العميد (حكاية شرطي )

الحلقة 1

هيا وينكم يا عشاق كرونيكات جبتلكم كرونيك هبال
عنوان "العميد
نتعرفو عالأبطال
اصيل :عمرو 27سنة طفل بوڨوس عاللخر طويل ومزيان برشا في وجهو عينيه فاتحين عسليين بشرتو فاتحة شعرو حرير ديما يهزو الفوق و لحيتو محصورة و مزيانة عالخر يخدم في الشرطة إختصاص عميد يسكن وحدو عندو دار مزيانة عالخر قريبة للخدمة و دار بوه و امو بعيد شويا و ديما يمشيلهم عندو زوز خوات بنية و ولد
البنية أصالة تقرا في الفاك عامها الثاني تقرا هندسة و أصلان يقرا في الليسي ثانية علوم إعلامية بو أصيل سي محمود عندو شركة راجل مضخم عاللخر عمرو 55سنة و أمو آلا جودة مرا تهبل عمرها 43سنة
سحر :عمرها 21سنة بنوتة مزيانة برشا متوسطة في الطول بشرتها فاتحة و بيضا شعرها نوار سواد الليل وطويل يوصل لاخر ضهرها و عينيها كبار ولونهم مارون ورموشها طوال هذا عامها الثاني في الجامعة تقرا قانون تسكن في الفوايي خاطر مالقات مع شكون تكري البرا عائلتها متفرهدة بوها يخدم معلم تعليم إبتدائي إسمو سي عصام و أمها تخدم أستاذة لغة عربية عندها خو واحد صغير مزال كي خذا السيزيام و اسمو ساجد
#كرونيك_منقولة

فاقت عالصباح بكري مع السبعة طلت من شباك بيتها لقات الحل شتا مشات فيقت بينومتها قالتلها تقرا العشرة خلاتها راقدة ومشات تحضر في روحها لبست سروال دجين نوار و بورتكان نوار معاهم كبوط سيبت شعرها المزيان على اكتافها عملت مكياج خفيف شويا فون ماسكرا و روج في فمها حطت الكابيش بالفورير متع الكبوط على راسها وهزت ساكها وخرجت تعدات في ثنيتها عالكافي خذات ديراكت و كرواسون و كملت ثنيتها تمشي للفاك شادة القهوة في يدها و بش تقطع الكياس سمعت شخرة الكرهبة في الكياس وخرت لتالي مفجوعة والقهوة طيحتها مالفجعة هزت عينيها في الكرهبة بغزول و بدات تعيط وماتعرش شكون في وسطها مرا ولا راجل
سحر :حل عينيك الهم علاش هكا شتا و تجري بالفاصون هاذي نرمال انت
نزل عالبوطون وهبط بلار الشباك وطل عليها خزرتلو وبقات ساكتة
أصيل بدم بارد :شبيك بنوته
سحر :البنوته تقلك نقص مالسرعة متع الكرهبة قريب تضربني سيادتك و شوف شعملت فيا
أصيل :ماو انت المرة الجاية حل عينيك اكثر و نحي البرطلة على راسك بش تنجم تشوف الماشي والجاي
سحر :معناها انا الغالطة ؟
أصيل :مالا انا ؟
سحر :اي انت و من واجبك تطلب السماح
أصيل تبسم : وفاش قام نطلب في السماح
سحر :خاطر غالط قتلك قريب تضرب تقتلني
هزها وحطها ببلادة :هاك لباس عليك وماقتلتكش المرة الجاية كي نقتلك تو نطلب السماح
خزرتلو بغزول :تتمقصص عليا واللاهي ما نشكي بيك
ضحك و عمللها باي بيدو سكر بلار الشباك وديمارا بقوة ومشا جبدت تليفونها وصورت سيري الكرهبة