"أثر الهناء حلم يا حمد"

البارت السادس عشر

دخل أبو متعب غرفته تاركٍ وراه العيال وهم معاقبين
زينه:وش هاللي مسويه يا ابو متعب! الدنيا مطر وراك مقعدهم فوق الجدار!
ابو متعب:اتركيهم عنتس خلي السهر والسمرات تنفعهم
زينه وقفت من سجادتها وجلست قباله:سيف انا زينه لاتخبي علي شيء انت وش بلاك؟ولد ضاري قايل لك شيء؟ناوي يفتح ملف ابوه؟
ابو متعب نفض فراشه:انا ما اخطيت عشان يدور له شيء عندي مير هالتيس اللي فوق الجدار-أشر على حمد-طاعن الرجال في تسبده وش تبيني اسوي؟ اقول انا ذبحت ابوك اولى وولدي...
زينه سكتت ابو متعب بانفعال بسيط:مهب أنت ياسيف الغلطة غلطة فايز!والذنب برقبته هو! ليه تحمله عنه ؟ شف ولده الحين حاقد عليك وعلى حمد وعيالي كلهم يحسبك المذنب ، سيف ولدي ماهوب تابعٍ درب عمه! لاتقول طعنه! أكيد الولد غبن حمد وأنت تعرف حمد زين ما يخطي ولايرفع يده على احد تبيه يطعن!!
ابو متعب بحده:زينه!!!!! اقصري حستس ولا احدٍ يدري عن فايز وموضوعه علامتس انتي! انا ماقلت لتس عشان تفتحين السيرة
زينه: ياسيف تكفى كل شيء الا عيالي انا اقوم الدنيا ولا اقعدها لا وصلت عند عيالي!
ابو متعب انسدح واعطى زينه ظهره:محدٍ بجايس عيالتس مير امرحي ولا اسكتي ..-التفت عليها-ولاتطلعين او تنزلينهم او تطلّعين لهم شيء هذاني قلت لتس خليهم يتربون ويتركون السمرات-رجع ينام وزينه قامت تكمل صلاتها وتدعي إن الله يحفظ عيالها من شر شايع وفايز والموضوع القديم-
-بالحوش-
حمد: ايييي عااد هذا اخر بيت ومعروف بيت حمدان وبنات اخته الثنتين
سعود:تهقون شصار عليهم؟
فارس:يووووووه هذا ما جاء عقب ما ماتت اخته؟
عمر:تخبره؟
فارس:مستحيل انساه ومستحيل انسى هالليلة حسبي الله عليكم
-ضحكو العيال على فارس وحمد التفت براسه للبيت وكأنه حاس إن عذبه صاحيه وتناظره وهي فعلاً كانت بالسطح تحتري مجيه وتبيه يقرأ رسالتها بس للأسف أنه تعاقب قبل يقراها وأول ما لمحها حمد نزلت راسها بسرعه تحت سور السطح وحطت يدها على قلبها من الخجل-
قال حمد بصوت مسموع للي حواليه وعذبه تسمعه:
ياهلا في شوف زولك ياهلا
يالطيف الروح خذ مني سلام
ارحم اللي في هواك مبتلا
من ودادك نايحٍ نوح الحمام
-عذبه نزلت بسرعه للغرفه وهي تندس باقرب فراش على الارض وبين البنات وانفاسها تتسارع من الخجل بعد ما انتبه لها حمد وقصد فيها-
عمر ناظر حمد:هذا مصروع؟ يقصد في من؟
التفتو العيال للبيت يتأكدون ورجعو ناظرو حمد اللي كان رافع راسه للسماء ويستقبل رشاش المطر على وجهه بابتسامه وطاقة حلوه
حمد:منيب مصروع لكن ابيات طارفه وجريتها
سعود عرف ان حمد لمح عذبه واكتفى ببتسامة
فارس:الا والله مصروع ومهبول ماسدك اللي حنا فيه؟ تقوم تقصد بالجن؟ من شفت انت؟ ماشفنا غير كشة خالي من شوي لا يكون ذا كله بر؟
سعود: ابوي لطيف الروح؟ على اللي مسويه فينا يبي لنا قصيدة عتاب وهجاء بعد
العيال:ههههههههههههههههههههههههههههههههههههههههههههههههههههههههههههههههههه
-عند البنات-
هيا بعدت البطانية عن وجهها ونغزت عذبه:بسس
عذبه من تحت البطانيه:هممم
هيا:وين طسيتي من شوي؟
عذبه:رحت الحمام
هيا:وخري البطانية اشوف وجهتس
ساره:اسكتوووووووووووو
مزون:ساره وراك تصارخين؟ ... لايكككون صرصور؟؟؟؟؟ تكفون الا حشرات الديرررررهههه يمهههههههه
فزت جازي وبدور وقامو يصارخون كلهم: وييينننننه وينهههههه
هيا:وسلاااااال لكم كل ابوكممم اسكتو اسكتو لا يقوم خالي يقعدنا مع المهبّل اللي برا
عذبه بعدت البطانية:شفتيهم؟!
الهنوف قامت واخذت نعولها بيدها وهي نص صحوة ونص نوم:والله وبالله وتالله ان سمعت حس وحدةٍ منكم لا اخذها بهذي! نبي نرققققد مابقى شيء على الفجر !
كتمو البنات ضحكهم على جهللة وعصبية الهنوف ورجعو اماكنهم وكلها ثواني وهم يسترجعون اللخبطه اللي حصلت واصواتهم تتعالى بالضحك لين صحصحو وقامو يتسألون بينهم ويفهمون من بعض وكلها دقايق واذن الفجر ونزلو يرتبون سفرة الفطور والبيت ويجهزون القهوه وياخذون شوي ويتذكرون عصبية الهنوف ويرجعون يضحكون
ابومتعب:لا اله الا الله.. صبحكن الله بالخير يابنات
تقاربو البنات حوالين ابو متعب يسلمون عليه ويصبحون عليه:صبحك الله بالنور /خالي/عمي/يبه
زينه طلعت وراه بوجه جامد:السلام عليكم..ساره جهز الفطور؟صحيتي اخوانتس الصلاة؟وجدتس؟
مزون:انا صحيت امي وجدتي
ساره:اي يمه صحينا قبل الاذان بشوي وجهزناه بس اخواني فوق الجدار والثنين الباقي نايمين مع العيال
ابو متعب:انا اصحيهم كلهم بس جهزو الفطور يلا ..-طلع ابو متعب للحوش وهو كاتمٍ ضحكته-انزل انت وياه الصلاة
سعود:محنا نازلين وبنحرمك مننا مثل ما حرمتنا النوم
ابو متعب:ابركها من ساعه مير انزل الصلاة اخلصو-راح للمسجد وهو مبتسم لهروج سعود اللي تضحك الكل غصب عنهم-
عمر:انا صراحه تأثرت من العقاب .. حمار انت؟محد يبيك حتى خالتي زينه
سعود:مدري عاد توقعته بيحزن
فارس طب في الحوش:امشو امشو تصلب ظهري خل نصلي ونرقد
حمد:ترقد؟هههه ياحظك مهب ابوك ولا وراك حلال ومحل بعدين لاتنسى انك في الديرة يعني الفطور والغداء والعشاء جماعه وغصب عنك-راح حمد للبيت وبدأ يتنحنح-
ساره:امش امش ياحميد محد قدامك
حمد:صباحتس خير وسرور ياعين حميد
ساره:حمد ابيك بعد الصلاة او الفطور متى مافضيت عاد
حمد:ابشششري
ساره ابتسمت لحمد وراحت للمطبخ اللي كانو البنات كلهم فيه اصلاً وعذبه انسحبت من بينهم وعليها جلالها ووقفت تحت الدرج وحمد كان طالع
عذبه بصوت واطي: حممد
حمد وقف وابتسم وهو يناظر مسكة الدرج:قليب حمد
عذبه ترددت تسأله هو شافها امس وهل قرأ مكتوبها ولا باقي وانتبه لها حمد وجاوبها قبل تسأل
حمد:شفتس شفتس
عذبه:منت زعلان علي؟ عشان اللي صار امـ...
حمد:انا لاشفت زولتس قمت ارحب وأهلي يرتاح راعي الحب لا شاف خلّه
.. وينسى زعله بعد يا عذبه
عذبه توزت تحت الدرج ولمت نفسها بخجل وحمد طلع فوق وهو للحين مبتسم وغير ثوبه اللي تبلل من المطر وهو يوضي وينطلق للمسجد بكل رحابه صدر وحب طالع من عيونه وبعد ماصلو الفجر جماعه في المسجد ورجعو للبيت واستقبلتهم ريحة العود وصوت الجدة منيره وهي تهلل وتستغفر التمو كلهم حواليها كانت جالسه عند باب البيت الداخلي والباب مفتوح وانسام الفجر وبرودة الجو وريحة المطر منتشره في الجو والرباعي المعاقب كانو منهلكين من النوم وكل واحد منسدح على كتف الثاني الا حمد كان يصب ويباشر ويسولف عكس الإنسان اللي امس 
متعب:علامكم تتناعسون؟
فارس وهو يناظر خاله: خلونني ساكتتتتتتت خلوني ساكت -لم نفسه من البرد-
ابو متعب ابتسم وهو يناظرهم: انا ما نهيتكم اولى؟
حمد: يااااا يبه يا تسبدي انت حنا ماسوينا شيء غلط .. سم-مد له فنجال القهوه-
ابو متعب: وانت تبييني احتريك تغلط؟؟
سعود اشر لحمد يسكت:خلوه علي... يبه الحين وش استفدت يوم انك عاقبتنا؟علمني؟بس تعبنا وانهلكنا بعدين ليش ما تأثرت يوم قلت نبي نحرمك مننا؟ ها جده شفتي وليدتس؟؟؟
الجده منيره ضحكت:الله يوسع صدروكم بالعافيه
عمر:جده !!! وراتس ماخذتها سعة صدر وحنا نرجف من البرد قدامتس الله يسامحك يا خالي.. يمه قولي شيء!!
الجده منيره:اي وانتم وش مسوين يوم انه يعاقبكم اهرجو!!
عمر: والله يا جده ما سوينا شيء والله كذا شافنا خالي و.... -عطس عطسه قويه- الحمد لله المهم وهو يقول ارقو الجدار واقعدو لين الصبح تخيلي!
فارس:جده انتي تعرفيني انا عاقل مهب حركاتي يعني ذولا بنقول بس انا؟ -ناظر خاله-يعني المفروض تنصفني يا خال وما تعاقبني معهم
ابو فلاح:العقّال والله عيالي
هزاع ترزز:احمممم احممم
ركان:لالا ياعمي حتى انا ومتعب عقّال ومشعـ... ابك هذا ميت؟من جاء الديرة وهو راقد احد يكرفه بالرياض؟
دلال: اسكت انت خلني اشوف ابوك ..الله يسامحك يا سييييف عيالي مناعتهم ضعيفه ليش تسوي فيهم كذا!!!
ابو متعب: من الدلع والله خليهم يستاهلون ثنين برا البيت لتالي الليل وهذا ماسمعنا حسه من جاء كله من دلعتس لهم
دلال:اي خلهم يتدلعون!! الله يسامحك بس قم عمر يمه ارقد
قام عمر وهو مبتسم للثلاثي اللي بقى:ياحلو الواسطة حلواااه ،انا استأذن اجل
فارس:ابك انا محد يشوفني ولا شسالفه؟
حمد:هههههههههههههههههههههههههههههههههههههههههههههه الحب كله لعمر الله يعوضك
متعب:اقول حمد
حمد:شتبي انت ولا كلمة يا الدجاجة ساحب علينا وراقد من 9؟ ابوي انت؟
متعب: زين زين مير قل فاين
العيال:ههههههههههههههههههههههههههههههههههههههههههههههههههههههههههههههههههه
ركان:هاه هاه يبه شف حمد يغلط عليك
ابو متعب:الظاهر ماسده اللي جاه
حمد قام وباس راس ابوه:حقك علي يبه بس انت ترقد بدري
ابو فلاح ناظر متعب:امورك جاهزه وانا عمك؟
متعب اعتدل في جلسته:الحمدلله كل شيء تمام انا مواعد عمال اليوم يسوون غرفة خارجية لنا وبنسكن مع اهلي
ابو فلاح ناظر ابو متعب:شلون!
ابو متعب اكتفى بالصمت وترك الموضوع لمتعب:اي ياعمي بنسكن مع اهلي ماله داعي التكاليف ونطلع وحنا كبرنا وربينا سوا وهذا الأريح لي ولهيا
الجده منيره:مير الله يوفقكم ويسعدكم والمكان مايهم هذا حنا بيتنا يشيلكم كلكم ماشكى المهم الحب وانا اميمتك الحب وهيا درة لاتزعلها ولاتكدرها وهي مهب رايحة بعيد عند اهلها وبينهم ولا يا فايز؟
فايز سكت وصوّتت ساره لراكان وهي تناديه يشيل الفطور وفعلاً قام ركان ياخذه ويحضره عندهم وتذكر حمد ان ساره تبيه وقام لها
حمد:تعالي تعالي سوير
ساره التفت:سم؟
حمد:هاه وش بغيتي انتي؟
ساره تذكرت بس غلبها الخجل:لا خلاص بس كنت بنشدك ورا ابوي معاقبكم امس وجانا العلم-غمزت له وضحكت-
حمد عرف ان عذبه شافتهم وسمعت كل شيء:ههههههههههههههههههههههههههههههههه اييييييه .. متأكده؟
ساره:اي اي بس ليه فيه غيره؟
حمد قال من باب الطقطقة:مدري يمكن تعرسين
ساره جمدت ملامحها وطارت بأحلام وردية بعيدة كل البعد عن الواقع وأول من جاء في بالها "تركي بيصير زوجها" ولا كان لها مفر إلا بالنحشه عن حمد وحمد يناظرها مصدوم وضحك ورجع يفطر وبعدها انتشروا كلهم لأشغالهم إلا فارس قام ينام مع عمر وهو ماتعود على وضع الديرة وطارق كان قاعد في المجلس ويحاول يصيد النت عشان يدخل دورات وتزيد شهايده وباقي العيال هزاع ومشعل راحو مع ركان للبل وسعود وحمد راحو للمحل ومتعب كان مبتلش مع العمال واغراضهم وهم يزينون له غرفته والبنات كانو في المشب مع الجدة منيره ضبطو لهم قهوتهم وحليّبتهم اللذيذه ... في طريق السوق صادف فايز شايع اللي كان فايز يعتبرها صدفه اصلاً وشايع كان مخطط  لكل صغيرة وكبيرة ومحدد الوقت بالضبط، قابل فايز ومسكه من ذراعه وهو يهمس في اذنه ويقول
شايع:اقنع اخوك يزّوج صقر بن ضاري وتتم هالخطبة ولا والله ثم والله يا فايز الطايل ان تهتز الرياض كلها والمملكة مما يسمعون مني عنك ،،اللي عندي قلته لك يالقاتل والمغرب ابي اسمع تم
راح شايع وهو كله يقين وثقة ان فايز بينفذ اللي قاله بالحرف الواحد مايهمه شلون كل اللي يهمه النتيجة أما فايز فكان مصدوم صدمة حياته!! بعد هالسنين كلها جاء من يذكره بقضيته!! جاء من يعايره بفعلته وذنبه! ليش الحين بالذات؟ووش علاقة شايع بصقر اصلا؟وش مصلحته من هالخطبه؟ومن بيتزوج؟؟؟؟ليش راح وهو مرتاح وواثق انه بينفذ كلامه! معقولة عنده دليل!! كانت هذي تساؤولات فايز اللي عجز يجاوبها وعجز يستوعب اللي حصل وتقدم لقهوة العم سعد يبي يركد راسه بشاهي ويقلّب الموضوع في مخه بس في الجانب الآخر كان متعب رايح يجيب واحد من العمال وشهد الموقف لكن ماسمع اللي دار بينهم ولا جاه غير سؤال واحد(وش اللي قاله ابو تركي وخبص عمي فايز؟معقول بينهم علاقه ومو مقاطعه معنا؟)ما اهتم متعب للموضوع كثير واخذ العامل وكمل مشواره
في المحل
سعود وهو جايب الشاهي من قهوة العم لسعد لحمد:وراه عمي لحاله بالقهوه؟
حمد:غريبه مهو مع ابوي!
سعود:لا.. اقول على طاري ابوي وعمي متى بتخطب عذبه؟هيا واعرست
حمد ابتسم خفّة:مابعد اعرست وانا توي والصدق مابي اسكن في بيتنا عذبه تستاهل قصر يليق بها
سعود تفل الشاهي:وععععع وع الله يغثك ياشيخ وبيتنا علامه!! هذا هي تاكل وتشرب فيه ورا ماتسكن فيه بعد؟
حمد:عشان ماتقابل عيناتك الوصخه وتغثها..عذبه بعيشها عيشة اميرات ببني لها بيتٍ يهرجون كل اهل الديرة فيه وابجيب لها الخدم والحشم وكل طلباتها أوامر لذلك منيب مخطي خطوة وحدة لين انجز هالأمور
سعود:كان تبي شوري تقدم وخلص نفسك من الحين لا ارنك بهالبيّالة هذي قال خدم وحشم انت زين موترك هالحين وعقبها زين حياتها
حمد ابتسم ابتسامة عريضة:جبببببتها ياسعوووود جبتتتتها !!! والله مايغلى الموتر عليتس ياعذبه
سعود ناظر حمد ببلاهه:شتقول انت؟
حمد فز من يم سعود:امسك المحل زين ابروح واجي منيب مبطي
سعود:يالله الصلاح والعقل بسسسس-صب له بيالة شاهي ثانيه وجلس يتأمل السوق والناس اما حمد فأنطلق لقسم الشرطة اللي ببداية الديرة وهو يستعجل خطواته لمكتب سرور-
حمد:فاضي حضرة الضابط؟
سرور فز:هلا هلا باللي خلوني اكرف وراهم
حمد جلس:لو ادري كرفت معك ولا رجعت وعاقبني ابوي
سرور:ياحليله ابوك للحين مايداني السهر ويعاقب؟
حمد:جايك وانا مواصل ومنطول في الحوش ومطر الليل كله
سرور ضحك:والعجيب انك رايق!
ضحك حمد ثم قال:والله ياسرور انا اهقى ان لك من اسمك نصيب وبتسرني وتسعدني بخدمة بسيطة تقدر عليها ولاهي صعبة عليك
سرور نفخ صدره:اوف اوف ! ازهل وتم من الحين مير وش عندك؟
حمد:ابي اتوظف بأسرع وقت وقلت اقربها عسكرية و الأمن العام ودامك فيه بتخلص الأمور،هاه؟
سرور ابتسم:اببببد عطني اسبوع بس ومالك الا اللي يسعدك ويرضيك بس وش ورا هالعجله؟
فز حمد يحضن سرور بفرح:جعلك حي غني ياسرور.. اعلمك بعدين -طلع حمد على عجاله وهو يحمد ربه على هالتييسر والسرعة الحاصله كان يحس إن عذبه قاعده تقرب له يوم عن يوم-
انتهى💗