"أثر الهناء حلم يا حمد"

البارت الرابع عشر

بعد صلاة العصر مباشرة
فوز:تعال تعال صلوح
صالح:نعممم
فوز:اركض لبيت الطايل قل خالة فوز تسلم عليكم وتبي تجيكم هالحين انطلق
صالح:وتعطيني برجون؟
فوز ضحكت:ابعطيك برجون ومغيطة بعد بس انت اركض
وفعلاً ركض صالح لبيت الطايل اللي كانو مستعدين اصلاً وعلمهم
صالح من فوق الجدار: هنووف خاله فوز السياف تسلم عليكم وتقول تبي تجيكم هالحيننن
الهنوف: لعنبو دارك قرد انت!!! ما توصل علومك الا من فوق الجدران والسطوح!! ندري انها تبي تجي مير انزل لا تموت ثم يقولون هنوف ذبحته .. يدخلوني بكل المشاكل انا
صالح:تراها بتعطيني مغيطة وعقبها بوريتس
الهنوف: الله لا يعطيها عافيه كانها تبي تعطيك اخس سلاح وتبلشنا به
-راح صالح والهنوف دخلت تجهز اخر الاستعدادات وعند تركي وفوز كانت فوز بعباتها مع عذاري عند باب البيت-
فوز: يلا يا تررركي!!! مواعدين الناس العصر تبي تطيح الشمس وحنا ما طلعنا للحين!
تركي طلع وهو يتنحنح عشان تبعد عذاري:انا بمر ابوي بالاول كود انه يطيح اللي براسه ويجي معي مو كفايه عمي مسافر! ماينفع اخطب لحالي اسبقيني انتي
فوز:ياتركي ماتعرف ابوي! ولاتعرف هالعداوه والله لو وش يصير ما يخطب لك بنت سيف هو مارحمنا وهذاك طولنا تبيه يوقف معنا وهذا كبرنا!! وابو متعب يعرفك ومايعدك الا ولده وداري وعارف بالوضع والحال انت تعال بس واقصر الشر طعني يا اخوي!
تركي:بحاول منيب خاسر شيء! ابوي بالنهاية وماتدرين يمكن نسى او تغير
فوز نزلت برقعها: الله يهداك يا تركي .. امّنت الله على قليبك بس اجل انا بروح هالحين وانت لاتبطي زين!!
تركي ابتسم لفوز وودعها بنظرات كانت مليانه خوف وتوتر من الجاي وحب بنفس الوقت للخطوة اللي بتجمعه بساره اخيراً كانت مشاعره مختلطة لكن شال نفسه بسرعه وراح لأبوه بخطوات ثقيلة وهو اللي ما يقابله حتى بالصدفه بعد من سوء عشرته وأخلاقه ونذالته اللي تشمل عياله حتى كله بسبة الفلوس و بعد ما وصل حوش ابوه دخل تركي وسلم على راسه
تركي:شلونك يبه!
شايع:الشمس طالعه من مغربها؟ قمت اشوف شيء ما ينشاف اي والله! اجل انت زاير ابوك؟
مسح تركي وجهه بصبر: زايرك يبه وجايك في علم خير وفرح وقلت ابد مايشاركني فرحتي غير ابوي .. يبه انا نويت اعرس وبغيتك تخاويني وتخطب لي بنت الحلال
شايع وهو يقلب بالراديو حقه:اقول وش لك من عازه عندي يوم تنثر هروجك هذي ؟ تبي فلوس؟؟؟ما كفاك محل الذهب ؟ اترك عنك ابوي وامي انت لو رجال و بك خير ما تركت ابوك هالسنين كلها وجاي هالحين تقول بعرس واخطب لي
تركي:انا رجال وكفو وابعرس ان شاء الله.. يبه ابيك تتعوذ من الشيطان وتقوم معي نروح نخطب اذا مب عشاني عشان الناس وش تبيهم يقولون؟ولد السياف يخطب بروحه؟؟
شايع:عجيب والله هالحين صار يهمك حكي الناس؟ ومنهي اللي بلا حظ وبلشت بك؟
تركي:دامك نشدت اجل تبي تروح تخطب معي الحين ان شاء الله ! هاه!
شايع بعصبية معروفه:وانا اقول عند من اهرج اخلص؟؟؟؟؟
تركي:سيف الطايل ابي ساره يبه
شايع رمى الراديو بالجدار بعصبيه غير معتاده وكأن تركي داس على طرف مخبأ من سنييييييين وداسه بقوه اثارت غريزة الانتقام في نفس شايع وانقض على تركي:وووششنههههوووو؟؟؟؟؟؟ ايااااا العاققققق ياقليل المروه تاركٍ ابوك لك دهرررر ماقلت ابسلم عليه ابشوفه واخرتها داخل علي تبا تاخذ بنت سيف الطايل!!!!! تاخذ بنت عدو ابوك!!!! والله ومن تحت هالراس ما تصير لك لو ترقى السماء وتنزل والله ما تعرفها يا تريييككك تفهمم!!!!فاااارق يلا عن وجهههي لا بارك الله بك هينننننن دواك عندي اذلفففففف
وقف تركي بخاطر مكسور ونزل يدين ابوه وقال:لو اني طعت فوز ازين لي لاحول ولاقوة الا بالله -طلع بغضب وهو قاصد بيت ابو متعب وناوي يخلص موضوعه بنفسه ويفوز بساره بجهده-