"أثر الهناء حلم يا حمد"

البارت السادس والستين

ابو متعب: تعلمني بويششش انت بعد ! حمد ما ياخذها ولايعرف اولها من تاليها ايه حمد حار وطايش لكن لا ! لا لا لا مهب له ولا هي اللي ربيته عليها لا ! غلطان يا ضابط تأكدو من هويته من دمه حمد ما ياخذها
فايز بنفس الخوف واستغل الفرصة: وانا ما حولت شيء اساسًا اكيد انكم غلطانين اكيييييد
سرور استدعى عسكري وأشر له يكلبش فايز وينزله الحبس على ذمة التحقيق وبدأ يهدي ابو متعب اللي كان يكذب تعاطى ولده ولاهو مصدق وقلبه مو عند فايز ابدًا ، مشتغل بصدمته الأولى اللي كانت بعنوان: ( حمد متعاطي!)
سعود وركان كانت عيونهم تطارد عمهم فايز والحقد ونار القهر تحرقه من نظراتهم وهو يحاول يفهّم العسكر اللي ماسكينه ويجحد ويخلّص نفسه منهم ، بآئت محاولاته بالفشل ونزلوه الحبس غصبًا عنه وبالإجبار والقوة
متعب كان ماسك ابوه من ركبّه: يبه قل لا إله إلا الله واذكر الله ، صار اللي صار وحنا الحين بقضية ثانية وهي رفع السلاح وعيال ضاري لاتشغل بالك بهالموضوع انا بفهمك اياه وحمد ماله فيها لا ناقه ولاجمل والله انه على عهدك وتربيتك وبريٍ منها بس انت اهدا الله يطول عمرك
ابو متعب:انا اللي سمعته صحيح ؟ حمد ولد سيف بن ذياب صار اسمه متعاطي وقاتل ؟ واخوي ولد امي وابوي هو اللي دافع قيمة بلاه ؟
سرور: الجمره اللي في صدرك ياعمي مثلها واكبر في صدري  ، حمد خويي وولد ديرتي ومن جماعتي واغليه مثل ما تغليه ولاني بتبلى عليه ... اللي فهمته صحيح
متعب التفت بكل قوته وقهره ودف سرور على الجدار : خخخخللللللل ااببووووييي عععلليييييييي اننناا اففهمههههه واننننتتتت اسككككتتتتتت اسككككككتتتتتتت !! يياسرورررررلاتههههرررججججج
دخل عسكري مرعوب وسحب متعب من سرور بس أشر له سرور يتركه وهو فاهم غبنة الأخ على أخوه وابوه وسعود وركان يبون يوصلون عمهم ويساوونه بالارض على فعلته هذي
متعب طاح على الارض وهو يلقط انفاسه بسرعه ويجدد طاقته عشان يقوي اهله وابوه بالذات ويحاول يحبس دموعه قدر الإمكان .. ابو متعب وقف من ورا مكتب سرور وقال: كانك تعز حمد وتغليه عطني ورقة منك تسمح لي ازوره الحين
سرور ناظر متعب بتردد: ياعمي حمد في الرياض باشرهم يوم الاحد يوم الزياره
ابو متعب بهدوء وإصرار :كانك تعزه عطني ورقة الحين
متعب فز من على الارض وتقدم لابوه :يبه وش تبي تسوي؟؟؟ مهب وقت زيارة نروح بكره
سرور: بكره الجمعه .. ابشر هذي الورقه وهذا الختم الرسمي
ابو متعب ناظر عياله : ودوني الرياض -تقدم سعود بيحاول بس دفه ابو متعب بعصاته وخلاه يتراجع وفهمو ان ابوهم وصل لمرحلة صعبة وما تقبل النقاش وركبو السياره وكل واحد انفاسه أحرّ من البراكين والنيران أولهم ابوهم ، ترك اخوه في الحبس واتجه لولده المتعاطي ... ياكبره من هم !
متعب رفع جواله واتصل على بيتهم وردت الهنوف : الو ؟
متعب بصوت ثقييييييييييييل: حنا ماشين الرياض لاتحتروننا على السحور بلغي امي وهيا
الهنوف برعب:متعب شفيه صوتك؟عسى ماشر ترى ماصرنا نتحمل
قفل متعب ورمى جواله في حضنه وشد على الدركسون بيدينه الثنتين وبكل قوته داس على البنزين واخذ الثلاث ساعات في وقت أقصر رغم أن السرعة ممنوعة في قانون ابو متعب لكن بهاللحظة بالذات كان ودهم يطيرون طيران للسجن المركزي المُسمى بأسم أخر معروف ومشهور بالرياض ... وصلو للرياض وبدأت رجلين متعب تثقل وترتفع من على البنزين وهو يتجه لطريق السجن ، فتح سعود الدريشه يبي يشم هواء يحس كبده تحترق من مشهد عمه وكان يردد (ليتني ما مسكتك عنه يا حمد)
وصلو اخيرًا عند السجن ووقفو عند مدخل الزائرين ورفع ابو متعب رأسه للوحة الكبيرة فوق المدخل الرئيسي اللي تحمل مسمى السجن المتعارف عليه في منطقة الرياض وتنهد بكل مافيه عقبها
العسكري أشر بيده يوقف سيارة متعب وقرب منهم ونزلو كلهم :على وين يا الطييب؟
ابو متعب:ابزور ولدي داخل
العسكري ناظر عيال ابو متعب: كلكم زوار؟ اول مره تجون؟ واحد بس اللي يدخل بعدين الزيارة امس ! توكلو على الله وتعالو الاحد او الربوع
ابو متعب مد ورقة الأذن ونزلت دمعة حارة وسريعة على الورقة حس فيها العسكري ورفع انظاره لعيون ابو متعب والتمس فيها حزنه وقهره على ولده وسمح له بالدخول تعاطفًا منه ورافقه بدون ما يفتح ورقته حتى
سعود ناظر المواقف قدامه وتكى بظهره على شنطة الموتر واخوانه على يمينه ويساره ومعطين السجن ظهورهم
سعود: ليت رجلي انكسرت ولادخلت هالمكان وهالبوابه ليتني مت ولا جيت لمكان مهب مكان حمد ولا يناسبه
متعب:ليت ماتبني بيت ياسعود ، اذكرو الله وبعضنا يقوي بعض ابوي بحاجتنا والبنات وامي ياخذون قوتهم منكم لحد فيكم يضعف ولحد فيكم يبين غبنته قدامهم انتم رجال وقدها وهالمواقف ما خلقت الا لكم ولشرواكم
ركان:متعب ... اذا ماتو عيال ضاري حمد بينقص؟
تنهد متعب وسكت ، لكن ما سكت تطنيش سكت لأن عبرته سدت مخارج الحروف مايقدر يكذب ويقول (لا يا ركان) ولا يقوى لسانه يقول اللي يحسه ويدري به سكت متعب وانطفى أمل ركان
دخل ابو متعب أروقة السجن وبدأ يتلفت يمينه ويساره والحسرة مقطعه قلبه تقطيع ، هذا مكان يبات فيه حمد ولد سيف ! كان معزز مكرم في الديرة وبين اهله وجماعته ومسجده وحارته
العسكري:تفضل يا والد هنا .. زودني بأسم النزيل ولاعليك أمر؟
ابو متعب والعبره تقطّع كلامه: حـ...ــمـ...د سـيـ...ـف
مافهم العسكري الحروف المقطعه اللي طلعت من ابو متعب وفتح الورقه اللي بيده وقرأ الأذن وشاف الختم وأسم حمد وقضيته ورقمها وربت على كتف ابو متعب ودخل للمبنى الإداري يفهمهم الوضع ويتوسط لحمد بالزيارة..
عند حمد اللي صار له أسبوع بالسجن ومايذكر غير صوت الطلقات وملامح رايد وكثرة التفكير مع بقايا أثر المخدرات في جسمه غيّرت ملامحه ١٨٠ درجة طلّعت له هالات وذبلت عيونه زياده ونقص وزنه وانطفت حيوية وجهه ، كان منعزل عن باقي السجناء وساكت وبالقوة يصلي فروضه ويرجع يتمدد بمكانه ويسترجع ليلة ١١ رمضان واصوات الصراخ والرصاص ويناظر كفوفه ويطري عليه كف سرور .. قطع عليه دخول عسكري مناوب ينادي بأسم:
حمد سيف ذياب الطايل !
وقف حمد وتقدم له: انا!
العسكري ناظره من فوق لتحت: عندك زاير .. مد يدك اشوف
حمد: تعرف منهو؟
العسكري:فاضي لك انا انشد لك -كلبش يدينه ونزله لقسم الزائرين ووقف حمد عند مدخل الباب يوم شاف ابوه وناظر العسكري-
حمد:لالالا تكفى لاتدخخخلني عليه تكفى طالبك لايشوفني بهالشوفة تككككفى طالبك
العسكري ناظر حمد بإستغراب والتفت لخويه وكأنه يسأله بس رفض خويه(العسكري الأول) وجبر حمد يدخل على ابوه وطلعو العسكر عند الباب
ابو متعب ناظر حمد لوقت طويل وعاتبه بعيونه عتابٍ مايقدر ينطقه بكل اللغات
حمد بصوت راكد بسبّة الندم: يبه تكفى لا تناظرني بهالنظرة والله ثم والله ماسويت شيء تكفى يبه لاتصدق فيني
ابو متعب:اثاريك رميت عيال ضاري بلا وعي بسبة الحبوب
حمد: يبه والله ما استعملتها ولا اكلتها ولا قصدت اللي حصل كله والله بعالي سماه ما قصدت ولاتعمدت اي شيء انا اجهل اللي حصل لي انا مدري وش قالو لك ووش علموك فيه بس تكفى يابوي لاتصدق فيني وانشد سرور هو بيعلمك عن بندر والقصة كامله
ابو متعب: وهذا البلاء اني داري من سرور مير سود الله وجهك يا حمد .....
حمد انهزم واطلق العنان لدموعه وبدأ يبكي مثل الطفل: تكفى يبه لاتزعل علي والله ماسويت شيء والله والله هذا عاشر دين اقوله اني دخلت العسكرية ابي اتزوج وتفرحون فيني عريس ولا ادري وش حصل لي عقبها تكفى يا ابوي تككككككفى يابو متعب تكفى لاتزعل علي ولاتدعي
ابو متعب ناظر ملامح حمد المتغيره وكان يعاتبه وما يسمع ردود حمد بقلبه يسمعها بأذنه فقط: ولد سيف صار متعاطي ! الله يسود وجهك مثل ما سودت وجهي بين الرياجيل انت رحت تدور لها ما رحت العسكرية ولا دخلت ميدان الرجال الشجعان -وقف ابو متعب وقلبه محروق على حمد- انا بريٍ منك لين تبرأ منها يا اللي ما حفظت دينك وجنّبت عن الحرام
حمد صرخ بجنون: تتتكككككففففىىىى يااا ابوي اسستتتغغفر عنننهاااا تكككفففىىىى ابوس رجولككككك يبببببههه لاتخلينييييي لاتخليينني والله ما اخذتتتها والله ، الله ياخخذني ان اخذتتها ولا عرفت لها شككككلل ولوووون  يبببه لاترووحححح لاترووووووحححح
-قفى ابو متعب طالع من الباب ودموعه تنزل بحرارة من صراخ حمد اللي خيب ظنه وتربيته وصار متعاطي وقاتل "تقريبًا"، والتفتو العسكر يقاومون عبرتهم من الموقف اللي شهدوه ثم تقدمو لحمد ياخذونه ويردونه لعنبره وزنزانته-
حمد للعسكري:قلتتتتت لك لاتدخخخلني قلت لككك -دفه العسكري بدون مايرد-
-برا-
سعود:ابوي جـ... ابوي يصيح!وش العلم !!!
متعب التفت هو وركان وراحو له ركض
متعب:يبه علامكك!! قل لا إله إلا الله ! حمد فيه شيء؟؟
ابو متعب ناظر عياله بنظرة عتب وحزم وجدية: من اليوم ورايح مالكم اخو بذا الاسم لين يطهره الله
شهقو العيال وناظرو بعضهم !
ركان:يبه فهمنا طيب ليه وش اخطأ فيه!!!!
سعود بقهههههر واضح في نبرته ونسى نفسه من اللي سمعه وقال: الحين اخووووك يسمم اخوي واخرتها تتبرأ من حمد !!!! وينك يبه من عمي فايز؟؟؟ علامك ماتشوففف افعاله!! اخوك؟ حتى انا ما اقدر اشوف خطأ اخوووي
متعب صفق سعود بكل قوته: لاتنسى نفسك وانت تكلم ابوي يا حيييوووااانن ، ارككككب اشوف
ركبو كلهم وسعود له انفاس مسموعه وابو متعب يفكر بكلام ولده ، فعلاً هو تجاهل موضوع فايز ! ما علق عليه ولا انتبه شلون غابت عنه هذي؟ طريق الرجعه كان مليان حسراااااااااات وتفكيييييييير وقلوب ما وقفت من البكاء
وصلو الديرة اخر الليل وكلٍ افترق بمكان ، سعود طلع للعزبة ماله وجه يناظر ابوه وركان اخذ له فراش وطلع ينام بالسطح ومتعب فتح غرفته وشاف هيا تقرأ قرآن على سريرها ولا قوى يناظرها بعد سواة ابوها وجاء بيطلع بس فزت
هيا: والله ما تروح بعد ما جيت! الهنوف قالت انكم بالرياض ، طمني
متعب:ما ودي ازعلتس ارجعي لمكانتس وقرانتس واتركيني انا منيب طايق الارض اللي امشي عليها
تراجعت هيا وهي تشوف صدود متعب حتى عن ملامحها ! حست ان الموضوع أكبر مما تتخيل وروحته هالمره للرياض أصعب من الأولى ولا هو شيءٍ بينحل بحضن ومواساة
طلع متعب ما يدري وين يروح ، يشوف حمد بالجدران والسيارات والبيوت والصغار الديرة تقسّمت ملامح حمد وريحته.. اخذته رجوله لطريق العزبه وشاف زول يتمشى بين الابل
متعب: هذا انت يا محمود؟
سعود: لا بالله هذا سعود اخو حمد
تنهد متعب وهو زعلان من سعود وكلامه لابوهم وصد للجهة الثانية ودخل الخيمه وسعود استمر في المشي بين البل يدري ما يوخر ضيقته غير شوفتها وهو اكثر مكان يجمعه بحمد