"أثر الهناء حلم يا حمد"

البارت الثامن عشر

صلو العشاء كلهم واستأذن صقر وانسحب من بينهم بخفة وراح للبيت اللي شبه مهجور يسكنه هو ورايد فقط وده يشوف ساره ويبي يشوف وش بيحصل من وراه ، أما الرِجال ابو متعب وعياله وابو فلاح وعياله وعيال دلال رجعو للبيت ودخلو كلهم للمجلس وعلى طول فز حمد
حمد بنرفزه واضحه من عيونه ونبرته:يبه هذا تشابه اسماء؟
ابو فلاح بعصبية غير مبرره:اقصر حسك يا ولد!!! مالك كلمة في حضرة الكبار
طارق كان يناظر ابوه بتعجب:اذكر الله يبه !
متعب وهو متجاهل عمه:يبه فهمنا اللي حصل؟كيييييف؟
ابو فلاح تكلم قبل ينطق ابو متعب: يفهمكم وش يقول؟ تبون تمشون كلمتكم على ابوكم !!! علامكم انتم كبرتوا وتحسبون ما لكم ولي !!
فارس بهمس لسعود:خالي فايز علامه مشتط!
سعود بنفس الهمس:ان ما طلع وراه علم لاتناديني بأسمي
ابو متعب:اتركوني مع عمكم
ابو فلاح وقف استعدادًا لحرب الاقناع اللي بتواجهه هالحين وقال لهم:سمعتو اللي قاله ! اطلعو !
حمد طلع الحوش والشرار طالع من عيونه وهو يناظر اخوانه: معقولة اللي فهمناه صح!!!!! كيففففف!!! كيف! مو يقول لنا زواجة تركي بتلحقه كلام هو وجدي!! اجل ليش يزوج راعي السالفه بكبرها!!! ليش يقبل بولد ضاااري؟
ركان:ايه صح! ماسمعته يقول اخوه طريح وابوه ميت!! ونفس الاسم خلاص مايبي لها عاد! واضح انه اخووه وجاء يخطب واذا على تركي صدقني فيه سالفه انا قايلكم بس ماتسمعون لي
سعود: شلوووووووون؟؟؟ مو توك طاعن اخوه امس؟ شلون يخطب اختك اليوم ولا كأن شيء حصل!!!! عقلي واقفففف
متعب بشك : عمي علامه شاد حيله بالهخطبيه كلها؟
طارق انضم لنقاشهم وناظر هزاع ثم ناظر متعب: وش شكوك لابوي استاذ متعب؟
متعب ناظر طارق وقرر يسكت وما يرد مابقى على زواجه من هيا غير ثلاث ايام ولا وده يحوس الدنيا ويخربها مع اخوانها وابوها
عمر: عندي كلام بس اخاف تعصبون علي لكن هذا الصحيح
سعود: وشنهو؟
حمد:قول قول انا كذا ولا كذا ودي اطلع اللي بقلبي
عمر: لا يرحم والديك لا تطلعها فيني شوف غيري
سعود:اهرج يا الطقوع معليك
عمر: يعني اقول اذا الولد رجال ومحترم وكفو ومصلي ومسمي ليه تردونه واحنا كلنا نجهل القصة القديمة ونعرف بالعداوه بس؟ وهو بنفسه قايل عفى الله عما سلف
ركان:وتركي طيب؟ رجال ومحترم وكفو ليش رديناه؟ الا عشان هالعداوه انا اشوف ان موافقه ابوي على ذا ظلم لتركي
متعب:السالفه مهب كذا و ساره غاليه قضو الرجال يوم نزوجها ولد ضاري؟
حمد: واخو رايد السلوقي !!!!!! لا والله معصصصي
فارس: تصدقون؟ اقنعني عمر! وهو صادق
هزاع:وهرج ركان مقنع بعد!
طارق انسحب من بينهم وقرر يمشي في ممرات الديرة والشوارع لين ينتهي هالطاري وهو عنده نفس تساؤولاتهم ويفكر بتركي بعد بس ماحب يوجع راسه وطلع وباقي العيال كانو يتناقشون وحمد متنرفز بزيادة ومقهور شلون تبدلت فرحته اللي باول يومه لقهر الحين!!!

-بالمجلس-
ابو متعب بهدوء:وش علاقتك بعيال ضاري؟ انت ماتبي تجوز يا فايز؟ ما سدك دم ابوهم؟ من وين طلعو لك هالحين!!
ابو فلاح طرت له فكرة بالوقت المناسب وقرر يقولها ويتقمص دور "التائب المسكين": اسمعني يا سيف انت شاهد وعارف اني مانويت اخذ دمه وذنبه برقبتي انا اخذت بثار ابوي ذياب يا سيف وانت الوحيد اللي تدري ان روحتي للشرقية وطلعتي من الديرة بكبرها ما كانت لفلوس ولا منصب ما انكر حبي لها وانها ودي واللي ابيه لكن انا طلعت من بيتي وجماعتي وربعي وناسي وهجيت لشرق المملكة ابي اسلى وانسى هالذنب وارتاح من شايع ومطاردته وازريت يا سيف! ماقدرت ياخوي وهالصقر اللي جاك انا بنفسي مراقب صلاته وروحته وجيته وشغله الولد نظيف ولا له بالامور المكروهه كلها انا جيتي هالمره ناوي فيها اعدل اخطائي كلها واولها ازيح هالدم والذنب من رقبتي انا اخذت ابوهم وبتكفل في عرسهم وازين امورهم
ابو متعب بصدمة: تعدل امورك ببنتي ساره يا فايز! ساره! وذنبك انا اللي حملته برقبتي عنك محدٍ يدري بخطاك غيري حتى رايد معادي عيالي من كرهه لي وظنه اني المذنب ، ما كفاك هالحمل تبي تحمّل بنتي بعد؟
ابو فلاح: ادري يا سيف انك ماخذه عني واني كنت طايش ورميته عليك وهذا لحاله ذنب ثاني ومثل ما قلت لك انا جاي هالمره اخذ ذنوبي وابدلها حسنات ولافيه أخير من الزواج وربط الانساب بالحلال واقولك الرجال على ضمانتي يا سيف انت تحسبني برخص ساره وازوجها لواحد ما يستاهلها؟ ولا لواحد ما اعرف عنه ياكود اسمه؟؟؟؟ ساره مختار لها من خيرة الرجال واطيبهم والله ان ما خذت صقر ما تتهنى ولا تسعد مع غيره ، الرجال ينشرى قربه يا سيف لاتطيره !!!
-كان فايز يحاول يكبّر صقر في عيون ابو متعب ويقنعه يزوج ساره ويفتك من شر شايع واللي ماسكه عليه وشر رايد كان يبي يطلع منها باقل الخساير وينجّي نفسه وعياله-
ابو متعب: وراك ما زوجته من بناتك يوم انه كفو ومطلق! وين راح كلامك الاولي والبنت صغيرة وماتعرس بدري! وش غيرك؟ لاتمشي علي هالكلمتين يا فايز
ابو فلاح بنبرة عجيبه كان يتمسكن فيها عند سيف: ازوجه من؟ هذي هيا بعد ثلاث ايام نبي نزفها لمتعب وعذبه ناوينها لحمد من قبل تولد محدٍ مشاورني فيها حتى والجازي بزر! تبيني ازوج بزر يا سيف؟ وساره ما عادهي صغيره صارت بسن على قولك هذا هي بعمر هيا وهذا نصيبها خلها تعرس وتتوفق وتروح وان كان ماتبي ساره ابد نزوج الهنوف-كان متعمد يطري الهنوف لأن مستحيل يزوجها سيف وهي باقي تدرس وصغيره ويبي يضغط عليه عشان يوافق على ساره وصقر-
سيف بعصبية:والهنوف مهب بزر بعمر الجازي!!!!!
ابو فلاح:كلهن بزران وانا وش اقول ! ما لصقر غير ساره ، لاتوقف نصيب بنيتك يا سيف قل تم ما انت خاسرٍ شيء وانشد عنه وخذ وقتك وابببببد ان لقيت عليه الزله نوريه نجوم الللي بعز القايله على جرأته وجيته وعلى طاري جيته هذا هو جاء وخطب ما تردد! وبين عليه شجاع ما قال بيننا دم وباخذ ثار ابوي (واخوي) ولا نوى علينا الحرب الولد نسى الماضي واللي قد حصل وعفى واصفح ونسى وجاك شاري نسبك باللي هي به انت بنفسك سمعت هرجه منيب معلمك ولاني عايدٍ عليك كلامه
-كان فايز يحاول يضغط كثيييير وقد مايقدر ومايعطي ابو متعب مجال للتفكير والجدال والزعل وابو متعب كان يفكر بدعوته اللي دعاها وهو فوق الضلع وبدأ يقتنع ان الله دله على صقر وصرفه عن تركي وحياة ساره ماهي في خطر وبنفس الوقت كان مستغرب شلون يخطبون وفايز قتل ابوهم! ابو متعب كان متردد وقرر انه يستشير ساره هالمره فعلاً ويخلي القرار بيدها عشان مايندم بعدين انه غصبها او بعدها عنه وقام من عند ابو فلاح وهو يدخل البيت ويصوّت لساره-
ابو متعب:يا ساااااره
فزت زينه وساره معها ونزلو
ساره:لبيه يبه !
ابو متعب:تعالي يا ابوتس ابيتس
قربت ساره وامها معها وجلس ابو متعب معهم بمجلس الحريم البسيط وبدأ ينقل لها سالفة هالرجال وخطبته وهو ينتظر ردها بس وقفت ساره بخجل مجبورةٍ عليه وقالت بصوت واطي: اللي تشوفه يبه الشور شورك والكلمة لك
ابو متعب: موافقة يا سوير؟
ابتسمت ساره وطلعت بخطوات سريعه وتركت امها وابوها مع بعض وقابلت متعب وحمد قدامها-
متعب:جابتس الله يا سويره تعالي شوفي غرفتي وعطيني شورتس فيها وش ينقصها ووش يبي لها
حمد:يلا يلا واطرحي جلالتس العيال برا البيت
متعب التفت وهو متعمد يبي يضحك ساره:شتبي انت؟من عزمك؟
حمد:بعطيك شوري انا بعد
ساره ضحكت:لا بخليه علي ارتاح به ، كلنا نروح نشوفها بس ما ودك تشوفها هيا اول يا متعب؟
متعب:تلقينها متقهويه العصر فيها مير امشو بس