يوم ثاني الصبح..
گعدت جوري من وكت وعيونها مورمات دليل ع كثر بجيها
التفتت شافت البنات نايمات يمها وكل وحدة من جهة...عجبها المنظر..اخذت الايباد وصفت يمهم وصورت البنات وهي بنصهم...بعدها گامت وراحت حضرت الريوك ورجعت للغرفة...
دخلت لگت نقال رنيم يدگ بأستمرار...راحت تشوف منو المتصل..شافت مكتوب{حياتي} ف عبالها امها وردت...
جوري:الو
......:رنيم؟!!
جوري انصدمت..ابد ماتوقعت يكون هو
........:انتي جوري مو؟؟
جوري بتلكك وارتباك:أأ..أأيي
........:شلونج؟؟
جوري:الحمدلله
..........بهدوء:ماسألتيني عن اخباري مثل العادة
جوري حيل مرتبكة وتحس گلبها رح يطلع من مكانه من گد مايـــرگــع
جوري بتلكك:أحم...ر..رنيم نايـمة بـ..بـعد شـوي دگ علــيها
.........:بس انا مااريد رنيم
جوري:لعد؟
..........:اريدج انتي
جوري خـــلاص بـــعد مـاتتـــحمل ثــانيـة وحـــدة تحجــي ويـــاه
جوري:فارس انا مشغولة باي
فارس بسرعة:لحظة لحظة قبل لاتسدين الخط
جوري بأرتباك:نــ..نـعم
فارس:ليش صوتج مبحوح؟؟
جوري بگلبها(لحد الان تعرف صوتي يافارس)
فارس:انتي وياي؟؟
جوري:احـم...اي وياك
فارس:ماگتيلي شبيه صوتج؟؟
جوري نزلت دموعها غصب:مابيه شي بس مجرد افلاونزا ومأثرة ع صوتي
فارس بهدوء:جوري
جوري:نعم
فارس بحنية:فدوة لاتبــــجين
جوري بخنگة:ماجاي ابجي
فارس:جوري هذا الكلام گوليه لغيري
جوري ماگدرت وطلعت شهقة منها ودموعها اربع اربع
فارس:جوري لا الله يخليج اموت ولااسمعج تبجين
جوري بهمس:باي
سدت الخط بسرعة
رنيم جانت گاعدة من اول ماردت عليه بس سوت نفسها نايمة ومن سمعتها تبجي وسدت الخط
گامت ومدت ايديها بمعنى تعالي
جوري رأسن ركضت بحضنها وضلت تبجي بهدوء ورنيم تركتها تفرغ ع راحتها
بعد 10 دقايق هدت جوري
رنيم:حبيبتي گومي غسلي وجهج وريحي
جوري اكتفت بهز راسها وگامت تغسل
اما رنيم .. ف بمجرد ماطلعت جوري نزلت دموعها ع حال تؤمها الي تبجي الصخر
.................................................. ......
عند فارس....
فارس ضل گاعد من امس ومانام...ب 11 الظهر اتصل ع رنيم عالمود يرجعهم للبيت..وانصدم من ردت عليه جوري
فارس:اااااه ياربـــــي شســــوي...والله المــوت اهــون ألــي من هـذا كلـة
00000000000000000000000000000000000000
عند البنات...
گعدت رشا وتريگو البنات وعينو من الله خير
رنيم:رشيوا رح اتصل ع فارس يجي علينه
رشا:اتصلي
جوري:وين وين؟؟ ابقو للعصر فدوة
رشا:لاحبيبتي مانگدر نطول اكثر
رنيم اتصلت بفارس:هلو
فارس:هلا
رنيم:حبيبي اذا فارغ تعال علينه
فارس:ان شاء الله هسه اجي
رنيم:اوك..من توصل انطيني رنة حته نطلعلك
فارس:ماشي
رنيم:فارس شبي صوتك؟؟
فارس بكذب:مابيه شي..بس توني گاعد من النوم
رنيم ماصدّگته بس مشّت:اهاا..يلا ننتظرك
