"أثر الهناء حلم يا حمد"

البارت السادس والعشرين

-عند البنات-
بعد ما لعبو بالمطر مع بعض وتبللو فعليًا وانبسطو استوعبو أن ملكة ساره بعد ساعه ونص بالضبط ! ولا فيه أي استعداد للشخص الغريب عنهم وقررت عذبه ومزون يطلعون ساره للسوق ويقضون لها لبس مناسب في حال حصلت نظرة أو جات ام صقر وبالمره يقضون لزواجها إذا كفّاهم الوقت وبما أن عذبه ذوقها انيق وناعم طلعت معها ومزون تفهم بالميكب وتنسيق الاكسسوارات طلعت هي بعد ولعل السوق الشعبي يسعفها ويساعدها تكشّخ ساره ، اما الهنوف وبدور وجازي قعدو في البيت عشان يجهزون ويرتبون اللي ماقد ترتب ويفرشون الحوش الخلفي لأن حريم الديرة بيجون الجده منيره العصر كالعادة ، وبالسوق كان حمد جالس على كرسي قدام المحلات اللي نصها مفتوحة ونصها مسكره وهو متنرفز من عمه وهالملكة العجله ! وهذا سبب خروجه من البيت عجز يتحمل عمه قدامه وهو يشوف قدرته في التأثير على قرارات ابوه وهو اللي واثق أن ابوه مستحيل يزوج ساره أي احد! بس في قلبه شعور مو راضي ولا مرتاح كان يناظر الأرض ويفكر بحل ينفّر صقر منهم وشوي دخل منصور السوق وهو رايق لأن خويّ عمره خطب أخته الوحيده وطاير من الفرحة واتجه لحمد يبشره ويشاركه فرحته
منصور:لالا الظاهر اني بدنياي لحالي .. يا هووووووو ؟
حمد رفع عيونه:اسمعك وراك تصارخ؟
منصور سحب الكرسي وجلس جنب حمد وهو يناظر المحلات: الصحيح تقول ليش ما اصارخ وانا اخو العروس وخويّ المعرس؟
حمد التفت لمنصور بوجهه بس:حددتو العرس؟
منصور استحى يقول ان تركي ما خطب بالبيت ولا اتفق معه على شيء: للحين
حمد:الله يوفقهم -ربت على كتف منصور- عقبال مانفرح فيك وتذوق لذة الحب .. اهخخخ يا الحب اهخ بس (تذكر ان حبيبته بنت عدوه الحالي او عمه اللي شايل بقلبه عليه كثير)
منصور ضحك والتفت للجهة الثانيه وهو يضحك:اعووووذ بالله فكني من الحب وطواريه يازين قلبي وهو خَلّي
حمد ابتسم:اي والله قلبك خَلّي وقلبي أنا اللي يحترق
دخلو البنات بهاللحظة للسوق ومرو من قدام العيال بسرعه ومنصور ميّز مزون من عيونها وهو مستحيل ينسى وجه اللي طقته وصد على طول أول ما انتبه لغوايش ساره الطايل وعرف انهم اهل حمد أما حمد ابتسم بخفه ونزل عيونه هو ومنصور لين عدو البنات ودخلو لجهة الملابس من الجزء الخلفي للسوق البسيط الشعبي اللي كانت ثيابه معلقه على بابه وريحة البخور والحريم تعج بذاك المكان وهو معروف بالديرة "تخفضيات يوم الجمعه" ما تتفوت وكلٍ يترزق الله هاليوم
منصور: انا بروح للقهوه تخاوي؟
حمد: يلا اسبقني بشوف الأهل ناقصهم شيء ولا واجيك
منصور: لاتبطي -راح منصور وهو يحك جبهته و الود وده يلف ويخز مزون من قلبه، ضربتها للحين ما بردت -
حمد تقدم لساره وهو يناديها: سوير
ساره رجعت لحمد:سم
حمد:تبين شيء؟ناقصتس شيء؟
ساره ابتسمت لحمد من تحت برقعها:ياجعلك حي غني ياحميد قل امين، سلامتك كلها غريضات بسيطة باخذها مع مزون وعذبه وارجع..لاتبطي ابيك
حمد ابتسم وأشر على خشمه:تأمرين على وجهي كله مب على خشمي بس ، ساره كأنتس متردده ولا بقلبتس شكّه قولي لي ياخوتس
ساره أخفت ضيقتها: دام ابوي موافق يا حمد معناته رجال بعدين العرس تحدد وبعد شوي بوقع تهقى عاد لي كلمة؟
حمد لمس في صوتها وجع: والله ما تنجبرين يا اخت حمد لو على قص رقبتي ماتبينه؟؟؟؟؟
ساره مسكت يدين حمد:ابيه يا حمد ابيه ، خلني اشوف البنات واخلص قبل العصر
حمد ماتطمن كثير بس قرر يترك ساره على راحتها وخطف له نظرة تهدي نفسه من عذبه وابتسم وراح مع منصور وهو يحس أن عذبه بكل موقف شديد تلينه وتهديه وتعافيه وتطيب خاطره بجهد او بغيره يحس أنها منفذ الراحة والتنفس في حياته ووده يخسر روحه ولا يفقد عذبه ولاهو شعوره لحاله كان شعور عذبه معه اللي لازالت ابتسامتها مرسومه وانظارها تلاحقه لين اختفى من قدامها وطلع من سوق الحريم للقهوة
-عند عذاري-
ام منصور: وراتس ساكته؟الله يتمّ عليتس حالتس ذا مير هاه سكري التلفزيون لاياخذه الكهرب انا بطلع لأم سيف الطايل انتبهي للبيت
عذاري والضيق ذابحها لكن ودها تعرف علوم الديره وانتشر الخبر ولالا: ابطلع معتس ابي السوق
ام منصور التفت: وش ينقصتس؟بوصي منصور عليه يجيبه
عذاري: مو تقولين اني عروس!!! بروح اشوف لي غريضات تليق بولد السيّاف اللي طايرين به
ام منصور: ياقشر لسانتس واخلاقتس هذا وهو اخو فوز اللي ليلتس ونهارتس عندها .. لاتبطين! خلصي وتعالي عند ام سيف نبي نعتذر من سواد الوجهه اللي سويتيه عساها تعذرني وخيتي بسسس
عذاري:زين زين ، تحريني بجيب عباتي ونطلع سوا
ام منصور فتحت الباب:هذاني بالشارع انزلي (فعلاً ما تأخرت عذاري لبست ونزلت وانطلقت للسوق وامها مشت بهدوء لبيت ابو متعب )
الجده منيره: يا هلاااا يا هلاااا الله يحيتس
ام منصور ببتسامه شرحه: المهلي ما يولي يا ريحة اهلي
الجده منيره استقبلت ام منصور بالاحضان وهي تبارك لها باللي سمعته وام منصور ترد عليها بفرحة وقامو يدعون لمنصور ببنت الحلال والرزق واسترسلو بالسوالف والحريم يجون شوي شوي والمعروف أن قهوة ظُهر الجمعه ببيت الطايل ما تتفوت أبدًا فكان الكل وده يلحق عليها قبل قهوة العصر والوقت اصلاً صار على قراب العصر
بدور وهي تغسل الفناجيل: انا بفهم شغله وحده بس
الهنوف:هااه
بدور:بالديرة محد يقيل شوي؟ مو طبيعي الازعاج
الهنوف: اهببب يا بنت الرياض اهخخ ليتني اهج بس، اليوم جمعععه جمعه من ينام ظهر الجمعه؟؟؟؟ خلصي الفناجيل وتعالي صبي معي وانتي جيبي المواعين اللي بالمشب
جازي:يا حليلتس يا هيا بس
الهنوف ضحكت: وراكم مشوهين سمعتي؟ياحليلي انا من اختس الاولى والثانيه ويلا لاتكثرن هرج
الجازي:اي اي امرينا يوم صرنا لحالنا
بدور:حكم القوي على الضعيف يا جازي
الهنوف راحت تصب للحريم وهي تضحك وهي فعلاً ماخذه راحتها وتأمر وتنهي على البنات اللي صارو تحت مسؤوليتها وأمرها ، بعد ما صبت دخلت تشيك على مجلس الرجال للمره الأخيره قبل تنشغل بالحريم وطلعت وام منصور تعدل طرحتها عند مراية المغسله الوحيده في الزاويه المظلمه"كل البيت هالوقت كان معتمد على نور الشمس اللي يشع من بين الغيوم وينور البيوت" اللي كانت قريبه من الحمام
ام منصور ابتسمت للهنوف بفشله: تبي تجي عذاري وتعاونتس يمه ارتاحي
الهنوف بخبث:لالا خالتي ارتاحي خليها ، وهي بعد عروس مثل ساره الليله ملكة اختي وان شاء الله قريب ملكة اختنا الثانيه عذاري ، المهم لا تنادينها ولاشيء
ام منصور بتعجّب:الليلة ملكة ساره!
الهنوف انبسطت من ردة الفعل اللي تبيها:اييييي؟ محد قال لتس؟ وعرسها الجمعه بعد ماتشوفين سوير ما نزلت تسلم عليتس؟عروس عررروس وهذاني اشيك قبل يجون العصر ويملكون
ام منصور بفرحه: عسى الله يوفقها ويتم ويديم افراحكم يا الطايل وعقبالتس يمه
الهنوف ابتسمت وبعد ما قفت ام منصور وراحت رفعت الهنوف يدينها تدعي : يالله ياربي بعصر جمعتك اني اخخخذ هاك المزيون والسمح اللي يفكني من مجاكر العجز، قضى شبابي بينهن اهخخ