سيف لف عليهم :- سمعتو يالعمال ؟
ضحك نياف :- والله جبتها خلونا نفتح لنا مشروع
سعود:- دام انتو فيه خسرتو وخسرتونا وياكم
ضحكت ريوف :- خلوكم جديين شوي !
نياف اعتدل :- ابشري باقي ذا الورد اللي بالصور من وين نجيبه !
هياف :- انا اجيبه لكن اذا غيرت الفكره اللي فبالها بتصير مشكله هنا
ريوف :- ماعليك ماراح اغير شي بس جيبه سنع
مشاري :- انا واثق بتخطيطها اما تنفيذكم على الله
ريوف :- اووهه عممي البططل والله اني احبك
سعود :- وانا وين رحت !
غمزت ريوف له :- انت بنص قلبي
ضحكت مها على حركاتها :- اصعدي عند البنات اصعدي
ريوف :- خمدو كلهم وانا من الحماس مااقدر !
اديم :- حتى غرام نامت ؟
ريوف :- الصراحه لا بس مطروده منها ماتبيني
ضحكت شريفه :- من قال لك تهبلين بالبنت
هياف :- ماالومها الله يعينها كيف بتتحملش تكونين حماتها بعدين تعالي كلشي مرسلته حتى نوع الطاولات والشموع !
ريوف :- اذا قلت مره ثانيه الله يعين عليش بفقع عينك واي شي ارسله يطبق بالحرف الواحد
طنشها هياف وقامت :- الحقوني نتكلم عن مدخل الحوش
كسار :- متاكدين ذي اختي انا ؟ غبت عنها كم يوم وتغيرت علي
خالد :- مستانسه فيك تبي كلشي احسن مما يكون
كسار :- اشوفها منشطه اكثر مني !
الجد علي :- انت روح نام وراك شغل بكره من صبح الله
كسار :- ان شاء الله بس شوي
نسرع الاحداث شوي للايوم الثاني بدو بتجهيز البيت كله والحريم طلعو يعزمون جيرانهم والبنات يجهزون دبش غرام
~ بالحوش ~
غلا :- نياف افتح الباب شوي خلنا نشوف اجواء بره
نياف :- نعم !! حلوه ذي والرجال اللي بره !
غلا :- ماراح تنزّل الطرحات عنا بس افتح نشوف
نياف :- انا اقول ارجعي ادخلي عندهم وتسنعي
غلا :- صاير اسلوبك اسلوب هياف!
نياف :- توكلي داخل بالطيب قبل ما اخليش تدخليه غصب عنش
مشت غلا بزعل من جنبه :- بنطل عليكم من فوق اوريك انا
ابتسم نياف :- يالبزر اصور لش كلشي بس ياويلش تسوينها
نزلت ريوف وصادفت غلا :- ها بشري وش شفتي ؟
غلا :- الغثيث نياف ماخلاني اطل
ريوف :- قصدش هياف
غلا :- لا نياف يقول اصور لكم ولا اشوفش طاله علينا
غمزت ريوف وهي تمشي :- فكري ليش
ضحكت غلا :- يعني ليش خباله بذا البيت
ريوف رفعت صبعها تصرخ :- ميين حاط الطاوله ذي هنا !!!
فز سيف :- وجع ببلعومش كل ذا على طاوله !
ضحكت ريوف :- الطاوله غلط مكانها شيلوها
هياف :- لا تصارخين هنا وبره كله رجال
ريوف بستهزاء:- انتو طبقو اللي اقوله ولا تخلوني اصارخ
اشر هياف على نياف وسيف :- شيلو هل طاوله جت الاوامر
ضحك نياف ورفعها :- وين نحطها يالمديره ؟
اشرت ريوف :- هنا وحطو عليها الشموع نفس اللي بالصوره بالضبط
مشاري دخل :- ريوف ادخلي جابو الكوشه
سيف :- الحمد لله جانا الفرج
دخلت ريوف لبست عبايتها ونزلت :- ماراح تفتكون مني
هياف :- ارجعي مكان ماجيتي منه
ريوف :- بشوف نظره
هياف :- انا اقول اصعدي عند البنات احسن لش
نياف :- انت بعد روح تطمن على غرام
هياف :- صحيح ماشفتها اليوم
ركضت ريوف :- دور ربعك انت وهو ماراح تشوفونها الا بكره
سيف :- انا علمي يخشونها عن زوجها بس حتى اخوانها !
ضحكت ريوف :- ولا احد غيرنا احنا البنات
هياف :- اقول وخري قبل مااقوم القيامه الحين
ريوف :- تحللمم الباب بيتقفل
رجع هياف وقف جنبهم ، نياف :- جت اللي تقدر عليك
سيف :- الله لو يتزوجها كل يوم مصارعه
ضحك نياف :- كنت بقولها بس خفت يجلدني
هياف ببرود :- بتنطم انت وهو لا ادفنكم بارضكم ؟
~
تجمعو شباب الحاره عند المخيم مع العيال يساعدونهم
عبدالله:- الفرش صار جاهز
فيصل :- وانا رشيت الخيم عن الغبار
كسار :- ماقصرتو بيض الله وجيهكم اخدمكم بالافراح
فيصل :- ابد واجبنا ياكسار اخ وعزيز وغالي علينا بس لا تنسانا على الاقل مره كل شهر
سيف :- ماهي كل شهر الا كل اسبوع
متعب :- هذا اذا ماغيرته حرمته علينا
ابتسم كسار :- لا تشيلون هم ماني قاطع باذن الله
الأجواء كانت مليانة حماس والعيال بين جد ومرح وكل واحد عنده مهمة الكل يشتغل وكأنها الملكة لهم كلهم مو بس كسار
_
اديم: السلام عليكم كيف حالش يا أم فهد؟ جايين متعنين لش عشان خطبة غرام وكسار يوم الجمعة عندنا وإن شاء الله تشرفونا
أم مطلق استقبلتهم بابتسامة:- وعليكم السلام الله يبارك لكم ألف مبروك للخطوبة إن شاء الله نجي ونشارككم الفرح
مها :- حياش الله ياام مطلق انتِ وكل من يعز عليش يلا فمان الله
انتقلوا بعدها لبقية البيوت وكل جارة كانت تفرح وتبارك لهم
جاء الليل وكل واحد في البيت كان مشغول بطريقة مختلفة منهم اللي يجهّز ومنهم اللي مرتبك ومنهم اللي يتناقش بامور تافهه
غرام كانت بغرفتها تحاول تستوعب أن بكرة بتكون ملكتها رسميًا جلست على سريرها تتأمل الطاولة اللي مليانة صناديق الهدايا وأغراض التجهيز كانت تحس بمشاعر حلوه وبخوف من التغيير
دخل نياف :- اختي العروس وش امورها ؟
غرام :- جابك الله يانيوف بموت توتر
ضحك نياف :- جيت اسهر اخر ليله هنا
عبست غرام :- ماابي افارقكم
ابتسم نياف :- رني علينا رنه بس وتشوفينا عندش
بعد دقايق دخل هياف :- متجمعين بدوني هنا !
غرام :- كنا عارفين انك بتجي
هياف :- سلكي لي سلكي
غرام شوي بس وتدخل علينا امي
نياف :- حافظه الجدول
غرام وهي متكيه على المخده:- اكيد... تعال كون بدل المخده واقرا علي
نياف :- تراني اغار فخذ لي وفخذ لها اقرا علينا احنا الاثنين
هياف :- انا اخوكم ترى مب امي
غرام مثلت الزعل :- يعني افهم منك لا !
هياف :- تخسي الـ لا عندش انتِ كلي فداش... تعالو عيالي انتو
ضحك نياف :- لو انك مارفستني وخليتني اطلع قبل
هياف :- تستاهل الرفسه دامني صرت الاكبر
ضحكت غرام :- الله لا يحرمني منكم
نياف :- ولاا منش ياشمعة البييت
غرام :- ينفع تسرقوني من كسار بس ياخذني
ضحك هياف :- انا مستعد
غرام :- امزح بس متوتره للحين
ناظرها هياف وقال بجديه :-اسمعيني زين من الحين اقولش لو احتجتي شي او حسيتي بثقل احنا موجودين نشيل على كتوفنا الدنيا كلها ولا يمسچ اي ثقل
غرام :- هييوفيي لا تخليني استحي حتى منك
نياف :- انا اللي مااتخيل البيت بدونش محد بيعطيني على جوي غيرش الحين اقابل بس هيوف !
ضحكت غرام من نطقه لهيوف :- حتى انت انعديت
هياف :- لان انا اصغر عيالكم هيوف وهيوفي
ضحكت غرام وحلست تتامل اخوانها لاخر ليله قبل ماتبتعد وتصير حرمة كسار رسمياً
غمز نياف لهياف :-مزحنا معش اي بس لو تفكرين ترنين رنه بتلاقينا عندش قبل لا تتصلين
هياف :- ولو يرفع صوته او يده عليش المخيم بيكون مكان عزا
شهقت غرام :- انت وهو انا اسبق الاحداث انتو تنفعلون ليش !
نياف يمازحها :- خفتي عليه قبل لا تاخذينه ؟ كيف لا صار حبيب القلب
احمرت غرام :- مب كذا بس صدمتوني كيف انتو معي بكل مره وحلوه
هياف :- احنا ظل لش مب بس قريبين منش انتِ اختنا الوحيده
غرام :- الله لا يحرمني منكم بس احس بيغمى علي من كثر ماافكر ببكرة
هياف مسك يدها : ارام لا تشيلين هم ترى الزواج خطوة طبيعية بحياة كل احد وأنتِ وكسار ان شاء الله تفهمون بعض أهم شيء لا تضغطين نفسچ ولو احتجتي أي شيء تذكري هياف ونياف وراش
غرام نظرت لهم بحب :- قسم بالله أنكم أغلى نعمة بحياتي
هياف :- وما ودش تشكرينا بهدية؟
غرام وهي تضربه على راسه: هديه براسك انا العروس !
نياف :- جيبي لنا نونو يعيشنا شعور الخوال وذي احلى هديه
رفعت غرام المخده وضربته :- اسكت لا تتكلم انت
ضحكوا مع بعض والجو صار أخف لكن قلب غرام كان يدق بسرعة وهي تستوعب إن حياتها بتتغير بعد ساعات قليله ولحظات الطفولة مع إخوانها بتصير ذكريات تحن لها كل ليلة
دخلت اديم :- اشوف عيالي متجمعين بدوني !
نياف ضحك :- نحاول نقنعها نخطفها بس عاجبتها فكرة الزواج
غرام :- يمهه خليهم يطلعون يوتروني
أديم جلست جنبها تمسح عليها :- طبيعي تتوترين كلنا مرينا بالشعور بس ماراح اخليش تنامين متوتره
هياف وهو متكي على الكرسي :- ليش هي بتنام ! الحين إحنا نواسيها من ساعة ولا هدت وانتِ بكلمتين سكتيها !
أديم ضحكت: انا امها لو عندكم اعتراض تقلعو
نياف :- يمه ! تطردينا ؟؟
أديم :- لا بس نبي نتكلم ام لبنتها
هياف تنهد وهو يقوم: خلاص بنعطيكم راحتكم
نياف :- هديتكم تحلمون تشوفونها دام تطردوني
اديم مثلت العصبيه :- روحو نامو بس بتصحون من فجر الله تكرفون
نياف :- امرنا لله
بعد ماطلعو أديم :- حبيبتي مستعده انتِ ؟
غرام بهدوء :-مدري يمّه أحس كل شيء صار بسرعة كسار بيكون مسؤوليتي وأنا مسؤوليته باسبوع بس !
أديم :- طبيعي تحسين كل شي يمر بسرعه ويزيد توترش لكن استوعبي الزواج فيه شراكه وحب وسند ماهو بس مسووليات
غرام تنهدت وغمضت عيونها :- كلامش دايم يطمني
أديم ابتسمت:بنتي وافهمش اكثر من نفسچ اكيد بطمن قلبش
غرام حضنت أمها وهي تحس بطمأنينة غريبة لأول مرة من أيام :- الله يديمش لي
أديم قبلتها :- يلا نامي عروستنا لازم تكون احلى وحده
غرام غمضت عيونها :- تصبحين على خير يمه
اديم :- وانتِ بخير يا احلى عروس
انتهت الليلة بالنسبه للجميع ماعدى غرام وكسار غفت عينهم بصعوبه بسبب التفكير وبعد ساعات قليله صحت غرام حاسه بخفقان ماتدري هو بسبب مشاعرها او توترها
حطت عليها طرحتها وتوجهت لغرفة ريوف وفتحت الباب بسرعه :- رييوف قوميي
رفعت راسها ريوف تستوعب :- الله يخرش بليسچ يا غرام ! الدنييا ليل وش تبين
غرام جلست جنبها على السرير ولمت نفسها :- متوتره وحيل اكثر من امس
ريوف فتحت نص عين :- يعني وانا لازم اتوتر معش ؟ خليني انام
غرام ضربتها :- ماني ناقصه مزح تكفين قومي
ريوف قامت تناظرها :- تدرين وش اللي يضحك ؟ انش امس تهربين مني واليوم جايه لحد داري
غرام :- رييوف ! ابيش عون لا تصيرين فرعون الحين صار الموضوع صچي انا بصير زوجة اخوش !!
ريوف حضنتها وتكلمت بخبث :- عاد الله يعين اخوي اخذ وحده تتوتر وفوقها خوافه
ضربتها غرام على كتفها :- الله ياخذ عدوش توتريني زياده كذا لا تطرينه
ريوف ابتعدت ورجعت انسدحت :- انسدحي هنا وبتنامين اشغل لش قران تهدي شوي
غرام :- ماراح انام
ريوف :- الا بتنامين وغصب عنش لا تخوفين اخوي بكره بعيون متورمه وحمره
ضحكت غرام وانسدحت جنب ريوف راحت بنومه عميقه
أنت تقرأ
بشروني عنك ما يدرون عني مادروا باللي شغل فكري وظني
Поэзияاهلاً فيكم بمخيلتي الاولى " بشروني عنك ما يدرون عني ما دروا باللي مشغل فكري وظني"
