"أثر الهناء حلم يا حمد"

البارت الستين

قامت هيا من حضن الهنوف وهي مخططه ومقررة تحل الموضوع بنفسها وتعذّرت بتعب الحمل والوحم وجلست بغرفتها أما مزون قامت تسوي السحور وجلسوا الباقين جلسة عائلية وينتظرون السحور بغياب ابو متعب ومشعل وركان اللي كانو نايمين وانفتح طاري الزواج
دلال:عاد دام الطاري انفتح
مزون مسكت راسها: لا يمه لااااا
الهنوف ضحكت: اي طاري عميمه؟ لايكون فيه عرس!!! اذكرو الله تكفون خلونا نصوم مع المسلمين
الجده منيره:قوليييي يا دليّل قولي
فارس قام وهو يضحك:انا انسحب من جلستكم
زينه ضحكت عليه: على البركه على البركه ، من منهم؟فارس ولا مزون
بدور:لالا مزون تبي تعنس دامها تحتري محمد عبده
عمر لفارس:اقعععد تكفى خلنا نخلص منك ويجي دوري
طلع فارس وهو بطبيعته هادي وسحاوي وتركهم وراه
دلال:فارس الله يسعد قليبه ابزوجه إن شاء الله
عمر: الحمدلله ياااااااارب الحمدلله استعجلي يمه تكفين
سعود نغزه وهمس له:منن اللي قالبه موازينك انت؟
عمر تلفت حواليه:عسى ماحولي فواتير ولا دفاتر قبل افضفض؟
سعود:هههههههههههههههههههههههههههههههههههههههههههه
دلال للبنات: شرايكم بوضحى يا بنات؟
البنات شهقو بصوت واحد
زينه ابتسمت:والله ونعم فيها بنت حلال وعاقله وسنعه اطيب من اخترتي
مزون:والله ياهي نفس هدووووء فارس! تلييق عليه
بدور:بس بيتهم بيصير ممل!
الهنوف:اي والله من هالناحيه اوافقكم محد مونس صدري بالبيت غير متعب وهيا يازقنننننهم زقناه صدق لا قالو الحي يحييك الله يعينكم انتم
عمر:بسيطه بسيطه انا بعوضهم ان قالها الله
بدور:انت مابنزوجك لين تعقل فاسكت خلنا نتناقش بعدين ذي جلسة حريم وش مقعدكم معنا؟
سعود بصوت خافت:يالليل الليل هرجت احبتس وش يسكتها
كلهم تذكرو طلعتهم للعزبه وهالموقف وضحكو: ههههههههههههههههههههههههههههههههههههههههههههههههههههههههههههههههههه
بدور: خلاصصصصص اعتقوني منها تكفون العتب على السمع
دلال ابتسمت لزينه: وانتم يا بنات شلون تشوفون وضوح وانتي يمه ؟اثق برايتس
مزون غمزت لأمها:دام صرتي تدلعينها يعني دخلةٍ مزاجتس وبقوووه مالنا كلمة
الجده منيرة: والله ان وضحى بكفه وبنات هالجيل كلهن بكفه وفارس كفو ويستاهل الكفو انا اقول اقدمي
الكل صفّر بعد كلام الجده وصفق بحماس وفارس كان في الحوش يسمعهم من فضوله وانتهى به الموضوع وهو يضحك بمشاعر مختلطة ما بين توتر وخجل وفرحه .. تسحروا كلهم وانتهى يومهم بهالنقاش ونفس الحال في باقي بيوت الأبطال وبسيارة متعب وسرور اللي كانو راجعين الديرة وتاركين وراهم حمد وبندر في الحبس على ذمة التحقيق
سرور:فتره وتعدي يا متعب لاتاكل نفسك بالهم والحمدلله ان بندر اعترف وكتب اقواله ووقع عليها والشهود موجودين والرقيب يبي ينمسك وينوخذ حق حمد وينتهي فساد البلد
متعب تنهد وهو أخر شيء توقعه أنه يمسك الخطوط عشان يزور اخوه في السجن ويحاول يطلعه !
سرور:نتسحر في الرياض؟الظاهر معد يمدينا على الديره
متعب : إلا مر بي على اسواق الجملة دام باقي معنا وقت نسيت أن ابوي موصيني على اغراض ، وانت تسحر على راحتك يا سرور انا منيب مشتهي شيء
سرور:اترك السحور الحين .. الشايب يدري؟
متعب تنهد بصوت عالي: شلون ابدأ بها ووشلون أنهيها؟ أنا ما تحملت وحده شلون ابوي يتحمل الثنتين؟ (يقصد زواج عذبه برضى فايز وحبس حمد)
سرور:صعبة لكن بكّر بها ان طعتني
متعب:خير إن شاء الله إن رحت الديرة شفت وضعه ودورت لي حل
- اتجهوا لمحل كان فاتح وقضّى متعب كم غرض بسيط بحكم سيارة سرور الصغيرة وتسحرو بمطعم على الطريق وكملو طريقهم للديرة ووصلو بعد اذان الفجر صلو ونامو ودخل متعب غرفته وهو هلكاااااااااان وتعبان من السهر والهم وارتمى بفراشه ودخلت هيا الغرفه بعد ماطلعت من الحمام وشهقت يوم شافته توها تحس الأمان دب فيها -
هيا :متعب جيت!!!والله اني اشتقت لك وراك رحت مـ...
متعب بصوت مكتوم:بعدين يا هيا بعدين عاتبيني نفسي محمّله باللي يكفيها
هيا فهمت من نبرة متعب انه يصيح او مرهق فقررت تسكت لين يصحون ويتكلم بنفسه وهيا راحت تصلي الفجر وتنام ...
بغرفة البنات
مزون وهي جالسه على السجادة:كم نسوي صنف اليوم دامها عزيمه؟
الهنوف:الجيران بيشاركون أكيد بس علينا الثقّال
بدور: العصيرات علي
الهنوف:جعل الرفلا ما تحيا
مزون مسكت راسها:اول دعوه باول نحر رمضان! اعوووذ بالله استغفري الله لا افقد اختي الحين
الهنوف:ههههههههههههههههههههههههههههههههه معترفه انها رفله اجل؟
بدور:الشرهه على اللي يساعدك يا حيواانه!
مزون:صيااااامكم صياااامكم! ياربي وش ذا البزارين اللي انحطيت معهم!
الهنوف:يلا يلا نرقد الحين عشان اوريتس السناعه الظهر ان شاء الله وابكيتس
بدور:تبكيني؟ ما يتعب غير يدينك حبيبتي
مزون قفلت النور ولمت السجادة وغصبتهم بالنوم قبل يتهاوشون وعلى الظهر قامو كلهم يفرشون الزل الأحمر بنص الديرة وبالشارع اللي بين البيوت والعيال يرفعون العقود فوق البيوت كان عمر في بيت ابو متعب ويربطها من جهته وحمدان يربط من جهته وهو يبتسم لعمر وتركي السياف موصل العقد من بيته لبيت منصور وكملوا على هذا النحو وتسلسل البيوت إلى المسجد وباقي العيال كانو يحضرون التمر بصحون ويغلفونها ويوزعون الماء بأمتداد طولي والصغار يساعدونهم شوي ويأذونهم شوي وركان ومشعل لهم بالمرصاد وريحة الطبخ بدأت تنتشر من كل بيت
-في بيت تركي السياف-
عذاري ركضت تستفرغ ورجعت تهاوش فوز:لاتطبخيييين البصل! ريحته تصرع
فوز تنهدت: شلون اكشن!!!! عذاري !!! مو منطق اللي تشكين منه ! سولفي بالعقل او اطلعي من مطبخي رجاءًا!!! هذا الناقص والله
عذاري:تطرديني؟؟؟؟؟بيت رجلي وقلت لتس ريحته قلبت كبدي خلصنا عاد كبيه
تركي دخل بعد ما ثبّت العقد:شبلاكم اصواتكم لأخر الشارع؟
فوز بعبره في صوتها: تركي انا تحملت اللي يصير بما فيه الكفايه! وخر ناسك عني وخلني اصوم واطبخ مع المسلمين
تركي ناظر عذاري : وبعدين يا عذاري؟ وبعدين؟
عذاري اللي كانت مكذبة فكرة حملها وماتدري أنه وحم حقيقي:هيييييي انت الثاني وش اللي بعدين؟ انا ما ابي اشم بصل بهالبيت عاجبكم اهلاً وسهلاً مب عاجبكم طلعني ببيت لي لحالي وفكني
فوز:احدٍ ماسكتس بالقوة؟؟؟؟؟اطلعي
تركي:بس يافوز انا موجود ، عذاري تاخذين علاجاتس كامله؟يمكن هذي سوالف حمل مدري وش تسمونها
عذاري بنفسها:(هذا اللي مصدق وطايح على وجهه) -شمّقت وطلعت وتركتهم وهي كبدها تقلب عليها من ريحة الطبخ-
فز ناظرت تركي بزعل: ياحسرتي لا ابو ولا اخو ينشد فيهم الظهر ! عاجبك كلامها وطولة لسانها !
تركي باس راسها:حقتس علي واعذريها يابنت الحلال حامل وتعبانه لاتزعلين وانتي العاقله
التفتت فوز على كشنتها واعطت تركي ظهرها وهو طلع يساعد العيال برا ويطلع من جو البيت المشحون
-في مطبخ ساره وشريفه-
شريفه كانت تعجن للقيمات: ساره يا امي استوت الحشوه لفي السمبوسه
ساره تباطت نومة صقر:ابشري يا خالتي بس ثواني واجيتس ، -دخلت غرفتها وشافت صقر منسدح ومغمض عيونه لكن مو نايم وقربت منه حطت يدها اليمين على جبهتها ويدها اليسار على جبهته وفتح نص عينه يناظرها وهي مغمضه تبي تتأكد من حرارته بس بحركة عفويه سحب يدها وباسها في باطن الكف-
ساره شهقت وسحبت يدها:روعتتتني
صقر ضحك واعتدل بجلسته:دايم وانتي مرتاعه مني ، وش تسوين؟
ساره بخجل:تباطيتك وخفت عليك احسبك مريض
صقر ناظرها بأمتنان
ساره ضحكت:نظراتك هاليومين مو مطمنتني وش وراااااك؟
صقر:وراي إني حظيظ بتس
ساره:اعوذ بالله يا صقر لك شهر مخيط فمك يوم اقبل الصوم نطقت بالعسل! -قامت وهي تضحك-
صقر:وش تسوون؟
ساره التفتت عليه وهي مبتسمه:نلف السمبوسه
صقر:بساعدكم اجل واطمنتس علي
ساره:هههههههههههههههههههههههههههههههههههههههه ما بقول لا تعال لف معي باخذ لأهلي أكبر كمية لركون
صقر ابتسم على خفيف ولحقها وضحكت شريفه يوم شافته مع ساره
شريفه:طلبتي معاون اجل؟
ساره ناظرت صقر:ما استغني عن رجلي بالهين والشديد ياخالتي
دبّت الكلمة السعادة في قلب صقر وتأكد أن ساره ما بتتركه لو عرفت الحقيقة وجلسو الثلاثه على ارضية المطبخ وبتّو سفرة وبدو يلفون السمبوسه والراديو شغّال عندهم