"أثر الهناء حلم يا حمد"

البارت الثلاثين

حرك سعود للديرة وبقى رايد في الشرقيه لكن مابقى عبث كان يراقب سعود من بعيد لبعيد وفهم سبب جيته يوم شافه في الحراج وبسيارة حمد ومن هنا طرت له فكرة جهنمية خبيثه تخلصه من حمد وتوسع له الطريق وابتسم من قلبه بفرحه ومسك جواله يتصل على صقر
صقر: هلا رايد؟
رايد:الو صقر شصار على دوامك وحياتك اللي في الرياض؟
صقر بتعجب وهو يدري ان رايد يعرف حياته:وش هالسؤال! مستمره
رايد:زين يعني بتكمل هناك؟
صقر بنفس الاستغراب:ايه يا رايد! انا بس بزين الغرفه في حال جينا الديره عند امي ليه لكن وش سالفتك انت؟ وش قاعد تسوي؟
رايد:ايييييي بس بس معليك كل شيء بوقته حلو كمل اللي تسويه.. سلام
-قفل رايد وهو مبتسم لأنه ضمن موضوع الرياض والشغله اللي ناوي عليها ورجع يراقب بيت فايز وينتظر الوقت المناسب للتنفيذ
اما سعود مسك خط الديرة وهو يحوقل ويتمنى ان السالفة تعدي ومايخرب أي شيء والعلاقة تتم زي ماهي ، كذلك متعب وهيا كانو ماسكين خط الديرة ، وعند حمد وسرور كانت نيتهم مثل متعب وسعود ولكن ما اسعفهم الحظ وخربت السياره
حمد ضحك بإنهزام: يالليل الحظ العوج ليلااااه ، هاه يا سره شنسوي الحين؟ علمني
سرور وهو يقفل الكبوت: يارجال الحمدلله انها خربت وحنا مابعد طلعنا من الرياض وقتها ورطه صدق
حمد:ايه الحمدلله ما اختلفنا لكن وش تسوي بدوامك اللي اشغلتني به؟ انا بعتبرها لصالحي تعرف شعري مقرع وكذا واستحي اقابل الناس (كان يطقطق عشان يضحك سرور)
سرور:ههههههههههههههههههههههههههههههههههههههههههههههههههه انا وين وانت وين .. معليك من الدوام بتتيسر ان شاء الله لكن انت علمني وش الدبرة الحين وين نذلف فيه
حمد ناظر على يساره ويمينه وشاف الخلا: اييييييه جاك يا مهنا ما تمنا هذي والله السجه تعال تعال ادبرك
سرور وقف بيأس من جو حمد :لاتقولها!
حمد: وليه ما اقولها!! عصر والجو يعطي العافيه وغيم ! ليه ماتقدم للبر يا الضابط يا حامي الوطن هاااه؟؟؟
سرور نفخ صدره: اقدم اقدم
حمد اللي كان يحاول ياخذ كل مشكلة بروقان: كفووو مشينا نكشت لين نلقى لها دبرة وعاد اليوم ما زينت شاهي من قمت يعني جت بوقتها
سرور أشر على موتره:وهالخرابه ذا يقعد على الخط!!
حمد:محنا مبعدين ياسرور ، مير قل ان عزبتك معك تكفى
سرور فتح شنطة السياره وهو مبتسم: افا عليك!
حمد ابتسم واخذ الفرشه من الشنطة وراح شوي عن الخط وقعد وبدأ يحفر في الوسط عشان يزين مكان للضو وراح يمشي يلقط اغضان تساعده في الشبه وتعاون هو وسرور بالمراكي والشاهي وكل شيء وقعدو
سرور وهو يصب الشاهي:عطني علمك الحين وحلمك اللي مروعك
حمد اخذ الشاهي وتمدد ورفع عيونه للغيم واخذ نفس عميق: اييييهههههه يا سرررور الله يكفينا شر الجاي وبس الظاهر اني تعوذت من ابليس اربعين مره ابيه ينقطع مير ازريت فيه اقوم واعود ارقد والقاه يتكمل ! اعوووذ بالله بس
سرور تكى بيده على المركى وميل بجلسته : ايييه جات السالفه لعندنا يلا مالك مخرج الحين -كان سرور يترقب الاجابة اللي صار يعتبرها قضيته الخاصه واللي بيمسكها من بدايتها-
حمد : مامن سالفة يا طويل العمر لكن الظاهر اني شلت هم بعض الامور ودخلت باحلامي ولادخلها الا ابليس
سرور:ايه؟ كمل هرجك ياخوي وش هي الامور اللي مضايقتك؟تراني اعين واعاون واذا فيه شيء تبيني فيه ازهلني ياحمد
حمد ابتسم لسرور:ماتقصر جعل عمرك طويل ..-بدأ حمد يتكلم وهو يشرب بيالته- ابد الامور اللي مشغلتني هي نفسها اللي الكل يعرفها .. تعرف عداوه ابوي وعمي مع شايع السياف وخويه ضاري كأنها بتنفتح من جديد وشايل هم ابوي بس
سرور بدأ ينشد للموضوع بانتباه وهو فاهم كل شيء بس وده يتأكد من حمد: وش سببها؟؟؟ مو تقولون موضوع قديم وتقفل؟
حمد اللي كان وده يفضفض ويخفف الثقل عن قلبه وبدأ يتكلم باللي يعرفه: سببها يا سسرةّ عيني يقال ان جدي ذياب حصل بينه وبين ضاري جدالٍ وهم جايين الديرة ولا اتفقو على موضوع بينهم ودخل الشيطان الاولي وهو شايع ثم الشيطان الرجيم بينهم وصار اللي صار مات جدي ومات ضاري وحصلت هالقطاعه والعداوه ومن يومها وشايع متبري من الكل حتى تركي واخته كله عشان خويه ومعادينا لكن خبثه ما انقطع ولاظنتي انه لحاله -ناظر حمد بيالته وابتسم بيأس-
سرور: مب لحاله! ليه ؟ هقوتك تقول ان فيه اخبث منه؟ (كان سرور يبي يعرف إذا حمد يدري بنوايا فايز ولالا)
وحمد كان مستحي يقول ان عمه شقيق ابوه الوحيد في صف العدو واخبث من شايع وادهى منه :مدري لكن الله يقطعه ويقطع اعاونه ويفكنا شره ، نزين قهوتنا؟ الظاهر محدٍ معرض مع هالخط
سرور تأكد وفهم أن فايز وشايع وعيال ضاري بنفس الصف وسيف وعياله بالصف المقابل وهذي اول رموز القضيه وانحلت وعرف وين موقع كل واحد من الاسماء اللي كاتبها في باله
سرور:الله يزين الامور ويكفيك الشرور كلها وانت خلك حريص مع اني مستغرب يعني سالفة حصلت بين جدك وبين واحد من الديرة الثانيه وانتهت ومرت عليها السنين ليش ترجع تنفتح؟ وليش الاعضاء المشاركين كثرانين فيها؟ غريب والله لكن قمنا نزين قهوتنا ونكمل
حمد نزل عيونه للضو اللي قدامه وانتبه لكلام سرور ثم ناظره:الاعضاء المشاركين ويشش؟ المزاين بدت؟
سرور ضحك من تصريفة حمد:ههههههههههههههههههههههههههههههههههههههههههههههههههههههه المزاين والفعاليات والله عندكم، اقصدك انت واخوانك وشايع وهالحين رايد ذا لكن تدري وش اللي يطمن؟ ان الامور مستتبه للحين والدليل انك مزوج اختك اخو رايد معناته مافيه شر ان شاء الله  وبعد رايد ما نور قسمنا واشتكى عليك يوم طعنته الظاهر مالهم بالشر طاري
-كان سرور ينتظر الاجابه بهذا الموضع والسؤال خصيصًا عشان يفهم لكن ما ساعده حمد اللي كان مستحي مره من سوايا عمه واتفاقه مع شايع وصقرواكيد مسكّت رايد بعد ومنعه مايشتكي لخطة ثانيه-
حمد: ايه ايه ان شاء الله ما من شر تطمن وزين قهوتك
تراجع سرور في جلسته ويتوعد بينه وبين نفسه ان ينصر حمد على عمه اللي قالب نفسيته ووقف للعزبة وراه يطلع القهوه والماء: اقول دام الجو كذا في الرياض وش ظنك جو الديرة؟ اهخخخخخ
حمد ابتسم:اهه يا الديرة جعل المطر ما يقطعها ولا يغايبها
سرور:اميييين عساه يلحقنا بعضٍ من حبك لها
حمد كان يقصد عذبه وديرته بنفس الوقت:اجل يبي لي قلب ثاني استقبل فيه عباد الله الباقي هذا قاضيٍ وخالص
سرور صفر: لااااااا لااااا
ضحك حمد وهو يصب له شاهي والتفت للخط ينتظر احد يمر
-في الديرة-
راحو وضحى وسلمى لبيتهم وساره للحين بغرفتها تدعي مع المطر ان الله يحفظ عذبه بس طلعت لها الجازي وقاطعتها
ساره حاولت تخفي توترها: جازي؟علامتس
الجازي بتردد:مدري شقول بس احس استاحشت الجلسة بدون خواتي وبدونتس انزلي ولاتروحين يا ساره
انحفر قلب ساره من كلام جازي وحضنتها:من عيوني الحين اجيتس
الجازي نزلت بخجل ولحقتها ساره هي تحس انها مسؤولة عن الجازي الحين بغياب عذبه وهيا وامهم عاد بدنيا ثانيه
الهنوف وهي تشيل الفناجيل وترتب المكان:لااا؟ بدررررري ! وينتس فيه هالوقت كله!
ام متعب:اقصري لسانتس وصوتس يا بنت ! ماترتاحين الين يلعلع بالديرة كلها؟ بعدين سويرعروس لاتكرفينها
ساره مدت اصبعها المجروح: اييي وامي صادقه! يكفيني هالجرح
مزون:خلاص انا بعاونك بدل ساره
دلال:ياحلو بنتي يا ناس يمممه تكفين شوفي الذرابه شوفي الفرق بين بنات ولدك وبنت بنتك
الجده منيره: صدق من قال القرد بعين اميمته غزال ولا مزون ذربه!
مزون وقفت وهي تمثل الصدمه: جدددددده! انا مو ذربه!!
دلال:يمممممه!
بدور وهي تقلب في صفحات روايتها اللي بيدها:الحمدلله ان جده مو منتبهه لي
الجده منيره:لا لا ادري بتس واشوفتس وانتي غاطه بين هالكتب لا سنع ولا معاون ولاشيء وامتس تقول ذربات! ايييه بس ياسيف وعياله شوفو ركود البيت من دون عياله وتعرفون الفرق
الهنوف نزلت الطوفريه ومسكت راسها بحب: يااربي ياااربي ابك شوفو حب جده لنا !!! شوفو الحنان اهخخخ بس منيب معرسه خلاص وش ابي بالعرس وعندي احلى جده تغنيني عن كل شيء
ساره:ياعمممري ياجده ياععمري الله يخليتس لنا بس والله مايقصرون والبيت ماله طعم بدون عذبه وهيا
الجده منيره للهنوف: انا اقول قومي خلصي شغلتس وفكيني شرتس بس منين اجيب لتس عيال انا !
ضحكو البنات كلهم بفشله من شفافية جدتهم
دلال لساره:اسكتي بس يا ساره خلينا لا رحنا الرياض صاحت علينا اعرفهااا امي
ساره ضمت جازي على جنب:اكييد عميمه هذا هي تصيح على هيا من الحين وش عاد انتم!  بس اقول جده لايكون نسيتي الملح والقبله كله؟؟؟( تأشر بعيونها على الجازي)
الجده منيره فتحت يدينها للجازي:معصصي! لا بالله مانسسيتها قليب جدتها وعينها ، اقول حصه؟
ام فلاح بهدوء:سمي خالتي؟
الجده منيره:شلون عذبه؟ ماكلمتنا
ام فلاح:اي اكيد مشغوله وفلاح ورغد جايين الشرقيه يعني ما بتفضى
ساره كانت تناظر عمتها بنظرات حقد وهي زعلانه على عذبه وحظها وتشوف هدوء عمتها وكأنها مو مهتمه لعذبه ! محد كان فاهم الثاني ومحد كان عارف الحاصل بالضبط .. مرت الوقت إلى بعد العشاء ورجع ابو متعب وابو فلاح للبيت وتعشو من يدين الهنوف عشاء شعبي بسيط ونامو والعيال نفس الشيء لأن نظام ابو متعب يمشي على الكل إلا مزون نزلت تدور لها بابونج او نعناع او اي شيء تشربه يوخر عنها الصداع من كثر ما فكرت في طارق وروحته للشرقيه بدون ما يقول لأحد ، بعد ماسوت الكوب جلست عند باب المطبخ اللي يفتح على الحوش وشبك الدجاج ومددت رجلينها والكوب في حضنها وهي تناظر تفاصيل حوش الديرة وتسترجع كل شيء صار من طفولتهم للحين وهي تدري ان من طفولتهم وهذي شخصية طارق ساكت وبعيد وما يحب الحب ولا يحب الشعر ولا يحب الديرة ولايتفق معهم في أي شيء ومع ذلك تحس ان بينهم تناغم عجيب! تحس بينهم مشاعر عجزت تفهمها .. اخذتها الهواجيس والتساؤولات لمنظر رجولها قدامها وانتبهت للكيّه اللي في رجلها وعلى صوت عزف قريب منها رفعت عيونها تشوف الصوت منين جاي أو من اي بيت بالضبط