أسيرة الشيطان الجزء الأول + الجزء الثاني+ الثالث

الخامس عشر الجزء الثاني

للقلب سلطان آخر
الجزء الثالث
       من
أسيرة الشيطان
الفصل الخامس عشر
الجزء الثاني
¤¤¤¤¤¤¤
بناء على رغبة القراء هنحط في بداية كل فصل كل عيلة بولادها عشان الناس اللي لسه بتتلغبط
جاسر ورؤي أبطال الأجزاء اللي فاتت عندهم 6 أولاد رعد وجوري أول تؤام
يوسف ومريم تاني تؤام
سليم وياسين آخر تؤام
-----------------
نرمين أخت جاسر اللي جاسر كان بينتقم من صبري وبنته شاهندا عشانها
نرمين وياسر جوزها عندهم 2
( جاسر الكبير 29 سنة دكتور نفسي
اريج في 2 كلية طب )
ياسر كان ليه بنت من مراته اللي ماتت قبل ما يتجوز نرمين اسمها سما جوزها اسمه مصطفى
______________
عاصم أخو رؤي خال العيال اللي كان بيحب تهاني واتجوز حلم في الجزء التاني عنده ولدين
حسين الكبير مهندس ، مراد الصغير في ثانوية عامة ساقط سنة
_____________
رؤى كان ليها جيران أخ وأخت ساكنين سوا اللي هما عمرو وايمان
ايمان اتجوزت علي صاحب جاسر وعندها شريف الكبير ظابط شرطة ، وليان الصغيرة المدلوقة على الجاموسة جواد
_________
أما عمرو فاتجوز روان بنت صاحب الشركة اللي كان شغال فيها وخلف ولد وبنت
جواد جاموسة متنقلة مهندس ديكور
ومرام دلوعة ماما 22 سنة في كلية إعلام ومخطوبة لشريف ابن عمتها
________
فاضل طرب وملاك ، ومليكة وتوحة وكل الناس دي هنعرف اصلهم وفصلهم فيما بعد
لما تتلغبط اطلع بص هنا وكمل الفصل عادي
نبدأ الفصل ❤
____________
نظر الرجل لعيني جاسر عدة لحظات قبل أن يبتسم ساخرا يتمتم :
- ليه كدة يا دكتور جاسر ولا عشان أبوك طردك أنت كمان عايز تطردني أقولك طردك ليه عشان ضربت مصطفى جوز أختك ، دا حتى رفدك من المستشفى ، نصيحة سامر الغلبان هو اللي بيدفع التمن الحقه ، روح شوف حالك وسيبني اشوف شغلي يا دكتور
توسعت حدقتي جاسر ذهولا مما يسمع ليترك ثياب الرجل في حين ضحك الأخير ساخرا
كانت لحظة واحدة اهتز ثباته فيها قبل أن يعد كما كان ليقترب من الرجل من جديد ضيق حدقتيه يهمس يتوعده :
- أنا عارف اللي زيك كويس أوي وقابلت منهم كتير أوي ومش كلمتين هايفين زي اللي أنت قولتهم هيخلوني اخاف منك ولا أصدقك ، ألاعيبك أنت واللي زيك مكشوفة أوي وقديمة أوي أوي أوي ، فاطلع برة احسنلك

ضحك الرجل عاليا يكتف ذراعيه أمامه يغمغم متباهيا بذاته :
-بس أنا مش دجال ولا نصاب وكل اللي قابلتهم دول في كفة وأنا لوحدي في كفة أنا فوقهم كلهم
ضحك جاسر يسخر منه يردف متهكما :
- ايه أنت رئيس نقابة الدجالين ولا المندوب الأول لجماعة السحرة ولا تكون اللورد فولدمورت وما ينفعش نقول اسمك
تبادل الرجل وجاسر نظرات تحدي ساخرة قبل أن يحرك الرجل وجه صوب والد زينب يغمغم في هدوء :
-يا تمشيه يا امشي أنا يا أبو زينب ، وجوده هنا مش هيضر بس هيعطلني وبنتك هتتأذي أكتر
هنا تحرك والد زينب غاضبا صوب جاسر يشير له لباب الغرفة يطرده خارجا:
- امشي اطلع برة يا جدع أنت ، اطلع برة على رجليك احسنلك
ابتسم جاسر ساخرا لا يبدو أنه سيغادر بتلك البساطة كما يظنون ، نظر صوب والد زينب ليغمغم بهدوء يتخلله بعض الحدة :
- بص يا عم أبو زينب بنتك مش ملبوسة ولا عليها عفريت ولا جن واللي أنت جايبه دا سواء دجال ولا ساحر ما يفرقوش عن بعض كتير كدابين ونصابين ، وهيأذي بنتك مش هيفيدها بنتك مريضة محتاجة علاج مش محتاجة نفتح الودع ولا نبين زين ، بنتك عندها اكتئاب وميول انتحارية ، ما انتوا لو بتسمعوا عيالكوا وتصدقوهم وتحتوهم مش هيوصلوا للحالة دي