حب بطعم مر "بالدارجة المغربية"

البــــــارت 22

البــــــارت 22:

مراد بصفة عامة مكيحمل لي يقول ليه هالي خاصك دير ولي خاصك، هو ما صغير ما ناقص عقل.. اك كيتحتارم الكبار ومكيقلل اداب ولكن فحياتو العاطفية ولا العملية مكيستحمل حتى نقاش.. ماشي هو لي يگلس فطبلة ويدوروه كلا يلغي لغاه بوحدو ويقررو بلاصتو هو ولدو مغادي يسمح فيه لا هو لمو.. ولكن باش يجي واحد يگول ليه نجلا نساها ماشي ديالك مغادي يتحمل.. هو بنفسو معارفتش اشمن حب هذا لي يخليك تبغي متبعدش وفنفس الوقت تخون.. واش يمكن الاهمال اولا البرود او او او.. هو شخصية متسرعة لا تفكر بالعواقب وهادشي اكيد خاصو يتبدل.. فاش كيفكر بينو وبين راسو مكيشوفش ان الغلط منو يمكن الرؤيا مواضحاش ويمكن هو كيشوف من زاوية مكتباتش لعائلة.. معارفش ان الانثى لا بغا يقتلها يكفي انه يخونها.. واخخ منها يا كملة مكونة من ربعة الحروف قادرة دمر عائلات وتشرد اطفال ولما لا تقتل أرواح .. البنت لي نفسها حارة ودايرة لراسها لقيمة مستحيل تقبل بيها كيف ما كان العذر.. واكيد نجلا ماشي وحدة منهم لأنها ضعيفة مقادراش تسيطر على راسها ولا لمشاعرها..

يكذب عليك الكذاب انو لي طلقات اتموت بالجوع ولا اتشرد ولا اتضرب بالحجر كيف ُحلل الزواج تحلل الطلاق.. ولكن اختي نصيحة نهار تحصلي على راجلك الخيانة ونتي مباغيا طلاق يكفي انك تسكتي متقولي والو والا مغادي يبقا بيناتكم احترام وبحال والو غدا ولا بعدو يولي يدخل عليك الصاحبة لقاع الدار ..

حلات عويناتها ملقاتو حداها.. ناضت من الفراش لحمام قدات حاجتها وخرجات مشات لبيتها غسلات وجهها وسنانها خدات ليبة مع بوط قصير وساية قصيرة تريكو فوقو كبوط فالغوز بب على حساب البرد هزات تيليفون عاطيه ليها لا حتاجات شي حاجة ولا لا بغات تدوي معاه مهم احتياط لأي حاجة هبطات فطرات من الفطور لي مخلي ليها وخرجات من الدار كتسوني ليه ماشي بزاف جاوبها

قيس: اميرتي صباح الخير

دينا: صباح النور

قيس: محتاجة شي حاجة؟

دينا: لا صونيت باش نقول ليك انمشي لعند ريم

قيس: عارفا الطريق؟

دينا: اه ديك المرة كتبات ليا العنوان فورقة انعطيها لمول الطاكسي

قيس: عارفا اش تقولي ليه؟

دينا: وصاف ابابا راني كنعرف لتركية شوية

قيس: والفلوس عندك؟

دينا: "بملل" عندي

قيس: ردي البال لراسك وداك البرهوش ديال امين مضحكي معاه لا يضربك

دينا: هاي هاي كابتن " قطعات عليه"

وقفات طاكسي لي فالاول مكان غادي يوقف عند بالو موضرة على عائلتها كيشوف برهوشة يكون فعمرها خمسة، ستة سنين هكداك.. حتى كيتفاجئ بالعنوان لي عطاتو هو ولفلوس عاد فهم وديمارا لوجهتها.. مسافة طريق وصلات نزلات قدام ڤيلا متوسطة مكبيرة ما صغيرة.. مشات داخلة من الجردة فتحات باب ديال الكوزينة طالعة لفوق دازت لبيت تنسيم و يوسف بشوية حتى تلاحت عليهم فوق الناموسية كتنقز..

تنسيم : دينااااااا

دينا: فيقو نمشيو لبارك

يوسف : واش انا ولدتك ونسيتك

حلات عينيها بشوية راسها باقي مهرس لبارح منعسات حتى طلع الصباح ودابا مصبحة عليهم هاد البرهوشة.. لوات عليها ليزار ساترة بيه لحمها لي عريان غادية لدوش.. اما يوسف جر عندو دينا من رجليها لاحها على الفراش كيخنزر فيها

يوسف : هاد باك مقالش ليك بقاي دقي فديور الناس شوفي واش يفتحو ليك عاد دخلي ولا لا؟

دينا: لاءءءح

تنسيم : يوسف بعد ليا من بنتي

دينا: سمعتي ماما اش قالت ايوا رووول

يوسف : رووول!

دينا: " كتبعد منو شوية بشوية زعما هاربة" هي قلب ستة تسعود هههه " هربات مخرجة ليه لسانها"

يوسف : اجي البرهوشة لهنا اجي

دينا: ههه هههه لااا

خدات دوش لبسات حوايجها مشات لبيت أمين لقاتو فايق وكيف ديما فين ما تكون دينا عندهم فالدار كتمشي تصدعو ومع هو معزيش عليه الصداع .. وهي العكس ضروري ما يضاربو وفين ما تجي تنسيم كتلقاه يا شاد ليها شعرها ولا رابط ليها ايديها وفمها ومرات حتى رجليها 😂 وتقول واش تحشم وتفوتو خاصها تعصبو وربي كبير شيطانة من صغرها تگول لبلا طير ولا انا نطير 😂 جراتهم لطابلة الفطور ..

تنسيم : امين اشنو كنقول ليك انا

امين : هاد البرهوشة قولي ليها متبقا تجي عندي لبيت كلا مرة راه اندير فيها شي عاهة

دينا: ريم اشنو هي عاهة؟

تنسيم : إعاقة

دينا: واشنو هي اعاقة!

امين : كولي وسكتي هادشي كبير عليك البرهوشة

يوسف : امين Sos " سكت"

قلب عينيه مخنزر كيكره شي وحدة سميتها ديناا مكيكرهش گاع داكشي لي معلمو فلاصال يديرو ليها.. وميبردش طفل منغلق على راسو ذكي بزاف كيلقى راحتو فالوحدة.. والهدوء هو البيست فريند ديالو .. كي كتجي لدار كدير ليه الزلزال فعقلو خصوصا وانها مكتشد الارض

دينا: تنسيم.. امين غادي يمشي معانا ياك

تنسيم : "شافت فيه " غادي تمشي ياك اماما اممم

قلب عينيه بلاما يجاوبها معارفش اصلا لاش ايمشي معاهم واشنو دور ديالو من هاد الخرجة كون مبقات عليه البارح بالهضرة وخلاتو يواعدها گاع ميمشي