تضرب ولا تبالي

عودة «مُهم مُهم مُهم»

السلام عليكم ورحمة الله وبركاته✨✨✨

بالنسبة لوقوف الرواية فـ محدش يحكم عليا ويقول إني بتأخر بإرادتي، صدقوني أنا عايزة اخلص الرواية بسرعة وساعتها أكون سعيدة جدا قبلكم كلكم والله.

المهم أنا وقفت الرواية الفترة دي لأني بمر في ظروف مايعلمش بيها غير ربنا، زي ما إنتوا عندكم ظروف صعبة أكيد أنا عندي أصل انا مش استثنائية عنكم مثلاً.
الأيام إللي عدت كانت صعبة جداً والحمد لله عدت بفضل ربنا، فـ أنا بعتذر من القلب عن تأخيري إللي هو غصب عني بالأساس.

وعارفة أنكم مستحملين بالعافية بس كل واحد عنده ظروف خاصة، عموما الرواية قربت تنتهي..
في بعض القراء قالوا أنهم نسيوا الأحداث كلها، فـ أنا جبتلكم ملخص لكل الرواية، وتذكير من أول الرواية، علشان لو نسيت تفتكر يا عزيزي
«هتكلم بالعامية علشان توصل للكل»

«نبدا من عين..
عين ابوها إبراهيم رجل اعمال وتزوج زهرة ، والد زهرة كان رافض الجوازة لأنه كان ليه عداوة مع أسرة إبراهيم و إبراهيم ذات نفسه، ومن كتر الغضب قرر «الرازي» يتبرى عن بنته زهرة ويطردها ويأخد ثروة إبراهيم جوزها علشان يربيها،
عدت السنين وانجبت زهرة طفلة «واللي هي عين» وفجأة من لا يحتسب هيظهر لينا بشير كان محامي العائلة من أيام الرازي واللي بالمناسبة هو عشيق لواحظ.
المهم بشير هيتفق مع عين ترجع لعائلة والدتها وتسرق فلوسهم والفلوس تقسم عليها وعليه وعلى الباقي، أول ما هاتدخل  بيت الرازي هتقولهم أن ابوها متوفي، طب ليه؟!
علشان زي ما قلت في الأول بينهم عداوة مع إبراهيم وحاجة تاني بس مش هينفع أقولها بس هتظهر في الفصول القادمة بإذن الله.
طب هي ليه وافقت تسرق عائلة امها:
1 علشان تسفر يونس برا ويتعالج.
2 علشان تسفر إستبرق برا وتعالجها.
3 تدفع ديون ابوها، وتجوز حسام للبنت إللي بيحبها اللي بالمناسبة اسمها «حبيبة»  حبيبة القلب.
4 تعوض ابوها عن إللي خسره.
--------------------------------------
نيجي بقا لـ جاسم..
أول مرة يقابل فيها عين كان في حفلة، البداية هو كان معجب بمعنى أصح مهزوز في مشاعره، في يوم من الأيام يا عزيزي جاسم هيهدد عين وتهديده كان عبارة إنه هيقول أن إبراهيم عايش للعائلة ومقابل ان يسكت يتجوزها، طبعاً هي استسلمت ووافقت علشان متتفضحش وخطتها تخرب، السؤال هنا إيه اللي يخلي جاسم يعرض الجواز عليها من الاساس؟؟؟؟
1 علشان في وصية امه مكتوب إن لأزم جاسم يتجوز وبعد ست شهور من جوازه يقدر يستلم فلوسها أو نص املاكها.

2 عايز يعوض اخته مهرة عن الوحدة إللي عاشتها لما سافر، فـ والده قاله هو ممكن يأخد مهرة تعيش معاه لو اتجوز.

3 عايز يبعد مرام عنه لأنها متعلقة به أوي و مهووسة به فـ ظنناً منه لو تزوج ستنساه وتتزوج يحيى اللي مغرم بها.
--------------------------------------
«نيجي بقى لزهران ولواحظ...
اعتقد هما اساس خراب كل شيء والله..
لواحظ دي بقى بتخون جوزها صابر، طب مع مين؟؟؟
مع زهران وبشير 🙃متبصليش كدا انا مالي ياعم دي شخصية مريضة نعملها أيه بس!!
المهم يعني هي كانت بتحب زهران اصلاً، فـ زهران بقى هيأ لها إنه هيتزوجها لو صابر مش موجود، فهبت بقى فكرة في عقلها وقررت توقع بشير في حبها علشان يقتلها صابر وللأسف فعلاً قتله في مشهد مؤثر جداً،
طب أيه خلصت كدا الحكاية؟!!! تعدي سنين وسنين لحد ما يموت «نوح» وتظهر صفاء أمه،
صفاء لما شافت جاسم جابلها حق ابنها نوح حست بالذنب فقررت تقول كل حاجة تعرفها عن لواحظ، طب إيه الحاجات دي؟!
هاتعرفها في الفصول الجاية متستعجلش على رزقك ياعم.
لواحظ بقى خافت تتفضح بسبب صفاء فقالت مبدهاش بقى ونقتلها وبالفعل قتلتها على الرغم أنها صحبتها وزهران طول الوقت عارف بس ساكت.
نِعد بقى ضحايا لواحظ: 1 صابر 2 صفاء 3 بشير هتقول دا عايش هقولك دمرته يسيدي ، دمرته إزاي؟؟؟ هتعرف في الفصول الجاية.
------------------
نِعد بقى ضحايا زهران: 1 نفيسة اللي هي والدة جاسم..
بالمناسبة جاسم ميعرفش أن زهران قتلها هو فاكر أن كوثر اللي عملت كدا لأنه شافها كذا مرة بتحاول قتل نفيسة، السؤال هنا طب جاسم بيكره أبوه ليه؟؟؟؟؟
علشان ببساطة يا عزيزي مصدقهوش لما قاله أن كوثر قتلت مامته وكمان بقى يضربه ويهدده لو اتكلم "يعيني جاسم ميعرفش أن القاتل الحقيقي أبوه🤡😶‍🌫️"
طب زهران قتل نفيسة ليه؟؟؟؟
زهران عمره ما حب نفيسة وأصلاً إللي اختار نفيسة الرازي علشان كانت بنت غنية ساعتها، المهم زهران اتجوز كوثر ودخل على نفيسة وقالها مفيش مبروك يا حبيبتي أصل اتجوزت هوب الست طبت ساكتة وبقى عندها جلطة، فـ زهران قال بقى مبدهاش ونقتلها وعوضنا على الله، وبالفعل قتلها، دي يعتبر أول ضحية له!

2 ضحية بقى صفاء لأنه يعتبر اشترك مع لواحظ.

3 ضحية لواحظ هتقولي ما هي قاعدة مرزوعة عايشة..
اقولك آه بس يعني هو دمرها، اقنعها بحبه لحد ما قتلت جوزها وفي الآخر رماها.

"طب كدا خلصت الحكاية ومفيش ضحايا تاني؟! اقولك لا يا عزيزي زهران حكايته طويلة أنا بعتبره كدا هو رأس الأفعى إللي المفروض أنا وأنت يا عزيزي نخاف منها! "
--------------------------------------
نيجي بقى لـ نادر..
اتعرض للاعتداء من والده وبسبب كدا اخته ماتت، السؤال هنا فين امه في كل دا؟ هاتعرف في الفصول القادمة بإذن الله.

نيجي بقى لـ إستبرق..
مريضة بالكانسر ومش معرفة حد بمرضها غير سعاد بس عين عرفت بقى من تحت لتحت عن طريق سعاد، و فجأة كدا لاقينا عادل مغرم بها وفجأة مرة تاني اتفاجئنا أن عادل ابن سعاد، هتقولي انا مش فاهم؟
هقولك أرجع لأخر فصل نزلته وهتفهم كل حاجة 😌

نيجي بقى لـ رفقة..
بنت كدا في حالها ولا بتهش ولا بتنش اتفقت مع يحيى تعمل خطوبة ومقابل دا يسافرلها أخوها برا ويعالجه، وبالفعل حصل كل ده،
طب السؤال هنا هو عرض العرض ده عليها ليه؟؟ ظنناً منه لو عمل كدا مرام هتغير عليه وتحبه، ظنناً بقى!! 
بس بالنهاية فسخ الخطوبة دي وعرف إنه خلاص خسران مهما عمل مرام مش هتشوفه غير طيف
--------------------------------------
بالنسبة لخطة عين شغالة ولا لأ؟ وقفتها لأنها بقت مغرمة بجاسم زي ما هو مغرم بها، وقررت تعود لرشدها.

طب هو أنا المطلوب اقرأ كل ده؟؟؟؟
لأ، طالما أنت فاكر مش مطلوب منك تقرأ، ولو مش فاكر اقرأ علشان تفتكر يا عزيزي، ومتجيش تقولي أنا مش فاهم أو نسيت!!

"وبأذن الله بكرا الخميس هينزل أربع فصول في ذات الوقت الساعة 8 مساء، كـ تعويض الغياب إللي دام شهر تقريباً"

انتظروني💘👉🏻👉🏻👉🏻👉🏻