وصلوا الفندق كسار نزل وفتح لها باب السيارة بنفسه حست غرام بخجل بس نزلت بهدوء:- ما كان له داعي
كسار :- وصية اخوش
ابتسمت غرام وتقدم كسار ياخذ مفتاح جناحهم أول ما دخلوا كانت انوار الغرفة خافته وفيه باقة ورد على الطاولة مع كيك صغير مكتوب عليه "مبروك غرام وكسار"
غرام وقفت عند الباب تتأمل حسّت بشعور غريب يجمع بين الفرحة والخجل .
كسار تقدم عنها ورمى شماغه على الكرسي والتفت لها :- تفضلين ترتاحين أول أو نطلب عشاء؟
ابتلعت غرام ريقها بصعوبة:- عادي.. مثل ما تبي
ضحك كسار وفهم انها باقي متوتره :- خلاص بما انش قلتي مثل ماتبي انا جوعان
بعد ما طلبوا العشاء غرام توجهت لشنطتها عشان تغير وترتاح شوي اما كسار جلس على الكنبة يتصفح جواله وكل تفكيره كان منصب عليها
فتحت غرام الشنطه وشهقت :- رييوف !! الله ياخذ عدوش
التفت كسار منصدم :- شفيها ؟
استوعبت غرام وسكرتها :- وين جوالي شفته ؟
كسار :- لا ما كان معش ولا احد عطاني اياه
غرام همست وهي تفتح الشنطه :- خططتها زين الخبيثه
وقف كسار يطل عليها وشاف الفستان القصير الاحمر وفهم ابتسم بخفه وقاطعته غرام :- لف وجهك هناك
ضحك كسار :- ريوف اللي تخططها وتهاوشيني انا ؟
رفعت شعرها غرام :- اختك
انسدح كسار جنبها :- صحيح اختي بس مالي دخل هذا وهي مجهزه شنطة السفر بعد
وقفت غرام :- سفر !
اتكى كسار على المخده :- شهر عسلنا
غرام :- وين ؟ ماعلمتني !
كسار :- بكره تعرفين
ابتسمت غرام :- بدخل اسبح وامي موصيتني نصلي ركعتين مع بعض
اعتدل كسار :- ابشري بنتظرش
دخلت غرام وكسار كان يهوجس بشكلها اول ماتطلع
____
عند البنات
ريوف :- اقول لكم حال غرام الحين ؟
غلا بستهزاء:- حاطه كمرات تراقبينهم بعد !
غمزت ريوف :- لا بس غيرت شنطتها بشنطه ثانيه
شهقت لطيفه :- ماتوقعتش نذله كذا
غلا مصدومه :- مافهمت
ريوف :- كلام كبار الاطفال مايفهمونه
استوعبت غلا :- حلفييي انش سويتيها !
ضحكت ريوف :- اي والله سويتها
لطيفه :- اسكتواا لاحد يسمعنا اما غرام اذا جت انا مالي دخل
ريوف رفعت يدينها :- وانا مالي دخل كسار يتحمل
غلا :- الله يعين كسار ابتلش بثنتين
لطيفه وهي تضحك :- تخيلو وجهها اول ما فتحت الشنطه
غلا :- اكيد بدت تتحلطم بدون ماتحس لنفسها
ريوف :- اتخيل اول ليلة لهم مع بعض
لطيفه قرصتها :- طار عقلش بعيد انتِ ارجعي
دخلت عليهم مها وهي معصبة :- إنتو ناويين تسهرون لين الفجر؟ الصبح بتجي غرام وكسار وباقي اليوم تبريكات ! قوموا ناموا لانكم بتكرفون
ريوف وهي تحاول تكتم ضحكتها:-يمه احنا في يوم لا يصدق غرام تزوّجت ومين ؟ كسار لازم نسهر شوي نستوعب
مها رفعت حاجبها:-شوي والحين الساعة كم؟!
غلا :- توي أشوف كيف صارت كذا بسرعة ماحسينا لنفسنا
لطيفة وهي تقوم تسحب غلا معها :- يلا نمشي قبل لا يجي الطرد النهائي
ابتسمت مها :- جايكم الدور حتى انتو اصبرو
ريوف :- خلاص خلاص بننام كلنا بغرفه وحده وماعليش انتِ روحي نامي
مها وهي تقفل النور :-لا اسمع لكم حس
بعد ماتاكدو انها مشت غرفتها طلعوا للحوش عند العيال
ريوف بحماس وهي تجلس معهم:- ياسلام جلسه ولا علمتونا... أجل مين بيصب لي قهوة ؟
سيف وهو يرمقها بنظرة مستفزة:- ما عندنا خدمة ذاتية صبي لنفسچ
غلا وهي تمد يدها للكوب :- اذا على كذا ناولوني الدله
نياف وهو يرفع حاجبه:- شوفوا الاستغلال جايين كأنهم ضيوف
غلا وهي تضحك:- لازم نستغل الفرصة إذا تزوجتوا بتخلونّا نكرف ونجهز لكم كل شيء مثل ماسوه كسار جاء بارد مبرد اخذ غرام وراح
سعود :- تصدقون مسوحش البيت بدون غرام بعيد الشر
تنهد هياف :- لا تفتح المواجع انا اللي للحين ماني مصدق
ريوف وهي تسند ظهرها على الكنبة:- أقول لكم غرام الحين أكيد قاعده تصيح لانها بعدت عن ذا ونياف
رفع حاجه هياف :- ذا له اسم هياف تبين اكتبه لش وبالخط العريض؟
ضحكت ريوف :- لا خلاص حفظته
لف هياف عليها مصدوم :- الحين ذي استسلمت بسرعه ليه !
ضحك سيف :- تبي راحة بالها
ريوف اعتدلت :- لا لكن اعتبره شكر على اللي سويته معي ليله كامله بدون هواش
ابتسم هياف :- العفو ما يحتاج ارجعي مثل ما انتِ
همس نياف لسيف :- ذا هياف ولا مين !
سعود يضبط شايه:- طيب أنا عندي سؤال ليش أنتم هنا للحين؟ مو المفروض كلكم نايمين؟
هياف :- اكيد جاين هاربين من امي او وحده من خالاتي
نياف:- اي واضح وبعد مبين أنهم يخططون يطفشونا علشان يبقى لهم الجو
لطيفة وهي تحاول تغير الموضوع:- الحين خلونا من ذا من متى ما قعدنا كلنا كذا؟!
سعود :- والله زمان لنا شهور ما جلسناها بس ناقصنا غرام وكسار
سيف وهو يعدل جلسته:-ياخي الجلسات بالحوش لها طعم الحين لو نطفي الأنوار ويصير الجو هادي نبدأ سوالف الرعب
غلا رفعت يدها:- لاااا الله يرحم والديك ما نبي خرابيطكم أنا بالموت انام !
ريوف وهي تضحك عليها:- الخوافه وين اللي تهايط علينا ؟
سعود زمر عليها :- بس بدينا هواش !
نياف:- انا اقول يازين السفر والله كسار بيعيش حياته شهر عسل وراحة ومعه وردتنا بعيد عن حنتكم انتو يالشوك
غلا وهي تتثاوب:- أنا الصراحة تعبت وبقوم انام بس انت يابو شوك ليت دبور يقرصك
نياف ضحك بسخرية:- إي روحي نامي بس انتبهي لا يطلع لش جني المطبخ
ركضت غلا وضحكو عليها وكذا استمرت السهره وسط سوالف وضحك و حش باللي جاء
في الفندق
بعد ما طلعت غرام من الحمام كانت لافة على نفسها روب أبيض وشعرها مبلل ترددَت تشيله وهي تناظر كسار اللي كان جالس على طرف السرير يلعب بجواله لكنه أول ما شافها رفع حاجبه بابتسامة خفيفة :- سبوحة الهنا
ابتسمت غرام :- الله يهنيك
كسار :-بتمي بالروب كذا ؟
نزلت غرام روبها وانصدم كسار من طلتها كان فستان قصير وماسك على جسمها وهي بداخلها تشتم بريوف
ابتسم كسار :- طالع حلو عليش طلعت ريوف ذويقه
كشرت غرام :- حلت ايامك لكن ماني ممشيتها لك ولاختك
كسار يحاول يخفف توترها :- بعتمدها دايم بذي الامور
غرام وهي تضربه بالمخدة:- ياويلك لو ابي شي باخذه انا هي مالها دخل فاهم ؟
كسار وهو يمسك يدها قبل لا تضربه بالثانيه :- يمكن فهمت ما علينا منها الحين وش قلتي؟ نصلي الركعتين؟
غرام سحبت يدها :- اي أمي وصتني كذا
دخل كسار يتوضأ وقفوا يصلّون مع بعض وغرام حست براحة غريبة كان إحساس جديد ومختلف إنها تصلي خلف كسار ، وبعد ماخلصو فتح كسار العشاء :- كلي وانا جاي
جلست غرام وهي ترفع شعرها :- انتظرك خلص وتعال
بعد دقايق جاء كسار وجلس بالقرب منها حست غرام بشيء غريب وحاولت ماتسمح لتوترها يسيطر عليها :- انا ماني جوعانه اكل انت بروح الغرفه بسوي شعري
لكن كسار حس بتجيها نوبتها ودخل وراها جلس بكل هدوء
غرام :- روح اكل لا تنتظرني
كسار :- ننام خفيفين احسن ... غرام إذا في شيء مضايقش تكلمي أنا هنا اذا متضايقه من ريوف
قاطعته غرام :- لا ريوف سوت اللي المفروض انا اسويه بس
فيه شيء من الماضي يلاحقني كسار يمكن مب وقته بس انا مب قادره اتخطى محاولات عمار وتقربه مني
كسار سحبها بحضنه :- غرام انا اسف على كل الايام السيئة اللي مريتي فيها سواء كنتِ صغيره ولا كبيره لا تشيلين عبء من الماضي على ظهرش وانا معش من ذي اللحظة عيشي الحاضر وبس
غرام حست براحه :- احاول يا كسار احاول بس خلك ساندني
كسار وهو يمسح على راسها :- بتلاقيني دايماً حولش واذا تحتاجين وقت مستعد انتظرش ارتاحي الليله كانت متعبه فعلاً
ابتعدت غرام :- اسفه كسار ما اقدر
كسار :- لا تعتذرين ما بينا عتاب ولا اعذار انا هنا عشانش
ابتسمت غرام متجهه لسرير :- يمين ولا يسار ؟
كسار :- خلش على اليمين
انسدحت غرام لكن كسار فصخ ثوبه قاطعته غرام :- لا تقول بتتم مفصخ لي !
هز راسه كسار :- اي عندش خلاف ؟ انتِ ماخذه راحتش بعد
رفعت غرام اللحاف تغطي نفسها :- ما قلت شي سو اللي يريحك
ضحك كسار وانسدح عندها :- نزلي اللحاف مالها داعي تكتمين نفسچ
غرام :- مرتاحه
سحبها كسار بخفه :- نامي على يدي شوفي كيف طويله حرام مايكون عليها شي
ابتسمت غرام ورفعت راسها بتردد وحطته على يده
كسار :- ما دامش حلالي حتى يدي لها حق فيش لا تمر ليله وراسچ مو على يدي مهما كان ولو فيه خلاف الله لا يقولها
هزت راسها بالموافقه وانتهت ليلتهم الاولى ...
~ نسرع الاحداث شوي .
صحيت غرام على ضوء الشمس وشافت نفسها بحضن كسار دق قلبها وابتعدت تناظر كيف نايم وملامحه مرتاحه كانه اول مره ينام بعمق انسحبت بهدوء من حضنه تحاول تقوم لكن حسّت بإيده تمسك معصمها كسار :- وين بتروحين ؟
غرام :- ما احب انام واجد اذا تبي تكمل كمل ماعليك مني
فتح عيونه بكسل :- خليش بحضني على الاقل شوي
حمرت خدودها وغيرت الموضوع:- بسوي قهوة تبي معي ؟
ضحك وهو يعتدل :- قهوة اول شي ! بس يلا حتى لو سم موافق
بعد دقايق دخلت غرام بكوبين قهوة :- للحين منسدح انت قوم
سحب كسار اللحاف :- انتظرش تقوميني
حطت الكوبين على الطاوله وتقدمت له تطبع قبلتها على خده :- يلا قوم
انصدم كسار والتفت لها :- عيديها باقي نعسان
ضحكت غرام بخجل وسحبت اللحاف :- قوم لا تطولها
قام كسار متفهم لخجلها :- هاتي كوبي
مدت غرام له الكوب :- حطيت فيه السم يلا اشربه
كسار شربه كله بجغمه وحده :- سمك عسل على قلبي
ضربته من ظهره :- مجنون بتموت !!
ضحك كسار وجلس يتاملها وهي تشرب كوبها اما غرام كل ما رفعت عيونها له لقت نظراته عليها حاولت تكسر الصمت :- متى بنروح لبيت اهلي ؟
كسار :- بعد شوي بس خذي كل الاغراضمره وحده
غرام نزلت كوبها :- ليش !
اعتدل كسار :- بنسافر شهر عسلنا ولا شلون ؟
غرام بحماس :- وين بنروح؟
كسار :- مفاجأة بتعرفين لما نوصل المطار يلا قومي لا تاخرينا
غرام رفعت صبعها :- أنا ما أحب المفاجآت اتمنى محسن الخيار
كسار وهو يميل لها بخفة:- وأنا أحب أشوفش متحمسه كذا
وفعلاً قامت غرام بكل حماسها تجهز اغراضهم ومباشره توجهوا لطريقهم ، أول ما وصلو الكل كان بانتظارهم أديم أول وحدة استقبلت غرام بحضن دافي وبعدها البنات تجمعوا حولها اما كسار انسحب عند العيال عشان تاخذ راحتها
الجد علي :- ادخلو كلكم المجلس نجلس مع بعض
سيف :- نعساان انا بروح الملقط
الجد علي :- تحرك قدامي قبل لا اكسر العصا على ظهرك
سيف :- اضرب كسار هو اللي اعرس وابلشنا
الجد علي :- لو تبي الراحه ماسهرت للفجر وتمثل علي انت وياهم انكم نايمين مشيتها لكم اليوم بس لو تعيدونها لاكسر عظامكم
نياف :- اما طلعنا مقفوطين
غلا :- الظاهر كذا رحنا فيها
مشاري :- ادخلو بس وانتوا ساكتين لا تخربون لمتنا
ضحكت غرام :- حسافه سهرتو بدوني
همست لها ريوف :- انتِ كيف سهرتش
التفتت غرام وهي تتذكر موقفها :- والله يا ريوف غير اوريش نجوم الليل الحيين تعالي
ركضت ريوف وغرام مستمره تهددها والكل منصدم منهم
كسار :- خذو راحتهم زياده عن اللزوم
ضحك هياف :- طالع اختك كيف تركض اكيد مسويه شي شايد لغرام
ابتسم كسار ويحاول يغير الموضوع :- هواش بنات مالنا فيه المهم يا جماعة الخير عندنا سالفه
وقفت غرام بعد ماحست يتكلم بجديه وجلست بجنب اخوانها ، كمل كسار بجديه :- انا وغرام بنسافر فتره بعيد عن هنا بكثير نحتاج نترك كل شي ورانا
أديم وهي ترفع حاجبها لغرام:- وش صاير ؟
رفعت يدها غرام :- مالي دخل باي شي يقوله هو مخطط كلشيء
مها بمزح :- يا زين التخطيط بس أهم شيء ارجعو لنا ثلاثة
شهقت غرام وضحكت ريوف :- كففوو ياميمتي تعلمتيي مني
كسار بابتسامة وهو يناظر غرام:- اذا الله راد بيصير بس الحين لا
نياف :- المهم لا تطولون ابي اختي انا اول ماترجع تتمم عندنا اسبوعين اذا مب شهر !
ضحك كسار :- بحسب الوضع إذا غرام مشتاقه لكم برجعها
غرام وهي تعطيه نظرة جانبية:- ومن قال إني بشتاق لهم؟
ضربها نياف :- افااا ياجحوده ذي ليله وسوت فيش كذا ؟؟
قامت تمثل الالم:- اجلس جنب رجلي احسن لي من الدفش
زحم كسار لها وقبل مكان الضربه فزت غرام :- الظاهر المكان الغلط ياريوف جايتش
ضحكت ريوف :- مالش الا انا تلفين وتدورين وترجعيين لي
انصدمو كلهم من حركة كسار وضحك الكل والجلسة تحولت لـ مزح وضحك اما غرام كانت تحاول تسيطر على دقات قلبها ومستوعبة انها مع كسار وصارت علاقتهم علنيه حتى بين اهلهم
وقف كسار :- الحين نستاذنكم لازم نمشي للمطار بوقف السياره هناك وخذوها انتم فيه سبير هنا اتوقع
خالد :- تراها امانه عندك ولا اوصيك عليها والمفتاح عندي
كسار :- على عيني وراسي بس أتوقع اني ببتلش ماعندها هناك الا انا
غرام وهي تضربه بعيونها:- وش قصدك؟
ريوف :- يقصد انه يبيني معكم
كسار :- اعوذ بالله بتناشبيني حتى مع مرتي !
ضحك هياف :- شفتي دايم اقول الله يعين عليش الحين ظهرت الحقيقه
ريوف :- ويع من زينكم ولا من زين سفرتكم خذو عفستكم من غرفتي قبل ما ارميها
ضحكو على ريوف اللي كشرت وجهها وأديم سحبت غرام على جنب وهمست لها:- انتبهي لنفسچ وخلش قريبة من زوجش لا تبعدين عنه وطيعيه
هزت غرام رأسها :- ابشري يمه لا تخافين كل شيء تمام
اديم :- صار شي امس ؟
غرام :- شي مثل وش ؟
اديم :- لا تستهبلين علي بينش وبين كسار
احمرت غرام لما استوعبت :- يمه بنتاخر بعدين
اديم :- لا تتهربين جاوبيني انا امش وعادي
تلعثمت غرام :- لا
مسكت اديم يدها :- اذا كسار تفهم امس ماراح يتفهم ان طولتيها
ناظرهم كسار وفهم نظرات غرام :- يا غرام يلا تاخرنا
سحبت يدها غرام :- مع السلامه يمه
تجمعو الكل يودعونهم وبعد ما ودّعوهم ركبو السياره .
تنهد كسار وهو ينزل غترته:- لا تهتمين لكلامهم احنا اللي نقرر امور حياتنا محد له دخل
ابتسمت غرام :- ما اهتميت لا تشغل بالك
كسار :- طيب ماعلينا مستعده ؟
غرام التفتت تناظره :- يمكن بس ويين بتوديني!
ابتسم كسار :- مفاجأة
غرام وهي ترفع حاجبها:- كسار لا تلعب بأعصابي
ضحك كسار :- وش الفايدة لو قلت لش؟ خليها مفاجأة أحلى
تنهدت غرام وهي تدرك إنها ما راح تطلع منه بمعلومة بسيطه بس في داخلها كانت متحمسة للحظات القادمه بينهم
وصلو المطار وجلسوا بصالة الانتظار وكسار لاحظ كيف كانت غرام تشرد بنظراتها :- تفكرين في وش؟
غرام ابتسمت بخفة:- أفكر متى بتقول وين رايحين ؟
ضحك كسار وهو يمد لها بطاقة ووردة :- اقري بنفسچ
نظرت لها بسرعة، وعيونها اتسعت بصدمة:- من جدكك!! كسار!!
ضحك كسار :- اي والله !
—-
عند بيت الجد
غلا وهي تآكل فشار:- أقول بالله عليكم أحد فيكم توقع غرام تصير زوجة كسار؟ أنا للحين مو مستوعبة!
لطيفه:- ترا كلنا مثلش بس عاد غرام تغيرت احسها ماهي متوتره مفس قبل وفوقها صارت زوجة كسار الصامت المخيف
ريوف :- فعللاً تغيرت وهو تغير صاير رومنسي زياده عن اللزوم !
غلا :- بالله كسار صار رومانسي؟ ذا اللي كنا نشوفه بالجمعات ساكت ويطالع الناس بنظرات تخوف؟!
لطيفه :- والله ذا اللي صار انتو شفتو حركاته ؟
دخلت شريفه عليهم :- اتركو الحش فيهم واطلعو جهزو الغذا
طلعت غلا :- ييووه الحين الجلد كله علينا
صادفها نياف :- السنعه تزوجت عنكم القمو الحين
سيف :- بس امانه لا تسممونا تونا مرتاحين
طلعت لهم ريوف :- بحط لكم السم بيدني الثنتين
سيف :- اعوذ بالله ذي تسويها
ضحكت ريوف ودخلت المطبخ ورى البنات
————
كل عام وانتوا بخير والله يعوده عليكم بالصحة والعافيه❤️❤️.
توقعاتكم لشهر عسل غرام وكسار وبعد توقعاتكم مين العلاقه الجايه🤔.
أنت تقرأ
بشروني عنك ما يدرون عني مادروا باللي شغل فكري وظني
Poetryاهلاً فيكم بمخيلتي الاولى " بشروني عنك ما يدرون عني ما دروا باللي مشغل فكري وظني"
