سباق المشاعر

التاسع عشر ......الحل

مرت الليلة اللى فاتت بكل مافيها . غير ان احمد معرفش ينام ابدا فضل يفكر فى كلام اكمل وتصريحه انه بيحب دنيا ومتمسك بيها  واحمد خبير مش محتاج حد يقوله ان دنيا كمان بتحب أكمل وشكلها وهى منهارة علشانه مابيفرقش مخ احمد انهارت بمجرد ماحست انه هيروح منها وأكمل  بيحارب عشان يوصل لدنيا ، واحمد مش عارف يعمل ايه لاينفع يكلم بنته فى حاجة زى دى ويقولها شيلى أكمل من دماغك ولا ينفع يقولها الحقيقة  وساب كل حاجة لربنا  واكيد لو ليهم نصيب هيكونوا لبعض  حتى لو اجتمعت الانس والجن ان يفرقوهم   .

اتى الصباح واشرقت الشمس بنور جديد على وجه الارض نور يحمل فى طياته حلول لكل مشكلة وامل لكل كرب وبلاء ، مادامت الشمس اشرقت يبقى مش اخر يوم فى الكون يبقى لسه فى وقت ومادام عايشين لازم نواجه الكتير من الابتلاءات و علينا نواجهها بشجاعة وايمان ويقين بان الله سيعيننا على حلها ..

نزل اكمل من غرفته فى الصباح  وهو يرتدى  بدلة جميلة ..
امه شافته انصدمت وسألته :
انت رايح فين انت لسه تعبان يااكمل .

أكمل رد عليها بابتسامة عشان يطمنها :
صباح الخير ياماما انا بقيت كويس الحمد لله .
امه قالتله بحزن :
لا مش كويس انت بتتحامل على نفسك عشانا  انا اسفة ياابنى انى كنت سبب فى تعاستك مع ابوك مش عارفة ازاى وافقته انه يعمل كدة فيك وفينا انا مكنتش عايزة مشاكل فى البيت  .

أكمل  قبل راسها  : 
متزعليش ياماما  بابا اكيد عرف غلطه   ومش هيكرره تانى .

امه بسخرية : انت متاكد قوى يبقى متعرفوش زيى  .

أكمل  بحزن على وصل اليه ابوه رد عليها :
المرة دى اسمه وسمعته  هما التمن اكيد هيفكر الف مرة  .
امه  تنهدت وردت : هنشوف  ..قولى انت هتعمل ايه !

نزل ابوه من غرفته اول ما كوثر شافته قامت عشان مش عايزة تشوفه...صبرى لاحظها  خصوصا بعد مالمت هدومها وانتقلت لاوضة تانية اول مرة من ٣٢ سنه كوثر تنام بعيد عنه اول مرة يحس ببشاعة اللى عمله وان خلى ثريا تتحكم فيه بالشكل دة لدرجة انها خربت بيته وهتضيع اسمه وسمعته  وبايد مين للاسف بايده هو من شدة غباءه  دى مااترددتش لحظة تعمل كدة فى اخوها  .
اكمل شاف امه وهى ماشية سابها براحتها ومع الوقت كل حاجة هتتصلح  ..

أكمل  : بابا انت كويس !
صبرى : الحمد لله .
أكمل  :
من فضلك يابابا انا عايز كل اوراق مشروع القرية وكل العقود اللى عملتها اى ورقة تخص المشروع انا عايزها حتى الرسومات  .
صبرى :
هتعمل ايه يااكمل فهمنى !
أكمل كان ماسك ملف .طلع  عدة عقود وقال لابوه :
لو سمحت امضى هنا .
صبرى بص فى الورق وقال  : دى عقود بيع .!

أكمل رد بهدوء :
ايوة  دى عقود بيع لارض المشروع منك ليا ودة عقد بيع  نصيبك بالكامل فى المشروع ليا يعنى حضرتك هتبعد تماما عن المشروع دة مش هيكون ليك اى حق فيه من دلوقتى وانا  اللى هاكون فى وش عبد الهادى  وعشان اسيطر على المشروع لازم تكون كل حاجة باسمى  عشان لو اتصرف اى تصرف اكون انا فى وش الناس مش حضرتك حضرتك لازم يكون اسمك نضيف لحد اخر لحظة  ،