سباق المشاعر

الرابع ......الباب مفتحش

كان يجلس الاستاذ احمد المحامى مع السيدة سهير تحكى له كل ما مرت به فى حياتها . والاستاذ احمد صامت منتبه لها ويحلل كل كلمة تحكيها السيدة التى امامه .
سهير تبكى : انا يااستاذ ممرضة فى المستشفى الحكومى وجوزى ابو بنتى مات بعد سنتين كان موظف معايا واخواته الله يسترهم تخالصوا معانا وبقى نصيبنا البيت اللى احنا عايشين فيه حاليا بيت دورين انا قاعدة فى شبرا فى حارة ضيقة لكن ناسها طيبين قوى عارفنى وعارفاهم .
كان الاستاذ احمد ينتبه لها جدا ولم يقاطعها ابدا حتى يستطيع ان يكون فكرة عامة عن حكايتها .

سهير : انا ليه اخ واحد واخت ، اخويا دة حشاش ودايما طمعان فيا انا عارفة وفضل يزن عليا عشان اتجوز صاحبه كارم سنين بعد حوالى ٥ سنين رضخت لضغوط اخويا انى ست لوحدى ولازم راجل يحمينى . قلت ضل راجل ولا ضل حيطة .
وبعد شوية من الجواز الحيطة اتهدت عليا لوحدى و بان كارم على حقيقته قعدلى فى البيت بقيت انا اللى اصرف عليه وعلى بنتى ، بنتى بقت بتكبر قدامى بقه بيعاملها وحش بقا يتخانق معايا لو اشترتلها حاجة او اديتها فلوس .
بقت معاملته معايا زى الزفت بقى بيجيب اصحابه فى البيت فى الدور اللى تحت شقة صغيرة عاملاها مخزن وطبعا كان بياخد فلوس مرتبى اول باول لدرجة انى كنت بخبى الفلوس مع واحد جارنا بتاع البقالة ..بقيت اتخانق معاه كل شوية عشان يطلقنى بقى بيهددنى ببنتى ويضربنى وياما كسرلى ايدى و رجلى .
وتبكى بكل حرقة وتكمل كلامها :اخويا بقى بيقف معاه وبيجى يسهروا سوا واصحابهم ويشربوا طول الليل . دخلت جيرانى اكتر من مرة لكن كانوا بيخافوا منه ..وفضلت حياتى على كدة سنين وسنين بنتى بقت بتكبر خوفى عليها زاد قوى منه ليعمل فى البت حاجة بقيت كل ما اروح الشغل اخدها معايا وهى متعرفش باخدها ليه كنت بتحجج انها بتوحشنى ..لدرجة ان كل المستشقى بقت بتحب جيهان عشان امورة وحلوة كل وردية ليل اخدها معايا وكانت بتنام فى اوضة الملابس ..
فى يوم كان هيغصبنى ابيع البيت وضربنى وكسرلى دراعى لولا الجيران ادخلت وحمدت ربنا ان البيت متسجل باسم جيهان وهى قاصر فالبيعة منفعتش ..

احمد بهدوء شديد : وايه اللى حصل خلاكى دلوقتى عايزة حد يخلصك منه .
سهير تمسح دموعها : جايب عريس للبت واحد صحبه بلطجى زيه عايز يجوزهاله بالعافية وانا مش راضية ...هددنا ان موفقناش هيسيبه عليها وهتتجوزه غصب عنها وعنى انت فاهم طبعا .
احمد بغضب : فاهم الاشكال دى كملى عملتى ايه بعد كدة . !

سهير : دخلت اخويا فى الموضوع ،،،تصور يقولى جوزيها البت كبرت بلا تعليم بلا نيلة البت لبيت جوزها ، كارم جابه هو واهله فى البيت لكن انا طردتهم وبعد ما مشيوا مسكنى ضربنى وكان هيضرب جيهان وطردها من بيتها وبيت ابوها وهددها مترجعشى الا لما تسمع كلامه عامل البت بيعة وشروة بيبيع فى بنتى وانا على وش الدنيا .
احمد :طب واهلها فين فين عمامها وكدة .!

سهير :عمامها فى بلدهم مايعرفوش عننا اى حاجة بعد مااتجوزت انقطعت علاقتنا بيهم مايعرفوناش .
احمد : وانتى عايزانا نساعدك ازاى ياام جيهان !! .احمد كان شخص ذكى جدا كان يريد ان تحدد هى ما تريده بالضبط حتى يعرف نواياها .