حب بطعم مر "بالدارجة المغربية"

البــــــارت 31

البــــــارت 31:

   نزلات الطائرة فأراضي الولايات المتحدة..

خدات طاكسي لأوطيل..  مبغاتش تمشي بهاد الطريقة  خاص تفكر مزيان قبل متنفد داكشي لي فبالها.. خطتها باش تنجح خاص يكون  الليل  وكولشي ناعس والاهم انها تقدر تصرف كيف بغات بلاما يوقفها حد

زفرات نفس سخون ملي شافت ليلى صوناات ليها بزاف المرات..  حنحنات صوتها باش تبان عادية ورجعات صونات ليها

نجلاء:  وي ليلى

ليلى:  فين غبرتي فقت ملقيتك! 

نجلاء:  انا مع قيس

ليلى:  مع قيس وعلاش

نجلاء:  جيت عند ماماه  هي لي بغاتني

ليلى:  اهاه نتي ومامات قيس مقربين لهاد
الدرجة 

نجلاء: شوية وصاف

ليلى: مزيان

نجلاء:  غادي نقطع دابا طوموبيلتك عندي بلاما تشوشي

ليلى:   عرفتها عندك " قطعات"

دورات عينيها بملل يالله البارح زعما كتنصح فيها باش تحيدو من بالها واليوم غايرة عليه بحالا راجلها..

نجلاء:  مزال خاصني معاك بزاف باش  تفهمي هضرتي

حطات تيليفونها يتشارجا ودخلات دوش..  كي سالات طلبات ليها الماكلة..  كلات ونعسات..مفاقت حتى لنص الليل

ناضت كتجبد غسلات وجهها  ولبسات نفس الحوايج لي جات بيهم..كانت  حيداتهم عطاتهم لوحدة من صحاب الميناج تغسلهم ليها

خرجات من الاوطيل خلصاتو كانو صوناو ليها لطاكسي يجي يوصلها..  كي وصلات  دخلات لدار كتشوف كولشي الضواو طافين اساسا كانت فاتت  الجوج ديال الليل..  قلبات على ليسونس لقاتو  فالگراج لي برا ديال الطوموبيلات دخلاتو معاها  غادية طالعة فالدروج مدايرة الحس مشات لبيتهم هو اللول عند بالها كتنعس فيه ملي ملقاتها عقدات حواجبها ورجعات كتقلب حتى لقاتو دخلات بلا حس كيف قبل كتمشى على صباع  رجليها شعلات ضو خفيف فتيليفونها  جابتو قدام وجهها..

نجلاء:  باقيا صغيرة خصارة اتموتي بكري

بدات كتخوي فداك لي سونس شوية  بشوية كدورو على  الناموسية كاملة وهي  خارجة بيه من البيت..  قبل متسد الباب..  شافت فالبالكو لي مسدود اكيد اتقوة الريحة  واتشمها وتفيق قبل الوقت مشات  هواتو شوية باش تخرج منو..  ورجعات  غادية هي وداك ليسونس لبيتو..  حلفات قبل فالدار لي داها ليها قبل متسافر الى لقات حوايج شي وحدة تحرقو هو ودارو..  ولكن ملقات والو ديك المرة .. 

اليوم تجرأ وجابها لدار لي كبرات فيها وعندها ذكريات فيها كون ما ذكراياتها مع ماما متفكرش جوج مرات وتحرقها كاملة بالناس لي فيها ولكن على خاطر دوك السنواات ودوك اللحظات لي عندها  معاها مقدات ديريها.. 

مشات مع الكولوار وهي كتخوي فيه حتى وصلات لبيتو دارت نفس العملية وگلسات فواحد الكرسي كان مقابل  مع الفراش كتشوف فيه وسط داك الضلام البيت  كان داخل فيه شوية ديال الضو من القمر هو لي مخلي الرؤية ديالو تبان ليها تقريبا ساعتين  كاملة وهي كتشوف فيه بلاما دير والو حتى ملات وهي تنوض لحمام..

  كيف ديما لمادوش ما يفيق منو لراسو..خوات عليه القليل ورجعاات گلسات فبلاصتها كتشعل فواحد البريكة وترجع طفيها بنفسها "تنفخ عليها".. 

كتبان طبيعية كأنها ماشي هي لي بحركة تقدر تقتل كتر من جوج ديال الارواح ولما لا كتر ..  بدا كيرمش  فعينيه كيستعد يفيق  باش تبتاسم ليه قايلة..

نجلاء:  صباح الخير نعستي بزاف لا! 

مراد: " بعدم تصديق "  نجلاااا

#حطو تعليقات وتوقعاتكم زعما ديريها ولا لا!