العميد (حكاية شرطي )

الحلقة 34

الحلقة الرابعة و الثلاثون
ضيق عينيه.. وجبد تليفونو طلبهاا
كانت راكشة في جردة الفوايي عاملة قهوة.. سمعت تليفونها يصوني.. شافت لقاتو أصيل فرحت عاللخر والتبسيمة ترسمت على وجهاا و طول هزت
سحر : ألو
أصيل : سحرورة سافا
سحر : الحمد لله سي أصيل و إنت
أصيل : هاني.. فاضية تواا
سحر : واللهي هاني في جردة الفوايي قاعدة
أصيل : قوم إلبس ربع ساعة نكون بحذاك
سحر بإستغراب : شفما ماو لباس
أصيل : حضر روحك وهاني جاي تو نقلك
قتلو باهي.. وقامت تلبس
لبست سروال دجين محزوق معاه مريول أبيض ومعاه فاست كوير.. وباسكيت نايك بيضا في ساقيها
سيبت شعرها و مكيجت مكياج خفيف وعملت ڨلوص في فمها يلمع محلاه
عملت إكسسوارات.. خواتم و شركة و بلوطة.. طلعت محلاها
وصل قدام الفوايي.. هز التليفون وكلمها.. علقت
وطول خرجت
خزر لباب الفوايي يستنى فيها تظهر
وخرجت.. وتقابلت العينين
حس براحة كبيرة وهو يخزرلها جاية
تبسمت وطلت عليه مالشباك : عسلامة سي أصيل
خزرلها : أطلع
حلت الباب وطلعت
خزرلهاا و سكت
خزرتلو و بعدت قصتها على عينيها : شفما هاك جيتني لباس ؟
أصيل : مستحقك في حاجة
سحر : في شنوا
أصيل : نحبك تمشي معايا لعيد ميلاد أصالة أختي
سحر : أنا ؟؟؟؟ فاش قاام منين نعرفهاا
أصيل : أمي شادتلي ڨارد في الدار ولامة البنات الكل تحب تشوفلي طفلة نعرس بيهااا
سحر خزرتلو وحست بقلبها تقبض وماتعرش علاش
سحر : و إنت.. شرايك
أصيل : مانحبشش.. و أمي شادة صحيح تحب ترا عندي بنية في حياتي... جيتك نحبك تعاوني
سحر : كيفاش بش نعاونك أنا
أصيل : تمشي معايا لدارنا.. ونقلهم اللي إنت..
خزرلهاا في عينيهاا وهي تخزرلو في عينيه
أصيل : نقلهم اللي إنت حبيبتي
سحر هزت حواجبهاا : شنوااا ؟؟
أصيل : تقبل تعاوني
سحر خزرت قدامها ساكتة
أصيل حسها مش قابلة..
دور وجهو.. وسكت
سحر وجعتهاا كيفاش بش تمثل اللي هي حبيبتو..
قعدوا ساكتين شويااا
غرس يدو في خصلات شعرو.. هزو لتالي
أصيل : سامحني سحر.. إحسبني ماقلت شي.. وتو نتصرف وحدي مع أمي.. ولا شكون يعرف بالكشي نلقاا بنية باهية في حفلة أختي و ناخووها
خزرتلوو حالة عينيها... وهو يتمقصص عليهاا يشوف في ردة فعلهاا
نزلت على سنونهااا... وحلت الباب..
خزرلها ساكت
سكتت شويا.. تنفست بالقوي.. و رجعت قعدت في الكرسي وسكرت الباب
خزرت قدامهاا : موافقة.. تنجم تمشي
تبسم وعدا يدو على شعرهاا ساكت
ديماراا و مشااا طول لدارهم
في الثنية
تعدات على ماڨازان
خزرت لأصيل : آقف لحظة سي أصيل بربي
أصيل وقف : حاجتك بحاجة ؟
حلت الباب وخزرتلو : ندخل للماڨازان فيسع وهاني جاية
طول سكرت الباب وهبطت تجري بفيانة
حط لحيتو عالفولون يخزرلها و يتبسم يرا في شعرها يطير في الهوا.. قداش تعز وقداش محلاها
دخلت للماڨازان.. تخزر شنوا تنجم تاخو لأصالة اللي ماتعرفهاش من أصلو
لقات باكو شوكولا مضخم عاللخر.. طول هزتو وكملت تشوف
خذاتلها زادا تلاثة دبابز فرني نفس المارك..
مشات خلصت حطهملها في باكو مضخم.. هزتهم وخرجت رجعتلو