"أثر الهناء حلم يا حمد"

البارت السادس والثلاثين

استمرت جلسات الطرب والرقص وقام متعب يزين عشاه ويشاركهم من بعيد وغرف شوي من المرق قبل يكب الرز في بيالة شاهي وتقدم لباب المطبخ ينادي هيا اللي كانت ماكله الجو بالسوالف مع رغد والبنات وفزت اول ما سمعت نداء متعب واخذت جلالها عليها وطلعت توقعت يبيها تحضر معه
هيا:سم حبيبي ؟ اجيب الصحون؟
متعب مد البياله لها:ذوقي المرقه وادفي يا هيا البرد لا يوجعتس
هيا تأملت حب متعب لها وقالت بنفسها وهي مستغربة حنان عيال عمها وحبهم اللي يزيد ويتكاثر ما ينقص ابد (إذا هذا حبه لي أجل شلون حب حمد لعذبه ووش شعوره الليله بالذات؟ )
هيا اخذتها من يده وابتسمت: ما امرض ولا يعرفني الضيم وانا ذراك يا قُبلة حياتي وملحها ... لذيييييذه يا متعب لذييييذه يعلها يمين ماتمسها النار
متعب انبسط من اطراء هيا ومدحها:بالعاااااافيه يا ام سيف ، اجل ازهمي هنوف واللي معها يجهزون السُفر بروح اكبس ، ازيد لتس مرق ولا اطرف لتس شوي؟
هيا بحب : من عيوني انا بجهز كل شيء ، لو تسقيني السم يا متعب تلذذت بشربته شعاد طبخك وما تمده يمينك؟عطني عطني
متعب ضحك الين بانت سنونه من الفرحه واخذ بيالتها :اشوف لسانتس صار معسول اكثر مني
هيا بعباطه:تي شسوي من عاشر قوم صار منهم
متعب غمز:المثل ناقص! قال اربعين وانتي توتس اسبوع ما كملتي
هيا اشرت بيدها للحوش اللي قدامها عند الدجاج:اربعين يوم؟ يارجال سري منطول هنيا عند هالشبك ، اربعين سنه وانا معك بس اخلص زين عشاك
متعب:كل شيءٍ بحسابه يا هيا
هيا بدأ يخف هياطها: وراك قايلٍ اسمي؟ناوي الحرب
ضحك متعب وهو فاهم كلامها:ومن الحين اقولتس منتصر
رجع هياط هيا يرتفع: اقدم وتعيّن وش يجيك وهذا الميدان ياحميدان
متعب قفى وهو رايح يكبس وقال قبل يختفي عنها: ارفقي على نفستس يا بنت مهب اطيب لتس
ضحكت هيا ودخلت داخل المطبخ وقابلت الهنوف:بسم الله الرحمن الرحييم ! انتم تمشون على السقف ولا على الارض مثلنا؟ علامكم تطلعون بوجهي فجأه
الهنوف تخصرت: انا بفهم شيء واحد ، وين موقع الخصوصيه عندكم؟ بنصصصصصصص الحوش؟
هيا: جاي يعلمني بالعشاء يا المصروعه يا الملقوفهههه جعل ربي ما يسلط علينا بسسس
الهنوف غمزت: اشوف وجهتس محمّر ورايح وطي الله المعطي بس عشاتس مختلف عن عشانا
رجع متعب وبيده بيالة هيا وفيها مرقه:هيون
هيا التفتت وهو ودها تسد فم متعب بهاللحظة وركضت الهنوف:هيون اجل؟ ماااااشاءالله؟؟؟؟؟ وانا ابي مرق
متعب ناظر هيا نظرة الورطة وضحكو الاثنين
الهنوف:علامكم؟؟؟ متعب! والله لا اصوت لابوي ترى
متعب اشر على خشمه: عطيني براد اجل وبيالات بصب للكل
هيا : والله ياهنوف لا ازوجتس اول واحد يطق الباب وافتك منتس والله
الهنوف ضحكت ضحكة انتصار: اثاري ذا عشاتس؟ ههههههههههههههههههههههههههههههههههههههههههههههههههههههههههههههههههه
متعب:ههههههههههههههههههههههههههههههههههههههههه طباييين استغفر الله
(اخذ البراد وفعلاً صب شوي من المرق فيه وبدأ يصب في الفناجيل ويعطي العيال ثم دخله داخل البيت ويصبون البنات لأنفسهم وهو رجع يكبس ثم تقدم عند العيال يتقهوى شاهي وهو جالس على اخر مركى يبي يكون قريب من العشاء ومن اهله بنفس الوقت والعيال كانو يسولفون وسعود يعيد عليهم سالفة سنه المكسور وهزاع يموت من الضحك كأنه يسمع السالفه لأول مره وحمد يصور كل الضحكات والسوالف براسه ما تلاشت ابتسامته ولاتغيرت إلا في التوسعه كل ما يطرى عليه انه بيبتعد عن الساحة خمسة واربعين يوم ثم يرجع ويملك عذبه يبتسم بعرض فمه وينطلق حجاجه اللي ماتعكر من الصبح ، تعشو واستانسو ورجعو يكملون رقصهم اللي صار استهبال وتفريغ طاقة وعند البنات كانت الاشواط ضروريه بعد العشاء وغير مُستهان بها في قانونهم وفعلاً قامو يشغلون المسجل اللي استرجعوه بالقوة وتحت أمر ابو متعب اللي مايرد الهنوف وساره ... وانتهت الليله اللي كانت سراب ومستحيل لمسه او حتى القرب منه في عين حمد وعذبه انتهت أحلى ليالي حمد وعذبه واعذبها انتهت وهم منتصرين والرايه البيضاء ترفرف فوقهم والغنايم عندهم ما تُحصى ، كلٍ منهم فرحته تطغى على الثاني هي ارتبطت بشاعرها وحبيبها وأمانها ومُنى عينها وهو ارتبط رسميًا بألهامه وعذبته وكل ما يملك
وبعد ما تحقق "الحلم" تقريبًا والفرحة العظيمة ، تعاونو العيال مع بعض ونظفو الحوش من الفناجيل وقدر العشاء والمواعين وكل شيء وكنسو الزل من الرز ونزلو طراحاتهم الخفيفه الشعبية في الحوش وفرشوها فوق الزل الأحمر وتلحفو ببطاطين ثقيله وانسدحو حوالين بعض وهم يناظرون السماء ويعلقون على هاليوم واول ما بدو يتناعسون انسحب متعب بخفه واتجه لغرفته
فارس:الله يعين ماتقدر تصبر عنها وترقد معنا ترانا مشتاقين لك حنا بعد
حمد كان ساكت وهو يحسب الوقت اللي يوصله لمرحلة متعب ويسويها مع عذبه
سعود: الظاهر ما صار يشوفنا شيء
عمر : تغانا عن سوالفنا وقعدتنا
متعب ضحك: وش جاب الثرى للثرياء؟ انتم وييييييييييين والاهل ويييييييين يلا يلا بس ارقدو ما اكلم عزابيه انا
فارس التفت ياخذ النعال وسدد وصوب متعب بالضبط:اذلف اذلفففف يا قليل الخاتمه
حمد:الله يبلغنا ما بلغك بسسسس
عمر:يا سمج الحب منكم لو طارق معنا كان مات
متعب:وراكم ما علقتو على فليح وهو راقد ببيت ابوه!!
سعود وهو يمثل نظرات الحب: انت الاول والاخير يا متعب وفلاح معذور
متعب : شفت هرجك ذا؟ هو اللي بينفرني منكم -راح لغرفته وهو يضحك وشاف هيا تقفل بجامتها وتلم شعرها-
هيا ابتسمت:زين جيت اسلم عليك قبل اطلع للبنات
سحبها متعب وارتمى على السرير:اي بنااااات واي خرابيط!!! همزي اكتافي بس تكسرت من الذبيحه
هيا همزت اكتافه ورقبته وهو نايم بحضنها:برقد معهم اشتقت لهم ولعذوب بالذات
متعب رفع عيونه:زوجة فلاح معهم؟
هيا: لا اكيييد وش تبي! الحرمة متزوجة وشوله ترقى معهم
متعب اعتدل:وانتي يا المهبوله؟؟؟؟؟
هيا سكتت بفشله:يا ابن الحلال نسيت حقك علي
متعب: لالا معليش! اطلع من العيال واجيتس اخرتها تقولين نسيتي انتس معرسه!
هيا:زلة لسان واعذرني
متعب:منيب راضي! -التفت ينسدح وهو يمثل الزعل وخافت هيا فعلاً انه زعل وهذي أول مره تصير بينهم-
هيا وتأنيب الضمير ماكلها: وانت صدقت يا متعب اني بطلع لهم واخليك؟ من متى والبس بجايم مع بنات عمي؟ من متى وانا اكشخ لهم كذا؟ شلون انسى حبيب قلبي وعيني افاااااا يا متعب؟ -قربت منه تشوف هو صاحي ويسمعها بس ما مداها تقرب الا والتفت عليها يضحك وكتف يدينها-
متعب: ما قلت لتس اني منتصر؟ ما قلت لتس خفي على نفستس؟
هيا: مازعلت؟؟؟؟؟
ضحك متعب:زعلت بس باخذ رضاوتي بنفسي لاتشيلين همي