اذن الفجر والبيت كان فيه كمية فوضى ادركوا الان جدية الموضوع
الجد علي :- صلو بالمسجد وارجعو على السريع وراكم شغل الدنيا
خالد :- انا ماني راجع بروح المحل علطول تامرون على شي معي ؟
سعود :- انا تكفى جيب لي كبك ضيعت كل اللي عندي
مشاري :- هذا انت مستحيل تتسنع
سعود :- والله عيالكم اللي يتلعبون باغراضي كل واحد فيهم المفروض يجيب لي طقم
سيف :- بزواجي ابشر به بس عرسني
ضحكو كلهم على ردة فعل سيف وتوجهوا لصلاة الفجر
اما عند البنات كانو متجمعين عند غرام الجو كان كله ضحك وطقطقة ريوف وغلا حتى كلهم كانو حولها يهدونها
غلا:- غرروومم خلاص عاد وش مدة البوز ذي
غرام :- متوترره لا تكلميني
غلا :- اذا تراجعتي عن الفكره قولي من الحين قبل لا يجي الموذن ونهج
ريوف :- تخسين والله اني اطلعها من تحت الارض
عصبت غرام :- انتو الثنتين اطلعو بره ماابي وحده فيكم هنا
لطيفة :- هدي لا تسمعين لهم افطري لو شي خفيف لا تدوخين علينا
شريفة :- وكلوها غصب عنها لو بس لقمه
ريوف :- خلاص بعطيش وقت راحه مني بتواصل مع اللي الحجوزات لا يتأخرون
غرام :- ماتحسين تو الناس ؟
لطيفه:- احس لا انتِ واحنا بيكون الوقت ضيق علينا
غرام :- طيب متى بيصير العقد ؟
غلا :- سمعت سيف يقول على عشر كذا
ريوف :- يعني بنزينش مرتين مره ناعم للعقد والمره الثاني للملكة
غرام :- جاني غثيان من اللويه كيفكم اسلم نفسي
ضحكت شريفة:- بنزل اسوي عصير ليمون يهدي اعصابش شوي
هزت راسها غرام بالموافقه :- والله احتااج
ابتسمت شريفه :- ابشري باحلى عصير ليمون الحين
غلا :- ولو فيه عصفر جيبي لها
ناظرت غرام رجفتها :- يمه تعالي جنبي بسرعه
تقدمت اديم لها وحضنتها :- خففي على نفسچ كلشي بيعدي مثل ماتبينه بس اهدي
غرام :- ابي ماي بارد وبقوم اخذ شور يمكن ارتاح شوي
مسحت على راسها:- احنا كلنا حولش تطمني
ابتسمت غرام وقامت تجهز روبها
__
بعد ماخلصو العيال من المسجد توجهو يشترون فطور لرجال والحريم اللي بيجونهم وهياف كان يدور على كسار بعد دقايق لقاه عند المخيم
هياف :- كسار ابيك بكلمة راس
كسار :-اسمعك قول
هياف :- بكلمك بموضوع يخص غرام مير انك تخبر نصه
ترك جواله كسار :- عسى ما شر ؟
هياف :- غرام مافيها شي وتقدر تتحكم بنفسها لكن مرات قليلة تجيها نوبات تخليها تسوي اي شي يخطر فبالها
تذكر كسار اول مره يسعفها :- حتى محاولات الانتحار ؟ لما اسعفتها بالعزبه الدكتور سالني بس مافكرت
هياف :- بالضبط اول شوي نرجع البيت امي وخالي بيكلمونك بالموضوع بس قلت اعطيك علم قبل مايمسكونك
هز راسه كسار :- قم نرجع الحين دام الموضوع كبير كذا
هياف :- اهم شي لاحد يعرف ولو خالتي ماحد يعرف غير جدي وامي وخوالي واحنا لا البنات يعرفون شي ولو بالغلط
كسار :- ابشر
تنهد هياف وكمل طريقه معه :- كسار الهوشة اللي صارت بيننا قبل الملكة ... أدري إني زودتها وقتها كنت مشحون ومعصب وغلطت عليك بكلام ما كان له داعي ، انا حتى عليها غلطت مانمت ذيك الليله لين استسمحت منها
كسار :-وأنا بعد كنت معصب منك وقلت كلام ما كان وقته
هياف كمل بنفس الجدية :- أنا ما ابي يمر شي بيني وبينك بدون ما ينتهي أنت ولد خالي وأخو قبل لا تكون زوج غرام وما ودي يبقى شيء يحط حدود لعلاقتنا انا واثق انك بتحمي غرام حتى من نفسك
كسار ابتسم بخفة أخيرًا حس إن هياف رجع القديم :- يعني الحين نقدر نقول صرنا نسايب ومتفاهمين
ضحك هياف وحضنه :- نسايب واخوان بعد بتلاقيني بظهرك بالمره قبل الحلوه
شد كسار عليه :- الله يديمك سند ياهياف واوعدك غرام بعيوني الثنتين
ابتسم هياف وكملو طريقهم للبيت
بجهه ثانيه عند العيال
سيف :- جدي شرايك اجيب معلم شاورما هنا
الجد علي :- بعرسك سوها بس ذا كسار الغالي اسدحو الفطور السنع
سيف :- يعني وانا مب غالي عندك !
نياف :- ذا كسار مب سيف استوعب فرق المقامات
كشر سيف بوجهه :- الله يسامحك الحين صرت تجرحني
الجد علي :- ابلع لسانك انت وهو كلكم عندي بنفس المقام
سيف :- واضح حتى قوتك رجعت لكسار من بعد الصلاه ما جلست بس تحوم حولنا
مشاري :- استح على وجهك تكلم ابوي كذا
سيف :- امزح معه اكيد ما اعطي عين انا اذا خايف عليه
ضحك الجد علي :- الله يصلحكم حومتوا شبدي بهالهرج يلا خلصونا قبل لا يلتمون
مشاري التفت على سيف يهدده :- اذا ماتسنعت بخليك تقهوي الرجال اليوم كله
سيف ضحك وهو يمد يده يسحب الترامس :- يعني اذا سكت ماراح تخليني ؟
مشاري :- اسكت بس ساعتين متواصله ومحد بيكلمك
نياف :- اقول لكم كسار رجع البيت مع هياف متى ذا بيروح الحلاق ؟
مشاري تذكر الموضوع:- تعال معي انت وسيف يتم مع ابوي
سيف :- ما امداني اسكت ربع ساعه غيرت كلامك !
ضحك مشاري :- عندي موضوع مهم نخلص ونجي كلنا نكرف
مشى نياف معه وترك سيف يتحلطم :- خالي عسى ماشر
مشاري :- بنكلم كسار على نوبات غرام
هز نياف راسه :- فهمت انا قد علمته بس مب بشكل موضح
مشاري :- اليوم بنوضح له
عند البنات
طلعت غرام من الحمام وهي لافة نفسها بالروب تمسح قطرات المويه اللي على وجهها تنفست بعمق وهي تشوف البنات جالسين على الطاولة الصغيرة والفطور جاهز
لطيفة :- يلا تعالي افطري لو شي خفيف
غرام :- طيب بس وين امي وخالاتي ؟
ريوف :- طردتهم عشان ناخذ راحتنا
كشرت غرام بوجهها وتقدمت لهم :- سوو لي مكان بس
غلا وهي توسع لها :-قولي والله مو متوترة للحين
غرام جلست واخذت فنجال قهوه :- مدري هديت شوي بس باقي احس بمشاعر كثيره خوف شوي فرح وتوتر وكلشي
رفعت ريوف صحن فطاير :- ابلعي وبتنسين التوتر
لطيفه قدمت لها صحن فواكة :-خذي تخفف عليك
غرام ابتسمت وخذته :- طيب
فزت ريوف :- كلمونني كلهم وصلو
غلا :- اناا بصعدهم اصبرو
غرام وقفت :- مستحيل ليش من الحين مارطبت بشرتي ! كله منكم خليتوني افطر
ضحكت لطيفه:- قومي انا اساعدش
فتحت غرام درجها طلعيهم كلهم وفتحيهم لي
شهقت ريوف :- كل ذا تستعملينه !
غرام :- لا تكثرين كلام سريع
ما مرّت إلا دقايق بسيطة إلا وسمعوا صوت الباب ينفتح ودخلت ريوف و معاها كلهم جاهزين ومعاهم شنطهم الكبيرة
فاطمة :- جاهزين نزين احلى عروسه ؟
ريوف وهي كاتمه الضحكة :- استري على ما واجهتي خليها تدهن نفسها
ضحكت فاطمة :- خليها تهتم بنفسها بس الاهم لا تقربين من وجهش ياغرام انا بحط من عندي
ابتسمت غرام :- طيب اختصرتي علي
سحبت شنطتها ساره :- انا ابي مكان فيه افياش كثيره
وقفت غرام :- فيه جنب التسريحه الجهه الثانيه
ريوف :- طبعاً مستحيل ماراح نخليك تشوفين وجهش نهائي
غلا :- يا نغطي المرايه او نروح المجلس
ساره :- نختصر الوقت ونروح هناك
اشرت غرام :- روحو وانا الحقكم
ريوف :- غرام ماعندش شي تعالي اعرف الحين تجلسين تفكرين
ضحكت غرام :- عرافه ذي مايمشي عليها شي
دخلو المجلس وبدت كل وحده تطلع اغراضها
اما بالصاله كانو متجمعين مع كسار
نياف جالس مقابل كسار :- تذكر يوم جدي يتعب وقلت لك تجلس بالمجلس وقلت عن النوبات بس لازم الحين تعرف السبب
كسار :- اي فاهم واعرف عن محاولاتها ذيك بس وش السبب؟
مشاري :- انا اشرح لك بس تسمعني للاخير
كسار :- طيب اسمعك
مشاري :- صدمات طفوله كانت تشوف امها تنضرب قدام عيونها ويسوي كلشي يخطر فبالي وياخذ حبوب كله قدام غرام كانت تشوفه وحش ماهو اب لين يوم رجع لهم البيت متعاطي وانهال ضرب بغرام ولما نوره الله يرحمها دافعت عنها جابتها لنا ورجعت بيتها وهي متغطيه لولا ماشفت اثر بغرام وشكيت فيه راحت فيها نوره لايام واحنا ماندري وللاسف اخذناها معانا عشان ماتظل بالبيت لوحدها وشافت امها تاخذ انفاسها الاخيره والحين ماتدخل المستشفى مهما كان تذكر امها بكل ممرر
هياف :- وتعرف اخر سالفه للحين ما انهارت عند احد تحاول تتمالك نفسها بس بتنفجر قريب مستحيل تكتم اكثر
شبك كسار يدينه يحاول يستوعب :- غرام مرت بكل ذا ومابينت لاحد شلون !
اديم تحاول تكتم البكيه :- الكل يعتقد انها هاديه لكن ذا السبب الحقيقي غرام عانت واجد ايام كثيرة ماتنام ومرات تنام عشان ماتقابل احد
كسار نزلت دمعته :- اوعدكش يا عمه اني انسيها كل اللي عاشته واخليها تتخطاه واوعدكم اكون سند لها بكل مره تجيها
وقف مشاري يربت على كتفه :- ماعندنا شك فيك واثقين انك قدها
نياف كان يحاول يمسك نفسه :- انا اللي كنت اهدي غرام بكل مره اعرف زين يا كسار غرام ماتجيها النوبات كثير نادر يا انه يكون بسبب مثل صراخ او انها تذكرت الماضي
كسار مسح دموعه :- طيب شلون اعرف انها جتها وكيف اتعامل وياها ؟
نياف :- إذا حسيت إنها بدت تتنفس بسرعة او انها تناظر بسرعه اماكن مختلفه او رجفتها زادت لازم تمسك يدها بهدوء وتذكرها إنها مو لحاله
هياف قاطعه :- أهم شيء لا تضغط عليها لا تقول لها تهدى غصب كذا يزيد عليها بس خلك قريب منها امسح على راسها او ضمها كلمها بصوت هادي حاول تشغل فكرها بشي بسيط مثل عد الأرقام أو ذكرها بشي زين صار كذا تبدا تركز على اللي تقوله وتنسى اللي تفكر فيه هي واذا شفتها تصيح خلها تطلع كل اللي بقلبها لو ليله كامل بس خلك وياها
اديم :- اهم شي يا كسار لا تترك شي حاد بدورة المايه الله يكرمكم
ابتسم كسار يطمن اللي حوله :- ابشري ان شاء الله ماتاذي نفسها وهي عندي ولا انا اكون سبب اذى لها
هياف :- احيانا تحتاج بس تقلل الاضاءه وتفتح النوافذ كلمها بكل هدوء كلمها عن الواقع ونسها كل اللي صار
اديم :- كسار لا تستهين بالموضوع مرات حتى لو كانت مستانسه تجيها بنهاية اليوم خلك دايم جنبها ولا تحسسها بثقل او عبء ماتحب تكون ثقيله على احد
كسار :- عمه تسمعين وش تقولين ؟ غرام بتكون حرمتي بعد كم ساعه احطها بعيوني الثنتين ولا احس بثقل
مشاري ابتسم وحاول يغير الموضوع:- يلا عاد لا تسوون دراما وقومو جهزو
ابتسمت اديم :- الله يدمك سند لها ويديمنا سند لكم
تقدم كسار يقبل راسها :- امين يارب يلا نستاذنك احنا لا نشغلك
طلعت اديم تودعهم ورجعت عند مها وشريفة يكملو الفطور للحريم
مها :- الله جابش يا اديم شوفي السفره كذا زينه ؟
شريفة :- انا اشوف كلشي جاهز وهي تقول لا !
اديم :- كلشي جاهز بس باقي يوصل الفطور
بعد لحظات دخل سيف ووراه نياف شايلين أكياس الفطور ، سيف :- صدته طالع من عندكم رجعت دخلته
ضحكت اديم :- زين ماتسوي فيه كرفه
نياف وهو يحط الأكياس :- خير حسستوني حرب !
سيف انسدح بوسط المدخل :- تعبتت حتى راعي المخبز حن علي اول ما دخلت عنده قال نفس طلب الرجال مايحتاج تطلب
ضحك نياف :- باقي كرف جدي ورانا
ابتسمت شريفه :- الله يعطيكم العافيه بس اطلعو
نياف :- بصعد لعروستنا
سحبته اديم من ثوبه :- توكل عندها البنات
طلع نياف يتحلطم ولحقه سيف :- بسم الله ندخل للحرب الحقيقه
أنت تقرأ
بشروني عنك ما يدرون عني مادروا باللي شغل فكري وظني
Poetryاهلاً فيكم بمخيلتي الاولى " بشروني عنك ما يدرون عني ما دروا باللي مشغل فكري وظني"
