ထရော်မာများ - ပါပီယွန်
ဒီစာအုပ်က ၂၀၁၇ က ထွက်တာ။ အခုချိန်ပြန် ဖတ်တော့လည်း အခု ၂၀၂၄ နဲ့ တိုက်ဆိုင်နေသေးတာတွေ အများကြီးပါပဲ။ နောက်ပိုင်း ထပ်
ထွက်လာတဲ့ ဂွတ်ဘိုင်ဘလက်ဒီးမေရီတို့၊ ဇီးကွက်ချောင်း တို့ထဲက ကိစ္စရပ်တွေလည်း ဒီထဲမှာ ဟိုတစဒီတစပါလေရဲ့။
ပါပီယွန် ရေးဟန်ကတော့ သိတဲ့အတိုင်းပဲ။ လက်ဘက်ရည်ဆိုင်မှာ ဘော်ဒါတွေကို အာပေါင် အာရင်းသန်သန် (တခါတလေလည်း နည်းနည်း
ကြေကြေကွဲကွဲနဲ့) ပြောပြနေတဲ့ပုံစံပဲ။
ဒီစာအုပ်က ဝတ္ထုရှည်မဟုတ်ဘူး။ ဝတ္ထုတိုလည်းမဟုတ်ပြန်ပါဘူး။ တစ်ခန်းရပ် ပုံစံမျိုး ၂ မျက်နှာ ၃ မျက်နှာလောက် စာလေးတွေ ပေါင်းစု
ထားတာ။ ငယ်ဘဝက ဖြစ်ရပ်တွေလည်း ပါတယ်။ နိုင်ငံခြားပညာတော်သင်ဘဝပါတယ်။ တရားမဝင်ရွှေ့ပြောင်းလုပ်သားဘဝပါတယ်။
ရယ်စရာ မောစရာတွေ အပြည့်နဲ့ပေါ့။
အဓိကက ဒီထဲကစာတွေကိုဖတ်ရင် Nostalgic ဖြစ်တဲ့ ခံစားချက်မျိုးရတယ်။ အဲဒါကပဲ ဆွဲဆောင်နေတာပဲ။
စိတ်ညစ်ညစ်နဲ့ ရယ်မိတဲ့တစ်ပိုင်းကတော့ သူတို့နိုင်ငံခြားမှာ တရားမဝင်သွားနေအလုပ်လုပ်တော့ ထောင်ကျပြီး ကြိမ်ဒဏ်မိတယ်။ အားလုံးချွတ်ပြီး အရိုက်ခံရတာ။ အလုပ်သမား အဖြစ်လာတဲ့ နိုင်ငံပေါင်းစုံက လူသိုက်ကြီးက ငိုကြအော်ကြ ဖြစ်နေတုန်း ဗမာတွေချင်းတစ်စုစု
ထားလိုက်တယ်။ ခဏနေတော့ ဇာတ်ကြောင်းပြောသူက သူအရင် ကြိမ်ဒဏ်ခံမယ်ဆိုပြီး မျက်နှာမော့ပြီးချီတက်သွားတယ်။ ရိုက်ရမယ့်အရာရှိကလည်း ရိုက်တယ်။ သူကတော့ မမှုဘူး၊ ကြိတ်ခံတယ်။
ပြီးတဲ့အခါကျ ဇာတ်ကြောင်းပြောသူက ဗမာ အုပ်စုကို လှမ်းအော်လိုက်သတဲ့။
"ဟေ့ရောင်တွေ ကျောင်းမှာ ဆရာမ ရိုက်တာခံဖူးလား။ အဲ့တိုင်းပဲကွ" တဲ့။
ဗမာတွေအကုန် ဟေးခနဲ ထအော်ပြီး
စိုးရိမ်နေတာတွေပျောက်သွားကြတယ်တဲ့။
ကိုယ်တုံးလုံးနဲ့ ဖင်ချင်းပေါက်နေကြသေးတာတဲ့။ကျန်တဲ့ လူမျိုးတွေက ဒီကောင်တွေ ဘာဖြစ်သွားတာလဲဆိုပြီး အံ့ဩတကြီးကြည့်နေကြသတဲ့လေ။
ဒီစာအုပ်ကို အခုမှပြန်ဖတ်ရင်း အေဂျေခရိုနင်ရဲ့
Judas Tree - အဆိပ် ရဲ့ဇာတ်ကြောင်းကို စီကာပတ်ကုံးပြောထားတာ ဒီထဲကပဲလို့ ပြန်ရှာ တွေ့သွားတော့ အတော်နေလို့ကောင်းသွားတယ်။ အဲဒီ အဆိပ် စာအုပ်ကို ဖတ်တုန်းက ဇာတ်ကြောင်းကိုရင်းနှီးနေပေမဲ့ ဘယ်ကနေ သိခဲ့တာလဲစဉ်းစားမရဖြစ်နေတာ။ ထားပါတော့။
ထရော်မာများဟာ ထရော်မာတွေတင်မက အမှတ်တရတွေပါ အများကြီးပါပဲ။ ဘာစာမှ ဖတ်မရဖြစ်နေတဲ့ block ကို ထရော်မာများနဲ့ ချေဖျက်နိုင်ခဲ့တယ်ပေါ့။
နောက်ရက်တွေတော့ မက္ကဇင်ပါပီပြန်ဖတ်ဦးမယ်။
ESTÁS LEYENDO
Random Thoughts on BOOKS
No Ficciónဖတ်မိတဲ့ စာအုပ်တွေကို ဖတ်ညွှန်းရေးထားတဲ့အပြင် စိတ်ဝင်စားဖို့ကောင်းမယ်ထင်တာလေးတွေ လည်း မျှဝေချင်ပါတယ်။
