وين؟
ساره:بغرفتها اكيد تصلي
تقدم سعود لغرفة امه وهو يطق الباب وردت زينه الصوت، سعود دخل وهو يغني ويتمايل :صبححح صباااااح الخير من غير مايتكلممم
ولما غنننى الطير ضحك لنا وسلممممممممم ، سلام عليكم يا ام متعب وصباح الخيررررر شلونتس؟
ام متعب وقفت وهي تضحك لسعود اللي مايخلي هباله وروحه المرحه:يالله صباح خير انت ما تبدأ يومك بذكر الله! بدل هاللي تردده؟ انا طيبه مير انت شعندك جاي غرفتي يا امك؟ ووراك جيت وابوك مب معك؟
سعود:والله ياطويلة العمر والسلامة عيالتس واحدٍ معرس وواحد متجه للعسكرية ومشغلني وهو بعيد يبيني اطلع الدمام ابيع موتره -غمز سعود-الظاهر عيالتس مهب مطولين معتس قاعدين ننفر بالدور
ام متعب ضحكت:عساني ما افقدكم ويالله ياربي مع هالصبح اطلعكم كلكم على خير وسعادة ورزق وحريم يلوقون بكم قل امين
سعود:ودي اقول امين مير محددين نصيبي من الحين الله يعين منيب شايف اي تناغم ولا هي تلوق علي بس يلا
ام متعب وهي ماتقدر تسكت من الضحك مع سعود: بسسس ياسعود! ياحظك بعمتك وبناتها اي والله
سعود:بس يمه بس لا يوقف المطر علينا من هالحكي .. يلا في امان الكريم وعاد لا اوصيتس يمه انتبهو لركان تراه صغيرون وصي ابوي لايكرفه عند البل والمحل مع بعض خلي مشعل وهزاع يعاونونه هاليومين
ام متعب:ياحلوه الحنون عسى عيني ما تبكيك ياسعود ، الله يحفظك يمه ولاتسرع وانتبه للطريق ، ومر جدتك وعمتك قبل تطلع سلم عليهم يمه
سعود اشر على خشمه:على سلة السيف اللي تشوفينه
ضحكت ام متعب ورجعت تكمل صلاتها وسعود طلع يسلم على جدته وعمته دلال مع شوي محارش ومناقر وهو يموت فيها وقابل الهنوف وعطاها مثل اللي جاء عمتهم دلال من مناقر وطقطقة ثم قابل ابوه وركان وعلمهم وراح سعود بدون ما يمر منصور يبي الموضوع يتم عائلي محد يدري به واول ما قطع به الخط ومع نسمات الفجر البارده برد حماس سعود وبدأ يهدا ويفكر والأفكار توديه وتجيبه وبدأ يرتب كلامه ويفهم اصل الموضوع من طارق ويحل السالفه في راسه ويجيب كل الاحتمالات ويجهز كل الردود كان سعود شايل هم اكبر منه بكثثثثثثير وكله عشان راحة اخوانه .. وعلى قراب الظهر وصل سعود الشرقية وعلى طول توجه لبيت عمه اللي يذكر طريقة من طفولته وكل شوي يضيع ويسأل اهل الحي عن بيت فايز الطايل ويوصفون له ويالله وصل وهو منهلك من ددسن حمد وطق الجرس بعد ما اخذ نفس طوييييل يستعد فيه لمواجهة طارق
طلع طارق اللي كان مستعد لجية رغد وفلاح اكيد بتكون هاليومين وتوقع انهم وصلو : هلـ... سعود؟ -قطب حواجبه طارق- الله لايسلط علينا ! شتبي؟
دخل سعود بروح مرحه رغم اللي سمعه ورغم علاقة طارق الرسميه مع الكل : وخخخخر تكفى بنسدح تعبت من الخططط
طارق تذكر عذبه: هيه هيه هيه وين داخل يالحبيب!!!! للبيت حرمته!! ارجع
سعود شهق وحط يدينه على فمه: اعرست من ورانا؟؟؟؟؟
طارق : يا ثقل الدم ، اهلي بالييت تيسر الله يعافيك يلا
سعود :اجل اللي ببيتنا منهم؟لايكون منكم نُسخ؟تكفى ما اقدر اتحمل زياده انا منحاش منهم
طارق : لا بالله انا اللي ما عدت اتحمل وانا المنحاش ما ودي بالمشاكل لكن الظاهر مالي فكه، وش جايبك؟ وش تبي لاحقنا؟
سعود بدأ يتضايق من اسلوب طارق بس كمل بنفس الطاقه المرحه: والله عاد بيت عمي وجاي لشغل مهب لسواد عيونك وبريح وانت شعندك جاي؟
طارق ضحك باستهزاء: تحاسبني لجيتي في بيتي!! لالالا اعتقد انا يبي لي اتفرغ للعايله كلها
سعود حاول يتغاضى عن اسلوب طارق وضحك ودف كتف طارق ودخل المجلس وهنا تأكد ان فيه مصيبه دام طارق يرمي الكلام بس كمل : عطني طريق اريح الحين يابن الحلال تالي سو اللي تبي
طارق دخل معه المجلس وقال بأنفعال: من مرسلك؟ (كان متوقع ان حمد عرف وارسل سعود عنه)
سعود بدأت تنرسم على وجهه ملامح الجدية والزعل من كلام طارق واسلوبه اللي يثبت ان فعلاً فيه مصيبه حاصله : افاااااااااا ! افا يا طارق ! الحين انا اخوك وولد عمك وماسك خط عشان رزقتي ويوم تعبت ماطرى ببالي غير عمي وعياله وبيته واتجهت لكم على طول اريح واستريح كأني بييتنا اخرتها تقابلني بهالهرج! هقيتك تمزح بالبداية لكن الظاهر قلبك محمّل علينا ! ومحمّل جدا بعد!
طارق كان ندمان انه يكلم سعود خاصه بهالاسلوب بس حمد يطري عليه كل شوي ويطلع حرته بسعود وانفلت طارق بكلامه: والله لو عمي مربيكم تربية رجال فعلاً مثل ما الكل منخدع فيكم كان ما سويتو اللي تسوونه بمحارمنا ومن ورانا لكن والله يا سعود والله الي لا إله غيره ان مابقى لعمري لحمد وصل له الكلام هذا -قفى طارق ثم التفت- حدك في بيت عمك اللي جيت عشانه هالمجلس والباب اللي تشوفه عينك لاتفكر تسرح وتمرح بالبيت

وقف سعود بعزة نفس وضيقه من كلام طارق: لا تحدد لي مكان أنا ما جيتك طلاّب يا طارق لكن هي كلمة وحده اقولها لك ، ابوي مربينا تربية رجال ومطاليق ما تطلع منّا الشينه لو يقضى شبابك كله وانت تدور ورانا ما لقيت الا التراب بوجهك ، محارمك اللي دخلت بشرفهم هم نفسهم خواتي  يا اللي ماتفهم هذي اختك الكبيره زوجة لمتعب واختك الثانيه تبي تصير زوجة لحمد اللي اشرف من اتهاماتك واطيب من نوايا ابوك ، دور ورا ابوك واعرف الحقيقة منه ولا حمد! ههه انت ماتسوى شعرة من حمد وان كانك تقصد باتهامك حبه العذري اللي انا وانت وابوك من قبلك يدري به فابشرك ان اختك وبنت عمنا شعرة من وجهه مثلها مثل ساره والهنوف مانرضى لهم الشينه ولاحن اللي ندور الردى في بنات عمنا ، خل جدران بيت ابوك لك وان براسك شر سوه وحنا قدامك
-طلع سعود والنيران تلعب بقلبه مو هذا اللي مخطط له كان وده يصلح الامور بس طارق استفزه وحده على الكلام اللي ما يبي يسمعه اياه طلع وركب الددسن ومشى مايدري وين يروح بس يبي يبتعد عن بيت عمه يبي يفهم اللي حصل -
اما طارق فاحترق دمه من كلام سعود اللي يصغره بالسن لكن يكبره في الفصاحه والعقلية وانقهر ان سعود قال الحقيقة اللي الكل يعرفها حتى هو بنفسه ماحصل شيء لحمد كل اللي بيده رسالة ومن اخته بعد! مافيه شيء يمس حمد وهذا اللي كبّر الحقد بقلبه ماوده الخطأ يطلع من اخته ، انطلق طارق لغرفة عذبه اللي ذبلت عيونها من البكاء على كل شيء دخل عليها طارق وهجم على اكتافها وهو ينفضها بكل قوته ويقول: صصصاااااارررررر بييينتتس وبين الكلبببببب شششيء؟؟؟؟؟؟؟ يكتتتب لتتتسسس مثللل ماتسويينن؟؟؟؟؟
عذبه صارخت بكل صوتها وهي تردد : لا لا لا لا لا لا
طارق رماها على السرير وقفى وهو يتنفس بسرعه
عذبه ببكاء: انت شلون تفكر باختك كذا؟ شلون تفكر بولد عمك كذا؟
طارق التفت بكل قوته وعطاها كف: اسككككتتتتييييي اسككككككتتتييي لا يطلع حستتتس دفنتسسسسس
كان طارق مقهور من عذبه لأنها الآن هي المخطيه الوحيدة بالصورة ما معها شريك وهذا اللي جننه وقهره طلع من غرفتها ونزل يحوس بالبيت تحت ويفكر شلون يعيّش حمد القهر اللي ياكله الحين