مابعد الحب الجزء الثانى﴿ حب أعماه الانتقام﴾

فرح ليلى

«بعد مرور شهر»
كانت ليلى تقف امام المرآه تتطلع لنفسها بشرود لتجد بعدها شيرين تداعب وجنتها مبتسمه لها لتتطلع ليلى لها باسمه لتمسك شيرين بيدها:-ليلى واخيرا.. مبروك ياجميلة مبروك يااحلى عروسة فى الدنيا..

تطلعت لها ليلى مبتسمه بدموع:-اخيرا يا شيرين أخيرا..

شيرين ضاحكه:-لاء لاء احنا مش عاوزين دموع انهارده خالص مفهوم ..

ليلى وهى تجفف دموعها بيها ضاحكه:-مفهوم ..

ليستمعوا بعدها لطرقات على الباب ويدخل بعدها عبدالله ومعه امينه التى تطلعت لها مبتسمه والدموع تتجمع بعينيها لتتقدم منها تحدثهابفرح وهى تربت على وجهها بحب دامعه:- بسم الله ماشاء الله زي القمر ياحبيبتى زى القمر..ثم تطلعت لها بفرح:-خلاص ياليلى هتتجوزى انهارده، كبرتى بسرعه ياليلى، لسه فاكرة امبارح يوم مااتولدتى وحملتك على ايدى كنتى حته لحمه حمرا صغيرة أوى أول ما شيلتك فتحتى عنيكى الحلوين دول ليا وضحكتى، وأول كلمه طلعت منك كانت ماما وقتها طيرت من الفرح، كنتى لسه امبارح بضفاير وبتلعبى حواليا،كنتى لما يزعلك الواد ده او يغيظك كنتى بتشتكيلى منه، لسه فاكرة أول يوم ليكى فى المدرسة وكنتى بتعيطتى ومش عاوزة تسبينى كنتى بتترعشي وخايفه انى ماجيش ليكى تانى، اى حاجه كانت تخوفك او تزعلك كنتى بتيجى تترمي فى حضنى وتقوليلى احمينى ياماما خبينى فى حضنك بس دلوقتى بقى خلاص..

احتضنتها ليلى سريعا ثم امسكت بيد امينه لترفعها امام شفتيها تقبلها سريعا:-أنا عمرى ماهقدر انساكى ولا ابعد عنك أنا زى ماانا وبعدين أنا ماليش غيرك الجا ليه انتى امى وخالتى وصاحبتى وكل حاجه فى حياتى أنا مااقدرش استغنى عنك انتى هتفضلى ليا أمانى وضهرى وحمايتى لاخر عمرى ..

حدثها عبد الله بمرح:-كل حاجة ايه يالولا أومال الجدع اللى برا ده أعمل فيه ايه اديلوا استمارة سته يعنى ..

شيرين ضاحكه:-كده ياليلى يعنى لما تبقى ماما كل حاجة انا ابقى ايه بقى ..

تطلعت ليلى لها مبتسمه:-انتى..انتى اجدع واحسن واحن اخت جت ليا فى الدنيا،انتى ليا حاجات كتير أوى كان صعب الاقيها من غيرك ومعاكى،أنا ساعات بقول لنفسي انى محظوظه انك فى حياتى محظوظه عشان ربنا رزقنى باحلى اخت، انتوا عيلتى واغلى ماعندى وانتى بالاخص ربنا بعتك ليا عشان..

قاطعها عبدالله مازحا:- عشان تبقوا احسن تشكيل عصابى فى الدنيا،تبقوا ريا وسكينه نمرة 2 الثنائي القاهر للرجال صح..

تطلعت ليلى له باسمه:-تعرف على الرغم من أنك ياما قرفتنى فى عيشتى وطلعت عينى بس بردوا مااقدرش استغنى عنك انت اخويا وابويا وصاحبى انت وطارق كنت عوضي عن حاجات كتير انتوا كلكوا أغلى من حياتى ولو جم فى لحظه وخيرونى بينكم وبين عمرى هختاركم انتم عشان انتوا أغلى من عمرى..