خبث
رشا:الله يخليكم ...توبة توبة اصوركم بعد...بس لا تسوولي شي
رنيم:جوري جيبي علبه الميك اب بالدولاب
جوري:من عيوووني
راحت جابت العلبة واجت
فتحو العلبة... ورنيم ثبتت وجه رشا... وجوري بلشت شغلها... لزمت الكحلة والحمرة والظل وسوتها اركوز ...ورشا تصرخ
خلصت وبعدت عنها... واجت رنيم وكفت بصفها... وضلو يضحكون عليها
رشا بقهر:ياحيوانات وربي الا انتقم منكم
اجت رانيا وبتول وشافوها...ووكعو من الضحك عليها... يحاولون يهدون ما يكدرون
رنيم:رشاوي حبي ...بعد عندي الج مفاجئة مارح تنسينها طوول عمرج
رشا:فكوني شريرات
رنيم:لالا ...مو قبل ما تشوفين المفاجئة
شوي ودخل شخص للغرفة رشا تمنت الموت ولا يشوفها هيج
فارس ماانتبه لرشا لان جوري واكفه كبالها
فارس:رنيمووو شنو ردتي مني
رنيم:عندي الك شغلة تشوفها
رشا تهمس لجوري:جوري فدووووة... الله يخليج لا يشوفني
جوري رحمتها:ماتريد شي منك ... بس هيج خباثة منها صاحتلك عالمود تگوم
فارس يوجه كلامة لرنيم:امداج مو صوجج صوج الي يجيلج
رنيم:جذااابة... انا ردتك تشوف رش...
قاطعتها جوري بصرخة:لااااا
فارس اخترع :شبيج شصاير... ليش تصرخين؟؟
جوري برجاء:فارس الله يخليك اطلع بسرعة
فارس بشك:انتو شنو مسوين وضامينة...وانتي شنو وراج ليش ما تتحركين؟؟
جوري بارتباك:ها!.. ماوراي شي..كلشي مااكو بس اطلع
فارس بعناد:مارح اطلع الا لمن تكلولي شعدكم
جوري اتنرفزت منة مايفهم
تدخلت بتول:فارس ماكو شي بس هيج البنات جانن يتعاركن ورنيم صاحتلك عالمود تخوفهن
فارس باوعلهم بنص عين
رنيم بسرعة:اي اي صح هيج... بس ردت اخوفهم وصحتلك
فارس عصب:مرا ثانية لا تعيدون هاي السخافات
طلع من الغرفه ورگع الباب بقوة وراه... والبنات اخترعن من صوتة
جوري حزت بنفسها من گال سخافات
وخرت عن رشا وكعدت ع القنفة وهي متضايقة ورنيم نفس الحالة
رشا:يعني شلون ما تفكوني
جوري ورنيم رادو يعيطون بوجهه... بس شافوها وغصو ضحك
جوري:هههههههههههه وربي ردت اعيط عليج بس مع شكلج نسيت كلشي..(اعيط يعني اصرخ)
رنيم:ههههههههههههههه والله انا هم ...بس بصراحة ..شكلج تووحفـــة
رانيا:هههههههههههههههههه ااه يمة انا بالكوة لزمت نفسي... انتو لو شايفين شكلكم من دخل فارس ومارضا يطلع
بتول ضحكت ع هالموقف:هههههههههههههه اي والله... انا شفتهم انصفگ وجههم ...كلت خل ادخل لا يموتون علينة
جوري:هههههههه بلا بشكلكم والله خرعني
رنيم:اي والله يخوف اذا عصب سألوني انا
رشا بصراخ:وبعدييييييين.... فكوووني وبعدين نكتو وشبعو ضحك
رنيم تذكرت انو نسو رشا... وزادت ضحك... تحس انو بردت كلبها من تصرفاتها الغثيثة
رانيا فتحت رشا ...وكامت رشا وتوجهت للمرايا... وشافت وجهه.... واخترعت وصرخت:يماااااا حسبي الله عليكم من بنات كل هذا حقد شوهتو وجهي وعدمتو ملامحي
جوري ورنيم طايحات من الضحك عليها.... شلون اخترعت من شكلها... ما يكدرن حتة ياخذن نفس
دخلت رشا للحمام وغسلت وجههة وطلعت
صارت ساعه ب3 وكل وحدة توجهت لفراشها تنام
جوري ورنيم نامو ع السرير اما الباقي ف فرشو بالارض ونامو
الكل منسدح ويفكر بشي
بعد صمت حجت رنيم:بنات نمتو؟؟
الكل:لا
رنيم:قبل لا تنامو... كل وحدة تكول شنو تتمنة هسة ...لو شنو يدور براسها
بتول:اتمنة انام بحضن خالد
رانيا:انا نفس بتول اريد احضن بدر وانام
جوري:اتمنة اسمع صوت حبيبي... واشوف شنو جاي يسوي هسة...ويكلي احبج
رنيم:انا اتمنه اشوف بهاء
ضحكت جوري ع الخفيف
جوري:وانتي رشا ماسمعنالج حس
رشا بهدوء:انا اتمنة فارس يحس بالي بداخلي
محد فهم شنو تقصد وجوري ماتدري ليش تخوفت من امنيتها وودها تعرف شنو الي بداخلها
بس رنيم كأنها قرت تفكيرها وسألت رشا:شنو الي بداخلج؟؟؟
رشا تنهدت:جنت دائما اتجنب انو احس بهذا الشي بس مو بيدي
بتول:شنو هو؟؟
رشا:فارس
جوري قبضها گلبها ولزمت ايد رنيم حييل
رانيا:شبي فارس
رشا:جنت اتجنب انو احبة... واقنع نفسي انو احنا علاقتنا مارح تستمر.. بس غصب عني ..بديت اميل الة واحبة
جوري لا ارادي نزلت دموعها... وحمدت ربها انو الاضواء مطفية ومحد يحس بيها
بس الي ماجانت تدري انو رنيم حاسة بيها...بس ساكتة عالمود الكل موجود
رانيا بحسن نية ونست جوري:طيب عادي... انتي زوجتة... وهذا شي حلو ...تحبين زوجج
رشا:بس هو يحب وحدة ثانية... وانا جنت شاكة... ومن سألتة مساع تأكدت
بتول بهدوء:بس انا حسيتج ما مهتمة بي
رشا:اكيد اسوي نفسي مااهتم... انا مااريد ابين انو احبة... مااريد انجرح وهو لغيري ...ومساع ذبها بوجهي بكل صراحة... ومن دون تردد... بس حسيت گلبي انمرد
بتول(الله يعينج جوري دوم الحظ واكف ضدج)::يجوز مع الايام يحس ...صبري انتي
رشا:عالوا....يلا خل ننام تأخر الوقت تصبحون ع خير
الكل ماعدا جوري:وانتي بخير
جوري ساكتة ودموعها اربع اربع... وبالكوة كاتمة شهقاتها ...تحس سهام انغرزت بكلبها
هي مو انانية حتة تاخد فارس من رشا... ع الرغم انو هو يعشقها... بس مع ذلك ماتكدر... تربيتها ماتسمحلها هيج تسوي... لان رشا زوجتة... وهي احق بي منها
رنيم ضلت ساكتة... لأن لو حجت ممكن تجرح رشا بكلامها... وجانت حاسة بجوري ..بس مابيدها شي تسوي
كل الي سوتة انها حضنت جوري وخلت دموعها تنساب براحة... لان تعرف طبع جوري اذا بجت تحب تكون بحضن شخص يحسسها بالامان
الكل نام ماعدا جوري الي جافاها النوم وبس دموعها الي تنزل وطلع الصبح يلا نامت
