حب بطعم مر "بالدارجة المغربية"

البــــــارت 52

البــــــارت 52:

• أمثالك  يستحقون  اللعنة ، لكن هم من يصيبون  أمثالي  بها فأين  الإنصاف  في كل هذه  الحكاية •

قلبات عينيها كتقلب على شي حاجة تجيبها ليه لراس طيحو بشي غيبوبة  عمر كانت ليها ورفضها شي حد حتى جا هو مرمد ليها كرامتها فالارض عرضات عليه راسها وقال ليها لا.. حتى لهادي و متقبلهاش حتال إمتا أتعاني كتر  ..

هزات  طابلة قدامها قلباتها..  العافية شاعلة ليها فقلبها وأش جا ما يطفيها..  كتضرب وتغوت أي حاجة جات عينيها عليها كتهرسها..  گاع داكشي لي فداك البيت  كيبان ليها من الزاج كتهرسو.. 

رفضو ليها فكرها غير فرفضها ليه فهاد الدار  نيت ..   الفرق هو خرج  منها بلا حتى  رد فعل وهي كتهرس لي جا قدامها..  قبل متنهار وطيح على رجليها كتبكي لربي لي خلقها..

أشنو  مزال  باقي مدار فيها  كلشي خصراتو وحتى كبريائها لي كانت كتفتاخر بيه ضاع ليها كرامتها ضاعت كولشي ضاع أش باقي مخصرات  ..

  هبط عندها كيتحصر على حالتها لي مبقا عرف كيفاش يتعامل معاها ولات كتخلعو بهاد المصطلح واش حب ولا مرض ولا لعنة مبقا عرف والو ومبقا فهم والو..

  كتافا يحط جبهتو على ديالها عارف مزيان علاش هي فهاد الحالة ولكن خاص يشرح ويبرر ويفهمها بلي مرفضهاش هو غير خايف عليها عارفها دابا كتصرف بلا عقل غدا لا فاقت ولقات راسها معاه وعقلات على أش دارو بحال والو تحرق راسها مدام فكرات تحرقو هو قبل ..

مراد:  مديريش فراسك هكدا

نجلاء:  رفضتيني  كيف رفضتك مرتاح دابا ياك نتاقمتي مني

مراد:   مكايناش هاد الهضرة

نجلاء:   علامن كتضحك اممم  فرحان ياك ها فرحان

مراد:  هاد الهضرة مكيناش

نجلاء:   ليوم و فهاد اللحظة نقدر نقول جمعت گاع الحب لي كان عندي ليك وكرهتك

مراد:   عارف

نجلاء:  سير من هنا

مراد:  هاد المرة مغاديش نخليك

" جات باغيا توقف سبقها وهزها بين إيديه غادي بيها لفراش "

نجلاء:  طلق مني طلق نمشي بوحدي

حطها ورجع دخل لحمام يقلب على علبة الاسعافات كأن نفس المشهد كيتصور مرة تانية بجوج بيهم يجرحو ويداويو غير هي جرحها ليه كيكون مقصود وهو غير مقصود رفضو ليها معندو حتى علاقة بالهضرة لي كتقول..

هو عارف كراكتير ديالها قبل الزواج.. كان كيبوسها  بالكشايف.. ودابا من بعد الطلاق كتطلب  منو طلب  لي هو براسو عمرو تجرأ وطلبو الى لباه ليها ايكون قضا عليها.. والا رفضها ايكون قضا عليها فكلتا الحالتين هي الخاسرة..

فضل يرفض وميوسخهاش  براكة غير هو زاني وغاطس فالحرام حتى وصل لودنيه .. عايشين فبلد أجنبي  لابليباغ ديال البنات كيديرو علاقات جنسية خارج إطار الزواج وعادي..

ولكن هي تربات على أن الشرف هو كولشي  عند البنت يمكن  تكون خصراتو قبل الطلاق ولكن باش تزني مع طليقها بلا عقد شرعي.. وتعيش معاه الحب اتكون ضربات  تربية ماماها ونصائح جداتها وتعليمات خالتها فعرض الحائط..

كاملات  عارفين عقلية الرجل الشرقي انه لا عطيتيه راسك قبل الزواج أيقول هادي ساهلة وأي واحد يقدر يديرها بيها..

أي راجل مغادي يرفض مرا عرضات  راسها عليه.. ولكن هو عندو مصلاحتها  اهم من ديالو مباغيش يمرضها كتر.. كيقول لا تبعها فهواها تقدر تصبح ميتة ولا منتاحرة بعذاب الضمير.. هي براسها معارفاش اشنو كدير.. تصرفاتها خارجين على إرادتها كتصرف بلا واعي منها حالتها غير مكتزيد تأزم ولات  كتخوفو  مبقاش عارف كيف يتصرف معاها

گلس حداها بلاما يدوي.. كيبان ليه السروال تقطع من جيهة الركابي والدم خارج من تم شوية شدو قطعو بالمقص محيدو ليها.. جبد المعقم  كيديرو بلاما  يشوف فيها..

هي راسها غير فهاد الشي ء لي وقع من دابا شوية.. كانت فمعركة بين الحب والكبرياء هاهو  خسر الكبرياء  وربح الحب فهنيئا ليه.. كيقولو بلي الحب كيعمي الواحد گاع المبادئ ديال الشخص كيتبخرو مكتبقا لا كرامة لا عزة النفس  نقدرو دابا نقولو ان هاد الهضرة صحيحة