"أثر الهناء حلم يا حمد"

البارت الثامن والأربعين

صحى صقر وطلع للصاله وبيده جواله وشاف ساره ترتب المكان
صقر:انتي اللي رديتي على امي؟
التفتت ساره: اكيد انا ، اقول صقر
صقر تماسك:بأي حق تلمسين جوالي وتردين؟
ساره انصدمت:شفت رقم خالتي وانت تعبان ومابغيت اقلقها علينا ! اصلاً يوم رديت كانت تبي تتطمن اذا وصلنا او لا يعني زين مني رديت
صقر جلس يناظر ساره مايدري وش يرد يحس أنه ضايع لا ناظرها
ساره بهدوء:كنت بسوي غداء بس البيت فاضي ... لاتجيب خدم خلصت البيت مايحتاج تضيع فلوسك
صقر عرف نبرة الزعل اللي في صوت ساره بس مايدري كيف يعتذر؟كيف يبادر؟
صقر: اكتبي الناقص بطلع اصلي ثم اجيبه
ساره وعينها على الكنب اللي ترتبه:حافظ على صلاتك لا يغلبك النوم عنها
طلع صقر بدون مايرد ووقفت ساره تناظر البيت والحال اللي هي فيه وجاء ببالها تركي، لو كان زوجها كيف راح يكون حالهم؟

-عند تركي وعذاري-
تركي:يلا اجهزي حبيبتي بنرجع الديره
عذاري شهقت:وشههههووو؟؟؟؟ليه ياعيني نرجع؟
تركي:ابطيت على فوز! مالها غيري ومدري وش الدنيا بها وش ينقصها ووش مسويه
عذاري:الجماعه والجيران مب مقصرين بعدين حنا ما كملنا شهر تونا !
تركي:الجيران؟؟؟؟ انا ما مت يوم احدها على طلبة الجيران شهالكلام ذا؟هذا وهي خويتس بعدين وشوله شهر! مب لازم نطبقه بالحرف
عذاري:بس النونو مابعد شبع حبيبي! خلنا شوي
تركي ناظر بطن عذاري وابتسم:نعوضه بسفره ثانيه اذا جاء
عذاري بحده:قلت لك ماشبع! خله يكمل اسبوعه الاول هنا على الاقل -غيرت نبرتها- واذا ولد بالسلامه نقوله ان اسبوعه الاول كان برا السعوديه ونسولف له عن سفرتنا ذي ، شرايك؟
ابتسم تركي من سنياريو عذاري اللي اخذته لعالم الأبوه والعالم اللي لطالما تمناه ويربي عياله عكس تربية ابوه له ويعطي عايله الامان ولايعيشهم التشتت والفقد اللي عاشه وطاوعها ومددو سفرتهم لكم يوم زيادة
-في بيت ابو متعب-
بعد الغداء اجتمعو كلهم على الشاهي والهنوف للحين بمريولها
الجده منيره:وراتس يا المطفوقه سرحتي بدري ولا اخذتي فلوستس؟وش افطرتي عليه؟
الهنوف:شسوي جده! مسرحيني ذول من قبل تطلع الشمس تقل المدرسه في القصيم قسم بالله شاديني شده!لدرجة مافيني ابدل يبه تكفى ما ابي اداوم معهم وسعود خاصه
ابو متعب:اجل تبين رويكن يسوق؟ معصي بعدين سعود..
سعود بلع الشاهي بسرعه:يبه قسم بالله مسرحها على الوقت بس تحب الكذب وانشد هيا متى طلعنا هذا واحد اثنين انا وراي الابل بس دام ركان يداوم يعني منيب فاضي احتريها للضحى
ركان:يبه ليه ما اسوق! اللي بعمري عندهم مواتر بعد
ابو متعب كان مركز نظراته على هيا اللي  كانت تعبانه ومعدتها تقلب عليها ووقفت على طول لغرفتها والكل استغرب ولحقها متعب
متعب:هيا بتس شيء؟؟؟ لتس ايام منتي طبيعيه!
هيا:راسي ماهجد من الصبح يا متعب وكبدي
متعب:تبين المستشفى؟
هيا باستسلام:ايه
انطلق متعب يدورعبايتها ويلبسها وطلع بسرعه بعد ما بلغ اهله أنه بيطلع المستشفى
-في الشرقيه-
وصل فلاح لشركة ورقى لمكتب طارق وهمس:اذا ماتبي تنفضح واهين شاربك قدام الموظفين انزل لي تحت يا البزر انا اعلمك شلون تقفل بوجهي
طارق ارتاع من تهديد فلاح الجدّي ونزل معه وصارو بالمواقف
فلاح:ان ما انهيت المهزله الحاصله توطيت بطنك وربيتك من اول وجديد انت كابرٍ راسك علينا من تالي
طارق:وش انهي؟انا مابديت شيء ولا سويت شيء واختك زوجة لرايد ابن ضاري غصب عني وعنك ، تبيها تخلعه؟ هذاك درب المحكمة تبيه يطلقها؟ اطلع الديرة وكلمه ، انا مالي شغل بس واجه ابوي عقبها
فلاح:انت وش موصلك لذا المرحلة؟وش مخليك تتحامل على فرحة المسكين ؟ وليتها وقفت على ولد عمك حتى ابن امك وابوك ماسلم من خبثك
طارق ابتسم:الخبث والله نخبر راعيه ، اجل انا اللي طلعت الحساء اسهر واخرب الدنيا؟عجييييب حالك يا اخوي الكبير يا ابن امي وابوي تغلط وترمي اغلاطك علينا ، على العموم انا موجود عشان ازين حال اهلي بما انك مشغول وطايح بالعسل او بالاغلاط لذلك لاتوقف بوجهي وبشغلي وخلك بحالك دامني متغاضي عنك
فلاح بغضب ضرب طارق على فمه:احشششم عمرك ولمم لسانك يا الكلب!!!
طارق مسح فمه:ابشششششر، جهز عمرك لعرس اختك بعد شهر -قفى طارق بيروح لمكتبه بس التفت لفلاح الغاضب- يا اخوي الكبير اذا عندك اعتراض فمكتب فايز الطايل فوق انا مابيني وبينك كلام ... لاتجربني يا فلاح
فلاح بصدمة:من غاسل مخك انت؟؟؟؟؟؟؟هذا هرج تقوله لاخوك!!!!!
قفى طارق وراح وهو مايهمه من هالموضوع كله إلا أنه يكسر حمد مثل ماكسره وكلم اخته من وراه وصارت بينهم مراسيل