"أثر الهناء حلم يا حمد"

البارت التاسع عشر

رجع صقر لبيتهم واستقبلته شريفه بترّقب وعيون رايد بعد كانت تنتظر نفس الإجابة وابتسم لهم صقر
شريفه:علامك؟؟؟ وافقو؟؟
رايد:وليش ما يوافقون!
صقر:اي يمه ان شاء الله ما يردوني وان ردوني رجعت اخطب
شريفه بابتسامه:وش هالصملة يا امك؟ الا من هاللي خطبت عندهم؟ما قلت لي
صقر حاوط كتف امه بيده:عاد هذي يا أم صقر مفاجأة منيب معلمتس ابي اشوف وجهتس لا شفتي العروس اللي ابيها
شريفه ناظرته:هذا اللي ما سمعنا به من يوم خلقنا ! ام ماتعرف زوجة ولدها الا بالعرس !!
صقر:منيب متكلف العرس بيكون هنا في حوشنا ان تم اصلاً ! وهي يبون يزفونها اهلها لعندنا
شريفه: ومخيم العُرُوس!!! وش ينقصك يمه عن عيال الديار اللي حولنا ؟؟؟؟ انا اسوي لك ازين من عروسهم بعد
رايد:وامي صادقه
صقر بنفاذ صبر ويحاول ما يرفع صوته ولا يعصب ولا حتى يبين رغبته الجاده في الانتقام: قلت في الحوش يا جماعه! نبيها محفوفه ومختصره والفرحه الكبيره في عرس رايد ان شاء الله
رايد ابتسم بخبث وعلى جنب:عز الله انها فرحة كبيرة الله يتمها بس
شريفه ناظرت عيالها:تبون تعرسون وتخلوني بريحاتي في البيت؟
صقر:اعقب يمه ! اعرس واسكّنها معتس هنيا
رايد:وانا بعد ، من قالتس نبي نروح ونخليتس يا حلوة اللبن؟؟
شريفه غلبتها دموعها وبكت بينهم وقامو يطقطقون عليها صقر ورايد ويحاولون يضحكونها ويخططون لزواج صقر مع بعض اذا تم ويحاولون يكررون كلمة اذا تم عشان يبعدون الشك عن امهم وهم متأكدين وضامنين ان ابو متعب بيوافق غصب عنه بضغط فايز ولأن شايع عطاهم كلمة

-في بيت ابو متعب-
بعد العشاء كلٍ طلع ينام وابو متعب كان يمشي ويقفل الأنوار وينبّه الكل ينام وما يطلع صوت وكلهم امتثلو لأوامره وطلعو قدامه للغرف وفعلاً نامو كلهم الا حمد طلع لجلسته في السطح بعد ما نام ابوه ويتأمل بياض الغيم فوقه ويهوجس بسالفة هالخطبه والعسكرية اللي كلفها سرور وعذبه ما يدري يخطب عذبه اول ثم يلتحق بالعسكرية ولا يخلص اموره كامله وبيته ثم يخطبها رسمي؟ ومعقولة رايد بيمشي له طعنته؟ ليش للحين ماله حس؟ ليش اخوه خطب ساره؟ الأفكار اللي براسه صحيحه؟ كان حمد بين كل فكرة وهاجوس يتعوذ من ابليس ما يبي يتخيل هالكم الهائل من الخبث انه يحصل في حياته ما يبي أحد من اهله ينضر ابداً
-في غرفة البنات-
ساره دقت هيا بخفه:هيون
هيا التفتت:علامتس؟
ساره بهمس:زعلتي مني اليوم؟
هيا عدلت سدحتها والتفت على جنبها الثاني وقابلت ساره:وش قلتي؟نسيت يا سوير
ساره ضحكت وعرفت ان هيا بهالطريقة كأنها تقول ( ماحصل شيء):ههههههههههههههههههههههههههههههههه الحمدلله انتس بتصيرين زوجة متعب
الهنوف سمعتهم:ياحظي انا فيها انتي بتعرسين لاتنسين بس انا اللي بتهنى بهيا
هيا وهي تتصنع الدلع: بس عاااااد لا تتهاوشون علي اففف
مزون رفعت البطانيه عن وجهها ورمتها بالدب الصغير حق جازي:ويععععععععععع هيااا مب لايققق قسم بالله مب راكب عليك
عذبه كانت شاهده اللحظات كلها وتضحك:وانا بتفرحون فيني لا سكنت معكم؟ ولا الحب مخلص على هيا؟
بدور قامت تناظرهم:لحد يجاوب تكفوووون خلونا نسوي شيء-ناظرت الهنوف-
الهنوف فهمتها وابتسمت:تممممممم
ساره:وشوو؟؟
الجازي:اعلمكم؟
هيا:انطقيييي
جازي:يبون جلسة بالحوش ونجاوب عذبه
ساره ناظرت من الطاقة:ترش يا بنات
مزون ابتسمت ابتسامه وسيعه:عز الطلب!!!! قومو تكفون نفرش ورا الحوش عند حبل الغسيل عشان نبعد عن طاقة خالي سيف ونسوي لنا براد شاهي ونسمر شوي
هيا ناظرت ساره والبنات:ونسوي فطاير
بدور حطت المخده على وجهها ومثّلت البكيه:اناا بموت من هياااا قولو لها انها عروس ولازم ترتاح تكفون
هيا:وش الشغله عاد!!! كلها عجين امششي بس
ساره وقفت وهي تضحك: نسوي فطاير على الشاهي ليش لا؟ يلا يلا وخذو بطاطينكم معكم لحد ينزل من العيال او يبرد الجو
مزون: يا خي ليالي الديرة عجيبه وحلوه خاصة بيت خالي سيف حنون حتى بالصيف
الهنوف ربت على كتف مزون: يطول عمرتس مير انزلي سوي الشاهي انا عجزت وانا اسنع هالحنيه اللي ببيت خالتس سيف
البنات: ههههههههههههههههههههههههههههههههههههههههههههههههههههههههههههههههههه
-ونزلو فعلاً وحده وحده وبهدوء خوفًا أن ابو متعب يصحى أو العيال ونزلو فرشو زولية وحده من الزل اللي كان ملوي بشكل طولي في نهاية الحوش وقبال باب المطبخ الخلفي وقعدو وكانت ليلة ١٣ وشوي يشوفون القمر وشوي تغطيه الغيوم والرش يصب عليهم بشكل بسيط ودخلت هيا تعجن للفطاير وساره معها وجهزو حبّ (فصفص أو دوار الشمس) وقعدو يسولفون بمثل الهمس تقريبًا بس حمد يسمعهم وهو في السطح-
عذبه:اي يلا دام جلسنا تجاوبوني هالحين
هيا:والله يا اختس دام ذا ترحيبهم بي اجل وش ترحيبهم بحبيبة حمد ؟
فز حمد وتكى ظهره على الجدار يسمع السالفه وهو رافع راسه للقمرى
الهنوف:والله انا من ناحيتي اشوف مايهمها حبنا المهم حميد بعينها
ضحكت عذبه: وأنا من لي بهالدنيا غير حمد؟ تدرون لولاه ما طلعت من الشرقيه؟ وش ابا بوجيهكم انا
ساره بققت عيونها بالهنوف : هذي اللي ماتستحي والله!!!
حمد ابتسم ابتسامة عريضه وهمس لنفسه:عهدٍ عليّ يا عذبتي ما اخليتس لو على قص رقبتي
مزون:ياحلو الحب والله على زين عذبه إلا ان حب حمد مزينها اكثر وحبها له بعد اثاريه يحلي الشخص!
بدور:خرافه احس! هذي هيا تموت بمتعب ولا شفنا فيها زين
هيا رمتها بنعال:منيب ميته عليه والله محليني من اول مير عينتس ماتشوف يا البزر
الجازي: المفروض بدور ماتهرج بسوالف الحب من عقب احبتس
البنات كلهم ضحكو بعد ماتذكرو انها استمعت لهاكلمة من سعود
بدور غطت وجهها بيدينها: يا فشلتي يا بنات والله مدري شلون سمعته لي
الهنوف غمزت:عشانها من سعععود
ساره ضحكت: ضاعو اخواني بسبّتكم الا حبيبي قلبي ركان ياحلوه حلواه
الجازي وهي متمدده:هذا بالعالم الآخر
ساره:ما ارضى عليه عاد والله انه حليّل
الهنوف: القرد بعين اخته الكبيره غزال .. عذبوه وين طرتي؟
عذبه وهي تناظر الحوش: تهقون حمد ان اعرسنا يبي يبني غرفتنا قدام غرفة هيا ومتعب؟
هيا : لالالا بعيد الشر نبي خصوصيه شوي وش ذا محاشريننا انتم!
رجع حمد يبتسم:انا اسكنتس بغرفة يا عذبه! بلاتس ماعرفتي غلاتس عند حمد وش يسوي
ساره:انا اذا اعرف حميد لو هالقد ذا -قربت الابهام من السبابه ولاتركت بينهم الا مسافة صغيرة جدًا لا تكاد تُرى حتى-ما اقول انه يبي يسكنتس بهالديرة كلها
عذبه غطت وجهها بالبطانية:عسااااني ما اتبدل فيه احبببه احبه
-ابتسم حمد ابتسامة بعرض فمه الين اتضحت اسنانه كامله وهو الود وده يرقى ويشوفها او ينزل ويضمها على صدره ويعلمها شكثر يحبها ويغليها ويموت فيها وفي كلامها وأن كلامها ما يمر مرور العابرين الكرام على صدره لا والله أنه يتخلل صدره ويرتكز في شرايين قلبه ، نزل وهو مخطط ماتجي السنة الجاية بالكثير إلا وعذبه حلاله وفي بيته وأم لبنته هذا قراره اللي مافيه رجعه أبد نزل وهو ناسي من صقر ورايد وكل الهواجيس اللي تكدر الخاطر... اما البنات اخذتهم السوالف تحت رش المطر لين خمرت العجينه وقامو يتقسمونها كل وحده اخذت مجموعه بسيطة وبدأت تشكلها وجمعوها بصينيه ودخلوها الفرن وزينت هيا شاهي بالحبق وكل هالشغل كان على لمبة صفراء معلقة فوق جدار الحوش ويوصل نورها للمطبخ ونفس الوقت للشارع الخارجي ، ما ودهم يشغلون نور المطبخ ويبان انهم صاحيات ويتعاقبون من ابو متعب مثل ما عاقب العيال وخلاهم فوق الجدار فقررو يكتفون بنور الكُبس الخارجي والضحكات تتعالى بينهم ويرجعون يخفضون اصواتهم بسرعه واكلوا الفطاير وشربو الشاهي وقامو بفناجيلهم يتمشون في غرفة متعب ويطقطقون على هيا وحياتها مع متعب -
هيا:بس عااااد !!! تبون الصدق؟يازين متعب عند باقي العيال اقلها راكد ورزين مهب طايرٍ عقله تقل مسحورررر واسمعي يا جاره
عذبه تخصرت:صبر صبر صبر هذا الوصف اعرفه زين ! لا يكون انا الجاره؟
ساره:ههههههههههههههههههههههههههههههههه
مزون:وهو فيه احد مصروع غير حميد؟
عذبه:يلا يلا انتي وياها!!!! حمد رجال وشيخ الرجال بعد ماتلقون فيه عذروب واحد
الهنوف:والله وانا اختس الولد من راسه لساسه عذاريب مير عينتس ماتشوف
بدور:الحب يعممممي يعممممي
عذبه:لحد ينور بصيرتي دامني مع حمد خلوني
هيا:يااااااااا قلعععععتس يا عذبووووه وععع وععع
عذبه وهي تتعمد الدلع:احبه شسوي
جازي:بطررررش انا ما اتحمل
الهنوف:انا بموت منها حمد من صوب وهي من صوب
مزون: خلوووها شعليكم منها!! حبي ياعذبه وطيري للسماء بعد معليك منهم
ساره:مشينا نرقد ماشفنا من ورا الحب اللي تهرجون عنه خير وتريضي يا عذبه خوفي تنفلتين بهالمشاعر وتطيح عليتس
عذبه:عاد انا وحمد أكثر ثنين مضمونين بالعايله من هذا طولنا واحنا لبعض يعني حتى لو رفضته ما بينسمع لي فمعليتس انتي
ساره:الله يجعل تاليتكم لببعض.. قمنا نرقد؟
البنات قامو يرقون لغرفتهم على وحده وحده زي ما نزلو وساره والهنوف غسلو المواعين وراهم ولحقو البنات وكلٍ راح يرقد ومن اصبح الصبح وقامو البنات من جديد بكسل وهم يحاولون مايطرون سمرتهم البارح ويتنشطون بس الحيل صفر وفجائتهم الجده منيره وهي واقفه تشرّع الباب على نهايته وتعزم حريم الديرة على الفطور ومنهم ام منصور وام جابر خوياتها : اقلططططن اقلطططن يا مرحبا ومسهههلا
ام جابر:مرحبٍ يسلم يا ام سيف يابعد حيي وميتي والله
الجدة منيره وهي تخمها:يا هلا بخوية الدرب يا هلااا يا هلا  ... يا ساااره يا ههيييااا
دلال كانت تفرش الزل وهي مبتسمه وترحب مع امها وهي من زمان عن هالأجواء والغيوم والصباح وحريم الديرة وجمعتهم للفطور وحصة كانت واقفة مع الجدة منيره وتسلم وتقلط الحريم في الجلسة المرتفعة
ساره مسكت راسها:تكفون قولو اني اتوهم الصوت ! جدتي تناديني؟
مزون وهي ترص الفناجيل بالطوفريه:لا والله مهب وهم الحريم ما ياسعهن الحوش اعجلوووو بس ،اعبيهن قهوه وشاهي؟ولا احط وحده للقهوه ووحده للشاهي؟
ساره:حطي ثنتين ازين
هيا وهي تفرد العجين على الصاج:انا بفهم ليش تعزمهم جده كذا؟؟ياااا الله كم اسوي قرص الحين؟؟ انا ما بعد صحصحت اصلاً وش خلانا نسهر احننا اوفففف
زينه دخلت:صباح الخير يا بنات، وين الهنوف؟ ما بعد زينت القهوه؟؟
هيا:جابتتتس الله يا خالتي قولي لي كم اسوي قرص؟
زينه: خمسه
هيا شهقت بصوتها كله:اممممم سيف!!! خمسه!! اهببب شلون اسوي الخمسه وافرمها !!
زينه ابتسمت ابتسامه عريضه: ام سيف؟
هيا لفت بفشله على الصاج وعطت زينه ظهرها وسكتت وضحكو ساره ومزون:ولدها على اسم ابوي يمه
زينه ضحكت:الله يكتبه لتس يا هيون .. الهنوف وين يا ساره؟؟
ساره وهي تحاول تخفي ضحكتها من ملامح هيا المتفشله:مدري يمه اكيد عند الدجاج او تشطب البيت
زينه: يلا اخلصو بالفطور
هيا : يا خفتتتتس يا هياا يا خفتس وش تقول عني هالحين!!! ياووووكككككك يا بناااات انا ما اتحمل هالحراره كلها
مزون:وراك يا ام سيف! تحملتي الاصعب
هيا:مابعد جاء الاصعب هذا البلاء
ساره:هههههههههههههههههههههههههههههههههههههههههههههههههههههههههه ماتجوزين يا هيا عن هروجتس!! اسكتي عاد
-تحت الدرج كانت الهنوف نايمه وبيدها مبخر فاضي-
زينه وهي بتطلع الدرج تدور للهنوف لمحت رجل طالعه من تحت الدرج وهي تنزل تشوف: هاااه!!! هنننوف!!! وش مرقدتس هنيا!!!
الهنوف فزت وصقع راسها بالدرج اللي فوقها:اححح يمه؟ انتي وش جابتس؟؟ انا ابخر
زينه:تبخرين بالحلم؟عليتس صخونه يا امتس؟
الهنوف وهي تحاول تجحد نعاسها:وشو يمه؟ ماسويت شيء اقولتس ابخر شوفي المبخر
زينه: والمبخر جامد من عهد الدنيا اخلصيييي يلا يا طول لسانتس بس بخري البيت وزيني القهوه الحريم جايين الفطور عند خالتي وين البنات يساعدونتس!! انتم علاكم!
الهنوف وهي تحاول تصحصح :زين يمه زين انا بزين كل شيء اطلعي للحريم بس
زينه:يلا عاااد !! ماشفتو عذاري؟ ريحة بخورهم واصلتني وانتي تنومين بكل زاويه تشوفينها!! وفوقها جاييه الفطور مع امها والله السنعه صدق مب انتي
الهنوف وهي تتخصر بيد وتتحلف بيد:والله يا يمه ان ما انقطع طاري هالعذاري لا اطلع احوس بوجهها حوس وهي وش عندها؟؟ امها ومنصور بسسسسسس وشغلتها تنقل علوم انتي تحسبينه سنع!! قططعا بس امحق سنع والله
زينه حطت يدها على فم الهنوف:اصصص اصصصص!!! ماتعرفين تقصرين حستس انتي!! ناطلين سُرتس بالصعيد حنا !!! شراره اعوذ بالله بس يالله صباح خير.. بخري البيت واطلعي انتي وخواتس جميع يلا (خواتس تقصد البنات كلهم)
الهنوف وهي تنزل قميصها وتعدل شكلها: اي الحين ابشري
قفّت زينه وهي ماسكة ضحكتها من عصبية الهنوف اللي تموت الكل من الضحك ما تموتهم من الخوف ابدًا وبعدها انتشرو البنات فعلاً يزينون الفطور كله والبيت ويلمون فُرش العيال ويشغلون القرآن فوق والعيال افطرو في العزبه يوم درو ان الحريم بالبيت وبعدها افترقو للشغل وبعد الفطور طلعو اغلب الحريم بعذر ان الضحى حلّ ولازم يروحون يزينون للغداء ويشوفون بيوتهم وبقت ام جابر وام منصور وعذاري ، وجات ساره وعليها جلابيتها وطرحه ملونه من لون جلابيتها على راسها وهي تنزل الدله وتقعد يم جدتها بحنان والجده منيره استغلت الفرصه وقامت تنشيد النشيد اللي تغنيه لساره وهي بزر وهي تبي العلم يوصل لفوز وتركي
الجده منيره وتصفق يدينها ببعضها وتنشد:
يا ساره بنت ابوها
وياسبعة وخطبوها
واحد يحسب الدندن
واحد يحاكي ابوها
واحد يعد قرنقش
واحد يكلم ابوها
ساره ضحكت بضيق:يوووه يا جده تخبرينها؟
الجده منيره:منيب ناسيتها وخص نص هالحين يوم ان اللي يعد القرنقش جاتس وخطبتس صدز مهب نشيد بزران
ام جابر:على البركة ياسويره على البركة يا زينه ماشاءالله ماشاءالله
ام منصور ناظرت عذاري:ساره انخطبت؟
عذاري:وولد السياف؟-ناظرت هيا والبنات-
عذبه: ابشرتس خذاها رجال
الجده منيره بنبرة حاده وهي مبتسمه وتأكد على رد عذبه: بنت الطايل ماتاخذ الا اللي مثلها ويطولها
عذاري ميلت فمها:الظاهر القرنقش اللي عنده مهب يم سوق الذهب كله
الجده منيره:وهي قرنقش بس؟ ما حلفتوني بالله ان زينه فوق زين القمر والدين والركادة والرزانه رجالٍ ينتصلى على طرف ثوبه
عذاري بهمس مايسمعه الا البنات حولها:هذي وصايف حمد مهب رجل ساره
عذبه ابتسمت وهي صايره تعرف نية عذاري: وصايف رجل عذبه.. اصحح لتس بس
عذاري ناظرت عذبه وشمّقت وهي كأنها على جمر تبي تطلع وتعلم بفوز بجديد الطايل وعرسهم
ام جابر بفرحه:عسااااه مبارك الله يتمه على خيير ياكريم ، وبكرة عرس متعب؟ با حليلتس يا هيا وراتس معنا ماقمتي وبكره عرستس؟
هيا بضحكة:والله يا خالتي ازريت اندس بموت على الناس والجمعات
زينه ضحكت:اصيله ام سيف اصيله
هيا نزلت راسها وقالت بهمس:يا قرادة لسانتس يا هيا
انتهى💗