سباق المشاعر

الثالث عشر ،،،،،،،السيدة عائشة رضى الله عنها

استيقظت دنيا على صلاة الفجر وجدت ابوها و امها يصلون . والمفاجاة كانت معاذ يصلى معهم ..
فرحت دنيا كثيرا .ذهبت وتوضات وصلت هى الاخرى بغرفتها ..بعدما انتهت سمعت امها تنادى عليها .
خرجت دنيا : نعم يا ماما.
نسرين : متناميش بابا ومعاذ خرجوا يشتروا فطار فول وفلافل سخنة وعيش .
دنيا فرحت : الله انا عايزة جبنه رومى كمان معاهم .ا
امها ضحكت : عارفين بتحبى الجبنه الرومى مع الفلافل . ابوكى هيجيبلك اطمنى ومخلل زتون عشان خلص .
دنيا : ياريت وشيبسى معاه تبقى هيصة والله .بس بابا خد معاذ معاه ليه .
نسرين ضحكت : هو اللى كان هيروح لوحده وبعد كدة صعب على ابوكى قال اروح معاه .
دنيا : والله بابا دا مفيش منه .
نسرين : اه ياختى مفيش منه فى كل حاجة لما يزعق على اى حاجة دى محطوطة ليه دة ماانشالش ليه وبردة لما الحنية تزيد عليه معاذ اتاخر دنيا اتاخرت .
دنيا ضحكت : ماهو الراجل مش حارمك من حاجة اهو شوية زعل وشوية حنية احمدى ربنا .
نسرين : على قد طيبة ابوكى وحنيته على قد لما يزعق يالهوى انا عن نفسى ساعات ببقى عايزة اضحك وانا مضايقة منه والله بس خلاص اتعودت .
دنيا : اه اتعودى احسن واهو اللى نعرفه احسن من اللى مانعرفوش .

نسرين ضحكت عليها : بكرة هاتعيشى يا دنيا حياة كاملة مع نصك التانى حياة فيها شغل وبيت واكل وشرب ومصاريف وفرح وزعيق ومرض وادوية حاجات كتير جدا مش الحب فى التليفونات والنت دة وكل واحد لما يشوف حبيبه يغرق نفسه برفان ويستحمى مرتين .لأ دى هتبقى عشرة كاملة ليل ونهار ٢٤ ساعة من بعض على الحلوة والمرة واهله بقى واهلك والجيران والشارع وكدة ..

ضحكت دنيا بشدة : انتى لازم ياماما تعملى كتاب فى كيفية التعامل مع الزوج للمتزوجين حديثا وتعلمى البنات لما جوزك يزعق بصيله وحطى ايدك فى وسطك وما تتكلميش ..يااما غطى وشك فى الباطنية وكأن هو بيزعق لحد من الجيران ..وكملت ضحك

نسرين : بتضحكى ماشى لما نشوف اللى امه داعية عليه هتعملى ايه معاه ..يارب نعيش .
دنيا لا تعلم لما تذكرت اكمل فى نفس اللحظة وكانها تتمناه هو بعينه ...ردت بسخرية، ،،دى امه داعياله فى ليلة القدر هى وعيلتها كلها ..

دخل احمد ومعاذ ووضعوا الاكياس على السفرة ..دنيا ركضت تفتح الكياس وجدت الشيبسى والجبن ضحكت وفرحت وقالت : اهو كدة الكلام .
معاذ : انا اللى جيبتلك شيبسى على فكرة مش بابا دا ماكنش فاكر اساسا ..
احمد : والله ! وانت خدت الفلوس من منين يعنى .
دنيا : ربنا يخليكم انتوا الاتنين قلبى والله .

نسرين وهى تحمل الأكياس : تعالى اعملى اى حاجة معايا والله انا مش عارفة لما تتجوزى هاتأكليه ايه والله ياعينى يابنى دا صعب عليا من دلوقتى والله .
دنيا باعتراض : يصعب عليكى ليه امال الاندومى معمول ليه ها !

احمد : اندومى ! هاتاكلى الراجل اندومى دا صعب عليا انا كمان .
معاذ جلس بجوار ابوه : ماله الاندومى والله انتوا اخركوا رز وشوربة .
احمد ضربه على قفاه : شوربه هو فى احلى منها ..