"أثر الهناء حلم يا حمد"

البارت الواحد والثلاثين

هزاع: بالله يا متعب شف لي طريق بسلم على هيا ما هقيت اني بشتاق هالكثر زين منكم جيتو بسرعه
متعب وقف وهو مبتسم: تعال تعال ياحليلك -تقدمو لجهة الصاله ودخل متعب ينادي
هيا للبنات: استريحو بشوف رجلي
ساره:شوفي بس معه احد ولا طلعنا نسلم على اخونا
زينه ناظرت هيا وضحكت وطلعت هيا وهي مبتسمه بوجهه وما انتبهت لهزاع-
هيا:لبيه؟ لبببيه
متعب تنحنح وهو مبتسم:اقول هزاع يبي يسلم عليتس
هزاع:هههههههههههههههههههههههههههههههههههههههه اييييه هالحين لبيه؟اقول الله يرحم ايام الجلد والصوت اللي يهز الشرقيه هز
هيا تفشلت وضحكت:تعال تعال منيب قايله شيء لاني مشتاقه لك هههههههههههههههههههههههههههههههههههه
ابتسم متعب لهم:انا راجع المشب اجل
هزاع غمز لمتعب: لالا خذ راحتك هذاني سلمت وبرجع انا
هيا:وجعع ياهزاع!
هزاع راح وهو يضحك
متعب قرب يحضن هيا وده بطاقة قبل يبدأ يومه وبادلته هيا الحضن وهي توصيه يقرب من النار ويدفى واشر متعب على خشمه بمعنى (على خشمي)
هيا: لاتروح خالتي والبنات ودهم يسلمون عليك
متعب: ناديهم يلا
اشرت هيا على عيونها ودخلت الصاله اللي كانو يفطرون فيها وهي مبتسمه ابتسامه سعيده و شافت البنات واقفين ومعهم مواعين الفطور ويناظرونهم من طرف الباب
هيا:بسم الله الرحمن الرحيم علامكم انتم!!!
مزون بنظرات اعجاب: ياحلو الحب والزواج الله!
بدور:حتى برواياتي ماشفت زي متعب اجل شلون حمد وعذبه؟
مزون:عاد اكثر اثنين متحمسه لهم بيغطون على الثنائيات الموجوده للآن اهخخخخ
الهنوف: فريتي راس اخوي يا السوسه بس والله تلوقون لبعض
ساره: صدق صدق يا هيا طلعتي محظوظه!
الجازي:عشان كذا رضيتي بمتعب من عقب الهواش! طلع حليّل ورومانسي
هيا استحت من كلامهم وهي تدري ان متعب برا ويسمع : انا بطالب بنقل خارج بيت عمي وش ذا !! صفر خصوصيه! وعيونكم مبققه علينا ! اقول اطلعي انتي وياها لاخوكم سلمو عليه وارجعو لاتنبسطون!!
الهنوف حطت الطوفريه على خصرها وبدأت تتكلم بيدها الثانيه: والله ياحبيبتي هذا انتو طايحين بالعسل بنص البيت وفي وضح النهار وش تهقين يعني؟ اكيد نبي نشوف بعدين طولنا ولا ما طولنا شعلييتس؟ شعليييتس اخونا قبل يصير رجلتس اهخخخخخ يامن يطقتس طق بهالمكان!
ساره:وهنوف صادققققه! ياقلعتس بس ههههههههههههههههههههههههههههههههه
هيا بستفزاز للهنوف وبهمس عشان ما يسمع متعب: بس تراه حبيبي وولد عمي قبل تجين يا البزر وموتي حره يلا ههههههههههههههههههههههههههههههههههههههههههههههههههههههههه
دفتها هنوف ونادت امها وطلعو يسلمون على متعب وحضنوه الثنتين ساره والهنوف وهو تقدم بعدهم يحضن امه ويبوس راسها وهو مبتسم بعد ما سمع هواشهم
وداخل الصاله كانت هيا بين بنات عمتها واختها وامها وناظرتهم شوي ثم قالت
هيا:هااه! قومو زينو لي القهوه واكرموني ! حسسوني اني ضيفه وجع يلااا شبلاكم قعدتو معي؟؟
مزون وقفت بضحك: ابشششششري تامرييين امر الحين اروح ازينها
بدور بفضول:اقول هيا وين سافرتو بيومين؟
هيا بحب: مكه والطايف
بدور كشتها: ويعععععععع بس؟
هيا قرصت بدور:على وجهتس الا على وجهتس ياقليلة السنع ! يا البقره ترى شهر العسل مب شرط يكون شهر كامل ومب شرط خارج المملكة انا لو رجعت مع متعب بعد الزواج للغرفة ذي كنت اسعد انسانه بالعالم
حصه بهمس غير مسموع:من قل الدبرة والله
مزون كانت متكيه ويدها على خدها: يازززززين الحب زينااااه والله انك صادقه
الجازي وبدور:لا والله مو صادقه
هيا:يا حيييييل الله جعل ربي يمدني بالصبر بس قبل اقوم واحوس هالثنتين تكفين يا مزون استعجلي بالقهوه
مزون ضحكت:من عيووونييييييي الحين تنزل اطلق قهوه لاطلق عروس -طلعت مزون للمطبخ تزين القهوه والشاهي وساره والهنوف وزينه برا مع متعب وبعد ما سلمو البنات على متعب واخذو اخباره دخلو لهيا والبنات وساره راحت تعاون مزون في المطبخ-
زينه:اقول متعب
متعب:سمي يمه؟
زينه بصوت واطي:ناقصك شيء؟ صاير شيء؟
متعب بتعجب:لا ؟ علامتس يمه؟
زينه:ما ودي انشدك والله لكن عسى لجيتكم بهالسرعة خير، تعرف الناس وهروجهم خوفي يلحق بنت عمك ومرتك شيءٍ من الهروج ما يسرنا ولا يسر عدونا حتى
متعب: يا يمه وش بيقولون الناس؟ هذا لو اني رادها مطلقه ولا ناشرٍ شيء مير اعتمرنا ورجعنا وهذي التمشيه عندنا وتكفينا والناس بيهرجون على كل حال انتي لاتشغلين بالتس بهالسوالف ولاتفكرين ما ودي شيءٍ يضيق صدرتس
زينه: لكنك استعجلت بالرجعه! هذا فلاح ماشاءالله للحين مسافر توه يفكر بالرجعه وعشان دوامه بعد لولا دوامه كان كمل شهر والبنت ضعيفه عروس مالها يومين ماتمشت ولا استانست! لو صارت لساره ما بيضيق صدرك عليها؟
متعب كان متضايق من الرجعه بدري ومتحسف على هيا اللي كسر فرحتها ورجعها للديرة والواقع بدري لكن كان مجبور عشان يحل السالفه بصمت قبل تكبر وقال بدون لا يبيّن لأمه ضيقه: ابشرتس هيا اللي طلبتني نرجع ماغصبتها ولا نكدت عليها وبعدين فيه ام ماتفرح بجية ولدها وبكرها؟هاه يا ام متعب؟؟
-ضحكت زينه بعد ما تطمنت ان هيا اللي رجعت بقناعتها وحضنت متعب بحب ثم طلع متعب للمشب عند ابوه وعمه وتبدلت ملامحه للجديه يوم طاحت عينه بعين عمه فايز اللي كان متضايق من رجعة بنته بهالسرعة-
ابو فلاح: الظاهر ما دليت بالسعودية مناطق تجوز لك وتناسب الوضع !
متعب ناظره لثواني ثم قال:لا والله ادل في بلادي وكلها خير وبركة لكن ما مثل الديرة وطلبات هيا أوامر يا عمي ودها بديرتها وأهلها وجيناك على العموم عندي لكم بشارة تسركم جميع -كان متعب يحط الموضوع بهيا عشان محد يشك ويتقفل الطاري ويبدأ يفكر بالحل -
سعود ناظر متعب وهو يرقبه ينطق بالموضوع ويحلها ويريّح القلوب ، ومتعب قبل يدخل المشب كلم سرور وسأله عن حمد وبشره انه انقبل وبيجون ان شاء الله
ابو متعب: وش البشارة
فارس بغمزه لمتعب:بياخذ الثانيه على هيا
عمر ضحك : رجااال من عرفناه كفووو
هزاع ناظر متعب بنظرات تحرج: ماظنيييييت
ركان:اجل بسسسسس ... الولد في الطريق؟
مشعل:ولد في يومين؟قلنا متعب عجل لكن حياته مب مثله
متعب ضحك من تخمينات العيال وسوالفهم:ههههههههههههههههههههههههههههههههههههههههههههههه
ابو فلاح ناظرهم بحده ثم ناظر متعب:وش بشارتك؟
متعب : البشارة يا طوال الأعمار أن حمد انقبل بالأمن العام ودورته بتبدأ الأسبوع الجاي وابشركم اموره تيسرت الحمدلله  وان سمح لي ابوي تاج راسي فأنا عندي لك طلب ياعم
ابو متعب انشد لسالفه : مسموح يامتعب وبدّها
ابو فلاح: مبروك، وش طلبك عساه مقدور عليه؟
متعب بابتسامه:الله يبارك فيك وابشرك انه بسيط ومقدور عليه وكلٍ راضي به بعد ويتحراه
سعود بتمثيل وهو فاهم: عساه خير ؟
متعب ابتسم لسعود وقال:خير خير ، الصراحة يا عمي انا يوم وصلتني بشارة حمد بقبوله بالوظيفه قلت ابد ما ينقصه ولا يكمل الفرحه إلا الزواج وطلبي أنك تعجل بموضوعه ونخطب له كريمتك عذبه لاجاء إن شاء الله على سنة الله ورسوله، خطبه محفوفه وعايليه بيننا بين والعرس لا تخرج من دورته بحول الله ... هذا علمي واللي عندي وسلامتك والسامعين
(متعب شاف أن هذا انسب حل ويخطب لحمد بغيابه ويسفه طارق لأن الشور الأول والأخير عند عمه واستعجل بالموضوع قبل يوصل عمه وحمد الحاصل، كانت يده على قلبه وينتظر رد عمه والعيال كلهم مبتسمين وهم فعلاً ينتظرون اجتماع حمد بعذبه وارتباطهم الرسمي ببعض والكل انظاره على ابو فلاح)
ابو متعب التفت بابتسامه يناظر ابو فلاح اللي ماتوقع حمد يستعجل بالخطبة كذا! توه ما تأسس ولا استعد زين وسكت ابو فلاح وهذا اللي وتر سعود ومتعب وهم يناظرون فيه
ابو متعب: الله يحيك وعلمك اللي يشرف يا متعب نعم الأخو هذا العشم فيك والله يديم الافراح علينا .. هاه يا فايز منتب رافض ان شاء الله
ابو فلاح بتردد:عذبه في الشرقيه ولاعندها خبر وصغيرة للحين يا ابو متعب ! وحمد لا طلع من الدوره وجهزت اموره كاملة حزتها خير ان شاء الله
"العيال كلهم ناظرو بعضهم باستغراب من رد عمهم/خالهم"
ابو متعب ناظر ابو فلاح بجديه و حِده: عذبه صغيره!  ولاعندها خبر! شهالكلام يا فايز! مزوجينها غريب حنا؟
ابو فلاح كان معارض ورافض فكرة تزويج البنات وهم تحت العشرين وعادات الديرة والجهل وسفههم لشور البنت بعرسها بس معد يقوى المشاكل وهو اللي ناوي يجامل ابو متعب لزواج ساره ثم يرجع الشرقيه يصفي ذهنه من شايع وصقر وهالحين حمد: خير ان شاء الله
متعب كان شاك برد عمه بس حب يأكد على كلامه: على بركة الله  والله يوفقهم ويجمعهم ، عسى فلاح حوله جيه؟ ودنا يشاركنا الخطبه والفرحة
ابو فلاح :يبي يجي للشرقيه بدأ دوامه وماظنتي بيجي الديره
ابو متعب:لالا يبي يجي يحضر خطبة اخته و كلم طارق يجي ويجيب البنت ونخطب قبل عرس ساره ونسمع شورها دامك تشاور الحريم
سعود دخل يخفف الحده بين ابوه وعمه وقال: الظاهر هالاجازه كلنا بنتزوج ماشاءالله ، هاه عسى لاحقنا دور مع المسلمين؟
ابو متعب بغضب وهو ملاحظ تردد فايز بموضوع خطبة حمد: لاصرت رجال وما عاد اوصيكم -أشر على سعود وركان- تروحون للمحل والعزبه حزتها زوجّتك قم صرنا ضحى
ركان بهمس:اييييه اجل مبطي انا ما اعرست
هزاع:اقول عمي دام سعود جاء وبتكرف عيالك معناته انا ومشعل نعتبر معفيين صح؟
مشعل بارهاق وهو ماتعود على كرف الديرة:تكفى خالي ارحمنا والله قاعد تضغط علينا !
ابو متعب ناظر مشعل وهو ناقد: يااا سمج الهرج يناااه قممم قم لا بارك الله بالدلع اللي رابيٍ عليه قممممم .. وانت قم معه -يقصد هزاع- رح لأبلكم مع ركان وانت يا سعود خذ ذا واسبقني المحل
عمر وهو حاط يدينه ورا راسه ومتكي: وانا ياخالي مع اي فريق؟ معفي ولا معاقب يا حضرة الرئيس؟
ابو متعب ناظره ثم صد يبتسم غصب عنه ووقف عمر بضحكة وتقدم يبوس راس خاله يطيب خاطره وطلع مع سعود وابو متعب للمحل ، وفارس ومتعب وفايز بقو في المشب والصمت سيد الموقف بعدهم-
فارس: حنا نستأذنك يا خالي نبي نطلع انا ومتعب اجل -وقف فارس وأشر لمتعب بحواجبه يطلع معه ووقف متعب-
ابو فلاح اشر لهم بيده يطلعون وهو يناظر الضو قدامه ويهوجس
فارس:تدري وش جدول الاسبوع ياعريس؟
متعب ابتسم:وش ؟
فارس: الظاهر اني برقد وانا مشخّص ومرسّم عندنا خطبة حمد وعرس اختك وعرس تركي السياف
متعب:تركي؟؟؟؟؟ يا ماشاء الله! اثر سعود صادق! خلصو الناس
-فارس اخذ متعب وبدأ يسولف له عن كل شيء ويتمشى معه ومرو منصور وراحو لتركي بمحله يطقطقون عليه ويسلمون والناس انصدمو بشوفة متعب بالسوق بدري بس ما اعطى احد اي اهتمام -