سباق المشاعر

السابع والاربعون ،،،،،،الرخمة

فى صباح اليوم التالى ..
كانت نسرين مازالت تبكى على فراق دنيا .
احمد : يانسرين بطلى عياط بقة بنتك اتجوزت الحمد لله احسن راجل .
نسرين وهى تبكى : ماانا عارفة دى الدنيا كلها بتحسدها على جوزها وانا خايفة عليها يااحمد .احمد حضنها وطبطب عليها وقال ،،بس بس اهدى .
نسرين وهى تبكى : دنيا وحشتنى .
احمد بعدها قليلا وقال : هى لحقت داانتى سايبها الساعة اتنين بالليل .

نسرين : اه وحشتنى وعايزة اطمن عليها واشوف أكمل عاملها كويس ولا ايه .!
احمد ضحك وقال : يامفتريه دا الراجل بيحب التراب اللى بتمشى عليه بنتك هيعاملها وحش ! وبعدين هو لحق .
نسرين : معرفش المهم انا عايزة اطمن على بنتى .
احمد : يانسرين الساعة عشرة الصبح هتكلمى عرسان ازاى بس خليكى للمغرب ابقى كلميهم .

نسرين اعترضت وقالت : المغرب ايه هو انا هاستنى دة كله .!
احمد : لا حول ولا قوة الا بالله العصر ابقى صحيهم من النوم وكلميهم ماشى ! هو مفيش فطار ولا ايه !
نسرين : سيبنى فطار ايه اللى بتفكر فيه
احمد ضحك : ماشى خليكى انتى ياام العروسة وانا هاعمل فطار وشاى كمان .وخرج للمطبخ وعمل صينية فطار واخدها لغرفتهم وقال ،،تعالى افطرى يالا .
نسرين شافت الفطار وقالت : افطر انت .

احمد عملها ساندوتش جبنة واداهولها وحب ان يخفف عنها وقال ،،فاكرة يوم صباحيتنا !

نسرين ضحكت وقالت : فاكرة يامتر فاكر لما جالك واحد عشان تكتبله عقد وتقوله انا عريس وصمم برده تنزل معاه المكتب ويومها دفعلك مبلغ كبير . وطلعتلى هنا فرحان بوستنى وقولتلى ياوش الخير وادتنى نصهم !

احمد ضحك وقال : فاكر لما زعلتى ساعتها انى نزلت مع الراجل المهم اقول للراجل انا عريس ياعم وهو حمار مش فاهم ياعم انا متجوز امبارح يقولى دى نص ساعة بس .

نسرين تضحك ونسيت الحزن :
بس الحقيقة ادالك فلوس كتير وقالك تعويض للعروسة اننا خدنا العريس منها .
احمد : الحمد لله كنتى وش الخير يانانو وجيبتلى دنيا اجمل بنوتة وبعدها معاذ الرزل .
نسرين : موزو دة قمر بلاش تشاكسه والنبى طبعا فضيلته بعد ما دنيا اتجوزت .

احمد جلس بجوارها عالسرير وقال : طبعا قمر عشان شبهك يانانو .
نسرين : تعالى نتفرج عليهم وهما صغيرين ..واحمد جاب البوم الصور وقعدوا يتفرجوا عليهم ويضحكوا ..

،،،،،،،،،،،،،،،،،،،،،،،،،،،،،،،،،،،

فى مكان اخر .
الظهر قد اذن ووعد وسليم نايمين . رن جرس الباب . استيقظ سليم وغسل وجهه وذهب ليفتح الباب وجد اخوه باسم وزوجته نرمين معه سليم رحب بباسم لكن اتضايق لما شاف نرمين لكن سلم عليها عشان خاطر اخوه .
دخلوا وجلسوا ونرمين تنظر للشقة بغل وحسد .

سليم سابهم وراح يصحى وعد ولما عرفت انها نرمين اتضايقت لكن ماقالتش حاجة لسليم قامت دخلت الحمام وبدلت ملابسها ولبست دريس جميل وطرحة وخرجت لاستقبالهم .
باسم : الف مبروك ياوعد .
وعد ردت بابتسامة : الله يبارك فيك .ومدت يدها لتسلم على نرمين .فنرمين قامت وحضنتها وقالت : الف مبرووك ياعروسة الف مبرووك ياوعد ياحبيبتى .
وعد ردت بهدوء : الله يبارك فيكى اتفضلوا .
سليم : ياوعد هاتلنا نفطر مع بعض زمانهم مافطروش .
باسم : متغلبش العروسة .