"أثر الهناء حلم يا حمد"

البارت الخامس عشر

-على المغرب وفي بيت فوز وتركي-
فوز:هاه يا خوي بشر !!
تركي:قلت لتس ساره ضاعت من يديني يا فوز ضاعت
فوز جلست قبال تركي وهي تضغط على ركبته:ماتضيييييييع ماتضييييع ياعين اختك ساره لك
تركي بعد يدها:لاتعلقيني فيها زود هذا ابوها رفض وانا مابعد خلصت هرجي وتقولين ساره لك!! تحري يومين يومين بس ويقولون ولد عمها خذاها اهههههخخخخخ ليش حظي كذا يعني ابوي ما لقى يعادي من بد المسلمين كلهم  الا سيف!!
فوز وهي تطبطب على تركي الضايق:هونها ياخوي هونها بس على طاري ابوي شصار معه يوم رحت؟
تركي: وش بيصير يعني؟ لو اني سامع لتس اصرف لي
منصور من ورا باب البيت: ترككي يا تركي .. يا اهل البيتتتتت
تركي:ادخلي انتي خليني اشوف ذا
قامت فوز وهي متنكده من حال تركي وضايقه من ضيقه
تركي:هلا منصور
منصور:امممش يخوي العيال مجهزين العده والطرب والجو مايتفوت وانت مختفي!
تركي:المزاج ماهوب هاك الزود وانا اخوك روح انت
منصور: افاااا ! وش مكدرك؟ تدري شلون؟ علمني بالطريق تعال تعال
تركي حاول يرفض بس غصبه منصور واخذه ومر بيته اول ورمى حجر على الطاقة واستمعت عذاري
عذاري:هااه؟
منصور ناظر تركي:صد الله يعافيك شتبي تعاين! ..-ناظر الطاقه يكلم عذاري-نزلي العود انا موزيه بالسطح من امي اخلصييييي
عذاري:ماتجوز انت!هفففف
تركي ابتسم وهو صاد: خلصتو؟
منصور:هالحين تجيبه ونروح وتعلمني بعلمك بس انتظر
عذاري من ورا الباب:خذ
منصور:ادخلي يلا واقفلي الباب زيين.. اي وش موضوعك؟- بدأ تركي يسولف له عن اللي حصل ويشكي له الحال ومنصور يواسيه ويقنعه انه خيره وهذا قسمه ونصيب الين وصلو لعزبة سيف الطايل اللي كانو فعلاً متجمعين ويسولفون ويتقهوون الشاهي وحواليهم عدتهم اللي خاشينها عن الكل في استراحتهم وماتطلع الا بينهم بس-

وفي بيت رايد المهجور اللي كان بديرة الطايل ومقابل بيتهم بعد كان صقر قاعد بالسطح وبيده بيالة الشاهي ويناظر حوش بيت ابو متعب ولمح ساره اللي تكنس اوراق الشجر وبالها مو معاها ومستغربه ليش محد ناداها بعد ما طلع تركي ومحد كلمها بخصوص موعد الزواج وهنا تملكت صقر مشاعر غريبه اتجاه ساره من زود التأمل
أما في المستشفى...
رايد:وش هاللي تقوله يا عم !!!!!! مايصير هالكلام ومستحيل يصير بعد!!
شايع:يا رايد محدٍ يعرف نقاط ضعف سيف كثري اجل تبي تعلمني فيه! كانك تبي تحرق قلبه فما لك غير هالدرب اللي وصيتك عليه
رايد:وانا بحرق قلبه بولده حمد
شايع:وانت شلون تبي تعرف اللي يحبه حمد واللي يحبه سيف وانت بعيد عنهم؟ لازم تدخل عايلتهم وتعايشهم وصقر اخوك محد يعرفه حياته كلها بالرياض وانتم من ديرةٍ قريبةٍ منّا والله معطيكم من خيره يعني مهب شاك ابد وساره تراها عيون سيف اللي يناظر بها اسممممع مني وطعني
وهنا بدأ رايد يقتنع بفكرة شايع اللي قام يستأذن بعد ما عبا رأس رايد وضمن فراق ساره عن تركي واول ما طلع شايع اتصل رايد على صقر اللي كان يتأمل ساره وقطع عليه التأمل
صقر:هلا رايد ؟
رايد:صقر يا اخوي فرصتنا جات لعندنا وثار ابوي بناخذه
صقر فز:وشلون!!
علم رايد صقر بالخطه كلها
صقر:ثار ابوي ناخذه من مره !!!! انت انهبلت!!! دم ابوي تاخذه من بنت ضعيفه ولا ! من من!! مني!!
رايد:وانت تحسبهم رحمونا وفكرو فينا يوم ذبحو ابوك!! محد فكر فيك ولا احد درا عنك لا ذياب ولا عياله اللي تشوفهم هالحين وهالضعيفه اللي تقول تراها بنت عدونا صحصح!!!
صقر:لا يا رايد!! كانك صامل وتبي حق ابوي وتاخذ بثارك ابد بكره اطلعك من المستشفى واقرب محكمه تخلص امورنا وتنفذ القصاص بسيف اما هالدرب انا ماني معك فيه
رايد:صقر لا تلعب باعصابي وانت تعرفني زيييين فكر بأمي الأرملة فكر فيني! وفي نفسك شف شلون حالنا يرثى له وشف عيشتهم!
-هنا كان صقر بنفس مكانه و يناظر حوش سيف الطايل اللي الضحكات تتعالى فيه بعد ما كنسته ساره والتمو كلهم للقهوه في الحوش تحت رذاذ المطر وكأن رايد يصحيه ويوريه الحال بين البيتين- فكككر زين يا صقققر فكر!!!
صقر:انا بقفل اذا كتبو لك خروج اتصل بي-قفل صقر ووقف وبيده بيالته وهو يناظر ساره ويناظر حوشهم ويسمع ضحكاتهم والفكرة تراوده في باله والحيره لاعبه بقلبه