"أثر الهناء حلم يا حمد"

البارت الخامس والعشرين

طلعو العيال للصلاة في الجامع الكبير اللي يجمع الديرتين وأكيد الكل بيحضر صلاة الجمعه والجميع اجتمع هناك ما غاب غير متعب وفلاح العرسان والكل اقبل يسلم على ابو متعب ويبارك له بزواج متعب البارحه ويتطمن على حاله تاركين فايز أو مو معطينه ذاك الأهتمام مثل ابو متعب لأنه عايش بينهم ومنهم وفيهم فعلاقتهم فيه وطيدة أكثر وعميقه ، تضايق فايز لكن صد بهدوء وراح لقرآنه يقرأ سورة الكهف على ما يحضر الخطيب ويدعي لهيا وفلاح بالتوفيق وانظار حمد كانت عليه طول الوقت وبنص قراءة فايز جلس شايع جنبه بس تارك مسافه وقال بهمس غير مسموع للباقين لكن قرّب حمد بحركة غير ملحوظة يبي يسمع ويفهم قبل يظلم عمه
شايع: كفو يا خوّي الدرب هذا العشم فيك ، بشرني صقر وعزمني لعرسه -ربت على كتف فايز وابتعد وهنا جن جنون حمد وتأكد من كل أحاسيسه تأكد من كل شيء واللي خلاه ينجرح أكثر ان عمه ما أنكر ولا فز من شايع ولا صد كان بصورة الراضي وكأن بينهم اتفاق وخطة ! -
سعود: حمد
التفت فايز وراه وشاف حمد واقف ورا عمه وقفل فايز القران بسرعه ووقف وده يبرر موقفه قبل يوصل حمد اللي شافه وسمعه لأبو متعب وهو متأكد أن حمد سمع من نظراته الحاده لعمه لكن حمد ماعطاه مجال للتبرير والتفت لسعود
سعود يأشر لحمد يقعد جنبه ويستمع للخطبه جنب ابوه وركان : تعال
تقدم حمد لسعود وهمس: الردي من ثوبك يا سعود مهب الغريب
سعود التفت بحركة سريعه لحمد يحاول يكذّب اللي فهمه لكن نظرات حمد الغاضبه كانت تأكد كلامه ، قرر سعود يسكت ويحتفظ بالرد لين تنتهي الخطبه والصلاة ويتناقشون برا المسجد واثناء الاستماع دخل رايد وهو يبتسم لفايز بخبث وجلس بتعب من الطعنه وجلس معه صقر اللي تقدم يسلم على ابو متعب عشان ينعجب فيه زود ثم تراجع يقعد حول اخوه وشايع وراهم ثم باقي الرجال والعيال بستثناء منصور اللي مابعد جاء ، بس ابتسامة رايد لفايز ما غابت عن انظار حمد وتأكد مثل أسمه ان عمه له يد في زواج ساره وفي موضوع رايد المجهول وأن السالفه ماهي سالفة عداوة بين جدهم وابو صقر الموضوع اكبر من كذا وأقدم ووصل لعمه بعد ، كان حمد في دنيا ثانيه وأفكار ثانيه وهو اللي شك اصلاً يوم مرت عليه لليلة البارح حلوه وكلها اخبار حلوه بدون نكد وهواجيس لكن ما قصرت شمس الصبح اشرقت واشرق معها الجهاد من جديد

-في بيت ابو متعب-
مزون بعد ما شبت وافطروا كلهم لكن بدون سوالف طلعو مستعجلين للجامع وطلعو من بدري ، راحت مزون تزين الغداء وتعاون ساره
مزون وهي تقلب باكياس الثلاجة: سوير وين الخيار؟ معقولة قضى كله؟
ساره وهي تطلع اللحم عشان تحمره: وليش ما يخلص؟ نص الكمية راحت بزواج فلاح والنص الثاني امس هذا وابوي جايب خيار العالم كله وخضار الدنيا
مزون بضحك: اجل نبي نهون عرستس والعذر "مابقى بالبيت شيء" ... الحين شسوي ؟ كيف اقطع السلطة وهي ناقصه؟
ساره بضيق:ياليته يتكنسل وكلٍ يجتمع مع حبيبه ايييييه بسسس .. شوفي احد من البزارين بالشارع اذا لقيتي ارسليه على الجيران يجيب من عند ام منصور ولا فــ... اي احد
عذبه دخلت وهي مبتسمه يوم سمعت طاري فوز: اوهههووووه فوز مهب يمكم لحد يطلب منها شيء وبرضو بيت العروس
التفتو ساره ومزون لعذبه بتعجب يبون يفهمون اي عروس
عذبه تكّت على الباب وهي ناااااااااسيه من تركي كل همها ان عذاري تروح من طريقها: هاتو البشاره
مزون:انطقي اول نشوف يسوى ولالا
عذبه بضحكة: ولد السيّاف بيتزوج ام شوشه(كان هذا لقبها بينهم)
ساره رمت ملعقة الغرف على اللحم والتفت بقوه: وشو؟؟؟؟
مزون ناظرت عذبه ثم ناظرت ساره: ساره انتبهي اللحم لا يطيح-سكرت باب الثلاجه وهي تشيل اللحم عن ساره-
عذبه استوعبت بعد ما انصدمت ساره ان الموضوع يسعدها من جهة لكن ينكد على ساره من جهة: اسفه ساره والله العظيم اني اسفه
ساره:تركي و عذاري؟؟؟؟ مستحيل! عذاري مهب ذوقه هو بالذات
عذبه:مدري مدري فوز قالته امس
مزون وهي تحاول ترجع ساره للواقع وما تنجرح زود: وانتي شعليك يا ساره؟ يتزوج يموت يطس! دامه استسلم من البداية وتركك بكل سهوله ليش تضيقين عليه!! والله عوضك بصقر صح مانعرفه بس يكفي انه خطب وصمل واستعجل بالعرس بعد من لهفته عليك
عذبه ناظرت ساره وهي تأيد كلام مزون وكلها ندم
ساره رجعت تكمل شغلها واخذته من مزون بكل هدوء وثبات وامتلى قلبها زعل على تركي وحقد شلون نساها بسرعه! شلون يبدلها بعذاري؟ ما مر على خطبته غير ايام ! ..
وطلعت مزون تشوف احد من الصغار وترسله يجيب خيار من الجيران للسلطة ولأن المحلات مقفلة بعد للجمعه والصلاة فما كان فيه حل غير الجيران واول ما فتحت الباب تطل وهي متغطيه بجلال الصلاه وكاشفه نص عيونها وتدور بانظارها على احد وشافت عيال صغار يلعبون بالسياكل في الجو المغيم بنص الحاره الشعبيه البسيطة وقامت تنادي لكن محد سمعها ونزلت تاخذ حجر صغير تبي ترميه عليهم وينتبهون لها ولأنهم بعيد عنها شوي شدت حيلها في الرميه عشان يوصلهم بس من سوء حظها انه صقع في راس منصور اللي كان يركض يبي يلحق الخطبه ولو على نهايتها وصرخ بألم متوسط وشهقت مزون وانكشف وجهها وهي تقول : يمه يمه يمه جاك شيء؟؟
منصور رفع عيونه لمزون وصد بسرعه وعصبية: مصروعه؟ مهبوله؟ وش مسوي لتس انا ؟ ... هذي عقوبة اللي يتأخرعن الجمعه
مزون استوعبت يوم صد ورجعت تتغطى بجلالها: لاترفع صوتك! قلت لك جاك شيء؟ اذا جاك شيء اسـ..
منصور بانفعال:يعني ماسك راسي ومغمض تهقين اتستر عنتس؟ ولا مستحي؟ وش هالبلوه ذي!!!!
مزون بتعجب: ياطول هاللسان!!!! يالله لك الحمد والشكر بس !
منصور بقهر: ترميني بحجر كبر راستس وتنقدين!! عجيييييب والله!
مزون بتجاهل قامت تنادي صالح بصوت عالي ومنصور اللي كان يناظر يده بعد مانزلها من جبهته وتحديداً عند منابت شعره وحصل بقعه صغيره من الدم وهو يتأفف ويسمعها تقول لصلوح: قل لامك بنت خاله دلال تسلم عليكم وتقول عندكم خيار؟ اذا قالت ايه عطني شوي واذا قالت لا شف بيت ام منصور ولا السيّاف زييين؟
صالح: زييين
منصور وهو يمشي بعصبية: فالقه راسي عشان خيار؟؟؟؟؟؟ نسأل الله الصلاحححححح ، صويلح اياني واياك تطق بيتنا عشانها تفهم؟
ضحك صالح وركض لبيتهم يسأل امه ومزون دخلت ما سمعت اللي قاله منصور وهي معصبه من اسلوبه وهذي ثاني مره تصادفه وهو بنفس الأسلوب رغم ان جزء منها متحسف ومتألم على الاذى اللي سببته بدون قصد بس كانت شبه راضيه لأن بنظرها يستاهل على هالاسلوب
دخل منصور المسجد وقعد جنب تركي وسرور ، سرور بهمس: وراك تأخرت؟
منصور وهو يمسح مكان الاصابه: يارجال خلها على الله بس زين اني قمت من عقب كرف البارح
سرور ابتسم: ماشاءالله على عيال ابو متعب عرس ولدهم وهذا هم بالصف الاول تقل ما تعبو ولا اشتغلو
منصور تذكر البنت اللي فلقت راسه من بيت ابو متعب وسكت وهو متنرفز وبعدها اعتدلو واقامو للصلاة وتراصو .. بعد الصلاة وعند باب الجامع وقف سعود يبي يكلم حمد بس دخلو بينهم العيال وبدأ سرور بسوالفه ومرحه المعتاد يتكلم ويطقطق لين روق حمد وهو يناظر تركي اللي كان مبتسم لمنصور عشان الاصابه اللي واضحه في جبهته حتى وشعره عليها وكان ناوي يسأله عن السبب لكن حمد فهم شيء ثاني وقال: كل نظرات الحب ذي لنسيبك؟ وش بقيت لزوجتك اجل
التفتو العيال كلهم بتعجب يبون يشوفون من يقصد ووش الطاري وناظره تركي وقلبه يرقع مايدري ليش فهم أنهم رفضو صقر وهذي تلميحه من حمد : هاه؟؟؟
حمد وهو يغمز له: مبروك مبروك الله يوفقك
سعود بسرعه: لاتقولون فيه معرس جديد؟ انهد حيلي عقب فليح ومتعب اجلو العرس تكفون الاسبوع الجاي عرس اختنا
عمر رفع يدينه:يعني معليشششش الجدول مزحوم
تركي انقبض قلبه واسودت عيونه وتلاشت آماله كلها بعد ماسمع كلام سعود وعرف أن ارتباطة بساره مستحيل يحصل وبعز كسره مر صقر اللي كان طالع من المسجد وهو يهلل ويصلي على النبي ومو ملقي تركي بال ابد ولا انتبه له وناظره بنظرات حاقده وحاره بس قطع عليه فارس اللي رجعه للواقع
فارس: خطبت يا تركي؟
حمد وهو يضحك لتركي:اييييه ترّيك ناسب منصور ، وراك ساكت؟؟عطنا علمك
تركي ناظر حمد ثم منصور يحاول يفهم ومنصور ابتسم لتركي وهو اللي فعلاً يشرفه وتركي عنده خير وما بيلقى زوج مناسب لعذاري كثر تركي لكن انصدم منصور من الخبر يعني الرجال الوحيد شلون ما عنده علم؟ هونها على نفسه وقال اكيد انخطبت امس بالزواج خطبة حريم عشان كذا ركضت للبيت وهي خجلانه وبما ان اسلوب عذاري دفش دايم ما لاحظ عصبيتها من خجلها كلها واحد بعينه اما تركي تجمد مكانه للحظات وهو يناظر منصور المبتسم له وقرر يكسر الصمت اللي صار ويكسر قلب ساره مثل ما وافقت على صقر وتركته رغم علمه التام انه مرسول من ابوه ولا لها حول ولا قوة بهالخطبه والزواج بكبره وقال: صحيح اللي سمعتوه بس مطولين على الزواج معليكم معكم وقت ترتبون لزواج بنتكم ثم ترتاحون فترة وتستعدون لزواجي ان شاء الله
قاموا العيال يباركون له بالاحضان وهم اللي تقريبًا صارو متعودين على اجواء الزواج اللي صارت كأنه عدوى كل فترة أحد يتزوج ، صحيح انصدمو من سرعة تركي بين الخطبتين (ساره وعذاري) بس مشوها لأنه رجال وما بيأثر عليه الموضوع وهذا حقه ، بدو يمشون  جماعه لين دخلو ديرتهم ثم كلٍ راح لبيته وبقى منصور مع تركي
منصور بصوت منخفض: فهمني
تركي بحيره وهو اصلاً ما يعرف اساس الموضوع بس رقعه بمزحه وقال: شهالصوت؟ هاه لايكون انت بعد بتردني لا خطبت ؟
منصور وقف يناظره يبي يشوف صدقه من مزحه
توتر تركي من نظرات منصور وبدأ يكذب عشان مايخسره وبنفس الوقت يخارج نفسه من الموقف الصعب اللي انحط فيه وقال: علامك تناظرني؟ادري الموضوع صدمك لكن هذي الحقيقه أنا رجال نويت اعرس ولا لقيت لي افضل من نسبك يا منصور ويشرفني اطلب قربكم على سنة الله ورسوله ، ولابغيت خال لعيالي غيرك (كان مُنى عينه يقول هالكلام لمتعب او حمد لكن النصيب اكبر منه..)
منصور كان يناظره وهو اللي يعرف موضوعه مع ساره شلون يقول ما يبي خال غيره؟وساره؟ كان منصور متردد بس كمل تركي: ادري ان قلبك ياكلك على معرفة الصدق لكن البنت بدلها بنت وانا منيب ميت على الطايل يا منصور! هذاني سمعت نصيحتك وكملت حياتي وحنا رجال نمشي ونعيش ، وان كتب ربي نصيب نبي نكون العوض لبعض هذا اللي عندي وسلامتك والقرار الأول والاخير لك ( كان وده يحيّر منصور ويخلي القرار لعذاري اللي مستحيل توافق عليه يعرفها ويعرف دفاشتها ومستحيل يتفقون  لكن صدمه رد منصور السريع)
منصور ارتاح بعد كلام تركي وثقته اللي وضّحت له صدقه "الظاهري فقط" وقال:هذي الساعه المباركة يا تركي وما عاش من يردك وابد من عندي عطيتك وزوّجتك والله يتمم لك
تركي بابتسامه باهته ومقهور من حظه اللي ما حالفه بس حاول مره ثانيه وقال: اجل توكلنا على الله ، شاور الأهل وشوف قرارهم ورد لي (وده موضوع الرفض يجي من عذاري لان منصور يعز عليه كثيييير ما وده يكسره وهو اللي شاف لمعة عيونه من بداية الكذبه وعند المسجد )
منصور ضحك بفرحة وطقطقه على تركي: حنا نشاور ياتركي؟ ورا ما كانك ولد الديره وتجهل سلومنا؟ قلت لك مرتك جاهزه والله يحيك متى ما بغيتها هات الشيخ وخذها
ابتسم تركي بألم على منصور اللي حتى ما لمح لتركي يجي البيت ويخطب خطبة رسميه وابوه معه ، وافق من كلام في الشارع! وهذا يعني ان منصور واثق في تركي حييييل وهذا اللي اوجع تركي زود: على خير ان شاء الله ، تحرونا هالايام .. اقلط الغداء
منصور غمز له: مره ثانيه، هالحين نبي نشاور الاهل على قولك ههههههههههههههههههه
ضحك له تركي ودخل البيت وتبدلت ضحكته وقام يجر رجوله وقعد بالحوش عند القهوه الجاهزه ولاهي إلا دقايق وطلعت له فوز
فوز: جيت وجابك الله عندي موضوع بشاورك فيه
رفع تركي عيونه لفوز توقع بتطلبه شيء : اسمعتس
فوز: ياخوي أنت وراك متكدر؟ الكدر مهب لك غيرك يسعى لنفسه وطايرٍ برزقته وانت هنيّا ضايق؟ وعشان هالملامح بالذات أنا نويت وقررت أزو....
تركي ناظرها بعصبيه ونرفزه: وشهههو؟؟؟؟ اثرتس اللي ناشره العلم بدون ماتقولين لي؟ هالحين انا شكيت لتس الحال يا فوز؟ انا قلت دوري لي؟ انا قلت اني ضايق؟
فوز عرفت ان الخبر انتشر وقالت بسرعه: من غير ماتقوله يا خوي حالك يفضحك بعدين البنت اللي اخترتها لـ...
تركي بضيق واضح في صوته: ابببد ماقصرتي البنت اللي اخترتيها توي خاطبها من اخوها ووافق وهالحين متورط كله عشان ما اطلع ابله وغبي قدامه ورطت نفسي عشان خطتس اللي رسميتها من وراي تضبط ، ما تقولين لي هالحين وشش الحل؟
فوز تضايقت من اللي سمعته وفرحت بنفس الوقت: ابد الحل انك تكمل اللي بديته وتراه لمصلحتك وراك كأنك محكوم بالقصاص؟؟ هذا زواج وفرحة وسنة الله لمتى بتقعد كذا؟ (وصلت الموضوع لنقطة حساسه وهي صداقته بمنصور) وبعدين فكر بمنصور ! وش تسوي معه؟ وين تروح عنه؟ واحلف لي انك ماتبي قربه ولاصداقته وانا اروح الحين بنفسي وانهي هالسالفه بكبرها
سكت تركي وكانت هذي نقطة لفوز اللي بدت تمدح عذاري واخلاقها وزينها وتحاول تدخلها بعقله وتمحي ساره ، لكن وييييييييييين وعذاري ويين ! عذاري اللي كل الحاره تدري ان فوز كذبت بمدحها وهو بنفسه شَهد حالات عذاري وطولة لسانها وتسرعاتها ومنها يوم فتحت الباب عشان تعطي منصور العود قبل كم يوم ، كملت فوز الاقناع او محاولات اقناع تركي ان هذا الصح وهي نيتها الوحيدة انها تطلع اخوها من الهواجيس والافكار قبل يطيح على وجهه. وينهار وساعتها ماتقدر فيه وعذاري ماهي خيار سيء على الأقل بتلهيه عن ساره بسوالفها الكثيره