"أثر الهناء حلم يا حمد"

البارت السابع عشر

أما في البيت فكانو كل الحريم مع بعض في المشب وحوالين الجده منيره وزينه كانت ساكته على غير عادتها
دلال:زينه!
زينه رفعت راسها:سمي؟
دلال:فيك شيء؟تعبانه؟
زينه:لا يالله لك الحمد والشكر بس الظاهر خمول البرد شكل بردنا هالسنه شديد
الجده منيره كانت ملاحظه وساكته وهي عارفه ان الموضوع فيه زعل بينها وبين زوجها واسترسلو بالسوالف بعدها والضحكات الدافيه من الصباح البارد وكانو البنات يشرحون لأمهاتهم شلون عاقب سيف العيال ووشلون عصبت الهنوف عليهم ويضحكون ومستمتعين جداً..بجهة السوق كان فايز لا زال جالس بالقهوة و يفكر ويفكر ويهوجس ويحاول يستوعب شلون يزّوج بنت اخوه للولد اللي قتل ابوه!! وليه شايع طلبه هو بالذات أو هدده بالأصح ! قعد يفكر يجيب شيء يقنع فيه سيف بس كل محاولاته فشلت للآن لأنه بكبره ما اقتنع شلون بيقنع سيف؟ أما عند شايع فأتصل على رايد بفرحة واضحه في صوته
شايع:الووو
رايد وهو ساند نفسه على صقر ويتجهز للخروج من المستشفى:هلا عمي شايع؟
شايع:قل لصقر يجهز عمره المغرب ويروح يخطب الموضوع منتهي وخالص
رايد التفت لصقر وناظره بإنتصار:ماقصرت ماقققصرت الله يكثر خيرك ويناولك مرادك ، تم تمممم ان شاء الله-قفل-سمعت!!
صقر بتعجّب:شتخربط أنت؟
رايد:ابو تركي يقول الموضوع منتهي يعني جهز روحك وروح اخطب بيزوجونك وبنحرق قلوبهم ببنتهم الأولى
صقر صد بضيق:لالا منتب صاحي! -التفت له-تاخذ ثار ابوك من بنت؟؟؟؟؟فهمني!!! ووش تبي تقول لأمي!!!حنا ما قضينا من هالطاري؟؟
رايد:ردينا يا صقر؟ رديناااااا؟؟؟؟ قلنا لك محد رف له جفن يوم سال دم ابوي بالبر لين مات محدٍ رحمني ورحمككككك محححححد-كان يضرب صدر صقر-لاتفوت الفررررصة لاتقهر امك واخوك بطيبتك اللي مهيب بمحلها ، انت خذها ومالك شغل بالباقي
صقر:شلون مالي شغل؟ان اخذتها تبي تصير زوجتي!
رايد:ولاهي بتصير زوجتك شرعًا
صقر قرب من رايد:وش ناوي عليه انت؟تبي تدخلنا الحرام؟مو يمكن احنا الظالمين مو المظلومين! مو يمكن ابوي اللي ذبح ذياب مهب العكس!!
رايد مسك بطنه بألم وهو يصرخ:انننااا اللي شففففتتت الحاددددث وشهههدته اننننااااااا لاتجي تسولف على راسسسي ،صققققر!!!!! لاتحدني ياصقر لاتحححححدني وانا مابقى لي من عمر بخليه لسيف والطايل كلهم-اخذ نفس وبدأ يهدا- والبنت خذها لا اخرب الدنيا كلها صدق وحزتها دمي ودم ابوي برقبتك ليوم الدين-التفت يلم اغراضه وتنهد صقر بضيق وهو يشيل اغراض رايد للسياره ويسبقه لها وكان حاط يد على الدركسون ويد على شعره ويهوجس بضيق حول هالطاري عاجز مايدري من يرضي ومايدري اللي قاعد يسويه صح ولا خطأ مايدري ليش قلبه مو راضي يقسى على ساره بالذات ،ركب رايد واتجهو لبيتهم وبدأت امهم تستقبل رايد بحنان واهتمام وصقر طلع غرفته رمى كل اللي بيده وجيوبه وانسدح على ظهره يناظر السقف ويفكر بعمق لين نام.. وبعد العصر طلع سيف من المسجد ولحقه ابو فلاح بخطوات سريعه يحاول يختلي فيه ويفاتحه بالموضوع قبل احد يكلمه من الجماعه او عياله
ابو فلاح:سيف سيييف
ابو متعب التفت :سم يافايز؟
ابو فلاح:معي علم ودي افاتحك فيه بالعزبه خلنا نتوجه لها قبل يصادفك احد ويشغلك
ابو متعب:عساه خير
ابو فلاح مسك كتف سيف:خير.. ان شاء الله انه خير .. مشينا
-بعد ما وصلوا-
ابو متعب مد فنجاله:سم يافايز وش علمك؟
ابو فلاح اعتدل:جاني خطّاب في بنتك ساره وشاريها بالحلال ويبيها على سنة الله ورسولة والرجال ثقه واعرفه زييييين زين وقال لي اعلمك واشاورك قبل يجون بس هاه ! تراه ماينرد ولايعيبه شيء ولاينقصه حاجة من حوايج الدنيا ابد جاه ومال وزين وركادة ودين وبيت
ابو متعب بتعجّب وشك من اسلوب فايز:من هالرجال؟من اهل الديرة؟
ابو فلاح بورطة وهو مايدري وين صقر:ااا لالا مهب منا ولاهوب هنيا حتى ...
ابو متعب:والله وانا اخوك سارة درة وعين ابوها مهب اي واحد يستاهلها مير خله يجي ونشوف وننشد..متى شاورك ومتى بيجـ...
ابو فلاح بعجلة:المغرب! المغرب بيجي ويخطب ومثل ماقلت لك الرجال ماينرد وفي وجهي انشدني عنه -قال بينه وبين نفسه:الله ياخذ عمرك ياشايع ويحفظتس ياساره بس-
ابو متعب كان مستغرب وضع فايز وتحفظه لأسم الخاطب واختلائهم وطريقة كلامه السريعه بس ماكان متخوف ابد وجاهز لأستقبال هالرجال الغريب وياخذ العلم منه شخصيًا وفعلاً رجعو البيت وانتشر الخبر وكانت سارة في صدمة مو معقولة ولا أحد يتصورها ومابين واقع وخيال
هيا:سوير تهقينه تركي رجع؟
الهنوف:تركي! وابوي يقول رجال؟لو تركي سماه باسمه ابوي ما بيعاديه ويسوي سواة ابوه الردي
عذبه:وانتي شدراتس بابوه!!ياطول لسانتس
مزون وهي تمسح الفناجيل:عندي شعور بس اخاف اقوله
ساره التفت برجاء:لاتقوليييينه تكفين لاتقولينه انا مابعد فهمت اللي صار امس وعلى امل ان التصحيح يصير اليوم فتكفين لاتقولين شعورتس خليني اعيش فرحتي لو بالتسذب والخيال
عذبه:ليش كذب وخيال؟ يمكن صدق تركي رجع يخطبتس مره ثانيه
جازي:لو تركي ورا فوز ماجت اجل؟
عذبه:ويععععع لاتذكروني بالغثيثه اللي معها واللي صار
الهنوف:امشو امشو ننظف مجلس الرجال ونجهزه لعروسنا-غمزت لساره-
هيا كانت تناظر ساره وهي تدري ومتيقّنه ان اللي جاي مب تركي وهذا ما كان شعور هيا كان شعور الكل وشعور ساره بعد بس كانت تكذبه ماودها تنجرح وتجرب احساس الخذلان واستسلام تركي السريع، والحال عند زينه كان لايوصف وزعلها زاد عن اول .. وبغرفتهم وهي تجهز اغراض ابو متعب
زينه:ومن هاللي تقدم! تعرفه؟ يعرفك؟ولا بتوافق عليه عشانه من طرف فايز بس!!! ياسيف علامك! وش غيرك؟
ابو متعب:لاحول ولاقوة إلا بالله يا ام متعب انتي اللي علامتس! هالحين انا قلت بوافق؟انا قلت بزوّج ساره؟رجال وجاء يخطب وش تبيني اقول؟لاتدخل بيتي وبنتي محيرة للجدار؟لاهي لولد عمها ولاهي لولد الجيران وان جاء نصيبها لو مع هالرجال زوجتها
زينه:وتركي وش فيه يوم ترده!!
ابو متعب بضيق وبحده:تركي فيه ان ابوه شااااايع سكري الطاري بس
زينه جهزت اغراض ابو متعب كامله بصمت وطلعت من الغرفه وهي تشرف على قهوة ساره وتناظرها
ساره ابتسمت:هاه علامتس يمه؟
زينه:صرتي عروس يا امتس والخطابه يجونتس من كل ديرة! الله يوفقتس بس-صدت عنها زينه وراحت تشوف المجلس والجده منيره-
اختفت ابتسامة ساره وتلاشت احلامها وخيالاتها ومواساتها لنفسها وهي تناظر امها والعتب طالع من عيونها لين اختفت امها من قدامها ودخلت هيا
هيا:سوير بسم الله عليتس شبلاتس؟
ساره بخنقه:مهو تركي يا هيا !
هيا بأسف: ماتدرين يا سوير يمكن انه اطيب من تركي! ويمكن هالخطبه كلها ماتتم ! لاتزعلين على نصيبتس ترى الله اللي يسوقه لتس مب البشر والله يا ساره ما يعطي الا الزين ولا؟
ساره:منتي بحاسة فيني وانتي من نصيب متعب-صدت ساره بدون ماتصيح حتى وراحت تكمل شغلها تاركةٍ هيا وراها بعد كلامها وبدأت بدور تضبط قهوة البنات وجلستهم في المقلط فوق وشارف العصر على الإنتهاء وكلهم التمو وتجمعو فوق والعيال كانو نصهم في الحوش ونص في المجلس وابو فلاح يعيش اصعب اوقاته واكثرها توتر مو عارف وش قاعد يصير وخايف يدري ابو متعب ان الخاطب هو ولد ضاري وهو ماحسب حساب عاقبة هالموضوع .. والحال ماكان يختلف كثير عند صقر اللي دخلت عليه امه وهو لازال نايم وصحته بالقوه
شريفه:قم يا معرس قممممم ماصدقت انك تنوي العرس واخرتها نايم ! قم يا امي وفرحني فيك يلا
صقر قام يفرك عيونه وهو ناسي الموضوع من بعد ازين حلم حلمه بحياته كلها :اي عرس يمه شسالفه؟
شريفه:صقققر! ههههههه يلا يلا اجهز ما بقى شيء على المغرب وانا ابنزل اجيب لك العود الازرق وابخرك واسنعك وادعي لك يا يمه -طلعت بس رجعت له-قممممم
صقر ابتسم:زين يمه هذاني قمت -فرك وجهه بيدينه وتنهد ودخل يتروش ويتجهز تجهيز بسيط ما تكلف فيه وصقر كان وجهه سمح والطيبه باينه فيه وعقله يغلبه ويحكمّه في كل المواقف-
شريفه دخلت بالمبخر وعيونها مغورقه:عسى الله يكتب هالبنيه من نصيبك ويوفقك معها ويكتب لك الحظ الزين والتييسر يا امك
صقر:يمه الله يهديك وراك تصيحين! ان صحتي بكنسل الشغله ترى
شريفه ضحكت:لالا كل شيء ولا انك تهون اعرس اعررررس وفرح قلبي فيك وخلني اشوف عيالك قبل الله ياخذ امانته،خلني اشوف احفادي واشوف بيتنا حي بالاصوات والصغار وعقبال اخوك رايد ياكريم
صقر حاول يخفي الموضوع عن امه عشان ما تتكدر وما تنصدم بتفكير رايد:ان شاء الله يمه ان شاء الله ، ادعي لي بس والله يرحم ابوي -باس راسها وطلع يصلي المغرب ثم يتوجه لبيت الطايل-
-في بيت فوز وتركي-
فوز:اقول تركي
تركي وهو يحسب في ورقه عنده:هممم
فوز:منصور وش يبي بك البارحه يوم خذاك؟
تركي:رحنا نسمر مع العيال
فوز:وعيال الطايل؟
تركي رفع عيونه:علامهم عيال الطايل؟
فوز بتعجب:موجودين!!!
تركي:ايه موجودين واخوياي قبل يصير هالطاري علامتس؟تبيني اقطعهم؟
شايع بصوته العالي وضحكته المرتفعه قال من ورا الباب:افتحو يا الضعوف افتححححو
فوز فزت:صوت ابوي!!!!!!
تركي:اي والله ابوتس!!!-تقدم تركي يفتح ودخل شايع وهو يناظر البيت الشعبي البسيط اللي عياله فيه وهو يضحك وقال بأستفزاز-
شايع:تدري يا قليل المروه ويا العاق بابوك وش بيحصل هالحين؟
تركي:يبه تعوذ من ابليس واقلط داخل
شايع:اترك عنك سوالف المرجلة والكرم منتب يمها مير خلصني تعرف وش بيصير ولالا؟
فوز:يبه ادخل الناس تناظرنا علامك
شايع:وانا متعمد اوقف هنيا وتشوفون اللي بيصير هالحين .. -بهالاثناء كان صقر يزين شماغه قبل يدخل حوش الطايل وقفل سيارته ودخل- شفتو هالرجال؟هذا رجل ساره الطايل
فوز شهقت وناظرت تركي وتركي كان يناظر بيت الطايل اللي قدامهم ويناظر هالرجال بتمعن مهو مستوعب ولا مصدق ان هالفعل يطلع من ابوه
شايع:بلعت لسانك هالحين؟ انا جاي اقولك تنسى الطايل كل ابوهم يا الردي مب بس بنتهم اللي راحت عليك
فوز:يايبه انت وش سويت!!! وش سويت! حرام عليك والله انه مب هين اللي تسويه
شايع:اسكتي بس ياكثر هرجتس وياشين طبع امتس يوم انه لحقتس-طلع من بيتهم وهو يضحك على حال تركي-
فوز ركضت وراه تقفل الباب والتفت لتركي:تركي !
تركي:لاتلحقيني..-راح يطق باب بيت منصور-
فوز:ياحسرة قليبي عليك يا اخووي
منصور فتح:تركي! علامك وش هالطق!
تركي:تكفى يا منصور النار بقلبي وفيني كلي
منصور:ولد وش العلم!!!
عذاري طلعت ورا منصور:جاب الاغراض؟؟
تركي صد بسرعه ومنصور دف عذاري للبيت:ادخلييييييي!!!!-طلع منصور وقفل الباب وراه ووقف هو وتركي بنص الحاره-شفيك انت؟؟
تركي اشر بعيونه لبيت الطايل:الليلة خطبة ساره يامنصور
منصور:ساره بنت سيف؟هي اللي خطبتها البارح؟؟؟
تركي:هي .. هي وتدري وش حارقني وموتني؟ابوي اللي حرمني منها مهب سيف ! لا والله محشوم سيف
منصور انصدم بس تظاهر القوة:هونها وتهون ياخوك والبنت تلقى اطيب منها مهب اخر بنات المسلمين هونها! بكره ازوجك اربع غيرها وراك شوي وتصيح! 
تركي:شلون اهونها !!!!!! راحت من يديني !!!! والله لا اربع ولاعشر يحلون محلها ! 
منصور اخذ تركي لزاوية بعيده قبل احد يسمعه وتخرب سمعة ساره ويزودون الناس كلام ..
منصور:صاحي انت تقول هالكلام بنص الطريق! لوطلعو اخوانها وسمعو هرجك وش بيصير!!
تركي بضيق:هذا اللي ضيع احلامنا من يدينا ! هرج الناس ووش بيقولون اهخخخخخ ياعلة بصدري ويا نارٍ تاكل بقلبي تكفى يا منصور دلني قبل اموت مكاني دلني وقل لي وش اسوي
منصور:اذكر الله وخلنا نطلع من الديرة ونهدا شوي وندور لنا حل حزتها حنا ما بنطلع بشيء واحنا بهالمكان امش امش .. اركب يلا!
-راح تركي مع منصور بموتر منصور وطلعو من حدود الديرة وقبل الرياض وطول الطريق وتركي يتنهد وفاتح كل طيق السياره ويقلب باغاني السيارة وبهواجيسه وافكاره اللي براسه ومنصوره تاركه على راحته ما وده يزود كلام والكلام اللي برأس تركي كثير وواجد من غير شيء اصلاً فقرر منصور يسكت ويخلي تركي على راحته لين يوصلون لوجهه مناسبه للنقاش .. أما في بيت الطايل طلعو عيال ابو متعب يرحبون بالعريس في الحوش وهم يناظرون بعضهم شاكين بملامح صقر اللي يحسونها مألوفه عليهم وهم مايعرفونه اصلاً بس تجاهلوا الموضوع واستقبلوه احسن استقبال ودخل صقر المجلس والبنات كلهم كانو فوق ومقفلين انوار المقلط ويناظرون صقر بتمع وكل وحده تبدي رأيها إلا ساره جالسة بالزاوية والهم ماكل قلبها أكل ما ودها تصير حلالٍ لغير تركي-
هيا: يا زقننننه زقنااااااه والله مزيون
حصه:بنت!!! مابقى على عرستس غير ثلاث ايام يالمهبوله شهالحتسي اللي تقولينه!!
زينه ابتسمت وسكتت
دلال:محدٍ بياصل لمتعب في عينها..زحو عن الطاقه ابشوفه معكم
مزون ناظرت ساره:يوه يا ساره احسه ثقيل طينه مدري شلون
هنوف:ثقيل طينه!!! هذي نقولها لتس مب له -ناظرت ساره-وافقي يا سوير مايتفوت
عذبه:سوير ملامحه قرّيبه من ملامحتس تدرين! عيالكم بيصيرون يهبلوووووون حيل
دلال:والله ياهو مزيون صدق
جازي:والله ان صادونا عيال عمي سيف واخواني وحنا نعاين ان يذبحونا
زينه:معكم درع حصين-ناظرت في دلال وضحكت-
-ناظرو البنات عمتهم دلال وضحكو ورجعو يجلسون بجلسة وحده والجده منيره كانت ساكته وتناظر زينه وساره وهي حاسه ان هالخطبه وراها سالفه وما تطمنت بس قررت تسكت هالحين وتشوف وش النهاية-
-بالمجلس-
فز ابو متعب أول ما شاف صقر والتفت يناظر ابو فلاح بحده وهو يناظر عياله وصقر بس تحكم بنفسه وغضبه وهو يحاول يمشي اول لقاء له بعدوة ، وجلس وجلسو كلهم وبدأ السؤال عن الحال والأحوال والعيال يصبون ويكرمون صقر بكل أنواع الكرم والحفاوه اللي متربين عليها وهذا اللي شكك صقر بالموضوع ولوهلة كان بيهون ويطلع قلبه ما طاوعه يكسرهم ببنتهم بس تذكر رايد ودم أبوه وصمل على خطته وبدأ يعرف بنفسه وهنا كبرت عيون الكل من ابو متعب لعياله لعيال ابو فلاح لفارس وعمر ومشعل الكل تعجّب وكلهم عندهم نفس السؤال (شلون؟)
صقر بعد ما انهى تعريفه بنفسه قال:وأنا مثل ما قلت لكم اخوي طريح والوالد متوفي ولا لي عم ولا خال وجيت بنفسي وأظن جيتي بوجهي تكفي ، جيت اخطب بنتك الكبيره يا عم لي على سنة الله ورسوله وهذا أنتم عرفتوني وكل شروطكم مقبولة كثيرها وقليلها وكبيرها وصغيرها انا جايكم وانا شاري نسبكم ، يمكن بعضكم يعرفني من بعيد ولا من قريب وعندكم تساؤول عن طاري قديم وجديد لكن انا مالي فيه أي علاقه وعفى عما سلف جيت وانا ناويها صفحة جديدة واللي تأمرون به أنا حاضر وهذا علمي وسلامة الجميع
رد ابو متعب بهدوء مهيب: الله يحيك وعلمك ويقربنا ويقربك من النسب الحلال والطيب ، نبي نشاور البنت ونرد لك إن شاء الله
-كل اللي بالمجلس تعجبو أكثر وأكثر من وين طلعت سالفة"نسأل البنت"؟ ليش ابو متعب يتكلم بهدوء غريب ومرعب؟ معقولة بيوافق على صقر بن ضاري؟وابو فلاح ليش متوتر هالكثر؟ هذي كانت الأسئلة اللي تدور في اذهانهم كلهم بس قطعها ابو متعب وهو يقوم الجميع لصلاة العشاء وراحو سوية للمسجد وحمد بالذات كانت كبده تحترق وهو بس شاك بعلاقة صقر ورايد -
انتهى💗