مابعد الحب الجزء الثانى﴿ حب أعماه الانتقام﴾

حادثة

فى صباح اليوم التالى..
دلفت ليلى لغرفه شيرين بهدوء بدون ان تصدر صوت حتى لاتوقظ مراد وشيرين ولكن ما افزعها هو جلوس شيرين على الكرسي بشرفه غرفتها تطالع البحر امامها ودموعها تسيل على خدها بصمت،لتشعر ليلى بأن كل ذلك بسبب ماحدث معها بالبارحه وانها قابلت ادم بالفعل ليس كما ادعت بأنها لم تراه،ربتت ليلى على كتف شيرين لتنتفض الاخيرة تطالعها بفزع لتهتف ليلى بمرح:_ايه مالك شوفتى البعبع ولا ابو رجل مسلوخه ياشيري.

شيرين وهى تطالعها بحنق:_مش هتبطلى شغل الحرامية ده داخلة تتسحبى فزعتينى.

ليلى:_اللى واخد عقلك بقى ياجميل وبعدين ماانتى عارفة عادتى كل يوم بدخل وبتسحب عشان مورى مايصحاش.

تنهدت شيرين بألم:_خلاص ياليلى.

ليلى بمزاح:_ خلاص ايه اسكت ولا خلاص حاجه تانية،ثم حدثتها بجدية قائلة:_شيرين انتى لحد امتى هتفضلى كده لحد امتى هتفضلى تخبى وجعك والمك عننا على فكرة انا وماما شاكين انك شوفتى ادم..

تطلعت شيرين لها بقلق:_ليلى اوعى تكون ماما..

ليلى:_هشش اهدى انا غطيت عليكى ماتقلقييش المهم بقى هتقوليلى ولا هتخبى بردوا..

تطلعت لها شيرين لتنفجر بعد لحظات بالبكاء لتفزع ليلى وتجذبها وقتها لاحضانها وهى تمسح على شعرها لتهدأ بعدها شيرين وتقص عليها كل ماحدث منذ ان بدأت الديون تكثر عليها وذلك بسبب ادم وتضيقه عليها حتى انتهت..

لتنفعل ليلى:_نهاره اسمر هو اتجنن ده ولا ايه هى خلاص وصلت لكده يعنى عرف انك جيتى وسابك تأسسي شغلك وحياتك وبعدها يورطك ويداينك وكمان يقايضك بالدين بجد ده بنى ادم ساف..

قاطعتها شيرين:_لاء ياليلى ما تهنيش ادم قودامى ادم معذور غصب عنه كل اللى حصله بسببى وهروبى منه من غير تبرير وكل اللى عرفه بالكدب عنى كده يخلينى...

ليلى بانفعال:_يخليكى ايه ياشيرين هاه ده مش مبرر يااستاذة عشان يعمل كل ده،لتطالعها بعصبية:_شيرين انتى لسه بتحبيه لو كده فعلا تبقى انتى مجنونه.

شيرين بحده:_ايوة ياليلى انا مجنونه ارتاحى انا عمرى ماعرفت اكرهه ادم وهيفضل حب عمرى الاول والاخير،هيفضل جوزى لحد مااموت.

ليلى بدهشة:_لا بجد وجوازه عليكى ده كان ايه هاه لعبة يعنى،واللى عملوا معاكى امبارح ده كان حب،شيرين ادم ده مجنون وخدى فى علمك لو خد خبر بمراد هياخده ومش هيخليكى تشوفيه تانى فوقى بقى من اوهامك دى..

لترد امينه من ورائهم:_ادم معذور ياليلى ادم عامل زى الفرخه المدبوحه وكل اللى عمله ده كان له حق فيه،شيرين غلطت وهو كمان غِلط،وبعدين تعالوا نتكلم برا مش هنا الولد نايم وحضرتك ياست ليلى صوتك عامل الجرس ورايا..

تطلعت شيرين الى ليلى بغضب:_عاجبك كده اهى ماما سمعت وعرفت كل حاجه.

ليلى بهمس:_عادى خليها تسمع على الاقل حد فيكوا ينجدوا من ايدى بدل مااروح لعنده اطبق فى زمارة رقبته واطلع روحه فى ايدى.