ثبت على يديه🌱مكتملة🌱

🌱الجزء 20🌱

🌓تبت على يديه🌓
💎بقلم : ايمان العماري💎
✨الجزء : 20✨
خرجات كادور فداك السيكتور كتقلب على شي بوتيك تاخد منو حوايج باش تقضي لان كاع حوايجها تحرقو دخلات لبوتيك خاص بيجامات الدار ، خدات اكثرية غير كسيوات قصار تاع دار وبيجامات على شكل كولون وتيشورت هدا هو ستيل ديالها مولفة بداكشي لي مزير تقدات دوبياس وحوايج دالخروج .. خلصات داكشي ومشات الحانوت تقدات المونة لي اتخصها ورجعات حطاتهم فلاشومبر ديالها وخرجات تقلب على خدمة لي تقضي بيها بينما سهل عليها الله .....

لقات مكتبة فراس الزنقة دخلات ليها تيرات منها سيڤي ديالها ودارت ليه بزاف دنسخ  ... اي كابيني بان ليها ولا كلينيك كتحط فيه سيڤي ماخلات حتى بلاصة حتى من لي كافي ولي سوبير مارشي حطات فيهم سيڤيات
بانت ليها واحد الجردة وهي تمشي ليها تجلس حسات بدوخة والسخفة لانه ماواكلة والو بانت ليها واحد القهوة قدامها ناضت دخلات ليها مشات لواحد طبلة وجلسات جاها سيرڤور طلبات منو يجيب ليها الماكلة وهي شدات تيليفونها مع شعلاتو طلعو ليها أبيلات من عند فؤاد تنهدات وحطاتو وربعات يديها كتشوف لبعيد حتى وقف عليها نفس سيرڤور حط ليها طلبية هي تجي عينو على  سيڤي ديالها

- : كتقلبي على خدمة !

نور علات راسها فيه : علاش ؟؟؟

- شفت سيڤي وقلت واش كتقلبي على خدمة

نور : صراحة اه كنقلب عليها

- واش عادي لاخدمتي سرباية فقهوة ؟

نور : ماعنديش مشكيل مهم نلقى خدمة نقضي ليها بينما  لقيت  شي حاجة حسن

- انا قريب نمشي فحالي من هنا مغنبقاش خدام فهاد القهوة وراه نيت كيقلبو على لي ياخد بلاصتي الى عينيك فالخدمة انا نهدر ليك مع الشاف يخدمك

نور : واش كدوي بصح !

- كنهدر بصح اختي الى بغيتي تخدمي نعاونك ونهدر ليك مع الباطرون ديالنا

نور :  والله تا غادير فيا خير كبير عمرني مانساه ليك

- اكون خير ان شاء الله ملي تسالي اجي عندي حدا لاكيس نهدر معك

نور : وخا خويا

خلاها ومشا يشوف خدمتو وهي طاحت فالماكلة عمية  كون  صابت  طير بالفرحة ، ممصدقاش بلي الحظ حالفها ودغية لقات خدمة كلات تاشبعات شربات كاسها دالما وناضت تخلص وهي تلقاه واقف تما كيتسناها

-  خلي ليا نمرة ديالك وباش ماكان غنعيط ليك فالليل

نور : ارا تيليفونك نقيدها ليك

- مدو ليها : فايت ليك خدمتي فشي حاجة ؟