دحها فادي ع السرير بهدوء وغطاها وطفا الضو وطلع من الغرفة
دور ع فونة بجيوبة مالگاه تذكر انه ماجابة لأن بسرعة طلع من البيت...نزل وطلع من البيت وراح للسيارة...شافها مشتغلة وبابها مفتوح...دخل طفاها وبحوش بيها ع تلفون احتياط...دايما يخلي فونات احتياط...لگة فون...طلعة وفتحة انتظرة ع مايشتغل...نزل من السيارة وقفلها ورجع للبيت...صعد للطابق الثاني ووگف يم باب الغرفة خوفاً ان جوري تگعد وتخترع
فتح السجلات واتصل ع فارس
رد:الو
فادي بهدوء:فارس وين انت؟
فارس بأستغراب:بالشغل...ليش
فادي:اترك كلشي وروح لبيتكم اخذ رنيم وتعالو لبيت جوري
فارس عقد حواجبه:ليش شصاير
فادي:تعال وتعرف كلشي...لاتطول بسرعة تعال
فارس خاف من نبرة صوتة:دقايق واجي
فادي:ماشي..سلام
سد الخط وحط ايديه بجيوبة واتكة ع الحايط وغمض عيونة وتنهد بصوت عالي:ااااه
__________________________
عند رنيم...
جانت نايمة واتصل عليها فارس وگلها تجهز نفسها وهو بالطريق جاي عليها
طبعاً خافت وگلبها مارتاح من صوتة وبسرعة گامت وغسلت وبدلت ملابسها ولبست الها حي الله وگعدت تنتظر فارس...دقايق واجة عليها...نطاها رنة وطلعت من البيت وركبت السيارة
رنيم بخوف:شنو شصاير؟...جوري بيها شي؟
فارس بربكة:مادري...اتصل فادي وگال تعالو بسرعة ماگال شصاير
رنيم:يارب سترك يارب
اقل من خمس دقايق ووصلو للبيت
بسرعة نزلو من السيارة ودخلو...ماشافو احد
صاح فارس:فااادي
فادي طل عليه من فوگ:انا هنا...تعالو
بسرعة صعدو للطابق الثاني وراحو لفادي
فارس بخوف:شنو صاير...وجوري وين
فادي بهدوء:جوري جوا نايمة
رنيم:احجي شصاير وگعت گلوبنة
فادي:تعالو نگعد واگلكم
گعدو ع القنفات الي موجودة بالفسحة الي يم الغرف
فادي گعد وحط ايديده ع رجليه وشبكهم ببعض:سلطان جان هنا
فارس گام من مكانة وبصدمة:شلووون
فادي بسرعة:ششششش اسكت لا تگعد جوري
فارس گعد وبعصبية:شلون تريدني اهدا....احجي شعندة هنا
فادي بهدوء ويهز رجلة بتوتر من ردة فعل فارس:جنت بالبيت جاي ابدل اريد اروح للشغل واتصل علي رقم غريب...رديت طلع صوت بنية تبجي ومرتبكة گلتلي روح لبيت جوري دخل عليها واحد...سئلتها انتي منو ماگالت بس گلتلي الحگ عليها بسرعة...انا رأسن طفرت وجيت لبيتها.. لگيت البيبان مفتوحة...دخلت ماشفت احد بس سمعت صوت صريخ ...صعدت بسرعة للطابق الثاني ورحت لغرفة بابها مفتوح ولگيت جوري ع السرير وفوگها واحد مربطها ويريد يعتدي عليها...انا انصدمت ركزت بالشخص وطلع سلطــــان
فارس يسمع وعيونة تتوسع من الصدمة
رنيم حطت ايديها ع حلگها ومصدومة بالحيل
فادي يكمل:انا اشتعلت النار بگلبي صرخت عليه...هو فز وابتعد عنها وانا لزمتة وجنت ناوي اذبحة وماهمني بس الخسيس شرد الجبان ابن الجبان
فارس بعدة مصدوم:وجوري؟...شسوالها؟
فادي:الحمدلله ماسوالها شي لحگت عليه ع اخر لحظة...بس كلش منهارة تبجي ومهسترة وتريد اهلها...والله مردت گلبي...جذبت عليها وگلتلها اجيبهم الج يلا هدت
رنيم ضلت تبجي عليها:انا رايحة اشوفها
راحتلها للغرفة وبقة فادي وفارس
فارس غضب الدنيا بي وبحدة:ورب العزة سلطان موتة ع ايدي ومحد يفكني منة
فادي بتفكير:فارس....سلطان اكيد هسة شارد ف مووقتها تنشغل بي...خلي بالك هسة يم جوري وانتبه الها هسة هي محتاجة الكم...خلي تعدي فترة ونوهم سلطان ان احنة نسينه السالفة...تالي نلزمة وسوي بي الي تريد محد رح يحجي وياك...ماشي
فارس حط ايديه ع راسة وغمض عيونة:فادي بعد ماگمت أامن ع جوري...بس نتركها ببيتهم فترة لازم تصيرلها مصيبة
فادي:اگلك ليش ماتخطبها هسة وتخليها ع ذمتك...وتجي تعيش ببيتكم وتفتك من هالسالفة
فارس:وهو كذلك...خل هاليومين تعدي ع خير وتنسة السالفة جوري...ونروح للمحكمة نعقد...اخليها تحت نظري حتة اطمئن عليها
فادي:ماشي...وهاي السالفة خليها بينة احنة الاربعة ومهند هم نگلة حتة بعدين يساعدنة ندور ع سلطان
فارس:انت بعد تصرف وشوف شنو الافضل واسويه
فادي:اترك كلشي علي وانتبه لجوري
فارس گام:انا رايح اشوفها...وصل رنيم للبيت بطريقك
فادي دگ گلبة:اوك
دخل فارس لغرفة جوري وشاف رنيم گاعدة ع السرير تبجي وتمسح ع شعر جوري
اشرلها فارس تطلع...گامت من السرير وطلعت من الغرفة ولحگها فارس
فارس بهدوء:انا رح ابقة وي جوري وتالي الليل اجيبها وياي للبيت...انتي روحي للبيت رتبيلها الغرفة...فادي رح يوصلج...ولاتجيبين سيرة لأين كان والي يسئلج گليلهم ماتگدر تگعد لوحدها بالبيت تختنگ من الوحدة
رنيم هزت راسها:اوك..شوف اكو جنطة صغيرة بكنتورها حطلها بيها كم قطعة ملابس وشغلات ضرورية وجيبهم لمن هي تهدا وتجي تاخذ الباقي
فارس:اوك
دخل فارس للغرفة ورنيم راحت لفادي حتة يوصلها للبيت
لگتة گاعد ع القنفة ومصفن
رنيم:نروح؟
فادي رفع نظرة عليها لحظة تالي گام:يلا امشي
نزلو وطلعو من البيت...ركبو السيارة وحرك فادي
بالسيارة...الجو هدوء بس صوت الموسيقى الكلاسيكية الهادئة
فادي بهدوء:شخبارج؟..خطيبج شلونة
رنيم:الحمدلله تمام وبهاء زين الحمدلله...انت شخبارك
فادي ابتسم:ع الله
رنيم بمرح:ماحبيتلك وحدة؟
فادي ضحك:هههه شبه
رنيم فرحت:صددگ...منو؟
فادي:نفسها مرام
رنيم ضحكت:ههههه والله موهينة هالبت...وگعتك
فادي بغرور:ماجابتها امها الي توگعني...بس عاجبتني وهي خوش بنية وتحبني...مادري ليش هية الوحيدة الي ماأگدر أأذيها...طفولية ومرحة ويمها انسة همومي
رنيم:هلا هلا ههههه هذا كلة ويگول ماجابتها امها الي وگعتني....انت واگع ورايح بيها
فادي:هههههه..(التفت عليها وبغموض)...انا ماصحيت من وگعتي الاولة حتة اوگع مرة ثانية
رنيم عقدت حواجبها وابتسمت:مافهمت
فادي رجع نظرة ع الطريق وبأبتسامة:هههههه ماكو شي...ماگلتيلي يمتة الزواج؟
رنيم:مادري والله بعدنا ماحددنا
فادي:الله يوفقكم ان شاء الله...بهاء خوش رجال والنعم منة
رنيم:تسلم ويوفقك يارب
