ببيت جوري ...
نجود كالعادة تحاول بجوري انها تطلع من غرفتها بس ماكو فايدة
ف قررت تتصل ع رنيم تجي تحاول وياها بلكي تقبل تفك عن نفسها شوي
اتصلت وردت عليها رنيم
رنيم:هلا عمة شلونج
نجود:هلا بيج رنومة...والله مو زينه ابد
رنيم بقلق:ليش شبيج شنو صاير...جوري بيها شي؟؟
نجود:تعالي لبيتنا وافهمج كلشي..بس حبيبتي لاتخلين واحد يحس ...سوي نفسج تردين تزوريها
رنيم:ليش؟؟
نجود:انتي تعالي وافهمج... ورشا لاتدري بشي طلعي اي حجة بس كون ماتجي وياج ووو...(بتردد)...فارس هم لايحس انج مرتبكة لو قلقة
رنيم حيل خافت:اوك اوك هسه جاية
نجود:انتظرج حبيبتي
سدت نجود الخط وگعدت تنتظر رنيم
____________
اما عند رنيم
ف بسرعة طفرت بدلت وراحت للصالة
رنيم:ماما انا رايحة لجوري ويجوز ابات يمها اليوم
سعاد:اوك...رشا تروح وياج؟؟
رنيم:لا ماتدري اصلاً...عندي موضوع مهم وي جوري
سعاد:خير..خو ماكو شي ؟؟
رنيم:لالا ماكو شي لاتخافين..يلا بيباي
سعاد:باي
طلعت رنيم من الصالة وتوجهت للباب الخارجي وبطلعتها دخل بدر
بدر بأستغراب:وين رايحة هالوقت ؟؟
رنيم بسرعة:جيت والله جابك..فدوة وديني لبيت جوري
بدر:خير خو ماصاير شي
رنيم:لاياخي ماكو شي شبيكم انتو ...يلا بسرعه وديني
بدر:لحظة خل ادخل اسلم اول
رنيم:لالا وصلني اول وبعدين ع راحتك ادخل وسلم واگعد
بدر:ماشي
طلعو من البيت وتوجهو للسيارة وركبو
بعد 5 دقايق وصلو
بدر:منو يرجعج؟؟
رنيم:مارح ارجع اليوم..ابات يم جوري
بدر:اهااا
رنيم:يلا باي
بدر:باي
طلعت من السيارة وتوجهت للبيت وطرقت الباب
فتحتلها نجود ودخلو وتوجهو للصالة
رنيم:خير عمة...وگف گلبي شنو صاير
نجود بحزن:جوري تقدملها واحد..وهي ماموافقة ماتريد تتزوج هسة...بس خالج غصبها وانطة موافقة للناس... والاسبوع الجاي الخطبة
رنيم فتحت عيونها ع الاخر:شلون شلون...وهو من يمتة يغصبها ع شي ....وخاصة الزواج
نجود:ماادري والله....صاير كلش قاسي عليها.... ويگول كبرت ولازم تتزوج.....والي تقدملها مابي عيب
رنيم:وين كبرت...بعدها صغيرة ترا
نجود:بعد هذا تفكير خالج.....وهم عالمود ماترجع لفارس بعد
رنيم:ياربييي....وجوري شلونها؟؟...وينها هية؟؟
نجود:جوري صارلها يومين حابسة نفسها بغرفتها... وحالتها حالة.....انا اتصلت عليج عالمود تشوفينها وتقنعيها تطلع من الغرفة.....الخطوبة ماباقي عليها شي ....وفهد متحلف يگلب الدنيا اذا ماتجهزت
رنيم بحزن ع حال جوري:ان شاء الله گايمة اشوفها.....ورح ابات يمها اليوم انا انطيت خبر لأهلي
نجود بأمل:اي الله يخليج حاولي بيها وهديها.....بنتي رح تروح من ايدي والسبب خالج
رنيم:لاتخافين ان شاء الله موصاير شي ... يلا انا رايحة الها
_________________________
اما عند جوري....
جانت گاعده ع الكرسي گبال الشباك وسارحة بذكرياتها
رجعت لنفس عادتها القديمة الي كان بأعتقادها انها خلصت منها وخلصت من كئابتها ومشاكلها
طرت ع بالها ذكرى لمن تقدملها فارس وشلون اجتهم ع طبق من ذهب
