ကျွန်မဘဝခရီးမှ စာအုပ်များ - ဂျူး
ကိုယ်အဖတ်ဖြစ်ဆုံး အစွဲလမ်းဆုံး စာရေးဆရာ
က ဆရာမ ဂျူး ပဲ။ သူ့ဝတ္ထုတွေဟာ ကိုယ့်အပေါ်အများကြီး လွှမ်းမိုးမှုရှိတယ်။ အဲဒီလိုပဲ ကိုယ် စာပိုဖြစ်လာတာ၊ စာရေးစေလာတာရဲ့ ရာခိုင်နှုန်းအများစုကလည်း ဆရာမ ဂျူး စာအုပ်တွေကြောင့်ပဲ။
ဥပမာ ဆို "ကြယ်ကြွေတို့၏အတောင်ပံ"
ဖတ်ပြီးတော့မှ ကိုယ်က "ယောနသံစင်ရော်" ကို
ရှာဖတ်ဖြစ်ခဲ့တာ။ "မြစ်တို့၏မာယာ" ကြောင့် သမားရိုးကျ ထုံးတမ်းစဉ်လာသိထားခဲ့တဲ့ ပါးစပ်ရာဇဝင်တွေထက် ပုဂံကို သုတေသန ရှုထောင့်ကနေ ရှာကြည့်ဖို့ ပိုစိတ်ဝင်စားလာခဲ့
တာ။ "သူ မင်းကိုဘယ်တော့မှ" ကြောင့် ရေရှည်
တည်တံ့ခိုင်မြဲပြီး စဉ်ဆက်မပြတ် ဖွံ့ဖြိုးတိုးတက်ရေး ဆိုတာကို အာရုံစိုက်လာခဲ့မိတာ။
တက္ကသိုလ်မေဂျာ ယူဖြစ်ခဲ့တဲ့အထိပဲ ဆိုပါတော့။
ဆရာမ ဂျူး ကို လေ့လာအားကောင်းတဲ့ စာရေးဆရာတစ်ယောက်အဖြစ် လူအများက သိထားကြသလို ကိုယ်ကလည်း ဆရာမရဲ့ စာရေးဖို့ အကြောင်းနောက်ခံတွေကို သိချင်စိတ်
ဖြစ်မိတယ်။ တခါ တွေ့ဖြစ်တုန်းကတော့ ဇာတ်လမ်းတွေအပေါ်ဦးတည်ပြီးမေးဖြစ်နေခဲ့
တာနဲ့ သိချင်တာတွေအကုန်မမေးခဲ့ရဘူး။
ကံကောင်းစွာနဲ့ ဒီစာအုပ်လေး ရှိနေခဲ့တယ်။
ဒီစာအုပ်အကြောင်း မပြောခင် ဆရာမ ဂျူး ပဲ ရေးတဲ့ "ကျွန်မဖတ်ခဲ့သောစာအုပ်များ" ဆိုတာ
ရှိသေးတယ်ထင်တယ်။ ဆယ်တန်းပြီးခါစ လောက်က ဖတ်ဖူးခဲ့တာ။ အကုန်မမှတ်မိတော့ပေမဲ့ ဓူဝံ ရဲ့ မာလာ၊ တက္ကသိုလ်ဘုန်းနိုင် ရဲ့ နွေကန္တာဦး၊ ဂျာနယ်ကျော်မမလေး ရဲ့ မုန်း၍မဟူ၊
ခင်နှင်းယု ရဲ့ မွှေး တို့ ပါတာတော့သေချာသိတယ်။ အဲဒီစာအုပ်ကြောင့် ရှာဖတ်ဖြစ်ခဲ့တာတွေ
မို့လို့လေ။
အခုစာအုပ်ကတော့ ဆရာမ ဂျူး က ကလျာတို့
သရဖူတို့လို မဂ္ဂဇင်းတွေမှာ ရေးခဲ့ဖူးတဲ့ စာပေ ဆောင်းပါးတွေကို စုစည်းထားတာ။ ဒီစာအုပ် ဖတ်တော့မှ ဆရာမ က ဘာဖြစ်လို့ ဒီလောက်အရေး အသား ကောင်းပြီး ဆွဲဆောင်မှုရှိနေရတာလဲလို့သိလာတယ်။ ပျို့ကဗျာတွေကစလို့ သုတစာပေတွေအလယ် ကမ္ဘာ့စာပေ တွေထိ နှံ့စပ်အောင် ဖတ်တာကိုး။
"စာဖတ်ခြင်းက ကျွန်မရဲ့ပရော်ဖက်ရှင်နယ်
အလုပ်ပါ" တဲ့။
မြန်မာကျောက်စာတွေ ဖတ်ပြီး ပုဂံခေတ်က မိန်းမတွေရဲ့ဘဝအကြောင်း ဖြန့်ပြီးဆွေးနွေးတင်ပြထားတာနဲ့ စဖွင့်ထားတယ်။ ပြီးတော့ လောကသာရပျို့နဲ့ အစချီတဲ့ ပျို့ကဗျာတွေ။
မြန်မာစာပေ ပြီးတော့ ခရီးသွားစာပေ၊ သဘာဝ ပတ်ဝန်းကျင်၊ တွေးတောခြင်း၊ လွှမ်းမိုးသော စာရေးဆရာများ၊ လူ့ယဉ်ကျေးမှု၊ စာပေအနုပညာကို ယုံကြည်ရခြင်းအကြောင်းများ၊ စာဖတ်ခြင်းအနုပညာ၊ စာအုပ်အညွှန်းများ ဆိုပြီး
ခေါင်းစဉ်ခွဲတွေနဲ့ ရေးသားထားတယ်။
ကုန်းဘောင်ရှာပုံတော် နဲ့ ဆက်စပ်ပြီး မယ်နု အကြောင်း ရေးသွားတာဖတ်ရတော့ တလောက
ဟော့သွားတဲ့ မယ်နုအုတ်ကျောင်းသတင်းကို
တောင် သတိရသွားတယ်။
ဒီစာအုပ်မှာ သဘောကျရတာကတော့ ဆရာမ ရဲ့ဝတ္ထုတွေ ဖန်တီးတုန်းက ကျမ်းကိုးပြုရတဲ့ စာအုပ်တွေအကြောင်း သိရလို့ပါပဲ။ ဥပမာ - ကြယ်စင်တံတား ကမ်းပါးနှင်းဖြူ အတွက် ခါကာဘိုရာဇီ အကြောင်း စာအုပ်တွေကို မြန်မာ အပြင် နိုင်ငံခြားသားတွေရေးတဲ့ စာအုပ်တွေကိုပါအကိုးအကားပြုခဲ့ရပြီး အဲဒီထဲကမှ Burma's Icy Mountains စာအုပ်ထဲက စိတ်ဝင်စားဖွယ် အကြောင်းအရာတွေကို ပြောပြသွားတာ တော်တော်လေးတန်ဖိုးရှိတယ်။ ပင်လယ်နှင့်တူသော မိန်းမများ ကို ရေးဖြစ်စေခဲ့တဲ့ ဧရာဝတီ အကြောင်း၊ ချစ်သူလား စံကားတစ်ပွင့်ပွင့်ခဲ့တယ် ကိုရေးတော့ Magnolia Kobus အကြောင်းလေ့လာခဲ့ရတဲ့ စာအုပ်အကြောင်း စသဖြင့်
ဆရာမ ဂျူး ပရိသတ်တစ်ယောက်အနေနဲ့ ဖတ်ရတာ အားရစရာပါ။
နောက်ပြီးတော့ Simone De Beauvoir ရဲ့ The Second Sex နဲ့ပတ်သက်ပြီး ဆရာမ ရဲ့ အမြင်တွေကို ပြောရင်း Feminist လို့သတ်မှတ်ခံရပုံရယ် သူ့ရဲ့ခံယူပုံတွေကိုပါ ဆွေး
နွေးထားပါတယ်။
ဒီစာအုပ်ဟာ ဝတ္ထုဇာတ်လမ်းမဟုတ်ပေမဲ့ တောက်လျှောက် ဆွဲဆောင်သွားနိုင်တဲ့ စာအုပ်
မျိုးဖြစ်ပါတယ်။ ဆရာမ ညွှန်းထားတဲ့ စာအုပ်
တွေကိုလည်း ကိုယ်ရှာဖတ်ဖြစ်ဦးမှာတော့ အသေအချာပါပဲ။
စာအုပ်ထဲက နောက်ဆုံးအပုဒ်လေးရဲ့ခေါင်းစဉ်
နဲ့ပဲ ဒီ အညွှန်းကို အဆုံးသတ်ပါမယ်။
"You are what you read" ပါတဲ့။
DU LIEST GERADE
Random Thoughts on BOOKS
Sachbücherဖတ်မိတဲ့ စာအုပ်တွေကို ဖတ်ညွှန်းရေးထားတဲ့အပြင် စိတ်ဝင်စားဖို့ကောင်းမယ်ထင်တာလေးတွေ လည်း မျှဝေချင်ပါတယ်။
