العميد (حكاية شرطي )

الحلقة 33

الحلقة الثالثة والثلاثون
جا نهار غدوا.. نهار الأحد
يسمع في ال réveil متاعو تصوني مع ال 11 متع الصباح
حل عينيه وسكر ال réveil وقام يعمل في دوش ويحضر في روحو ماشي لدارهم
حضر روحو لبس سروال نوار مواتي بدنو عاللخر.. مريول نوار أجيستي مظهرلو تفاصيل بدنو فوقهم كبوط كاشمير مارون مضخم عاللخر طويل شوياا..
شيح شعرو الحرير وهزو لتالي.. لبس شركتو.. منڨالتو.. وبرفن
جبد كادوات أصالة وهزهم في يدو
و هز مفاتحو وتليفونو وهبط..
دخل للكوجينة خذا قهوة.. و شرب شويا عصير و خرج
ركب في كرهبتو وخرج
مع 13  وصل.. هبط مالكرهبة ودخل .. يلقا أصلان يتشعبط في شجرات الجنينة يعلق في النفافخ و ال lampes
ضحك ومشا وقف وخزرلو : شنواا أصلان قاعدين يحرثوا عليك
خزرلو و ضحك : أصيلووو خوياا.. ههه والله هاك ترا.. للا أصالة تزين في روحها الفوق و أنا هاني نعاني في هالنفافخ
ضحك : تي هاك محسوب كملت صحيت يا رجال.. فينهم الجماعة
أصلان : ما و pa في الصالة لداخل
دخل مشالهم سلم عليهم
شويا وقت وجااو خالات أصالة معاهم بناتهم
سلمت عليهم جودة وفرحت بيهم و أصيل زادا سلم على خالاتو بالبوس.. و سلم على بناتهم باليدين
يخزرولو مركزين معاه بنات خالاتو برشاا وهو مش لاهي بيهم جملا
خزر لأمو : أمي أنا ماشي بقضية و تو نجي شويا آخر آو مازلتو حايسيين إنتوماا
جودة : باهي بابا رد بالك على روحك
خرج مشا لكرهبتو.. وقعد
شويا وقت و حضر الديكور المزياان
جردة الدار مزينة بالنفافخ.. و الضو المزياان و الشرايط الملونة في الشجرات
و طواول الضياف مزينين وياسر محلاهم وطاولة الشرب و الڨاتو متع أصالة مقابلين طواول الضياف
جات العشية وجاو برشاا بناات.. فما اللي يقراو مع أصالة في الفاك.. و فما الصحاب معاها مالصغرة.. وفما كعبات من أيامات الليسي.. بنات خالاتها و عماتها.. و كعبات مالفاميليااا متع بوها و أمها
أصالة من صغرتها عيد ميلادها حاجة مقدسة في الداار وكل عام تعملو وتستدعى برشا عباد
جودة قعدت تخزر بعينيها للبنات اللي جااو.. تحب تشوف بنية لأصيل وتعرسلو وتتهنى
حست بولدها بطا كلمتو..
كان قاعد في كرهبتو على حافة البحر.. يخمم داخل بعضو
سمع تليفونو يصوني.. شاف لقاها أمو هز : وي أمي
جودة : وينك أصيل
أصيل : هاني قريب هوني
جودة : أيا إيجا عاد الحفلة عدهاا بدات
أصيل : باهي أمي
جا بش يعلق تكلمت
جودة : أصيل أصيل
أصيل رجع التليفون : وي ياامي
جودة : فماا برشا بنات تبارك الله عليهم جاو بحذانا.. إيجا نشوف عروسة لولدي
أصيل : شنياا.. أمي فاش تحكي يهديك
جودة : شنياا اللي فاش نحكي.. نحب نعرسلك نتهنى عليك
أصيل نفخ : أمي...
جودة قصت عليه : باهي أصيل باهي ماو طول عمرك ماتحبش تسمع مني وماتحبش تفرحني
علقت.. وهو ينفخ..
تكا راسو لتالي وخزر للبحر.. طول جات على بالو هي