ثبت على يديه🌱مكتملة🌱

🌱الجزء 15🌱

🌓تبت على يديه🌓
💎بقلم : ايمان العماري💎
✨الجزء : 15✨
∆فالحومة ...
الناس دالحومة كولهم تجمعو وكيشوفو فدار كتحرق وشي كيطل من شراجم لفوق ، والرجال دالحومة هازين سطولة دالما كيخويوها على الدار باش يطفيو العافية علامن توصل لومبيلونص ... والعيلات  كولشي كيغوت ولكن حتى واحد ماقدر يقرب لدار وتاواحد مازعم يدخل وسط ديك العافية ....
النسا شادين الهدرة شي كيدعي الله مع فاطمة يحفظها وشي شاد التبرگيك وكيتغامزو باغيينها فيها حتى وقفات طوموبيل دفؤاد  ... نزلات نور بززربة جات غادة جيهت الدار هوما يشدوها لعيلات

نور : ماما  .. طلقووو مني ... ( كتغوت وتبكي ) ماما

نور كتنتر منهم : وااا مامااااا ...  طلقووو مني بغييييت ماما وعتقوووو ماما كتموووت  

كلشي ساكت كايشوفو فيها  محسرييين كاينة لي بكات وكاينة لي تشفااات فيها ...

فؤاد  كيشوف فيها كتغوت وفنفس الوقت كيهدر مع الاسعاف دالكلينيك ديالهم قطع معهم ومشا جبدها من بين يديهم وهوما غير كيشوفو فهدا لي معها وشاد فيها ديك الشدة ويتغامزو بيناتهم ...

نور بالبكا والغواات  :  ماما كتمووووت ا فؤاد  .. ماما كتمووت  غاتمشي وتخليني مكوية عليها عتقووو ليا ماما ولا نمشيي انا ندخل نعتقها

جات غادة هو  يشدها مزير على دراعها

فؤاد : فييين غادخلي عندها واااش بغيتي تحرقي معها !! .. شوفي العافية كيف شاعلة فدار كاملة الى دخلتي تما غاتحصلي صبري  ... ها لومبيلونص جاية فطريق وحتى لي غايطفيو العافية مبقاش بزاف ويوصلو

نور بحرقة وشفايف كيرجفو : ماما غاتموووت و الى ماتتت تانا غانموووت منقدرش نصبر على فراقها نحماق

فؤاد : ديري يقينك فالله وماماك الى كان عمرها باقي طويل راه غتعتق

سمعو صوت الاسعاف  و  الفارگونيت د البوليس من وراها ... هبطو كيجريو يطفييو العافية ورجال الامن كيبعدو الناس من تما باش تاواحد مايتقاس ويتأذا نص ساعة وهوما مع العافية حتى طفاوها ....
هوما يدخلو جوج من صحاب الاسعاف وفيديهم الحمالة و دخلو معهم حتى البوليس لدار باش يديرو تحقيقات تاعهم .. دخلو كيقلبو فالبيوت حتى مشاو لاخير بيت دفعو لباب ديالو لي ولا كولو محروق لقاو فاطمة طايحة الارض محروقة كاملة جسدها كامل مشوه منظرها كيخلع واضح انهم حروق من الدرجة الثالثة .. تحدرو هزوها بحذر داروها فالحمالة غطاوها بليزار وخرحوها الاسعاف
والبوليس بااقيين فدار كيقلبو وعناصر اخرى دارو شريط محاصرين بيه المكان باش تاواحد مايدخل ...
غير خرجو هازين فاطمة مشات نور كتجري عندهم وفؤاد من موراها بغات تقرب ليها هوما يمنعوها

نور بصوت  باكي مبحوح : بغيت نشوفها خليوني نشوف ماما راه ماما هادي

- : معندناش الوقت خاصنا نقلوها دبا الكلينيك

فؤاد شدها : صافي سيرو