بشروني عنك ما يدرون عني مادروا باللي شغل فكري وظني

Part 26

بعد ساعات من تجهيزات غرام
كان المجلس مليان سوالفهم معها بين ضحك ومزاح وطلبات مستمرة وكل وحدة تحاول تبرز لمستها على غرام فاطمة قاعدة تضبط مكياج غرام وسارة تسرح شعرها بخبرة ونور تصور اظافر غرام وترسلهم لريوف
دخلت عليهم ريوف :- جيت اشوف بالواقع احلى
ضحكت نور :- مقدر عليش انتِ
فاطمة وهي مركزه :- غرام لا ترمشين كيف اركبهم لش وانتِ كل شوي ترمشين شوي وأخلص
غرام بتذمر :- ترى انا ادميه مو لعبة باربي من متى وانا صنم كذا
ريوف وهي تضحك :- من يوم دخلنا المجلس! بس ترى هذا يومك تبين تصيرين أحلى وحدة وإلا لا؟
غرام بابتسامة صغيرة :- طيب طيب كملي بس بشرط لا تحطين لي عدسات لون عيوني عاجبني
فاطمة وهي ترفع حواجبها :- أنا أعرف شغلي
سارة وهي تسرح شعر غرام :- تسريحتش صارت تجنن بس حقت الليل بتتعبش
غرام :- اجل خليها لين الليل هو فستاني ناعم
ساره :- طبعاً لا اسوي ثانيه بس نفس الخفه اي
ريوف :- سنعوها سنعوها
غلا فتحت الباب بقوه :- تدخلي شصار
غرام فزت :- وجع شيلي الباب بعد !
ضحكت غلا :- انتِ خلش بحالش مالش شغل
كشرت بوجهها غرام وضحكت:- شغلي وياكم بعدين
ريوف:- خلصي وش صار ؟
غلا وهي تضحك :- العجوز الشمطاء ماتحملت تجلس ومشت
ريوف :- حلفييي حسافه ماشفت اللحظه !
غلا :- والله فجاه قامت وهي ساكته ومشت
ضحكت ريوف :- انا اشوف الأكسوجين رجع لي
غرام :- وش السالفه علمونا
ريوف :-انتِ خلصي الحين وبعدين نعلمش
غرام كانت تراقب ضحكهم وهي تبتسم تحس بفرحة كأنها تعيش بحلم وكل شيء صار بسرعة بس رغم التوتر كان قلبها مرتاح وتوثق بذاكرتها مشاعر أهلها حولها
ريوف رفعت لكاميرا لها :- غرام وش شعورش وانتِ عروس الليله ؟
غرام لفت وجهها :- تكفين لا تصورين الحين
ريوف وهي تضحك :- لو سمحتي ذا توثيق جميع مراحل اليوم بعدين كسار لازم يشوف شغلي عليش !
ضحكوا كلهم وفجأة انفتح الباب ودخلت أديم ووراءها لطيفة وشريفة
أديم بصوت مشحون بالمشاعر :- يا عمري غروم ! ما شاء الله قمر
لطيفة :- تكفون بدون دراما لا تصيح
شريفه وهي تمسك يدها بحب :- ذكرتيني بنوره الله يرحمها حيل صرتي تشبهينها
غرام حسّت دموعها توصل لعينيها بس تداركت الموقف ما تبي تبكي وتخرب تعب فاطمة ابتسمت وهي ترد بخفة:
تمنيتها معي اليوم
اديم تقدمت تحضنها :- انتِ بعيوني وقلبي انا معش
ريوف وهي تتصنع الجدية لا والله؟ تراي تعبت وانا اهدي فيها خلاص طلعوو
ضحكوا كلهم وفزت غلا :- خلصو بسرعهه سيف مرسل ستريك جايين
اديم :- انزلوو بخرو الملقط والمجلس بسرعه
ريوف بمزح وهي ترفع يد غرام :- الى اللقاء يالعزوبييه
غرام خذت نفس عميق :- جيبو لي مرايه بسرعه بشوف نفسي
غلا وقفت تعطر فستانها :- عطورري اصليه ترى مب نفس بعض الناس
كشرت ريوف بوجهها :- لو انهم مو على وصول دفنتش هنا
غرام خذت فستانها :- بس كافي بروح اغير
لحقتها ريوف :- جيبي جوالش بسرعه لا تلهين فيه
مدت غرام جوالها وسكرت الغرفه تلبس
البيت كان يغلي بالحركة وأصوات التهاني بكل المكان والكل في حالة توتر وفرح بنفس الوقت
في المجلس الرجالي، والسيد بدأ يعقد القران
الجد علي كان جالس بهيبته المعتاده ومشاري وخالد على يمينه اما كسار وسعود وسيف ونياف على اليسار السيد بدأ يقرأ العقد وكسار صوته كان ثابت وهو يرد بثقة كأنه كان ينتظر هاللحظة من زمان
السيد: يا كسار تقبل بغرام زوجةً لك
كسار :- قبلت
السيد :- خذو طريق نسمع موافقة البنت
وقف هياف :- تفضل معي هي بالمجلس
السيد :- خلها توقف عند الباب عشان تبصم
نياف :- ابشر الحين اناديها
دخل نياف عندهم :-غروم تعالي
وقفت غرام بصعوبه وخطواتها كانت ثقيله مسكتها ريوف :- هدي توتر شوي ماراح ياكلش
ابتسمت غرام ووقفت عند نياف
السيد :- يابتي غرام تقبلين بكسار زوجاً ؟
غرام بتردد :- قبلت
اعتلت اصوات البنات بالتهاني لها وابصمت
السيد :- مُبارك لكم العقد رسمياً اصبحت زوجتك يا كسار
الكل قال "ما شاء الله" بصوت واحد والابتسامات علت وجوهم ، سعود طبطب على ظهر كسار وهمس له :- راحت عليك العزوبية مبروك يا رجال
كسار بابتسامة :- خليتها لكم والله يبارك فيك عقبالك
في المجلس النسائي كانت غرام جالسة تحاول تتحكم بتوترها ويدها باردة قلبها يدق بسرعة تحس كل العيون صارت عليها الكل يبارك لها بس عقلها مو مستوعب اللي صار توه ، قاطعتها لطيفة أمسكت يدها بحب وهمست لها :- انكتب اسمش باسمه يا حظّه فيش ياغروم !
غرام بخجل وهي تبتسم:- الله يتمم على خير
دخلت أديم وهي تقول :- جهزو غرام بيجي يشوفها
ريوف صارت تركض لغرام رتّبت فستانها وغلا رشّت عطرها المفضل و سارة رتبت لها شعرها
ريوف دزتها للمجلس الصغير بحماس :- باي باي انتظري زوجش
غرام بصوت خافت وهي تتنفس بعمق :- ريوف طسي عنيي يا رب يمر الوقت بسرعه
الباب انفتح ووقف عنده الجد علي ومعه خالد وخلفهم كسار
كسار دخل بخطوات هادية واثق من نفسه لما شافها وقف لحظة كأن الوقت توقّف عنده اما غرام كانت منزله رأسها تحاول تهرب من نظراته بس ما قدرت تمنع نفسها من رفع عيونها لجزء من الثانية وعينها صادفت عينه نظرة واحدة... وكانت كافية تطمن قلبها
كسار ابتسم بخفة كأنه كان يطمئنها ، غرام ما قدرت تقاوم الخجل نزلت عيونها بسرعة بس قلبها صار ينبض أسرع
الجد علي :- نتركك شوي معاها بس ها حدك ربع ساعه
كسار وهو يناظر غرام :- ابشر لا تشيل هم
خالد وهو يبقبل راس غرام :- الله يبارك لكم ويتمم كلشي على خير
طلعو وصار المجلس فاضي بس هم الاثنين تقدم كسار لها ومسك يدها بعد تردد :- الله يتمم لنا على خير
غرام همست :- امين يارب
ابتسم كسار :- تعالي اجلسي
مشت غرام وجلست لاقرب كنب كان جنبها وجلس مقابلها كسار :- طلعتي احلى من ماتخيلت
ابتسمت غرام وكمل كلامه :- صرتي زوجتي وحلالي اوعدش اني احميش حتى من نفسي
حست غرام براحه وتكلمت بصوت خفيف :- وانا اتمنى اكون لك الزوجة اللي تتمناها
ابتسم كسار ومسك يدها :- ماعندي شك ، تامريني على اي شي ؟
غرام خجلت وسحبت يدها :- لا تسلم ما يامر عليك ظالم
كسار قبل راسها :- الله يبارك لنا يا اعظم انتصاراتي
ابتسمت غرام :- امين يارب
وقفت كسار :- استودعش الله وهدي من توترش
ابتسمت غرام وهزت راسها بالموافقه ، طلع كسار ودخلو لها اخوانها ، هياف :- مبروك يا بوي انتِ عقد الهنا
نياف يمثل الحزن :- تسوون لي غرفه فبيتكم ولا ماراح اخليش تروحين معه
دمعت غرام :- نيافوه لا تصيحني تكفى
قرب نياف منها يمسح دمعتها :- ياويلش تبكين اليوم امزح معش الف مبروك !
ضحكت غرام :- ابشر والله يبارك فيكم ومايحرمني منكم
ابتسم هياف وميل راسها على كتفه :- شفتي كتفي ذا مادامه موجود يعني وراش سند وكتف تستندي عليه ويحميش
حضنته غرام :- الله يحفظك لنا وماعندي اي شك
الكل ابتسم وفرحة أهاليهم غطّت الجو خالد أخذ نفس عميق كأنه كان يحبس مشاعره طول الوقت وسعود طبطب على كتف كسار وهمس له:صدقني حياتك بعد اليوم ما راح تصير مثل قبل اخذت دلوعتنا
ضحكت غرام من سمعت سعود يقول"دلوعتنا":- لا تعطيه افكار عني
ابتسم كسار :- على قلبي مثل الريشه خليه يقول دلوعتنا
خجلت غرام وصفقت ريوف :- ماعرفتك بالرومنسيه
ابتسم كسار واستوعب وجودها :- الله يعيني
كشرت ريوف بوجهه :- انتقلت العدوه من ذا اشوف !
اديم :- بس بدينا فقرة ريوف وهياف اخذو غرام خلوها ترتاح للياله وصعدو وياها خصوصاً انتِ لا اشوفش
ضحكت ريوف :- تسلمين انا اللي ميته عليهم الحين العجوز الشمطاء ترجع
فلصتها اديم :- استحي
ناظر سيف نياف وردو بصوت واحد :- العجوز الشمطاء ؟
ضحكت ريوف :- سهرت الليله اعلمكم منهي
طلعو كلهم يتجهزون لليل وظلو البنات كالعاده مع غرام
دخلت ريوف ومعها البنات غرفة غرام اللي كانت جالسه وتتبسم ، كل وحدة ماسكة شيء لطيفة طلعت الفستان وغلا تجهز الإكسسوارات وفاطمة وساره ونور بدو يتناوبون على غرام والبنات
ريوف :- ناظرو كيف تتبسم الله اعلم كسار وش قال لها
غمز ريوف :- او ايش سوه لها
شهقت غرام بعد ما استوعبت كلامها :- يالوصخه لا يسمعك احد ويصدق !!
ضحكت لطيفه :- ما عليش منهم متاثيرن بالمسلسلات
غرام ضحكت بخجل لكنها كانت تحس إن قلبها بينفجر
~نسرع الاحداث للمغرب ...
بدأت التجهيزات فستانها الأبيض الناعم كان على الطاولة لمسات المكياج الأخيرة وتثبيت الطرحة كل شيء كان يمشي بسرعه البنات حولها يضحكون ويفرحون واللي تعدل شعرها واللي تكوي فستانها بس هي حسّت إنها في عالم ثاني عالم خاص فيها وبكسار الليلة!
دخلت ريوف :- شنطتش عطيتها كسار وكل اغراضش اللي تحتاجينها والباقي بياخذها لبيتكم
شهقت غرام :- لحظة اي بيت ووين ؟
ضحكت ريوف :- اخذ لكم بيت بالرياض
غرام :- الرياض !! بعيده
ريوف :- وين بعيده كلها ست ساعات
غرام :- تشوفينها قليله ؟
لطيفه :- اقول ماهي سالفه ذي هو بيكون قريب من شغله وانتِ قدمي على وظيفه هناك
غرام :- معرف ليش درست الطب وانا اكرهه المستشفيات
نور :- يعني انتِ درستي طب ؟
غرام :- اي بس اخر سنة اطبق فيها وقفت
ساره :- خلاص اول ماتروحين هناك قدمي على التدريب لو بمستشفى خاص او مستوصف وبعدها اختاري المستشفى الاحسن وتوظفي فيه
لطيفه :- بيجي الوقت اللي تشتغلين بوظيفتش وتكونين احلى دكتوره
غرام :- قصدش اني انحد عليه مستحيل اتم ايام بروحي اذا راح لدوامه هو
ريوف :- يا بيجيبش عندنا او نجيش
فاطمة :- بنات ! ماهو موضوع ينفتح الحين كملو شغلكم لا نتاخر
(بعد كم ساعه غرام صارت جاهزه اترك لكم التخيل تعالو انستا او تيك نتشارك تشبيهاتنا لاطلالتها)
شريفه رسلت على ريوف :- المصوره وصلت وصارت بالمجلس
ريوف :- يلا يلا انزلي المجلس الصموره صارت هناك
غرام لاول مره تحس محتاجه ريوف :- نزلي معي
ساره :- اووههه الظاهر وصلنا اعلى مراحل التوتر
ضحكت غرام :- حيل ولا من متى ابيها ذي
مسكت ريوف يدها وسحبتها تنزل وياها المجلس :- اسمعي بنصور ردت فعلهم كلهم بيدخلون الاهل قبل بعدها كسار بكون وياش يا احلى عروس !
غرام :- موافقه
المصوره :- ما شاء الله اجمل عروس تمر علي ذا الاسبوع ! رهيبه
ابتسمت غرام:- مشكوره
المصوره يلا عطي وجهش الكوشه وانا بقول لفي اذا جو
لفت غرام وهمست لها ريوف :- لا تنامين بالغلط
ضحكت غرام :- ماقصرتو بسبب القهوه اللي شربت اليوم مب انام اسبوع