"أثر الهناء حلم يا حمد"

البارت السابع والأربعين

بعد ما استانسو الأخوان بجلستهم نزل متعب ينام والباقين قررو يسهرون عند الحَمَام وهم فرحانين فيه وبقعدتهم بالسطح اللي تذكرهم بليالي حمد
متعب دخل الغرفة وشاف هيا نايمه بتعب واضح عليها ودخل جنبها وهمس
متعب:حبيبتي
هيا فتحت عيونها بارهاق تدور لمصدر الصوت وشافت متعب وانقلبت ملامحها وسدت خشمها
متعب وقف :خلاص بتروش واجي يمكن مسكت فيني ريحة الحَمَام والبل
هيا:ولاعليك امر يعني
قام متعب وهو ميت نوم بس راح يتروش عشان ما يضايق هيا وهو متأكد أن مافيه ريحة مقززة وبعد ما خلص وطلع وهو ينشف شعره بالمنشفه وعليه قميصه
متعب:جايتس من الحمام سييييده مالتس عذر،والله اني ولهت عليتس يابنت الحلال بخمتس
هيا سندت نفسها وفتحت ذراعها مجاملة لمتعب وهي لازالت تشم فيه نفس الريحه اللي عيت تفارق خشمها
متعب بهمس:عمري كله وانا اطرد وراتس يابنت عمي وحريص عليتس من الذنوب ما ودي يلحقتس ذنب ما ادري به واخرتها طحتي بذنب ما ينغفر
هيا بصدمه:وشهو!!
متعب:حرمتيني حضنتس اللي يرتبني
هيا انحطت بموقف ماتنحسد عليه ودها تجامل متعب ورومانسيته اللي تنشرى بماء العين وودها تقوم وتستفرغ وتبعد عنه وهي تحس أن كبدها واصلةٍ لأقصى حلقها ، برر متعب سكوتها بأنه خجل وباسها في نهاية خدها وارتمى بجهته ودخل بنومته على طوووول وهو مرهق وطافي نوم واول ما نام فزت هيا للحمام واستفرغت بقوة ماتحملت قرب متعب وريحته وللحين الصداع والدوخه ملازمتها .. اتجهت لرف العلاجات واخذت مسكن ودخلت فراشها تكمل نومتها وتحاول تتجاهل متعب ووجوده

-في الرياض-
وصلو ساره وصقر لبيتهم ونزلو اغراضهم بشكل عشوائي وراحو للغرفة ينامون بعد ماتعشو
ساره وهي تحط كريمها على يدينها وقالت من باب تغيير الجو وكسر الهدوء: بعتني الليله وراي شغل بكره يا كثره كثرااه
صقر دخل فراشه:بجيب خدم لاتشتغلين استريحي يا بنت الطايل
طارت عيون ساره وهي تناظر يدينها وصقر وراها ومستغربه في نفسها هذا الانسان والتناقض اللي يعيشه والتفت عليه وتحرك شعرها معها وانتشرت ريحة عطرها بثواني : صادق؟
صقر غمض عيونه وكتم انفاسه ماوده ينهزم بدري:ايه! ماتبين بكنسل واشتغلي
ضحكت ساره بضيق:ليت اهلي يدرون اننا نسولف عن بيتنا اللي بالرياض ونخطط نجيب خدم او لا
صقر ناظرها:وش بنسولف غيره؟
ساره:كانو يحسبون بنسافر ونطلع لمكه وكذا
صقر لاحظ الحسرة بعيون ساره بس قال :تزوجتي عشان تستقرين مو عشان تسافرين!
-عطاها ظهره بينام بس قالت ساره كلمتها اللي طيرت عيون صقر -
ساره بهمس ضايق:وتشوفنا متزوجين فعلاً !
-قفلت النور من جهتها وانسدحت بعد مانزلت دمعتها بقهر من اسلوبه وعرفت ان بُعدها عن أهلها وعيشتها مع صقر مو طيبه من الواضح لها الآن وغفت بعد ما بكت-
صقر بنفسه: تبين العيال يا بنت سيف! اثاريتس مستقصدة كل شيء! والله لا احرمتس الضنا مثل ما حرمتوني ابوي -نام صقر وهو مبسوط انه قدر اخيرًا يمسك عليها شيء يضيق صدرها فيه-

-من الصبح في الديره-
وقف رايد على رؤوس العمال ويشرف عليهم وبدأت ملامح غرفته تبان ووسع في الدريشه اللي تطل على حوش ابو متعب وبيته وناظر تفاصيل الغرفه والبيت ورفع جواله يدق على فايز
ابو فلاح وهو على السفرة يفطر:هلا؟
رايد:السلام عليكم ورحمة الله .. شلونك يا عمي
ابو فلاح ناظر طارق وام فلاح:وعليك السلام ياهلا
رايد:حبيت اعطيك خبر ان العرس بعد شهر من الآن إن شاء الله يعني تبي تصوم حرمتي رمضان معي وفي بيتي ان قالها الله
ابو فلاح ناظر عذبه: خير ان شاء الله الله يوفق الجميع -قفل ونزل جواله- حصه
حصه التفت له:نعم
ابو فلاح:خلصو اموركم قدامنا شهر
هزاع فهم وناظر طارق: شهر!!!
عذبه ضحكت:على رجعتنا للديرة؟
طارق بنفس الضحكه:على عرستس
الجازي: شلون تتزوج بعد شهر؟مو العسكرية ذي لازم ينحبس الواحد خمسه واربعين يوم مايططلع ابد ولا انا ما فهمت زين
ابو فلاح بغضب واضح:خلصنننا انا كنت اتكلم مع امكم مافتحت مجال للكل! انفطرو وعلى دواماتكم
قام هزاع وطلع لجناح فلاح والجازي قامت تلبس عبايتها عشان تداوم المدرسه وعذبه قامت لغرفتها وهي مستغربه اسلوب ابوها وحاله الأخير وطاري الزواج!
دخلت امها:البسي عبايتس بتطلعين معي السوق
عذبه:الصبح!
حصه:عذبه لاتعلين كبدي واخلصي
عذبه:يمه ليش سمعتي من طارق ولاسمعتي مني؟ ليش ماتقعدين معي وتفهمين وحتى لو حصل شيء هذا هو حمد صار خطيبي رسمي قدام الله وخلقه مو المفروض ترضين وتسامحيني رغم اني ما اذنبت!
ناظرت حصه في عذبه بضيق وهو بنفسها تقول (بلاتس ما تدرين من خطيبتس ورجلتس): اقفلي الطاري وانزلي