"أثر الهناء حلم يا حمد"

البارت الثامن والخمسين

متعب تنهد:توكلنا على الله
سرور:لاتضيق يا متعب لابد تفرج الحين متجه احقق وأبري حمد..ما ودي اقولها لكن لاتنزلها
متعب ناظر القزاز على يمينه:لاطاحت الدمعة من عين الصبور أعرف أن لوعة الصدمات تمادت
تنهد سرور وهو حاس بضيق متعب اللي ماتجاوز صدمته بمعرفته لسالفة القصة القديمة إلا وطلعت له قصة حمد وورطته واللي مرتبطة بالجميع من عمه وسرور وساره وهيا...اتجهو للمركز التدريبي للأمن العام ودخل سرور بصفته ضابط وماسك قضية الطالب حمد دخل وطلب التحقيق مع بندر وسمحو له يقابلهم وطلع لهم وهو متوتر ونبضات قلبه يسمعها اللي مقابله
متعب:انت بندر اجل!
بندر ناظر سرور وهو يعرفه:كلامي معك بس
متعب:أنا متعب اللي معتزي فيه وطالبه بالأسم
بندر التفت على متعب وحس بالأمان وهو مايعرفه بس يثق بحمد
متعب:قل الحقيقة وكل اللي عندك واللي تعرف وسلّم حمد.. اخوي مبلي وانحكم عليه ظلم بالسجن ستة شهور وكلنا نحتريه يطلع ويعرس لاتهدم أحلامه وعلمنا باللي تعرف أنت ما بلغت إلا وببطنك علم
بندر:لكن اللي يبيها اعرست
متعب ناظر سرور :هااااه؟؟؟؟
سرور بدأ يشك بالأتصال اللي وصله
بندر:كلمتني بنت تستفزع فيني تحسبني حمد تقول زوجوها غصب عنها ...
متعب:ابك انت وش تخربط به!!!!!! سرور! حقق معه واضبط لسانه
بندر لمتعب: رايد اللي متزوجها ومورط اخوك
متعب ناظر بندر والشرار يطلع من عيونه والدم يفور فيه وطلع برا يتصل على طارق
طارق:نعم؟
متعب:سويتها يا طارق!
طارق وقف:وعليك السلام! وش سويت؟
متعب:وانا احسبك تطقطق على سعود والكلام اللي حصل بينكم مزح عيال واخوان اثاري كل ذا بقلبك علينا! أنت وش جايك؟؟وش اللي صااابك وبلاك يوم تسوي سواتك!!!
طارق فهم:اجل وصلكم العلم ؟ أنا ماسويت شيء كل اللي عملته اني ربيت اللي ما تربوا
متعب:اللي ماتربى والله لسانك المنفلت والله لولا حشمة هيا وغلاها لا أساويك بالتراب مير هين يا طارق و اللي رفعها سبع ووطاها سبع أن ترجع عذبه لحمد لو على قص رقبتي أعلمك من اللي يمشي كلامه يا عديم المروة والرجوله مطلع حيلك وقوتك على اختك الضعيفه!مندس مكانك ما واجهت الرياجيل وبينت اللي عندك لكن بلغ أبوك وقله له الحرب قبت بينه وبين خلفة ضاري خله يطلع نفسه بنفسه مالنا شغل فيه وحريقه تحرقكم كل ابوكم

سرور وهو يسجل اعترافات رايد كامله: بوش يهددك رايد؟
بندر: بأهلي ... أمي واختي الوحيده حنا ناس على قد حالنا ورايد وعدني يعيشني عيشة ملوك لو ساعدته بموضوع بسيط وانا وافقت ما كنت ادري ان هذا هو الموضوع وان فيه مخدرات
سرور:وصلك منه شيء للآن؟ أيّ حواله أو كاش؟
بندر:لا بس وفر لي سيارة توصلني من الطايف للرياض وتحت رقابته بعد ما اقدر اتصرف فيها بأريحيه
سرور:كيف وصلت لشقتي؟
بندر تنهد بضيق:تكفى امي واختي احفظوهم عن رايد واجاوب
سرور:تكلم يا بندر دام النفس عليك راضيه وساكنه للحين ، بالمكسيك حنا؟ أنت في السعودية اهرج
بندر: قبل تبدأ الدورة وقفت عند شقتكم ومثلت العطل في الموتر عشان اخاوي حمد للميدان وانزل اللي معي في سيارته وقال لي أجنب سيارتي عن الخط والحقه اركب معه ومن ركب سيارته طلعت للشقه فتحتها ونزلت فيها كمية وفي موتر حمد كمية و الباقي...
سرور:الباقي وين؟وكيف فتحت شقتي؟
بندر:فتحتها بسيم
سرور:لك سوابق الظاهر ! ، وين حطيت الباقي؟؟؟؟
بندر خنقته العبره وقال بصوت متقطع:الباقي في حمـ...
دخل متعب وسمع النهاية ولا شعوريًا فرغ طاقته السلبيه وغضبه كله في كف محمّل بقوة عظيمه على عين بندر وخشمه ونص خده، فز سرور يبعد متعب ويطلعه وهو يحمل نفس مشاعر الغضب على بندر لكن هذا وقت العقلانية والضبط للنفس
متعب وهو يصارخ: ما سمعتتته يا سرورر!!! هوووو اللي مسمم حمددد بهالسم هو!!! وحمد ياعزتي له يقوول ما اشك ببندر !!!! فكنني الله يرحم والديك خلني اهينه وافرك وجهه بالأرض فكننننني
سرور صرخ: متععععععب!!!!! خلني اخلص شغلي واضبط نفسك لاتطلعنا من قضية وتدخلنا في الثانيه!!!!خلصنا عااااد ياخوي اذكر ربك وابعد!!
جلس متعب بحرقة وضعف بنفس الوقت على البلاط ودخل سرور على بندر الخاااااااااااااايف
سرور: تعترف أنك أنت اللي مورط حمد ومورطني بهذي الشغلة كاملة واللي على راسك رايد بن ضاري فقط؟
بندر:اي نعم اعترف وراضي انسجن وانجلد وانقص بعد لكن امي واختي لاتخلونهم مالهم غيري تكفى تكفففى
سرور: وقع على أقوالك وقم معي
بندر:فيه واحد هنا معاون رايد بعد
سرور: من هو!
بندر: الرقيب *****
سرور طارت عيونه وهو يسمع الأسم! هو نفسه اللي بلغه أن حمد متورط وسيارته محروقه
سرور:متأكد!!!!!
بندر:متأكد وهو اللي مراقب علي ويأمرني بكل شيء وهو اللي سامح لي بالجوال
سرور:ومعك جوال بعد!!!
بندر:اجل شلون دريت ان البنت اللي يبيها حمد تزوجت غيره
سرور:قم اجل للمركز مع اقوالك وعيدها هناك بالحرف الواحد عشان تنجي نفسك وامك واختك وتكمل في دورتك وتتخرج وتعز اهلك بمال حلال ما يسألك ربي عنه قم
قام بندر بعد ما ارتاح لسرور وهو اللي ناوي يدمر رايد عقب ما أهانه وطلع معه لمركز الشرطة ومتعب معهم وانفاسه مسموعه للكل وسرور يحاول يضبط الطرفين بكل هدوء وأول ما دخلو للشرطة أتصل ابو متعب على متعب
متعب: لبيه يبه
ابو متعب:متعب! السلام عليكم والرحمه
متعب:وعليكم السلام ورحمة الله وبركاته شلونك يبه
ابو متعب:ابك اخوانك وش يقولون؟ طالعٍ للرياض تقضي! حنا في قل من المحلات يوم تقضي من الرياض!
متعب مسح وجهه وتنهد:يبه حنا كثرنا في البيت ومجبور اقضي من برا مقضى يكفينا جميع استريح انت هالمره
ابو متعب: متى بتجي اجل! وعلامه صوتك
متعب:هاليومين ان شاء الله لين تكتمل الاغراض وابد عالق بهالزحمة لو تشوفها عينك اذرفت والله ما تنطاااااق يبه ، الا طمني عنك؟ جاء عمي؟
ابو متعب:عساك على القوة يا ابوك ، حنا بخير وعمك مابعد جاء يقول طاريٍ له شغل عجل يبي يخلصه ويجي ان شاء الله يفطر اول يوم معنا
متعب عقّد حواجبه بغضب:زين زين اجل انا استأذنك يبه الاشارة تبي تفتح في امان الله -قفل متعب من ابوه- طاريٍ لك شغل يا فايز هاه ! والله اني بحلقك لين استرد حلم حمد وهناه

-في الديرة-
عند عمر وسعود بالمحل
عمر:سعود خل عنك هالاسمنت والبلوك وعلمني ليه متعب طقك وش سويت؟
سعود: الله أكبر ! طقني مرة وحده! بعدين أنت اللي علمني وش مروقك أمس لاتحسبني ما انتبهت
عمر ابتسم واخذ دفتر الفواتير وقام يرسم خطوط فيه: والله ياسعود ما ألوم حمد اببببببببببببببد هو الوحيد اللي كان فاهم فينا يوم قضى عمره بالحب والعشق كنا فارغين صراحة
سعود ابتسم:وش طايحٍ عليه! ماصدقنا الاولى تعرس وتذلف منك
عمر: لالالا هالمره ثاببببته وبإذن الله اخذها
سعود انتبه للدفتر:وعساااااها الكسسسسر يا الكلب انت واللي تحلم بها
عمر ناظر الدفتر اللي انحاس من الشخابيط:والله ما وعيت بعمري ياسعود
سعود:اكييييد ياحمار اكييييييد مابتحس الحين شقول لأبوي ان نشدني عن المحل والفواتير ؟ هاااه!!!!
منصور:اذكرو الله يارجال وش هالصوت
سعود دف عمر:خذه ولاتشوفه عيني واعطيك الفين
منصور ابتسم:احلف!
سعود:دين في رقبتي
منصور اخذ عمر وهو وده بريحة مزون:امش امش اجل هذي فيها الفييين ياحبيبي
عمر:تبيعني يا سعود!!
سعود: برخص التراب بعد اذلفففف الله يقطعك يا البزر
منصور:هههههههههههههههههههههههههههههههههههههههههههههههه جلى همك يا سعود صار عندي
عمر مشى مع منصور وهو يضحك من سعود : علومك؟ مبطين منك والله وش جديدك اعرست مع اللي اعرسو ولا للحين
منصور فز قلبه من السؤال:لا والله للحين عزابي و اطلب الله الستر
عمر:تطلب الله واصبعك تدندن على العود
منصور:الله يغفر لنا عاد لا تستقعد
عمر:والله مدري من بترضى بك بس صلاتك تشفع لك وخالي خير شاهد
منصور اكتفى بابتسامه بعد كلام عمر وكملوا طريقهم وعمر اللي يسولف

وقضى النهار على هالحال وبعد صلاة المغرب كان الكل مجتمع عند تلفزيونه ويحترون خبر رمضان والشوارع فاااااضيه
في بيت ابو متعب كان الكل بالصاله عند التلفزيون والبنات جالسات بالطرف وعليهن جلالاتهن وبراقعهن والعيال قريب من التلفزيون والهدوء مسيطر عليهم ويترقبّون الإعلان السعيد
المذيع: أعلن الديوان الملكي أن يوم غدًا غرة شهر رمضان المبارك جاء ذلك بعد رؤية عددٍ من الشهود العضول لهلال شهر رمضان هذه الليلة.....
الكل قام يصفر ويبارك ويسلمون على بعضهم بحماس وعلى الجده منيره والخال سيف ابو متعب
ابو متعب: اجل تولمو بكره ان شاء الله بعزم للفطور حريم ورجال وعساكم على القوة
دلال:ازهل يا اخوي والله يكثر خيرك وعساها عادةٍ ماتنقطع
ابو متعب: سعود اطلع السوق عقب الصلاة وقضّ لبكرة لين يجي متعب بمقضاه زين وخذ ذولا معك -ركان ومشعل-
مشعل:انا مدري ليه خالي ما ينسى وجودي.. الشهر عليك مبارك واتمنى تعتقني بهالمناسبة
او متعب: ماسويت شيء من جيت
الهنوف:الشهر مبارك عليكم كلكم
فارس:علينا وعليكم يتبارك .. عندي عاده احبها من يومني بزر ولا تحلى غير بالديره فعشان كذا بقوم اجددها وابارك على الجماعه بيت بيت من يخاوني يا عيال؟
سعود: اناااا طبعًا
ركان ومشعل:وانا
عمر:يلا مابقى غيري
هيا قامت للمطبخ هي والعمة دلال ومزون والهنوف وبدور وزينه وقامو يستعدون ويكتبون الناقص ويطلعون المواعين ويبدون يجهزون للسحور وبدأت الثلاثين العزيزة من هاللحظة❤️

مُستعدين للخِتام والنهاية!