مابعد الحب الجزء الثانى﴿ حب أعماه الانتقام﴾

صفعات القدر(٢)

بذلك الوقت كانت شيرين جالسة بعد ان هدأت قليلا كانت تتذكر كل شئ مر بحياتها معه سعادتها وحبه لها حتى اخرجها من شرودها ذاك صوت هاتفها يرن لتجد ادم هو من يتصل بها ظلت تنظر للهاتف بيدها والدموع تتجدد من جديد فى عينيها لتقرر بعدها ان ترد لتسمع لصوته الملهوف عليها:_شيرين حبيبتى انتى كويسة.

شيرين وهى تجاهد ان تبدو بصوت طبيعى:_انا كويسة ياادم متقلقش.

ادم:_عملتى ايه عند الدكتور قالك ايه.

شيرين:_مافيش اللى حصلى ده كان هبوط وضغط واطى هو اللى اتسبب فى الاغماءة دى ماتخافش مافيش حاجه تقلق.

ادم وهو يزفر بارتياح:_الحمد لله انااطمنت المهم انتى فين ياحبيبتى عند طنط امينه.

شيرين:_لاء انا مارضيتش اروح هناك وطلبت من ليلى ان احنا نتمشي شوية يعنى اشم هوا وليلى معايا.

ادم:_طب ابعتلك العربية على..

شيرين:_لاء انا هروح مع ليلى هى اتصلت بطارق اخوها وهو ماشي ورانا بالعربية وهما هيوصلونى ماتتعبش نفسك انت انا هروح معاهم.

ادم:_طب ياحبيبتى انا لازم اقفل دلوقتى اوكيه ماتتأخريش سلام.

شيرين:_مع السلامه،وعندما كادت ان تغلق استمعت لصوته وهو يقول:_مريهان اصحى فتحى عنيكى ياحبيبتى احنا وصلنا يلا.

شعرت شيرين وقتها وكان احدهم  قد طعنها بنصل حاد فى قلبها بعدما استمعت لحديثه ذاك لم تستطع ان تتماسك اكثر وقع الهاتف من يدهاوكأن معدتها تثور ايضا لتجد نفسها فجاة تفرغ كل مافى جوفها وهى تشهق من البكاء لتسرع ليلى اليها بلهفه عندما وجدتها على تلك الحالة وطارق معها ..

ليلى وهى تمسد على شعرها:_هشش شيرين اهدى عشان خاطرى،ثم وجهت حديثها لطارق تقول:_ايه رايك نرجع لعبدالله تانى انا خايفه عليها.

شيرين بصوت متعب:_لاء انا لازم اروح على البيت عشان الورق وبعدين انا خلاص كويسة ،ثم بدا صوتها يختنق بالبكاء:_ ماتقلقيش اكيد اللى حصلى ده بسبب الحمل مش اكتر.

طارق:_طيب يبقى لازم بقى تاكلى حاجه على الاقل عشان البيبى،ثم اكمل بمرح:_عشان يطلع زى خاله راجل وعوده قوى.

ابتسمت شيرين لهم بضعف من بين دموعها،بينماهتفت ليلى لهم بمرح:_ياسلام وليه ماتطلعش او يطلع لخالته هاه.

طارق بمزاح:_لا كفاية علينا ليلى واحده بس خبطتين فى الراس توجع ولا ايه ياشيري.

ابتسمت لهم شيرين بامتنان:_انا مش عارفه لولا وجودكم معايا وفى حياتى كنت هقدر اتحمل ده كله ازاى،بجد انتوا احسن اخوات ربنا جمعنى بيهم.

ليلى وهى ترفع يدها تمسح بها دموع شيرين:_ربنا يخلينا لبعض ويخلى ماما لينا ويخلينا حبيب خالتو ده ويشرف بالسلامه يارب.