العميد (حكاية شرطي )

الحلقة 58

وصل بحذا سحر .. وقفت سلمت عليه والتبسيمة والفرحة مالية قلبها وهو كيفهاا خاصة و إنهم الزوز في أبهى الحلل متاعهم.. قعد يخزرلها ويتبسم:  محلاك و مابنك يا صغرونة
سحر تبسمتلو : إنت اللي محلاك يا روحي
قعد بحذاها... وتلمدت العايلات بحذاهم في الصالة.. وقامت البون متع مدام حنان كراتها لليلة بش تقوم بأمور الضيافة تسربي في الجماعة.. عايلة أصيل .. عايلة سحر.. وأخت حنان خالة سحر ومعاها زوز صغار وليد و بنية .. وأخت جودة جات وحدها ... هاذوما اللي كانو موجودين في الخطبة
وزوز رجال يخدموا عند سي محمود دخلوا بالقاتو والنوار والحلوى.. صدروهم فوق طاولة كبيرة ومزيانة قريبة لأصيل وسحر وخرجوا
قعدوا الجماعة يحكيو ويزغرطوا.. لين جا وقت الجد
سي محمود خذا الكلمة : سي عصام..متشرفين بمعرفتكم برشاا و معرفة خير إن شاء الله.. يا سيدي جيناكم اليوم في هالنهار العزيز الغالي.. خاطبين راغبين في بنتنا الغالية سحر .. لولدي أصيل ربي يتمم بالخير
سي عصام : مرحبا بيك وبجمعك سي محمود نورتوونا وشرفتونا.. يا سيدي جازاتكم.. سحر  بنتي كيما هي بنتكم وإن شاء الله وليد حلال و بنية حلال و ربي يجمعهم في خيرو و يبقي سترو عليهم.. و إن شالله عام جديد مبروك سعيد
جودة وحنان : آميين
سحر تبسمت و عينيها دمعت... وبوها خزرلها و تبسم
علات الزغاريط والتصفيق
قام أصيل من بقعتو وشد سحر من يدها قيمها معاه.. شدلها يدها..
غمزها يتبسم.. ولبسها الخاتم.. خاتم ديامون forme تفتق وياااسر مضخم
لبسها الخاتم.. والنسا تزغرط.. والرجال تصفق.. وأصالة و أصلان يصورواا و ساجد واقف يتبسم
قدمت جودة بحذا أصيل وسحر  وجبدت براسلي ذهب مرصعة بالألماس ولبستهالها
سحر باستها من خدها تضحك: ربي يفضلك ليا تتا جودة
جودة : بنتي راك.. وماليوما أنا ماما جودة مش تاتا
حنان  تبسمت وعينيها دمعوااا
قدم أصيل وسحر لخبزة الڨاتو.. خذاو سكينة.. شدتها سحر وهو حط يدو فوق يدها وقصو منها شويا... وكلها يتبسم.. وهي زادا وكلتو تتبسم
جات البون.. قصت للجماعة الكل.. وعملتلهم tour أخرى ضيافة
حطوا الغنا وشاخو شطيح وتصاور وضحك وجو وأحلى أجواء و أحلى اللحظات تعدات في الليلة هذيكا
جا وقت المرواح
قامت عايلة سي محمود وقامو معاها عايلة سحر يوصلوهم  للكرهبة
سي عصام : نورتونا سي محمود .. مرحبا بيكم في كل وقت.. وإن شاء الله معرفة طيبة ونتقابلو في ساعة سعيدة
سي محمود : يعيشك سي عصام هذا الله يخليك
قعدوا العايلات يحكيو البرا شويا
و أصيل إستغل الفرصة وقعد مع سحر وحدهم شويا..
أصيل : تعرف اللي عزيزتي خرجت تقتل.. وكملت خرجتني أنا من عقلي ولا لا
سحر تبسمت : إنت زادا حبيبي خرجت محلاك والله محلاك عاللخر
وجبدت تليفونها : إيجا نعملو تصويرة
تبسم وقربلها عنقها من تالي وتبسم وصورو برشا تصاور طلعواا يهبلوا
بعد عليها شويا وحط يدو على كتفها : تو مش كان جبت عدول كتبلنا صداقنا وروحت بيك خير من هالخطبة
سحر ولات تضحك : ماعاد مامازال عزيزي وتو نعرسوا ونوليو ديماا مع بعضنا نشالله
أصيل باسلها يدها : إن شالله عزيزتي
خطف منها بوسة من خدها قريب لشفايفهاا و خرج مشا سلم عالجماعة و ركبوا في كراهبهم و روحوااا