مابعد الحب الجزء الثانى﴿ حب أعماه الانتقام﴾

خبايا القدر(١)

فى سيارة ادم..

كان ادم يقود سيارته صامت على غير عادته لتنظر له شيرين بتعجب فهو كان منذ لحظات معها يضحك ويبتسم ولكنه الان صامت يقود بعصبية لم تتذكر انه حدث شئ بالاعلى عند ايمن يجعله غاضب بذلك الشكل بل كان مرح لطيف وتحديدا عندما اتت حامله نهلة الصغيرة بين يديها ليتطلع الى الرضيعه بحب ليحملها بين يديه ويظل يداعبها لتبتسم له،لم تتخيل ان ترى ادم كهذا وكأنه عاد طفلا من جديد معها حتى هى احبتها بشده وظلت تهدهدها وتداعبها حتى غفت بين ذراعيها،رجعت من شرودها على صوت الرسالة الاتيه من هاتفها لتراها لتجد فريده هى من تحدثها تخبرها بها انهم وصلوا للمكان المتفق عليه لتبتسم شيرين بفرح لتعتدل بجلستها...

لتقول بمرح:_ادم ينفع مانروحش على طول انهارده يعنى نسهر سوا.

ادم بجمود:_اللى انتى عوزاه..

شعرت شيرين بوجود خطب ما لتنظر له لتقول بقلق:_ادم حبيبى فيك حاجه انت كويس..

ادم وهو يقف بسيارته سريعا ليزفر بضيق:_لاء مش كويس ياشيرين لانك طول ما احنا فوق وانتى مابطلتيش تتكلمى عن دكتور عبدالله وكأنه ملاك ونازل من السما..

نظرت له شيرين بدهشة ماان تحولت دهشتها تلك لضحك شديد لينظر لها ادم منزعجا يقول:_شيرين انتى بتضحكى عليا ،شيرين بطلى ثم صرخ بها :_بس بقى..

صمتت شيرين وظلت تطلع اليه مبتسمه لتجده يدير وجه بالاتجاه الاخر لتمسك هى بذقنه تديروجهها اليه تقول:_انت بتغير ياادم.

ادم بغضب:_عندك مانع حضرتك على مااظن انك مراتى وده من حقى..

شيرين بهمس:_لاء بس انت تغير لو لاقتنى مهتمية بحد او بحب حد غيرك وده عمره ماهيحصل ابدا عشان ده.. واشارت لقلبها ..عمره ماهيدق لحد غيرك ولا هيفكر غير فيك ..

لانت نظرات ادم لها وبدأت ابتسامته فى الظهور على وجه مجددا:_خلاص يبقى ماتتكلميش عن اى حد خالص غيرى ولا تشكرى فى حد غيرى..

شيرين مبتسمه:_امم اظاهر كده ان فى واحد هنا بغيييير..

ادم وهو يطالعها بعشق:_اه بغير ومااتحملش حد يبصلك بعينه ولا حتى تسلمى على حد غيرى، سميه حب امتلاك ،سميه خنقه ،قولى زى ماتقولى عشان انتى ليا، ليا انا وبس ،وبعدين تعالى هنا حطى نفسك مكانى لو انا اللى قعدت قودامك اشكر فى واحده واتكلم عليها واقول فيها اشعار..

شيرين مقاطعه وهى تنظر له شرزا:_ده انا كنت دبحتك ودبحتها دى مين دى انشاء الله اللى تقول فيها اشعار هاه..

تطلع لها ادم مبتسما وهو يغمز لها بمرح:_غيورة انتى هاه ..

شيرين بتحدى:_ايوة بغير..بغير عليك زيك ويمكن اكتر منك كمان عندك مانع ولا انت ناسي انك جوزى وحبيبى.