بنيه صعب ينطفي ضيها.

Part 87

الروح المتعاطفة هي روح خاضت الألم الهائل..🥀

((أعتذر على الأخطاء الاملائية ))
︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
جلست نور قدام جود اللي كانت تهز رجلها بتوتر
:السلام عليكم
انتبهت لها جود:وعليكم السلام هلا
نور :عسى ماشر وش فيك متوتره!؟
جود بلعة ريقها بحرج:شسمه ااا انا انخطبت
نور بصدمه وفرحه:اماااانه!!
جود هزت رأسها: اي والله جد وبعد بكره النظره الشرعيه
نور :يمه كل شي سريع سريع!!
جود:متردده
نور:ومين هو؟
جود صارت تلعب بأصبعها:هو يعتبر يعني صاحب طارق
نور عقدت حواجبها بأستغراب: طارق!؟
جود هزت رأسها: اي طارق اخوي نسيتيه!!
نور ضربت جبهته: اي اي تذكرته
جود :مدري كيف بس الخاطب من جهته يعني وكذا
نور بحماس صارت تسوي حركات بيدها تضحك:يالبيه يعني قريب العرس
جود بحرج:انطمي قلنا لك بعد بكره النظره يمكن يكون في نصيب ويمكن لا
نور:دس دس تنكس يجي دوس دوس
جود هزت رأسها بيأس من صديقتها :حاشى لله مب صاحيه
نور سكتت فجأة وبجديه :جود
جود :هلا
خرجت نور جوالها وشغلت مقطع الفيديو اللي صورته لسديم
ناظرته جود: وراها بلاء صدقيني
نور:عارفه والله من يومها ما ارتحت لها
جود:طيب قولي لجدك عنها
نور هزت رأسها بالنفي: لا لاا راح امسكها بالجرم المشهود على قولتهم
جود عقدت حواجبها:كيف!؟
نور:شوفي انا اللي علي.....الخ
جود صفقت بحماس:والله انك كفو كفويه
نور بكره:بس المشكله بخالد
جود:وش فيه ذا بعد!؟
نور بسخريه:سديم مساعدته
جود:واذا يعني الغلط غلط بس تدرين انتي سوي نفسك غبيه ماتدري عن شي
نور ابتسمت بتلاعب:هذا الي بيصير ولايهمك
جود:الزبده اسمممعي تجيني بددددددري بدري بدري سااامعه تتجهزي من عندي بليز نوور بليز
نور بحماس:يوووووه بدون ماتقولين حتى انا بنام معك من اليوم الي قبلها
جود بتصديق:امااانه
نور:امزح والله بس بيجيك من الظهر
▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
دخلت روز لغرفة الضيوف كانت وديان متمددة على الكنبه وغاطه بنوم عميق سحبت الغطاء اللي عليها ومدت يدها عشان تصحيها بس عقدت حواجبها وهي تسمع لهمسها الخافت:يمه يمه لا لاا هنا لاا
روز هزت وديان :وديااني وديان قوومي
وديان فتحت عيونها بشويش:روز!
روز ابتسمت: صباح الخير ياقميل قومي هيا
وديان جلست بتعب بينما جلست روز بجانبها أسندت وديان رأسها على كتف روز وبهمس:امي ياروز كانت تبي تقول لي شي كانت ببيت جدي القديم واللي من سنين محد دخله
روز بحنيه:حلم ياوديان حلم
وديان هزت رأسها بالنفي: لا مو مجرد حلم احس في شي كان بيوصلني وكأنه شي بداخلي يطلب مني اروح لبيت جدي القديم واللي عشنا فسه فتره من فترات حياتنا
روز:انا معك وين ماتروحسن ساامعه!
وديان ناظرتها: بس..
قاطعتها روز:رجلي على رجلك سامعه!
وديان:طيب
روز: والحين قومي وغيري ملابسك بجيب لك
وديان:تمام انا بدخل للحمام بينما تجين
روز:لوتطلعي لغرفتي مو احسن؟
وديان:والله مافيني حيل اطلع لفوق
روز:تمام انا بجيب لك
خرجت روز بينما دخلت وديان للحمام (تكرمون)
رن جوال روز وهي صاعده لدرج وبطريقها فيصل اللي نازل
:هلا والله
نور:هلا بك زود كيفك اخبارك!
روز أشرت لفيصل بيدها وكملت طريقها: الحمدلله انتي كيفك بالله؟
نور:والله طيبه الحمدلله اسمعي
روز:هلا
نور بحماس بعدين بكره فيه خطبه
روز بحماس:امااانه يولد متى انخطبتي ساخااينه وماتقولين لنا!!!
نور فتحت باب المكتب ودخلت بس تفأجأت بخالد جالس كانت تضنه مو موجود انتبهت لصوت روز:هي هي وين رحتي لايكون مستحيه
نور ماسكه الضحكة: يافاهمني
روز بحماس:اماااانه متى انخطبتي
نور حطت يدها على فمها بقوة تمنع صوت ضحكتها :قبل اسبوع
روز بحماس دخلت لغرفتها وهي تنطط :منجدك
نور تتصنع الحرج:النظره بعد بكره
روز :ياااولد
نور ابعدت الجوال عن اذنها وهي تضحك بصوت خفيف رجعته:المهم اللي حابه اقولك حياك الله على الخطبه
روز بسرعه:الله يبقيك ويسلمك منك المال ومنه العيال
نور فطست ضحك: هههههههههههههههههههههه ههههههههههههههههههههههههههههههههه فاهمه غلط حبيبتي منه المال مو مني هههههههههههههههههههههه
روز :ههههههههههههههههههههههههههههههههههههههههههههه اللي هو اهم شي فهمتي علي!
نور:اي اي فهمت بس ترا للحين ماقررت بعد النظره نشوف
روز :الله يسهل مافيه الخير يارب
نور:امين يلا مع السلامه وراي شغل
روز:بحفظ الله
قفلت نور وهي ماسكه نفسها لاتفطس ضحك على حماس روز ماهانت عليها فتحت الواتس وارسلت لها(خطبة جود مو خطبتي ههههههههههههههههههههههههههههههههههههههههههههه ههههههههههههههههههههههههههههههههه )
روز(😡🔪)
نور ماكانت حاسه بنظرات خالد اللي تشتعل غضب وعصبيه
وهو مو مصدق اللي سمعه!((نور انخطبت؟طيب ليش انا اخر واحد يدري!؟ليش جدي ما قال لي ليش؟))
قاطعه تفكيره دق على الباب ودخلت سديم بنعومه:استاذ خالد الاستاذ عبدالله يبيك بمكتبه
خالد:طيب
نور ناظرتها ببرود((ياشين التصنع))
︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
فتح باب البيت ودخل كانت بوجهه الحيه او بالاصح زوجة ابوه تقفلت الابواب بوجهه وكانه شاف الشيطان الرجيم حس نفسه بينصرع من ريحة العطر القويه والثقيله والصوت المايع اللي تكلم بجانبه :صقر!
صقر لف وناظرها ببرود: انتي!؟
لين بنعومه: اضن عندي اسم بس ماعلينا كيفك؟
صقر ناظرها من فوق لتحت وبسخريه ابتسم على جنب وطنشها ومشى بس وقف من جديد على صوت مرت ابوه:البنت سألتك عن حالك ليش ماترد!
صقر ببرود:انتي آخر شخص ابرر له
لين بطيبه متصنعه:ماعليه خالتو ممكن مرهق من الشغل
صقر كمل طريقه لغرفته ولا عليه منهم
كانو يناظرونه بعيونهم حتى اختفى عن انظارهم
قربت صباح لبنت اختها :شفتي كيف؟
لين شمقت بعيونها: من زمان صقر كذا
صباح بشر:لا لا قبل كان يموت لامن جبت طاريك صدقيني صقر يحبك ويموت فيك
لين :منجدك!
صباح:اي من جدي اسمعيني زين وافهمي الثروة ذي كلها لازم تكون لنا انا ضمنت الشايب وسعود فكه منه مات بس العله بصقر هو عليك ساامعتني
لين:ماعندي مشكله بس صقر من يوم اعرفه وهو كذا بارد وش اسوي له !؟
صباح:ماعليك انا علي اجمعكم بمكان واحد كل ماسمحت لي الفرص وانتي تغنجي وتدلعي بتكسبيه
لين:خالتي شفتي كيف ناظرني قبل شوي!
صباح بقهر من بنت اختها:اقولك اسمعني زين وافهمي علي مو من اول مره بيوضح لك سامعه
لين ابتسمت:ابشري والله
صباح:اسمعيني تعالي لي واجلسي عندي اسبوع بحجة ان الخدم بأجزتهم واهلك مسافرين طيب
لين توسعت ابتسامتها: منجدك!
صباح:اي وكثري مواقف مع صقر وكأنها صدف
لين:ماعليك لعبتي
صباح:اي شاطره اذا ضمن صقر كل ذا اللي تشوفيه بيكون لنا
لين بطمع:صقر بيكون لي
انصدمت لين بصقر اللي كان نازل بسرعه من الدرج وصباح مو أقل منها صدمه لكن صقر ماناظر لهم حتى
︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
كانت جالسه مع امها على القهوه تسولف معها كالعاده قطع عليهم سوالفهم رنين جوال امها كانت ام طلال
ابتسمت ام الجازي وردت: يا هلا والله
ام طلال :هلا فيك يا الغاليه اخبارك عساك طيبه وكيف الجازي اخبارها عساها بخير
ام الجازي: الحمد لله يا حبيبتي كلنا طيبين ما نسال الا عنكم اخباركم انتم عساكم بخير
ام طلال بحب: بخير يامال الخير لكن انا اتصلت عليك ابيك بموضوع
ام الجازي :عسى خير
ام طلال: الا خير و كل خير طلال مستعجل يقول يبى الملكه قريب كلمي الجازي وشوفي ايش بترد عليك واذا انكم موافقين نجيكم ان شاء الله الاسبوع الجاي
ام الجازي: مرحبا بكم وحياكم الله باي وقت لكن لو تكون الملكه اذا جيت للمراجعه ما يكون احسن منها ما تتعبوا وتتعنو لنا
ام طلال :الله يبقيك ويسلمك والله باكلم طلال واشوف له وصادقه والله يا خيتي احسن لو تكون هنا
ام الجازي: اي والله اي والله هنا ناس مابيتركونهم بحالهم
لو عرف المقرود سند ان طلال خطبها بيحرق فينا
حسبي الله عليه ربي قادر وربي عالم بكل شيء
ام طلال: ما عليه لاتقول لهم ولاتخبروهم
ام الجازي: مير من بيكون ولي امرها والبلاء ذاك عمها؟
ام طلال :اي والله هذا اللي مافكرنا فيه
ام الجازي :الله يفرجها من عنده
ام طلال:شويات وادق عليتس
ام الجازي:بحفظ الرحمن
قفلت ام الجازي وناظرت بنتها
الجازي:ها يمه وش تقول!
ام الجازي:الملكه الأسبوع الجاي
هزت الجازي رأسها((حلو حلو)):طيب وش اللي الله يفرجها؟
ام الجازي:مين بيكون ولي امرك؟وعمك وسند اخاف يعرفون ولا شي
الجازي ابتسمت ببرود: ماعليه يمه جابر هنا واذا على عمي وسند الملكه بتكون بالمحكمه مناك بدون حوسه ولويه
ام الجازي:بس يابنيتي
الجازي بجديه: يايمه فديتك انتي عارفه الناس اللي هنا صح؟
ام الجازي: اي
الجازي:خلاص أجل مايحتاج اشرح لك بس اللي بسويه اني بضرب بكلامها عرض الحائط واللي برأسي بسويه وبثبت لهم ان كلمتهم عمرها ماتمشي علي يضنوني ضعيفه وعاجزه بس راح اوريهم العجز على أصوله وخصوصاً سند ذاك المتسلط
ام الجازي:يعني انتي موافقتن على طلال بسببهم
الجازي:يمه طلال ونعم والف بنت تتمناه ليش ارد زوج زيه!
ام الجازي رفعت يدينها وهي تدعي:أسأل الله العظيم ان يوفقك ويسعدك ويحفظك من اولاد الحرام وبنات الحرام
الجازي: امين يارب ويحفظك ربي فديتك
︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
مرت الساعات ساعد بعد ساعه وتحديد ٧:٠٠ م
جلست تالا على سريرها بعد ماكانت تناظر لأهلها اللي خرجو يتعشون برا بس هي مصدعه ومالها حلق تخرج اهتز جوالها معلن وصول مسج فز قلبها وهي تشوف اسم صقر المرسل فتحتها بس حست بأحراج وهي تشوف مضمونها(( قولي لأمك يابنت
جاية الليلة اطلب ايدك
ولا بعمري عاقل كنت
وحياة الاله بريدك..
..
جاي الليله اطلب يدك💍
وقت قصير واوصل لكم جهزي القهوه ياتالاتي))
تالا حضنت المخده وهي تدفن وجهها فيها((لا لاا لاا ياااربي كيف اشرح له وافقت مجبوره والله والله مجبوره حسبي الله عليك ياعادل ...دقيقه هو من جده بيجي اليوم؟لا لا اهلي مو هنا طيب كيف اقوله لا والله فشله ما راح ارد عليه بأي شي Silence is golden
>>السكوت من ذهب>>))
بنفس الوقت والمكان وحتى البيت
صوت تفحيط كفرات سياره وقفت بسرعه عند البوابه الكبيره نزل منها وهو معصب وشياطين الأنس والجن تناطط قدامه دخل من البوابه وبخطوات غاضبه فتح باب البيت اللي انفتح معه بسرعه بسبب انه مو مقفل صح ناظر البيت كان هدوء ناظر لدرج اللي كان امام الباب بدأت خطواته تتسارع له رقى الدرج بسرعه بس وقف وهو يناظر بحيره بالغرفه بس ما اهتم بدأ يفتح الغرفه وحده وحده بس كانت فاضيه واخيرا وقف عند باب غرفه سمع من داخلها صوت والواضح صوت مقطع شغال من جوال فتح الباب بشويش ودخل
بخطوات بطيئه وخافته
︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
توقعاتكم ورأيكم؟
.
.
أدري تأخر المفروض البارت الجمعه 🤚
بس حرفيا اليومين اللي طافت ماجلست بالبيت ابد
عالعموم بكره برضو بينزل البارت وبحاول يكون طويل >>>ما انعطى وجهه انا
بس ماعليه ابشرو ادلعكم ذا اليومين بما انه نوعا ما بكون فاضيه

واحبكم❤😭