عند بهاء...
گعد من النوم والبسمة مافارگت شفاتة وحاس نفسة طاير
دخل للحمام وسبح وطلع لبس جينز وتيشيرت اسود وحذاء سبورت اسود واخذ نظارتة وسويجة ونزل للصالة لگة امة وابوه گاعدين يتريگون
بهاء:صباح الخير
الكل:صباح النور
ام بهاء:اليوم تروح للدوام؟؟
بهاء وهو ياخذ قطعة توست:لا...اليوم اجلت كل مواعيدي
ام بهاء:تمام...ان شاء الله ع الساعة 4 نروح للجماعة
بهاء:اوك..(كام)..انا طالع مشوار وراجع
ام بهاء:لاتتأخر
بهاء:لالا ع الغدا انا موجود...يلا مع السلامة
الكل:الله وياك
طلع من البيت وركب سيارتة كومارو السودا..وشغل اغنية حسين الجسمي -متى متى-
وضل يغني وياها
وصل للمجمع ونزل من السيارة وتوجه لمحل المجوهرات
دخل للمحل وضل يتفرج..لفت نظرة اسوارة ناعمة وجميلة مرصعة بألماس
بهاء يحجي وي صاحب المحل:لو سمحت
الرجل:اهلاً...بشنو اخدمك
بهاء يأشر ع الاسوارة:ممكن توريني هاذي الاسوارة
الرجل:تأمر
الرجل طلع الاسوارة من مكانها وحطها گدام بهاء
بهاء عجبتة بالحيل
بهاء:كم سعرها؟؟
الرجل:150 الف
بهاء:اوك حطها بعلبة وانطينيها
الرجل:ثواني
بهاء:اخذ راحتك
راح الرجل علمود يجهز الاسوارة لبهاء
(طبعاً كالعادة مااعرف بشغل المجوهرات والسعر من راسي ومبلغة قليل مقارنة بسعر الالماس بس انا هيج حطيت اسعار من راسي يعني سلكو وترا بهاء كلش غني يعني ماتهمة سواء رخيصة او غالية الي يعجبة ياخذة)
ورا 5 دقايق اجة الرجل وانطاه العلبة وحطها بكيس ملائم الها ودفع بهاء الفلوس وطلع
ركب سيارتة وراح يسوي كم شغلة وع الظهر رجع للبيت عالمود يجهز نفسة للروحة وحيل متشوق
______________________
نرجع للبنات....
صارت ساعة ب1:30 وهمة حظرو كلشي بس باقي تلبس رنيم ويحطون ميك اب خفيف
دخلت نجود للغرفة:يلا بنات الغدا جاهز
جوري بتردد:بابا اجة؟؟
نجود:لا اليوم عندة شغل هواي ف رح يتأخر
جوري:اهااا
نجود:يلا تعالو انتظركم جوا
البنات:ماشي
طلعت نجود... التفتت جوري ع البنات
جوري:يلا خل نتغدا وبعدها نكمل واوديج هم يالله
رنيم:اوك
نزلو البنات وتغدو وبعدها صعدو وبدلت رنيم وجوري سوت شعرها وبعدها حطت الميك اب
ع الساعة ب3 رنيم صارت جاهزة
كانت لابسة فستان ناعم تركواز بأكمام قصيرة جداً وطبقتين وحدة من القماش وفوگها من الدانتيل ويكون تحت الركبة بشوي ومن فوگ مخصر لحد الخصر وينزل بنفشة بسيطة ولبست وياه عقد ذهبي ناعم ووياه الاسوارة والخاتم ولبست حذاء بيجي كعب ملائم وي الفستان وشعرها خلته مفرود ورفعت غرتها ببروش ناعم وجميل بلون الذهبي والتركواز رسمت عينها بالكحل الاسود وظلال تركواز خفيف وقلوس احمر وبلاشر وردي فاتح وكان سمبل ميك اب ماثخنت ولبخت هههه (اتمنى فهمتو الوصف هههه <<اشك والله تفهمون)
رنيم واگفة گبال المرايا وتشوف نفسها...التفتت ع البنات
رنيم:حلوة؟؟
جوري:تجنننييين
رشا:هسة يتخبل بهاء
جوري:ههههه هاي اذا بقة بي عقل
رنيم خجلت:هههه مولهدرجة
جوري:لا جد والله تخبلين..الله يحميج ويوفقج
رنيم:شكراً حبيبتي
جوري:يلا بس ابدل واوديج
رنيم:اوك
اخذتلها جوري لبس ودخلت للحمام ولبست جينز وتيشيرت عليه ميكي ماوس وطلعت
ماتكشخت زيادة لأنها بس توصل البنات وترجع ...راحت بأتجاه التسريحة وحطت كحل ومرطب شفايف واخذت نظاراتها وسويجها
جوري:يلا امشو
البنات:اوك
نزلو البنات وصادفو نجود بالصالة
نجود شافت رنيم:بسم الله...لا اله الا الله...رنومة طالعة تخبلين
رنيم:تسلمين
نجود:اقري ع نفسج
رنيم:ان شاء الله
جوري:ماماتي انا رايحة اوصل البنات واجي اوك
نجود:ماشي حبيبتي
رنيم:يلا مع السلامة عمتو
نجود:مع السلامة حبيبتي..الله يوفقج
رشا:مع السلامة خالة
نجود:الله وياج حبيبتي
طلعو البنات وركبو بالسيارة ورنيم ركبت يم جوري گدام
شغلت جوري السيارة وتوجهت لبيت رنيم
وصلت للبيت
رنيم:جوري ماتنزلين؟؟
جوري ابتسمت بحزن:لا حبيبتي مااكدر...ان شاء الله بالحفلة اجي واول وحدة واكون يمج
رنيم:اعتبر هذا وعد
جوري:وعد
رنيم:يلا حبيبتي..تعبتج اليوم
جوري:تعبج راحة كم رنومة عندي
رنيم:يلا بيباي
جوري:باي
نزلن البنات ودخلن للبيت وجوري حركت ورجعت لبيتهم
