حب بطعم مر "بالدارجة المغربية"

البــــــارت 01

البــــــارت 01:

"بعد كل نهاية سعيدة الا وكتكون بداية اخرى حزينة هادي حال الدنيا مرة تهزك لسما السابعة مرة تخبطك لتحت الارض الحاصول حتى واحد ملقاها كيف بغاها "

ڤيلا عائلة العلاوي المتواجدة بالولايات المتحدة الامريكية بالضبط فالعاصمة واشنطن ..

فغرفة باللون الاحمر والاسود لي المزيج ديال هاد الالوان جامع الجرأة، القوة والفخامة ولما لا حتى الحب .. كتواجد بنت ناعسة على كرشها بأنسومبل فالزهري شورط وميني ديالو فورمتها لي كتبان عادية معندهاش مخاصهاش زائد انها معتانية بمظهرها و على الرياضة قليلا بعض الشيء ، كيفها كيف گاع البنات على حساب الگانة وصاف.. ملامحها جميلة بحكم انها دايرة روتوش خفيف من التجميل على سبيل المثال رفع الحاجب وفيلر للشفايف ..

داخل بشعرو مشعكك باينة فيه عاد مدوش هاز فإيدو گاطو عيد ميلاد قصدها وإبتسامة مزينة شفايفو...

27 عام هدا هو عمرها ، ملامحها كتجمع ما بين الحدة والتقة الزائدة و القليل من البراءة الى بتاسمات ولا ضحكات عمرها باين عليها خصوصا وانها مرأة كاملة مكمولة حتى ملاميحها مبينيها على انها فأواخر العشرينات ...

گلس فوق الفراش وهو كيبعد خصلات شعرها لي مخبين ملاميحها خشا وجهو وسط عنقها كيستنشق عطرها

مراد : نجلا فيقي براكة عليك من النعاس

نجلاء : واش انا كلا عام خاصني نعاود معاك نفس الهضرة ولا شنو؟

مراد : حزني شهر شهرين ولكن ماشي عمرك كامل فهمي هي ماتت.. ومستحيل ترجع الحياة كتستمر

"هزات وجهها من الفراش وعينيها فيهم نظرة حادة "

نجلاء : اخر مرة نسمعك كتگول هاد الهضرة الى بابا بنفسو باقي متقبل موتها كيفاش بغيتيني انا نتقبلو دوي كيفاش ؟؟!

مراد : واش مكتشوفيش بلي راك ضالمة راسك وضالماني معاك

نجلاء : ملي انا ضالماك طلقني طلقنني طلقننني لاش باقي معايا حد ممبزز عليك

مراد : اكيد كتضحكي

نجلاء : لا

"شد وجهها بين ايديه كيحقق فملامحها بتاسم وهو كيحقق فوجهها واضح من عينيها انو اخر جملة گالتها مراضياش عليها "

مراد : نتي ليا ابنت الناس مكاينش لي يفرقني عليك ولا يفرقك عليا من غير الموت.. اومبليس علاش حابسة دميعاتك بكي انا ماشي شي واحد غريب لي غادي تلبسي قدامو قناع القوة.. انا راجلك وغادي نبقا راجلك وعمر طلاق تحلمي بيه

" بتاسمات وسط كلامو كانت محتاجة تسمع بحال هاد الهضرة غمضات عينيها مخليا دموعها يشقو طريقهم هابطين بحال حبات اللؤلؤ على خدودها فصمت تام، بشوية بشوية بدات كتشهق وتمتم... "

نجلاء : راه ماما هديك واش باغيني نتقبل موتها وهو كان يوم عيد ميلادي؟؟! واش باغيني نساها بحالا مكانتش؟؟! ومن الفوق نحتافل بيه بحالا موقع فيه والو على اساس لي ماتت كانت عدوتي

مراد : انا مكنقول ليك نسايها كنقول ولفي غيابها كانت وغادي تبقا عايشة هنا فوسط قلبك فكري فيها كيف اتحس ملي تعرف بنتها بهاد الحالة تلت سنين دابا ...

"نترات ايديه من وجهها نطقات "

نجلاء : منقدرش نعيش طبيعية وماما ممعاياش موتها مقادراش نتقبلو ونكمل حياتي عادي.. الصدمة باقا لدابا فيا.. قلبي كيتقطع امراد ياك الوقت كيداوي الجروح علاش جروحي انا باقين كينزفو؟!

مراد:شوش متگولي هاكدا الموت علينا حق دعي ليها بالرحمة راك غير كتزيدي تعدبيها معاك

كيضرو قلبو يشوفها هكدا عايشة بلا حياة العائلة كاملة كانت شاهدة على انو نجلاء هي اكتر وحدة متعلقة بماماها بحكم انها البنت الوحيدة.. قبل متولد وقع لنهى حالات اجهاد كتيرة لهاد السبب كانت مقربة منها بنتها بزاف .. هي نور عينيها وحتى نجلا كانت متفهمة خوف ماماها عليها ومتعلقة بيها بنفس الدرجة او اكتر ... خبر موتها كان صاعقة بالنسبة للكل نهار عيد ميلادك يجيك خبر بحال هكدا اكيد صعيبة وحدة بحالها اتحماق

3سنين كانت كافية تبدل بزاف ديال الامور فالعائلة مراد داير فوق خاطر خاطرو مع نجلاء.. وحتى الام ديالو لي كتعتابرها وحدة من ولادها ماهي ملي تزادت كبرات قدامها حب نجلا عندها بحال حبها لمراد وليلى ...

اب نجلاء كيحاول يصبر راسو ويتبت نفسو ويرضى بقضاء الله وقدرو حبو لنهى كان كبير عاشو بزاف ديال المشاكل والعراقل عاد كتاب ليهم يتجمعو فالحلال وحتى بعد الزواج مرتاحو حتى كتب ليهم الله يجيبو تمرة حبهم.. نهى مكانش عندها امل تولد لأنو البيبي لي حملات بيه كيطيح ليها ونهار ربي رزقهم بنجلاء داروها فعينيهم وحرسو باش مينقصها والو.. موتها كان الضربة لي غادي طييحها متعاود تنوض من بعدها.. جا فظروف غامضة حتى واحد معرف علاش خرجات من العرس وفين كانت غادية.. حتى وقع ليها حادت لي ادى بالوفاة الفوري ...

عماد رجل اعمال يملك واحدة من اشهر الماركات العالمية للتجميل تحت اسم K-G
( Gold kiss) ولي هي اختصار اول حرف من اسم كمال وجواد جوج اشخاص بعاد كل البعد من ناحية الدم جمعاتهم الدنيا عاشو نفس المعاناة علاقتهم وطيدة وهادشي قبل حتى ما يتزاد كل من عماد لي هو اب نجلاء و احمد اب مراد خصوصا ان الاباء ديالهم كانو من الطبقة الفقيرة تزادو فميتم معندهم حتى هوية.. معارفين اصلهم من فصلهم تشاركو فكولشي وقراو واخا الظروف لي كانو فيها صعيب عليهم يقراو.. ولكن عزيمتهم وارادة ديال تغيير قدرهم بإيديهم خلاتهم يخدمو يدمرو ويصنعو اسم لي هو #العلاوي.. هما ماشي خوت بالدم ولكن الحياة رجعاتهم خوت وكتر من هدوك لي كيتولدو من كرش وحدة.. شوية بشوية كبرو اعمالهم حتى لتاحقو بيهم الولاد وزادو طلعو بأسمائهم باش يوصلو ماركة ديالهم للعالمية وتولي متوفرة فأكتر من 120 دولة .. هادشي كامل اكيد مجاش فظرف عشر سنوات ولا اربعين سنة.